KA BUKE MUA A MOSE, I KAPA ʻIA KINOHI 33
33
MOKUNA XXXIII.
1 Ka hālāwai pū o Iakoba me ʻEsau me ke aloha. 17 Hiki ʻo Iakoba i Sukota. 19 Kona kūʻai ʻana i ʻāina ma Sekema, 20 a me kāna hana ʻana i kuahu ma laila.
1¶ Nānā akula nā maka o Iakoba, ʻike akula, aia hoʻi, ua hiki mai ʻo ʻEsau me nā haneri kānaka ʻehā. A puʻunaue akula ia i nā kamaliʻi iā Lea, a iā Rāhela, a i nā kauā wahine ʻelua.
2Hoʻonoho akula ia i nā kauā wahine me nā keiki a lāua ma mua, iā Lea hoʻi me kāna mau keiki ma hope iho, a iā Rāhela me Iosepa ma hope loa.
3Hele ʻē akula ia ma mua o lākou; kūlou pāhiku ihola ia ma ka honua, a hiki akula ia i kona kaikuaʻana.
4Holo maila ʻo ʻEsau e hālāwai me ia, ʻapo maila iā ia, kau ihola ma kona ʻāʻī, a honi ihola iā ia; a uē ihola lāua.
5ʻAlawa aʻela kona mau maka, ʻike aʻe i nā wāhine a me nā kamaliʻi; nīnau maila ia, “ʻO wai lākou nei me ʻoe?” ʻĪ akula kēlā, “ʻO lākou nō nā keiki a ke Akua i hāʻawi lokomaikaʻi mai ai i kāu kauā.”
6A laila neʻeneʻe maila nā kauā wahine, ʻo lāua me nā keiki a lāua, a kūlou ihola lākou.
7Neʻeneʻe maila hoʻi ʻo Lea me kāna mau keiki, a kūlou ihola lākou; a ma hope iho, neʻeneʻe maila ʻo Iosepa me Rāhela, a kūlou ihola lāua.
8Nīnau maila kēlā, “He aha iā ʻoe kēlā poʻe nui a pau i hālāwai me aʻu?” ʻĪ akula ʻo ia, “He mea ia e loaʻa mai ai ke aloha o kuʻu haku.”
9ʻĪ maila kēlā, “He nui nō kaʻu, e kuʻu kaikaina, iā ʻoe nō kāu mea.”
10ʻĪ akula ʻo Iakoba, “ʻAʻole, ke noi aku nei au iā ʻoe, inā i loaʻa iaʻu ke aloha ʻia i mua ou, e lawe ʻoe i kaʻu makana ma koʻu lima; no ka mea, ua ʻike iho nei au i kou maka, e like me kuʻu ʻike ʻana i ka maka o ke Akua, a ua ʻoluʻolu mai ʻoe iaʻu.
11“Ke noi aku nei au iā ʻoe, e lawe ʻoe i kaʻu hoʻomaikaʻi ʻana i hāʻawi ʻia aku nāu; no ka mea, ua lokomaikaʻi mai ke Akua iaʻu; a no ka mea, ua lako hoʻi au.” Koi akula ʻo ia iā ia, a lawe hoʻi kēlā.
12ʻĪ maila kēlā, e neʻeneʻe aku kākou i ko kākou hele ʻana, a e hele hoʻi au i mua ou.
13ʻĪ akula ʻo ia iā ia, “Ua ʻike nō kuʻu haku, he palupalu nā kamaliʻi, a me aʻu nō nā hipa hāpai a me nā bipi hāpai; inā e hoʻolalelale ʻia lākou i ka lā hoʻokahi, e pau ka ʻohana holoholona i ka make.
14“Ke noi aku nei au iā ʻoe, e hele ʻē aku kuʻu haku ma mua o kāna kauā ma kēlā kapa; a naʻu nō e hele mālie aku, e like me ka hiki ʻana o nā holoholona a me nā kamaliʻi ke hele i mua oʻu, a hiki aku au i kuʻu haku ma Seira.”
15ʻĪ maila ʻo ʻEsau, “E pono paha naʻu e waiho me ʻoe i kekahi poʻe kānaka oʻu.” ʻĪ akula ia, “No ke aha hoʻi ia? Inā e loaʻa iaʻu ke aloha ʻia i mua o kuʻu haku.”
16A hoʻi hou akula ʻo ʻEsau ia lā i kona hele ʻana i Seira.
17Hele akula ʻo Iakoba i Sukota, a kūkulu ia i hale nona, a hana ihola i hale kāmala no kona poʻe holoholona; no laila, i kapa ʻia ai ka inoa o ia wahi, ʻo Sukota.
18¶ Hele pōmaikaʻi akula ʻo Iakoba i kekahi kūlanakauhale ʻo Sekema, ma ka ʻāina ʻo Kanaʻana iā ia i hoʻi mai ai mai Padana ʻArama mai, a kūkulu ihola ia i kona halelewa i mua o ua kūlanakauhale lā.
19Kūʻai akula ia i kauahi o ka ʻāina, kahi āna i kūkulu ai i kona halelewa, ma ka lima o nā keiki a Hamora a ka makua kāne o Sekema, i nā ʻāpana kālā he haneri.
20Ma laila ʻo ia i hana ai i kuahu, a kapa ihola i kona inoa, ʻo ʻEle ʻElohe ʻIseraʻela.
Currently Selected:
KA BUKE MUA A MOSE, I KAPA ʻIA KINOHI 33: KBH
Highlight
Share
Copy
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.
