KA ʻEUANELIO I KĀKAU ʻIA AI E IOANE 11
11
MOKUNA XI.
1 No ka maʻi o Lazaro a me kona make ʻana. 41 Hoʻāla maila ʻo Iesū iā ia. 47 Hoʻākoakoa ʻana o ka poʻe Parisaio i ka ʻahaʻōlelo.
1¶ Ua maʻi kekahi, ʻo Lazaro, no Betania, no ke kauhale o Maria a me kona kaikuaʻana ʻo Mareta.
2ʻO kā Maria kēia i kāhinu ai i ka Haku i ka mea poni, a holoi hoʻi i kona wāwae me kona lauoho, nona ke kaikunāne maʻi, ʻo Lazaro.
3Hoʻouna aʻela nā kaikuāhine i ona lā, ʻī aʻela, “E ka Haku, aia hoʻi ʻo ka mea āu i aloha ai, ua maʻi.”
4A lohe aʻela ʻo Iesū, ʻī aʻela, “ʻAʻole kēia ka maʻi e make ai; akā, no ka nani o ke Akua, i hoʻonani ʻia ai hoʻi ke Keiki a ke Akua ma ia mea.”
5Aloha aʻela ʻo Iesū iā Mareta, a me kona kaikaina, a me Lazaro.
6A lohe aʻela ia, ua maʻi ʻo ia, a laila noho ihola ia ma ia wahi i nā lā ʻelua.
7Ma hope iho, ʻōlelo maila ia i nā haumāna, “E hele hou kākou i Iudea.”
8ʻĪ akula nā haumāna iā ia, “E Rabi, ua ʻimi iho nei nā Iudaio e hailuku iā ʻoe, a e hele hou anei ʻoe i laila?”
9ʻĪ maila ʻo Iesū, “ʻAʻole anei he ʻumikumamālua hora o ke ao? Inā e hele kekahi i ke ao, ʻaʻole ia e ʻōkupe; no ka mea, ua ʻike nō ia i ka mālamalama o kēia ao.
10“Akā, inā e hele kekahi i ka pō, e ʻōkupe nō ia; no ka mea, ʻaʻohe ona mālamalama.”
11Pau aʻela kāna ʻōlelo ʻana ia mea; a laila ʻī maila ʻo ia iā lākou, “Ua hiamoe ʻo Lazaro ko kākou hoaaloha; akā, e hele aku au e hoʻāla mai iā ia.”
12ʻĪ akula kāna poʻe haumāna, “E ka Haku, a i hiamoe ia, e ola auaneʻi.”
13No kona make ʻana hoʻi kā Iesū i ʻōlelo ai; akā, manaʻo ihola lākou, no ka hoʻomaha ʻana ma ka hiamoe kāna i ʻōlelo ai.
14A laila ʻōlelo akāka maila ʻo Iesū iā lākou, “Ua make ʻiʻo ʻo Lazaro.
15“A ke ʻoliʻoli nei au no ʻoukou; no ka mea, ʻaʻole au i laila, i manaʻoʻiʻo ai ʻoukou; akā, e haele kākou i ona lā.”
16ʻĪ akula ʻo Toma, i ʻōlelo ʻia ʻo Didumo, i kona mau hoa haumāna, “E haele hoʻi kākou, i make pū ai kākou me ia.”
17¶ A hiki akula ʻo Iesū, ʻike ihola ia, ʻahā ona lā i loko o ka hale kupapaʻu.
18Ua kokoke ʻo Betania i Ierusalema, he ʻumi paha a me kumamālima setadia.
19A nui ka poʻe Iudaio i hele aku i o Mareta lā, a me Maria, e hōʻoluʻolu iā lāua no ko lāua kaikunāne.
20A lohe aʻela ʻo Mareta, i ko Iesū hele ʻana mai, hoʻohālāwai akula kēlā me ia; akā, noho ihola ʻo Maria ma ka hale.
21ʻŌlelo akula ʻo Mareta iā Iesū, “E ka Haku, inā ʻo ʻoe ma ʻaneʻi, inā ʻaʻole nō i make kuʻu kaikunāne.
22“Akā, ua ʻike nō au ʻānō, ʻo ka mea āu e noi aku ai i ke Akua, ʻo ia kā ke Akua e hāʻawi mai ai iā ʻoe.”
23ʻŌlelo maila ʻo Iesū iā ia, “E ala hou mai nō kou kaikunāne.”
24ʻĪ akula ʻo Mareta iā ia, “Ua ʻike nō au e ala hou mai ia i ke ala hou ʻana i ka lā ma hope.”
25ʻĪ maila ʻo Iesū iā ia, “ʻO wau nō ke ala hou ʻana, a me ke ola; ʻo ka mea e manaʻoʻiʻo mai iaʻu, inā e make ia, e ola hou auaneʻi ʻo ia.
26“ʻO ka mea e ola ana, a e manaʻoʻiʻo mai iaʻu, ʻaʻole loa ia e make. Ke manaʻoʻiʻo nei anei ʻoe i kēia?”
27ʻĪ akula kēlā iā ia, “ʻAe, e ka Haku, ke manaʻoʻiʻo nei au ʻo ʻoe ka Mesia, ke Keiki a ke Akua, ka mea hele mai i ke ao nei.”
28A oki aʻela ia ʻōlelo, hoʻi akula ia, a hea malū akula iā Maria, kona kaikaina, ʻī akula, “Ua hiki mai ke Kumu, a ke hea mai nei iā ʻoe.”
29A lohe aʻela ia, kū koke aʻe, a hele akula i ona lā.
30¶ ʻAʻole i hiki aku ʻo Iesū i ke kūlanahale, aia nō ia ma kahi i hālāwai ai ʻo Mareta me ia.
31A ʻo nā Iudaio e noho pū ana me ia ma ka hale, a e hōʻoluʻolu ana iā ia, ʻike akula iā Maria e kū koke aʻe a hele i waho, hahai akula lākou iā ia, ʻī aʻela, “Ua hele aku nei ia ma ka hale kupapaʻu e uē ai ma laila.”
32A hiki akula ʻo Maria i ko Iesū wahi, a ʻike akula iā ia, moe ihola ia ma kona wāwae, ʻī akula iā ia, “E ka Haku, inā ʻo ʻoe ma ʻaneʻi, inā ʻaʻole i make kuʻu kaikunāne.”
33A ʻike maila ʻo Iesū iā ia e uē ana, a me ka poʻe Iudaio i hele pū mai me ia e uē ana, auē ihola ia ma ka naʻau, a ʻehaʻeha hoʻi,
34a nīnau maila ia, “Ma hea lā ʻoukou i waiho ai iā ia?” ʻĪ akula lākou iā ia, “E ka Haku, e hele mai e nānā.”
35Uē ihola ʻo Iesū.
36No ia mea, ʻōlelo aʻela ka poʻe Iudaio, “Aia hoʻi, nani kona aloha iā ia!”
37ʻŌlelo aʻela kekahi poʻe o lākou, “ʻAʻole anei i hiki iā ia nei, nāna i hoʻokaʻakaʻa nā maka o ka makapō, ke hana, i ʻole ai e make kēia kanaka?”
38¶ A laila uē hou ihola ʻo Iesū i loko ona, a hiki ma ka hale kupapaʻu. He ana ia, a ua pani ʻia i ka pōhaku.
39ʻĪ maila ʻo Iesū, “E lawe aku i ka pōhaku.” ʻĪ akula ʻo Mareta iā ia, ke kaikuahine o ka mea i make, “E ka Haku, ua pilau ia; no ka mea, ʻo ka hā kēia o ka lā.”
40ʻĪ maila ʻo Iesū iā ia, “ʻAʻole anei au i ʻōlelo aku iā ʻoe, inā e manaʻoʻiʻo mai ʻoe, e ʻike auaneʻi ʻoe i ka nani o ke Akua?”
41A laila lawe aʻela lākou i ka pōhaku mai kahi o ka mea make i waiho ai. A leha aʻela ʻo Iesū i kona mau maka i luna, a ʻī akula, “E ka Makua, ke hoʻomaikaʻi aku nei au iā ʻoe, no kou hoʻolohe ʻana iaʻu.
42“A ua ʻike nō au, ua hoʻolohe mai ʻoe iaʻu i nā manawa a pau; akā, no ka ʻaha kanaka e kū mai nei i ʻōlelo aku ai au, i manaʻoʻiʻo mai ai lākou, ʻo ʻoe kai hoʻouna mai iaʻu.”
43A pau kāna ʻōlelo ʻana ia mea, kāhea akula ia me ka leo nui, “E Lazaro, e hele mai ʻoe i waho.”
44A hele mai i waho ka mea i make, ua nākiʻi ʻia ma nā wāwae a ma nā lima i nā kahakahana lole; a ua kāʻei ʻia kona wahi maka a puni me ka hainakā. ʻĪ maila ʻo Iesū iā lākou, “E kala aʻe iā ia, a kuʻu aku iā ia e hele.”
45¶ No ia mea, nui ka poʻe o nā Iudaio i hele mai i o Maria lā, a ʻike i nā mea a Iesū i hana ai, manaʻoʻiʻo aku lākou iā ia.
46A hele aku kekahi poʻe o lākou i nā Parisaio, a haʻi akula iā lākou i nā mea a Iesū i hana ai.
47¶ A laila hoʻākoakoa aʻela nā kāhuna nui, a me nā Parisaio i ka ʻahaʻōlelo, ʻī aʻela lākou, “He aha kā kākou e hana ai? No ka mea, ua hana kēia kanaka i nā hana mana he nui nō.
48“Inā e waiho wale aku kākou iā ia pēlā, e manaʻoʻiʻo auaneʻi nā kānaka a pau iā ia; a e hele mai ko Roma, a e luku i ko kākou wahi a me ko kākou lāhui kanaka.”
49ʻO kekahi o lākou, ʻo Kaiapa, ʻo ia ke kahuna nui i kēlā makahiki, ʻī akula iā lākou, “ʻAʻole maopopo iki iā ʻoukou,
50ʻAʻole hoʻi ʻoukou i manaʻo, he pono nō kākou e make kekahi kanaka no nā kānaka, ʻaʻole hoʻi e luku ʻia ka lāhui kanaka a pau.”
51ʻAʻole nāna iho kēia mea āna i ʻōlelo mai ai; akā, e noho kahuna nui ana ia i kēlā makahiki, wānana aʻela ia, e make ʻo Iesū no ka lāhui kanaka;
52ʻaʻole naʻe no ia lāhui kanaka wale nō; akā, i hōʻuluʻulu mai ai hoʻi ia i nā keiki a ke Akua, i noho liʻiliʻi aku ai, i loko o ka hoʻokahi.
53Mai ia manawa mai, kūkā pū ihola lākou e pepehi iā ia.
54¶ No ia mea, ʻaʻole i hele hōʻike hou ʻia akula ʻo Iesū i waena o nā Iudaio; akā, hele akula ia mai laila aku ma kahi kokoke i ka wao nahele, ma ke kūlanakauhale i kapa ʻia ʻo ʻEperaima, a ma laila ia i noho ai me kāna poʻe haumāna.
55A kokoke mai ka Mōliaola a nā Iudaio; a nui nā mea i hele aku i Ierusalema mai ka ʻāina aku ma mua o ka Mōliaola, i hoʻomākaukau ai lākou iā lākou iho.
56A laila ʻimi akula lākou iā Iesū, a nīnau aʻela lākou iā lākou iho e kū ana i loko o ka luakini, “He aha ko ʻoukou manaʻo, ʻaʻole anei ia e hele mai i ka ʻahaʻaina?”
57Ua kauoha aku nā kāhuna nui a me nā Parisaio, inā i ʻike kekahi i kona wahi e noho ai, e haʻi mai ia, i hopu aku lākou iā ia.
Currently Selected:
KA ʻEUANELIO I KĀKAU ʻIA AI E IOANE 11: KBH
Highlight
Share
Copy
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.
