KA ʻEUANELIO I KĀKAU ʻIA AI E MAREKO 11
11
MOKUNA XI.
1 Ke komo lanakila ʻana o Iesū i loko o Ierusalema. 11 Ka lāʻau fiku. 15 Hoʻokuke ʻia ka poʻe kūʻai ma waho o ka luakini. 20 Aʻo maila Iesū i ka pule. 27 Pili pū ka poʻe kākau ʻōlelo iā Iesū.
1¶ A kokoke maila lākou i Ierusalema, ua hiki i Betepage, a me Betania ma ka mauna ʻo ʻOliveta, hoʻouna maila ia i nā haumāna āna ʻelua,
2ʻĪ maila iā lāua, “E hele ʻolua i kēlā kūlanakauhale ma mua o ʻolua; a i ko ʻolua komo ʻana i loko, e loaʻa koke nō iā ʻolua kekahi hoki keiki, ua nakinaki ʻia, ʻaʻole i noho ʻia e ke kanaka; e kala aʻe ʻolua, a e alakaʻi mai.
3“A i ʻōlelo mai kekahi iā ʻolua, ‘No ke aha ʻolua e hana ai i kēia mea?’ E ʻōlelo aku ʻolua, ‘No ka Haku kēia e pono ai’; a e hoʻouna koke mai kēlā iā ia ma ʻaneʻi.”
4Hele akula lāua, a loaʻa ihola iā lāua ka hoki keiki, ua nakinaki ʻia ma ka ʻīpuka ma waho, ma nā huina alanui. Kala aʻela lāua iā ia.
5ʻŌlelo maila kekahi o lākou e kū ana ma laila iā lāua, “No ke aha ʻolua i kala ai i ka hoki keiki?”
6ʻĪ akula lāua iā lākou, e like me kā Iesū kauoha ʻana mai; a kuʻu maila lākou iā lāua.
7Alakaʻi maila lāua i ua hoki keiki lā i o Iesū lā, hohola aʻela lākou i ko lākou kapa ma luna ona, a noho nō ʻo Iesū i luna iho ona.
8Nui nā mea i hāliʻiliʻi aʻe i ko lākou kapa ma ke alanui; a ʻo kekahi poʻe ʻē hoʻi, ʻoʻoki aʻela lākou i nā lālā lāʻau, a hāliʻiliʻi ihola ma ke alanui.
9Hoʻokani akula ka poʻe i hele ma mua, a me lākou e hahai ana ma hope, ʻī akula, “Hōsana!
«Nani wale ka Mea i hele mai ma ka inoa o ka Haku»!
10“Pōmaikaʻi ke aupuni o ko kākou kupuna kāne, ʻo Dāvida,
E hele mai ana ma ka inoa o ka Haku! Hōsana i luna lilo loa!”
11¶ A komo akula ʻo Iesū i loko o Ierusalema, a i loko o ka luakini, a nānā aʻela ia i nā mea a pau loa; a ahiahi aʻela, hele akula ia me kāna poʻe haumāna i Betania.
12¶ A ia lā iho, i ko lākou hoʻi ʻana aʻe mai Betania mai, pōloli ihola ia.
13ʻIke akula ia i kekahi lāʻau fiku, ma kahi mamao aku, he lau ma luna; hele aʻela ia e ʻimi i ko luna o ka lāʻau; a hiki aʻela ia i laila, loaʻa iā ia he lau wale nō; no ka mea, ʻaʻole ia ʻo ka manawa fiku.
14ʻŌlelo aʻela Iesū, ʻī aʻela iā ia, “ʻAʻole loa e ʻai kekahi kanaka i kāu hua, ma nēia hope aku;” a lohe nō kāna poʻe haumāna.
15¶ A hiki aʻela lākou i Ierusalema; a laila, komo aʻela Iesū i loko o ka luakini, hoʻokuke akula i ka poʻe kūʻai lilo aku, a kūʻai lilo mai i loko o ka luakini, hoʻokahuli aʻela i nā papa o ka poʻe kūʻai kālā, a me nā noho o ka poʻe kūʻai manu nūnū.
16ʻAʻole ʻo ia i ʻae mai, e lawe ʻia kekahi mea, ma waena aʻe o ka luakini.
17Aʻo maila ia, ʻī maila iā lākou, “ʻAʻole anei i palapala ʻia mai, ‘«E kapa ʻia koʻu hale e nā ʻāina a pau, he hale pule»?’ Ua hoʻolilo aʻe nei ʻoukou ia i «lua no nā pōā».”
18A lohe aʻela ka poʻe kākau ʻōlelo, a me ka poʻe kāhuna nui, ʻimi ihola lākou i mea nona e make ai iā lākou; makaʻu nō naʻe lākou iā ia; no ka mea, ua mahalo loa nā kānaka a pau i kāna ʻōlelo.
19¶ A ahiahi aʻela, hele akula ia i waho o ke kūlanakauhale.
20¶ A kakahiaka aʻe, i ko lākou hoʻi ʻana mai, ʻike akula lākou i ka lāʻau fiku, ua pau i ka maloʻo, mai ke kumu aʻe.
21Hoʻomanaʻo ihola ʻo Petero, ʻī aʻela iā ia, “E ka Haku, e nānā, aia ka lāʻau fiku āu i hōʻino ai, ua maloʻo loa.”
22ʻŌlelo maila Iesū iā lākou, ʻī maila, “E manaʻoʻiʻo aku ʻoukou i ke Akua.
23“No ka mea, he ʻoiaʻiʻo kaʻu ʻōlelo aku nei iā ʻoukou, ʻo ka mea e ʻōlelo mai i kēia mauna, ‘E hoʻoneʻe aku, a e lele i ke kai,’ ʻaʻole hoʻi e kānalua kona naʻau; akā, ua manaʻoʻiʻo nō, e hana ʻia kēia mau mea āna e ʻōlelo ai; e loaʻa ʻiʻo nō iā ia ka mea āna e ʻōlelo ai.
24“No ia mea lā, ke ʻōlelo aku nei au iā ʻoukou, ʻo nā mea a pau a ʻoukou e noi aku ai ma kā ʻoukou pule ʻana, e manaʻoʻiʻo ʻoukou i ka loaʻa ʻana, a laila e loaʻa ʻiʻo aku nō iā ʻoukou ia.
25“A i ko ʻoukou kū ʻana e pule, inā e hoʻomauhala ana ʻoukou i kekahi, e kala aku ʻoukou iā ia, i kala mai ai hoʻi ko ʻoukou Makua i loko o ka lani i ko ʻoukou hewa.
26“Inā, ʻaʻole ʻoukou e kala aku, ʻaʻole nō hoʻi e kala mai ko ʻoukou Makua i loko o ka lani, i ko ʻoukou hewa.”
27¶ Hele hou maila lākou i Ierusalema; a i kona hele ʻana i loko o ka luakini, hele maila i ona lā ka poʻe kāhuna nui, a me ka poʻe kākau ʻōlelo, a me ka poʻe lunakahiko,
28ʻī maila iā ia, “He aha kou pono e hana ai i kēia mau mea? Na wai lā hoʻi ʻoe i hāʻawi mai ia pono e hana i ua mau mea lā?”
29ʻŌlelo akula Iesū iā lākou, ʻī akula, “E nīnau aku nō hoʻi au iā ʻoukou i kekahi mea; e haʻi mai ʻoukou iaʻu, a laila, haʻi aku au iā ʻoukou i koʻu pono e hana ai i kēia mau mea.
30“No ka lani anei ka bapetizo ʻana a Ioane? No kānaka anei? E haʻi mai hoʻi iaʻu.”
31Kūkākūkā ihola lākou iā lākou iho nō, ʻī aʻela, “A i ʻōlelo aku paha kākou, ‘No ka lani mai,’ a laila, e nīnau mai nō ʻo ia iā kākou, ‘No ke aha lā hoʻi ʻoukou i manaʻoʻiʻo ʻole aku ai iā ia?’
32“Akā, i ʻōlelo paha uaneʻi kākou, ‘No kānaka’”; makaʻu nō hoʻi lākou i kānaka; no ka mea, ua manaʻo nui nā kānaka, he kāula ʻiʻo ʻo Ioane.
33ʻŌlelo maila lākou iā Iesū, ʻī maila, “ʻAʻole mākou ʻike.” A laila, ʻōlelo akula Iesū iā lākou, ʻī akula, “ʻAʻole nō hoʻi au e haʻi aku iā ʻoukou i kaʻu pono e hana ai i kēia mau mea.”
Currently Selected:
KA ʻEUANELIO I KĀKAU ʻIA AI E MAREKO 11: KBH
Highlight
Share
Copy
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.
