KA ʻEUANELIO I KĀKAU ʻIA AI E MAREKO 10
10
MOKUNA X.
1 No nā mea i mare ʻia. 13 Hoʻomaikaʻi ʻia nā kamaliʻi. 17 Aʻo akula Iesū i kānaka ʻōpiopio. 32 Haʻi hou maila ia i kona make. 46 Ola ka makapō ʻo Batimea.
1¶ A laila kū aʻela ia i luna, a hele akula ia ma kēlā kapa o Ioredane, a i nā mokuna o Iudea; a ʻākoakoa hou maila nā kānaka i ona lā, aʻo hou maila ʻo ia iā lākou, e like me kāna ʻoihana ma mua.
2¶ Hele maila ka poʻe Parisaio i ona lā, me ka hoʻāʻo mai iā ia, ʻī maila, “He mea pono anei i ke kāne ke hōʻoki i kāna wahine?”
3ʻŌlelo akula ia, ʻī akula iā lākou, “He aha lā ka mea a Mose i kauoha mai ai iā ʻoukou?”
4ʻĪ maila lākou, “I ʻae mai nō ʻo Mose «e kākau i ka palapala hoʻohemo, a laila e hōʻoki aku».”
5ʻŌlelo akula Iesū, ʻī akula iā lākou, “No ka paʻakikī ʻana o ko ʻoukou naʻau, i palapala mai ai ʻo ia ia ʻōlelo na ʻoukou.
6“Akā, i kinohi o ka honua nei, «hana ke Akua iā lāua, he kāne, he wahine.
7“No laila hoʻi e haʻalele ai ke kanaka i kona makua kāne, a me kona makuahine, a e hoʻopili ia i kāna wahine;
8a e lilo nō lāua ʻelua, i hoʻokahi»; no ia mea, ʻaʻole ʻelua hou aku lāua; akā, hoʻokahi wale nō ʻiʻo.
9“ʻO ka mea a ke Akua i hoʻopili mai ai, mai hoʻohemo aʻe ke kanaka.”
10A i loko o ka hale, nīnau akula kāna poʻe haumāna i kēlā mea.
11ʻĪ maila ʻo ia iā lākou, “ʻO ka mea hōʻoki i kāna wahine, a mare hou i kekahi, he moekolohe nō kāna iā ia.
12“A i hōʻoki ka wahine i kāna kāne a mare hou i kekahi, ua moekolohe nō hoʻi ia.”
13¶ Halihali akula lākou i kahi mau keiki liʻiliʻi iā ia, i hoʻopā mai ʻo ia iā lākou; pāpā aʻela kāna poʻe haumāna i ka poʻe nāna i lawe aku.
14ʻIke maila Iesū, a laila, huhū ihola ia, ʻī maila iā lākou, “E ʻae aku ʻoukou i kamaliʻi ke hele mai i oʻu nei, mai pāpā aku hoʻi iā lākou; no ka mea, e like me lākou nei ke aupuni o ke Akua.
15“He ʻoiaʻiʻo kaʻu e ʻōlelo aku nei iā ʻoukou, ʻo ka mea ʻaʻole e launa i ke aupuni o ke Akua, me he keiki ʻuʻuku lā, ʻaʻole loa ia e komo mai i laila.”
16Hiʻipoi ihola ʻo ia iā lākou, kau aʻela i kona lima i luna o lākou, a hoʻomaikaʻi maila iā lākou.
17¶ I kona hele ʻana aku ma ke alaloa, holo kikī aʻela kekahi i ona lā, kukuli ihola i mua ona, ʻī aʻela, “E ke Kumu maikaʻi ē, he aha lā kaʻu mea e hana ai, i loaʻa iaʻu ke ola loa?”
18ʻĪ maila Iesū iā ia, “No ke aha lā ʻoe e kapa mai ai iaʻu he maikaʻi? Hoʻokahi wale nō mea maikaʻi, ʻo ke Akua.
19“Ua ʻike nō hoʻi ʻoe i nā kānāwai; ‘«Mai moekolohe ʻoe; Mai pepehi kanaka; Mai ʻaihue; Mai hōʻike wahaheʻe»; Mai ʻālunu; «E mālama ʻoe i kou makua kāne, a me kou makuahine».’”
20ʻŌlelo aʻela ia, ʻī aʻela iā ia, “E ke Kumu, ua pau ia mau mea iaʻu i ka mālama ʻia mai koʻu wā ʻuʻuku mai.”
21Nānā maila Iesū iā ia, aloha ihola, a ʻōlelo maila iā ia, “Hoʻokahi ou mea hemahema; e hoʻi aku ʻoe, e kūʻai lilo aku i kou waiwai a pau, a e hāʻawi aku i ka poʻe ʻilihune, a laila e loaʻa iā ʻoe ka waiwai ma ka lani; a e hele mai ʻoe e hāpai i ke keʻa, a e hahai mai iaʻu.”
22A laila kaumaha loa ihola kēlā ia ʻōlelo, a hele akula me ka minamina; no ka mea, ua nui loa kona waiwai.
23¶ ʻAlawa aʻela ʻo Iesū ma ʻō a ʻō, ʻī maila i kāna poʻe haumāna, “Manomano ke komo pilikia ʻana o ke kanaka waiwai i loko o ke aupuni o ke Akua!”
24Kāhāhā ihola ka naʻau o ka poʻe haumāna i kāna ʻōlelo. ʻĪ hou maila Iesū iā lākou, “E nā pōkiʻi, he mea pilikia loa ke komo ʻana o ka poʻe paulele i ka waiwai, i loko o ke aupuni o ke Akua!
25“E hiki ʻē ke kāmelo ke komo aku i loko o ka puka kui kele, ma mua o ke komo ʻana o ke kanaka waiwai i loko o ke aupuni o ke Akua.”
26Kāhāhā loa ko loko o lākou, ʻī ihola iā lākou iho, “ʻO wai lā uaneʻi e hiki i ke ola?”
27Nānā maila Iesū iā lākou, ʻī maila, “He mea hiki ʻole kēia i kānaka; akā, ʻaʻole i ke Akua; no ka mea, e hiki nō nā mea a pau loa i ke Akua.”
28A laila, hoʻomaka akula ʻo Petero e ʻōlelo iā ia, “Aia hoʻi, ua haʻalele mākou i nā mea a pau, a ua hahai aku iā ʻoe.”
29ʻŌlelo maila Iesū, ʻī maila, “He ʻoiaʻiʻo kaʻu e ʻōlelo aku nei iā ʻoukou, ʻaʻole ka mea i haʻalele i ka hale, i nā kaikuaʻana, i nā kaikuāhine, i ka wahine, i nā keiki, i nā ʻāina, noʻu nei a no ka ʻeuanelio,
30e loaʻa ʻole mai iā ia ka pāhaneri i kēia ao, a me nā hale, a me nā kaikuaʻana, a me nā kaikuāhine, a me nā mākuahine, a me nā keiki, a me nā ʻāina, me ka hoʻomāinoino naʻe; a i kēlā ao ma hope, ʻo ke ola mau loa.
31“A he nui loa nā mea mua e lilo ana i hope, a me nā mea hope i mua.”
32¶ Iā lākou ma ke alanui e piʻi ana i Ierusalema, hele akula Iesū ma mua o lākou; a kāhāhā ihola ko lākou naʻau; a i ko lākou hahai ʻana aku, makaʻu ihola lākou. Lawe hou maila ia i ka poʻe ʻumikumamālua, a hoʻomaka e haʻi maila iā lākou i kona mea e hana ʻia mai ai;
33“Eia hoʻi, ke piʻi aku nei kākou i Ierusalema, a e hāʻawi ʻia aku auaneʻi ke Keiki a ke Kanaka, i ka poʻe kāhuna nui, a me ka poʻe kākau ʻōlelo; a e hoʻohewa mai lākou iā ia e make, a e hāʻawi nō hoʻi lākou iā ia i ko ka ʻāina ʻē.
34“A e hoʻomāʻewaʻewa mai lākou iā ia, a e hahau mai iā ia, a e kuhakuha mai lākou iā ia, a e pepehi mai iā ia, a pō ʻakolu aʻe, e ala hou mai ia.”
35¶ Pūneʻe akula i ona lā ʻo Iakobo, a me Ioane, nā keiki a Zebedaio, ʻī akula, “E ke Kumu ē, ke ake nei māua, e hana mai ʻoe na māua i kā māua mea e noi aku ai.”
36Nīnau maila Iesū iā lāua, “He aha ko ʻolua makemake, e hana aku ai au na ʻolua?”
37ʻĪ akula lāua iā ia, “E hāʻawi mai ʻoe iā māua, e noho kekahi o māua ma kou lima ʻākau, a ʻo kekahi ma kou lima hema, ma loko o kou nani.”
38ʻĪ maila Iesū iā lāua, “ʻAʻole ʻolua i ʻike i kā ʻolua mea i noi mai ai. E hiki anei iā ʻolua ke inu i ko ke kīʻaha aʻu e inu ai? A e bapetizo ʻia i ka bapetizo ʻana aʻu e bapetizo ʻia mai ai?”
39ʻĪ akula lāua iā ia, “E hiki nō iā māua.” ʻĪ maila Iesū iā lāua, “E inu ʻiʻo nō ʻolua i ko ke kīʻaha aʻu e inu ai, a e bapetizo ʻia nō hoʻi ʻolua i ka bapetizo ʻana aʻu e bapetizo ʻia mai ai.
40“Akā, ʻo ka noho ma koʻu lima ʻākau, a me koʻu lima hema, ʻaʻole ʻo kaʻu ia e hāʻawi aku ai; akā, no ka poʻe ia i hoʻomākaukau ʻia ai ia mea.”
41A lohe aʻela ka ʻumi, hoʻomaka ihola lākou e ukiuki iā Iakobo, a me Ioane.
42Kāhea maila Iesū iā lākou, ʻī maila, “Ua ʻike nō ʻoukou, ʻo ka poʻe i hoʻāliʻi ʻia ma luna o ko nā ʻāina ʻē, ua hoʻokiʻekiʻe ma luna o lākou; a ʻo nā kānaka nui hoʻi, ua hoʻolanilani ma luna o lākou.
43“Akā, mai mea pēlā i waena o ʻoukou; a ʻo ka mea makemake e lilo i poʻokela i waena o ʻoukou, e lilo ia i kauā na ʻoukou.
44“A ʻo ka mea e makemake i aliʻi ia ma luna o ʻoukou, e lilo ia i kauā na nā mea a pau.
45“No ka mea, ʻo ke Keiki a ke Kanaka, ʻaʻole ia i hele mai no ka hoʻokauā ʻia mai; akā, no ka hoʻokauā aku, a e hāʻawi i kona ola i kumu hoʻōla no nā mea he nui loa.”
46¶ A hiki maila lākou i Ieriko; a i ko lākou hele ʻana, mai Ieriko aku, me kāna mau haumāna, a me nā kānaka he nui loa, e noho ana ma kapa alanui, ka makapō, ʻo Batimea, ke keiki a Timea, e nonoi ana.
47A lohe aʻela ia i ko Iesū hele ʻana aʻe, hoʻomaka ia e kāhea aʻe, ʻī aʻela, “E Iesū ē, e ke Keiki a Dāvida, e aloha mai ʻoe iaʻu!”
48Nui loa nā mea i pāpā aku iā ia, “Hāmau,” akā, he nui loa aku kona kāhea ʻana aku, “E ke Keiki a Dāvida, e aloha mai ʻoe iaʻu!”
49Kū mālie ihola ʻo Iesū, kauoha maila e kāhea ʻia aku ia. Kāhea akula lākou i ua kanaka makapō nei, ʻī akula iā ia, “E hoʻolana ʻoe, a e kū aʻe i luna, ke kāhea mai nei kēlā iā ʻoe.”
50Haʻalele ihola ia i kona ʻaʻahu, kū aʻela i luna, a hele mai i o Iesū lā.
51ʻŌlelo akula Iesū, ʻī akula iā ia, “He aha kou makemake e hana aku ai au nou?” ʻĪ maila ua makapō nei iā ia, “E ka Haku ē, i kaʻakaʻa koʻu mau maka!”
52ʻĪ akula Iesū iā ia, “Ō hele, ua ola ʻoe, i kou manaʻoʻiʻo.” Loaʻa koke aʻela iā ia ka ʻike, a hahai akula iā Iesū, ma ke alaloa.
Currently Selected:
KA ʻEUANELIO I KĀKAU ʻIA AI E MAREKO 10: KBH
Highlight
Share
Copy
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.
