KA ʻEUANELIO I KĀKAU ʻIA AI E MAREKO 9
9
MOKUNA IX.
1 Ka hoʻopāhaʻohaʻo ʻana o Iesū. 14 Hoʻōla ʻia ke kuli. 30 Haʻi maila ia i kona make. 33 Hoʻomaikaʻi ʻo ia i nā kamaliʻi. 38 No ka hoʻohihia.
1¶ ʻĪ maila ʻo ia iā lākou, “ʻOiaʻiʻo kaʻu e ʻōlelo aku nei iā ʻoukou; ke kū mai nei kekahi mau mea, ʻaʻole lākou e make ʻē, a ʻike nō lākou i ka hele ʻana mai o ke aupuni o ke Akua me ka mana.”
2¶ A hala aʻela nā lā ʻeono, kono aʻela ʻo Iesū iā Petero, a me Iakobo, a me Ioane, alakaʻi akula iā lākou i kahi mehameha, ma kekahi mauna kiʻekiʻe, hoʻopāhaʻohaʻo ihola ia i mua o lākou.
3ʻAlohi aʻela kona kapa, a keʻokeʻo loa e like me ka hau; ʻaʻole e hiki i kānaka hoʻomaʻemaʻe lole ma luna o ka honua ke hoʻokeʻokeʻo pēlā.
4ʻIkea maila e lākou ʻo ʻElia, lāua ʻo Mose e kamaʻilio ana me Iesū.
5ʻŌlelo akula ʻo Petero, ʻī akula iā Iesū, “E ka Haku ē, nani wale kākou e noho ai i ʻaneʻi; e hana paha mākou i ʻekolu halelewa; nou kekahi, no Mose kekahi, a no ʻElia kekahi.”
6ʻAʻole ia i ʻike i kāna mea i ʻōlelo aku ai; no ka mea, ua makaʻu lākou.
7A he ao hoʻi kai uhi mai iā lākou; a paʻē maila ka leo mai loko mai o ke ao, ʻī maila, “Eia kuʻu Keiki punahele, e hoʻolohe ʻoukou iā ia!”
8Nānā koke aʻela lākou, ʻaʻole he kanaka a lākou i ʻike ai, ʻo Iesū wale nō me lākou.
9¶ A i ko lākou iho ʻana, mai ka mauna mai, pāpā maila kēlā iā lākou, mai haʻi aku i nā mea a lākou i ʻike ai, a ala hou mai ke Keiki a ke Kanaka mai waena mai o ka poʻe make.
10ʻUmi malū ihola lākou ia ʻōlelo me ka nalu nui iā lākou iho nō i ke ʻano o ke ala ʻana mai waena mai o ka poʻe make.
11Nīnau akula lākou iā ia, ʻī akula, “No ke aha lā i ʻōlelo mai ai ka poʻe kākau ʻōlelo, ʻo ʻElia ke hele ʻē mai ma mua e pono ai?”
12ʻŌlelo maila ʻo ia iā lākou, ʻī maila, “ʻOiaʻiʻo nō ʻo ʻElia ke hele ʻē mai ana, e hoʻoponopono i nā mea a pau loa. Ua palapala ʻia nō hoʻi ka hoʻomāinoino ʻia ʻo ke Keiki a ke Kanaka, a me kona hoʻowahāwahā ʻia.
13“Akā, ke haʻi aku nei au iā ʻoukou, Ua hiki ʻiʻo mai nei nō ʻElia, a ua hana aku lākou iā ia i nā mea a pau a lākou i makemake ai, e like me ka mea i palapala ʻia nona.”
14¶ A hele maila ia i kāna poʻe haumāna, ʻike aʻela ia i nā kānaka he nui loa, a me ka poʻe kākau ʻōlelo, e ninaninau ana iā lākou.
15A ʻike akula nā kānaka a pau loa iā ia, pīhoihoi iho lākou, holo kikī akula, a aloha akula iā ia.
16Nīnau akula ʻo ia iā lākou, “He aha kā ʻoukou mea e ninaninau nei me lākou?”
17ʻŌlelo aʻela kekahi o ua ʻaha kanaka lā, ʻī akula, “E ka Haku ē, ua lawe mai nei au i kuʻu keiki kāne iā ʻoe, ua uluhia ʻia e ka ʻuhane ʻāʻā.
18“A ma nā wahi a pau loa i kaʻina aku ai ʻo ia e ia, hoʻokaʻawili ihola ʻo ia iā ia, a kahe mai ka huʻa, nau ihola nā kuʻi, a hōkiʻi nō hoʻi; a ʻī akula au i nā haumāna āu, na lākou ia e mahiki aku; ʻaʻole i hiki iā lākou.”
19ʻŌlelo maila ʻo ia iā lākou, ʻī maila, “Auē ka hanauna hoʻomaloka; pehea lā ka lōʻihi o koʻu noho pū ʻana me ʻoukou? Pehea ka lōʻihi o koʻu hoʻomanawanui ʻana aku iā ʻoukou? E lawe mai iā ia i oʻu nei!”
20Lawe maila lākou iā ia i ona lā, ʻike maila ʻo ia iā ia, a laila, hoʻokaʻawili hou aʻela ka ʻuhane iā ia; hāʻule ihola ia i lalo i ka honua, kaʻa ihola me ka huʻa nui.
21Nīnau aʻela ia i kona makua kāne, “Pehea lā ka lōʻihi o ke kau ʻana o kēia ma luna ona?” ʻĪ maila kēlā, “Mai ka wā kamaliʻi mai nō.”
22“Ua hoʻolei pinepine ʻia ʻo ia e ia, i loko o ke ahi, a i loko o ka wai, i make ia; akā hoʻi, inā e hiki iā ʻoe, e aloha mai ʻoe iā māua, a e kōkua mai hoʻi!”
23ʻĪ maila Iesū iā ia, “A i hiki iā ʻoe ke manaʻoʻiʻo, e hiki nō nā mea a pau loa i ka mea manaʻoʻiʻo.”
24Kāhea koke akula ka makua kāne o ua keiki lā, ʻī akula me nā waimaka, “E ka Haku, ke manaʻoʻiʻo nei au; e kōkua mai ʻoe iaʻu i kuʻu manaʻoʻiʻo ʻole.”
25ʻIke maila Iesū i ka lulumi ʻana mai o kānaka, a laila, pāpā akula ia i ka ʻuhane ʻino, ʻī akula iā ia, “Ke ʻōlelo aku nei au iā ʻoe, e ka ʻuhane ʻāʻā, a kuli, e hele aku ʻoe pēlā, mai loko aku ona, mai komo hou i loko ona.”
26Kāhea aʻela ia, a hoʻokaʻawili hou ihola iā ia, a puka akula, mai loko aku ona; a like ihola ia me ka mea i make, no ia mea, ua nui ka poʻe i ʻōlelo aʻe, “Ua make ʻiʻo nō!”
27Lālau ihola Iesū i kona lima, hoʻāla maila iā ia i luna, a kū aʻela ia.
28A i kona hiki ʻana aku i loko o ka hale, a laila nīnau malū akula kāna poʻe haumāna iā ia, “No ke aha lā i hiki ʻole ai iā mākou ke mahiki aku iā ia?”
29ʻĪ maila ʻo ia iā lākou, “ʻAʻole hiki kēia mau mea ke mahiki wale ʻia aku; akā, i ka pule, a me ka hoʻokē ʻai.”
30¶ Hele akula lākou, mai ia wahi aku, ma loko o Galilaia; ʻaʻole naʻe ia i makemake e ʻike mai kekahi.
31No ka mea, aʻo maila ia i kāna poʻe haumāna, ʻī maila iā lākou, “E kumakaia ʻia aku ana ke Keiki a ke Kanaka i nā lima o kānaka, a e pepehi mai lākou iā ia; a make loa ia, a pō ʻakolu aʻe, e ala hou mai nō ia.”
32Akā, ʻaʻole lākou i ʻike i ke ʻano o ia ʻōlelo, a ua makaʻu nō hoʻi lākou ke nīnau iā ia.
33¶ A hele akula lākou i Kaperenauma; a i kona noho ʻana i loko o ka hale, a laila, nīnau maila ʻo ia iā lākou, “He aha kā ʻoukou i kamaʻilio ai ma ke alaloa?”
34ʻAʻole lākou i ʻekemu iki aku; no ka mea, ua kamaʻilio lākou iā lākou iho ma ke alaloa, i ka mea o lākou i ʻoi ma mua.
35Noho ihola ia, a kāhea maila i ka poʻe ʻumikumamālua, ʻī maila kēlā iā lākou, “Inā e manaʻo kekahi kanaka, e ʻoi ia ma mua, e emi auaneʻi ia ma hope o nā mea a pau, a e lilo nō hoʻi i kauā na nā mea a pau.”
36Lawe aʻela ia i kekahi keiki, hoʻokū ihola iā ia ma waenakonu o lākou; a i kona hiʻipoi ʻana iā ia, ʻī maila ia iā lākou,
37“ʻO ka mea e launa mai i kekahi keiki liʻiliʻi, e like me ia nei, no koʻu inoa, ʻo ia ka mea launa mai iaʻu; a ʻo ka mea launa mai iaʻu, ʻaʻole ia i launa mai iaʻu wale nō; akā, i ka mea nāna wau i hoʻouna mai nei.”
38¶ A laila ʻōlelo akula ʻo Ioane iā ia, ʻī akula, “E ke Kumu, ua ʻike aku mākou i kekahi mea e mahiki aku ana i nā daimonio ma kou inoa, ʻaʻole naʻe ia i hahai iā mākou; a pāpā akula mākou iā ia; no ka mea, ʻaʻole ia i hahai iā mākou.”
39ʻĪ maila Iesū, “Mai pāpā aku iā ia; no ka mea, ʻo ke kanaka nāna i hana ka hana mana, ma koʻu inoa, ʻaʻole ia e hiki ke ʻōlelo ʻino noʻu.
40“ʻO ka mea kūʻē ʻole aku iā kākou, no kākou hoʻi ia.
41“ʻO ka mea hāʻawi iā ʻoukou i kekahi kīʻaha wai e inu ma koʻu inoa; no ka mea, no Kristo ʻoukou; he ʻoiaʻiʻo kaʻu e haʻi aku nei iā ʻoukou, ʻaʻole loa ia e nele i ka uku ʻia.
42“A ʻo ka mea hoʻohihia mai i kekahi o ka poʻe liʻiliʻi nāna wau e manaʻoʻiʻo mai nei, e aho nona, ke nakinaki ʻia ka pōhaku wili palaoa ma kona ʻāʻī, a e hoʻolei ʻia aku ia i loko o ke kai.
43“A inā e hoʻohihia mai kou lima ʻākau iā ʻoe, e ʻoki aʻe; e aho nou ke komo mumuku aku i loko o ke ola, i ke kiola ʻia aku i Gehena me nā lima ʻelua, i ke ahi pio ʻole;
44kahi «ʻaʻole loa e make ko lākou ilo, ʻaʻole loa hoʻi e pio ke ahi».
45“A inā e hoʻohihia mai kou wāwae iā ʻoe, e ʻoki aʻe; e aho nou ke komo ʻoʻopa aku i loko o ke ola, i ke kiola ʻia aku i Gehena, me nā wāwae ʻelua, i ke ahi pio ʻole;
46kahi «ʻaʻole loa e make ko lākou ilo, ʻaʻole loa hoʻi e pio ke ahi».
47“A inā hoʻohihia mai kou maka iā ʻoe, e pōʻalo aʻe; no ka mea, e aho nou ke komo maka kahi i loko o ke ola, i ke kiola ʻia aku i ke ahi o Gehena me nā maka ʻelua;
48kahi «ʻaʻole loa e make ko lākou ilo, ʻaʻole loa hoʻi e pio ke ahi».
49“No ka mea, e kāpī ʻia lākou a pau i ke ahi, e like me ka mōhai i kāpī ʻia i ka paʻakai.
50“He maikaʻi ka paʻakai; akā, inā i pau ka liʻu o ka paʻakai, pehea lā ia e liʻu hou ai? E ao ʻoukou, i loaʻa ka paʻakai i loko o ʻoukou, a e kuʻikahi like ʻoukou.”
Currently Selected:
KA ʻEUANELIO I KĀKAU ʻIA AI E MAREKO 9: KBH
Highlight
Share
Copy
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.
