KA ʻEUANELIO I KĀKAU ʻIA AI E MAREKO 2
2
MOKUNA II.
1 ʻO ka maʻi lōlō. 15 ʻAi pū ʻo Iesū me nā luna ʻauhau a me ka poʻe hewa. 18 No ka hoʻokē ʻai ʻana.
1¶ A ma hope iho o ia mau lā, hele hou akula nō ʻo Iesū i Kaperenauma, a lohe ʻia aʻela kona noho ʻana i loko o ka hale.
2A hoʻākoakoa koke ʻia maila nā kānaka he nui loa, ʻaʻole loa he wahi kaʻawale iki, ʻaʻole nō hoʻi ma ka ʻīpuka, a haʻi maila ia i ka ʻōlelo iā lākou.
3Hele maila lākou i ona lā, e halihali pū mai ana i kekahi maʻi lōlō, i kaʻikaʻi ʻia e nā mea ʻehā.
4ʻAʻole hiki iā lākou ke komo aku i ona lā, no ka paʻapū i kānaka; no laila wāwahi lākou ma luna o ka hale, ma kona wahi; a hemo iā lākou, a laila kuʻu ihola lākou i kahi moe i moe iho ai ka maʻi lōlō.
5ʻIke maila Iesū i ko lākou manaʻoʻiʻo, ʻōlelo ihola ia i ua lōlō lā, “E ke kama iki, ua kala ʻia kou hewa.”
6E noho ana kekahi poʻe kākau ʻōlelo ma laila, a ʻōhumu ihola lākou i loko o ko lākou naʻau;
7no ke aha lā ʻo ia nei e ʻōlelo ai i nā ʻōlelo hōʻino? “ʻO wai lā ka mea e hiki ai ke kala i ka hala, ʻo ke Akua wale nō?”
8I ko Iesū ʻike koke ʻana ma kona naʻau, ua ʻōhumu malū lākou pēlā, ʻī akula ʻo ia iā lākou, “No ke aha lā ʻoukou e ʻōhumu nei kēia mau mea i loko o ko ʻoukou naʻau?
9“Ma hea ka hiki pono o ka ʻōlelo i ka maʻi lōlō, ‘Ua kala ʻia kou hewa’; a ʻo ka ʻōlelo paha, ‘E ala aʻe, e kaʻikaʻi i kou wahi moe, a e hele?’
10“Akā, i ʻike ʻoukou, he mana ko ke Keiki a ke Kanaka ke kala aku i ka hala ma ka honua nei, (ʻī aʻela ia i ka maʻi lōlō,)
11ke ʻōlelo aku nei au iā ʻoe, e ala mai, e kaʻikaʻi i kou wahi moe, a e hoʻi aku i kou hale.”
12Ala koke aʻela ia, kaʻikaʻi aʻela i kona wahi moe, a hele akula i waho, i mua o lākou a pau; no laila, mahalo akula lākou a pau, hoʻonani akula i ke Akua, ʻī ihola, “ʻAkahi nō kākou i ʻike i kēia.”
13¶ Hele hou akula ia ma kapa o ka moana wai; a hele maila nā kānaka a pau i ona lā, a aʻo maila ʻo ia iā lākou.
14A i kona hele ʻana aʻe, ʻike ihola ʻo ia iā Levi a ʻAlapaio, e noho ana i kahi ʻauhau, ʻī maila iā ia, “E hahai mai ʻoe iaʻu!” Kū aʻela ia, a hahai akula iā ia.
15¶ Eia kekahi, i kona noho ʻana i ka ʻaina i loko o kona hale, he nui loa nā luna ʻauhau a me nā mea lawehala i noho pū me Iesū a me kāna poʻe haumāna; no ka mea, ua nui loa ka poʻe i hahai ma muli ona.
16A ʻike akula ka poʻe kākau ʻōlelo, a me ka poʻe Parisaio iā ia e ʻai pū ana me nā luna ʻauhau, a me nā lawehala, nīnau aʻela lākou i kāna poʻe haumāna, “No ke aha lā ʻo ia nei e ʻai pū ai a inu pū hoʻi me nā luna ʻauhau a me nā lawehala?”
17Lohe aʻela Iesū, ʻī akula ʻo ia iā lākou, “ʻAʻole no ka poʻe ola ke kahuna lapaʻau, no ka poʻe maʻi nō ia. I hele mai nei au e aʻo aku i ka poʻe lawehala e mihi, ʻaʻole i ka poʻe pono.”
18¶ He poʻe hoʻokē ʻai nā haumāna a Ioane a me nā Parisaio; a hele maila lākou, nīnau maila iā ia, “No ke aha lā e hoʻokē ʻai ai nā haumāna a Ioane, a me nā Parisaio, ʻaʻole hoʻi hoʻokē ʻai kāu poʻe haumāna?”
19Nīnau akula Iesū iā lākou, “E hiki anei i nā hoa o ke kāne mare ke hoʻokē ʻai i ka wā e noho pū ana ke kāne mare me lākou? I ka wā e noho pū ana ke kāne mare me lākou, ʻaʻole e hiki iā lākou ke hoʻokē ʻai.
20“Akā, e hiki mai ana nō nā lā e lawe ʻia aku ai ke kāne mare, mai o lākou aku, a laila lākou e hoʻokē ʻai ai, i kēlā lā.
21“ʻAʻole nō kekahi e pīnaʻi i ka ʻāpana lole hou, ma ka lole kahiko, o haehae ʻia ka mea kahiko, e ka mea hou i pīnaʻi ʻia, a nui aku ka nahae.
22“ʻAʻole nō hoʻi kekahi i ukuhi i ka waina hou i loko o ka hue ʻili kahiko, o nahae nā hue i ka waina hou, a kahe aku ka waina, a pau pū nā hue; akā, e ukuhi ʻia nō ka waina hou i loko o nā hue hou.”
23¶ Eia kekahi, i kona hele ʻana i waena o nā mahina ʻai i ka lā Sābati, ʻako aku nā haumāna āna i nā huhui palaoa, i ko lākou hele ʻana.
24ʻĪ maila ka poʻe Parisaio iā ia, “No ke aha lā e hana nei lākou, i ka lā Sābati, i ka mea kū ʻole ma ka pono?”
25ʻĪ akula ʻo ia iā lākou, “ʻAʻole anei ʻoukou i heluhelu i ka mea a Dāvida i hana ai i kona wā i hāiki ai i ka pōloli, a me ka poʻe me ia?
26“I kona komo ʻana i loko o ka hale o ke Akua, i ka wā o ʻAbiatara, ke kahuna nui, a ʻai ihola i ka berena hōʻike, i ka mea kūpono ʻole ke ʻai, na nā kāhuna wale nō, a hāʻawi aʻela nō hoʻi na ka poʻe me ia.”
27ʻĪ maila ia iā lākou, “Ua hana ʻia ka lā Sābati no ke kanaka, ʻaʻole ke kanaka no ka Sābati.
28“No laila, ʻo ke Keiki a ke Kanaka, ʻo ia ka Haku o ka lā Sābati.”
Currently Selected:
KA ʻEUANELIO I KĀKAU ʻIA AI E MAREKO 2: KBH
Highlight
Share
Copy
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.
