Yohane 17

Yesu bɔ mbaeɛ ma ye nwo ne ye asuafoɛ

1 # Mat 26.18 Na Yesu dwudwole yiele nen, ɔmane ye nye so hyirele nyameɛso, na ɔhane kyɛ, “Baba, dɔnhwere ne adwu. Hyɛ Ɛwa ne animnyam, ná Baa ne koso ɔhyɛ wɔ animnyam; 2#Mat 28.18; Dan 7.14 kyɛbɔ ama ye tumi wɔ anwoɔnaen amukoraa so, kyɛ ɔma ebiala bɔ afa ama ye ne daa ngoa ne. 3Na daa ngoa ne ɛhe: kyɛ bekonwu wɔ, nahorɛ Nyameɛ komapɛ ne, ɔne bɔ asoma ye ne, Yesu Kristo ne. 4Mahyɛ wɔ animnyam wɔ aseɛ so; mayie adwuma bɔ ɛfa mane me kyɛ nyɔ ne. 5#Flp 2.6; Yoh 1.1 Afei, O Baba, animnyam bɔ nne ye wɔ berɛ koraka yeɛ ewiase baawa ne, fa hyɛ me animnyam wɔ wɔ bɔbɔ wɔ berɛ.

6“Mmenia bɔ ɛyele bɛ fili wiase fa mane me ne, mala wɔ dumaa ali mahyire bɛ. Bɛte wɔ deɛ, na ɛfale bɛ mane me, na bali wɔ dwirɛ so. 7Afei de, bɛse kyɛ nningyein amukoraa bɔ afa ama me ne, befi wɔ berɛ; 8ofikyɛ edwirɛ bɔ ɛfa mane me ne, mafa mama bɛ; na bɛ koso basɔ nu, na banwu ye amba kyɛ wɔ berɛ yeɛ mvi mmale ɔ, na bale bali kyɛ wɔ yeɛ ɛsomane me ɔ.

9 # Luk 22.32; Yoh 14.16 “Mésrɛ mema bɛ; menzrɛ memma wiase, na mmom bɛ bɔ afa bɛ ama me ne, ofikyɛ bɛte wɔ deɛ. 10Me nningyein amukoraa te wɔ deɛ, yeɛ wɔ deɛ koso te me deɛ, na manya animnyam wɔ bɛ nu. 11#Edw 133.1; Flp 2.9; Nye 19.12; Rom 12.5 Afei de, nne wiase ko, nakoso ɛhemɔ de bɛwɔ wiase wa; na me de, méba wɔ berɛ. Baba Krongron, bɛ bɔ afa bɛ ama me ne, fa bɛ sie wɔ wɔ dumaa nu, amaa ɔnate so bayɛ ko, kyɛbɔ yɛte ko ne. 12#Edw 41.9; Yoh 6.70; 18.9 Mmerɛ bɔ né me ne bɛ yɛwɔ wiase ne, mvale bɛ bɔ afa bɛ ama me ne nziele wɔ wɔ dumaa nu. Mabɔ bɛ nwo waen, na bɛ nu biala ammini, sana baa bɔ wamini ne; bɔ ɔnate so Ahyerɛlɛ ne awa nu ɔ. 13Na afei de, méba wɔ berɛ, na mekã edwirɛ hemɔ wɔ wiase wa, amaa ɔnate so banya m’anigye maa wali mu wɔ bɛ nu. 14Mafa wɔ dwirɛ ne mama bɛ; na wiase apɔ bɛ, ofikyɛ nna wiase yeɛ befi ɔ, kyɛbɔ me koso mmvi wiase ne. 15Menzrɛ wɔ kyɛ ɛye bɛ fi wiase, na mmom kyɛ: Bɔ bɛ nwo waen fi bɔnefoɛ ne sa nu. 16Nna wiase yeɛ befi ɔ, kyɛbɔ me koso mmvi wiase ne. 17#2 Sam 7.28; 1 Ahe 17.24 Yɛ bɛ krongron wɔ wɔ nahorɛ ne anu; wɔ dwirɛ ne te nahorɛ. 18Na kyɛbɔ ɛsomane me wɔ wiase ne, sɔ ala yeɛ me koso masoma bɛ wɔ wiase ɔ. 19Meyɛ me nwo krongron mema bɛ, amaa ɔnate so bɛ koso bayɛ krongron wɔ nahorɛ ne anu.

20“Nna ɛhemɔ angome yeɛ mebɔ mbaeɛ mema bɛ ɔ, na mmom bɛ bɔ ɔnate bɛ dwirɛ so bekole me bekoli ne koso, 21#Yer 32.39 amaa ɔnate so bɛ mukoraa bayɛ ko; kyɛbɔ wɔ, Baba, ɛwɔ me nu, ná me koso nwɔ wɔ nu ne, ná bɛ koso bayɛ ko wɔ yɛ nu, ná wiase ole li kyɛ wɔ yeɛ ɛsomane me ɔ. 22#Yoh 14.20 Na animnyam bɔ ɛfa mane me ne, mafa mama bɛ, amaa ɔnate so bayɛ ko, kyɛbɔ yɛte ko ne. 23Nwɔ bɛ nu, na ɛwɔ me nu, na bali mu wɔ koyɛlɛ nu; na ɔnate so wiase konwu kyɛ wɔ yeɛ asoma me ɔ, na ekuro bɛ dwirɛ kyɛbɔ ekuro me dwirɛ ne.

24 # Mat 25.34 “Baba, bɛ bɔ afa bɛ ama me ne, mekuro kyɛ nekaa bɔ nwɔ ne, bɛ koso bɛbaboka me so wɔ berɛ, amaa ɔnate so banwu m’animnyam bɔ ɛfa mane me ne; ofikyɛ ehurole me dwirɛ koraka yeɛ ewiase ahyɛaseɛ ɔba ɔ. 25#Yoh 15.21 O Baba Teneneeniɛ, wiase annwu wɔ, na me de, manwu wɔ; na ɛhemɔ banwu kyɛ wɔ yeɛ ɛsomane me ɔ. 26Mala wɔ dumaa ali mahyire bɛ, na ngɔla ye ali ngohyire; amaa ɔnate so ehurolɛ bɔ ekuro me dwirɛ ne watena bɛ nu, ná me koso matena bɛ nu.”

Currently Selected:

Yohane 17: EBP

Highlight

Copy