Yohane 18

Yudase Yiskariote ye Yesu ma

(Marko 14.43-52; Luka 22.47-53)

1 # 2 Sam 15.23; Mat 26.36 Na Yesu hane sɔ dwirɛ nemɔ nen, ɔne ye asuafoɛ nemɔ bɛɛpɛle asue Kidron;#18.1: ASUE KIDRON: Kidron bɔnza. né turo bie wɔ berɛ, na ɔne ye asuafoɛ nemɔ bɛhɔle nu. 2Na Yudase bɔ ɔyele ye mane ne, né ɔse berɛ; ofikyɛ né Yesu ne ye asuafoɛ nemɔ bɛtaa bekoyia berɛ. 3#Aso 1.16 Yiti Yudase fale asraafoɛ kure ne awɛmvoɛ bɔ befi asɔfo mbanyi ne Farasiifoɛ nemɔ berɛ ɔ wale berɛ; ná ne betiratira ɛtɛen, nganea ne akodeɛ. 4Na Yesu de, né ɔse bɔ ɔbaato ye amukoraa; na ɔhɔle ye nyunu moa, na obisale bɛ kyɛ, “Ɛmɔpena nwa?” 5#Mak 1.24 Na bebuale ye kyɛ, “Yesu, Nasarɛteniɛ ne.” Yeɛ Yesu sele bɛ kyɛ, “Me ɛhe.” Na Yudase bɔ ɔyele ye mane ne, né ɔne bɛ yeɛ begyigyi berɛ ɔ. 6Na mmerɛ bɔ osele bɛ kyɛ, “Me ɛhe” nen, bepimbini bɛ si, na befifini ase. 7Yeɛ obisale bɛ bieku kyɛ, “Ɛmɔpena nwa?” Na bebuale kyɛ, “Yesu, Nasarɛteniɛ ne.” 8Yeɛ Yesu buale kyɛ, “Mahã mahyire ɛmɔ kyɛ me ɛhe; yiti sɛ me yeɛ ɛmɔpena me a, ye de ɛ́mɔma ɛhemɔ bɛhɔ!” 9#Yoh 6.39; 10.28; 17.12 Na ɛhe mane edwirɛ bɔ ɔhane ye kyɛ, “Bɛ bɔ afa bɛ ama me ne, mamma bɛ nu biala wammini ne” wale nu.

10Yeɛ Simɔn Petro bɔ né otira ngrandɛ ne, ɔhwene, na ɔfa bɔle ɔsɔfo panyi paa n’akoaa pɛle ye so famaa. Akoaa ne dumaa li Malkose. 11#Mat 20.22 Na Yesu sele Petro kyɛ, “Fa wɔ ngrandɛ ne wura ye bɔha ne anu! Kulie bɔ me Baba afa ama me ne, aso onni kyɛ meno anaa?”

Bɛfa Yesu bekogyina ɔsɔfo panyi paa nyunu

12Yeɛ asraafoɛ kure ne ne bɛ safohene ne ne Yuda asomvoɛ nemɔ bɛhyele Yesu, na bɛkyekyele ye. 13#Mat 26.3 Na belili moa bɛfale ye bɛhɔle Anase nyunu; ofikyɛ né ye sia ole Kaifa bɔ ɔte ɔsɔfo panyi paa wɔ sɔ afoɛ ne anu ne. 14#Yoh 11.49-51 Kaifa ole sona bɔ né watu Yudafoɛ nemɔ foɛ kyɛ, “Ɔte paa kyɛ sona ko kowu kɔma maen ne ɔ.”

Petro po Yesu

(Mateo 26.69-70; Marko 14.66-68; Luka 22.55-57)

15 # Mat 26.58; Mak 14.54; Luk 22.54 Yeɛ Simɔn Petro lili Yesu si, na sɔ ala yeɛ suaniɛ ko bie koso yɔle ɔ. Né ɔsɔfo panyi paa ne ɔse sɔ suaniɛ ne, yiti ɔne Yesu bewurale ɔsɔfo panyi paa n’aluo berɛ. 16Na Petro de, ogyinane dwaaso anoa ne asi. Yiti suaniɛ bɔ ɔsɔfo panyi paa ne ɔse ye ne, ofitele oodwudwo hyirele afaneɛ bɔ ɔwɛne anoa ne, na ɔfale Petro hɔle nu. 17Yeɛ afaneɛ bɔ ɔwɛne anoa ne bisale Petro kyɛ, “Wɔ koso, biaa he asuafoɛ nemɔ, aso nna bɛ nu ko ole wɔ?” Na obuale kyɛ, “Daabi oo.”

18 # Mak 14.54, 67 Né ngoaa nemɔ ne asomvoɛ nemɔ bahua see begyigyi ye nwo, ofikyɛ né ɛyerɛ wɔ nu. Né bɛ́to see ne, na né Petro koso ogyi bɛ nwo berɛ ɔto see ne bie.

Ɔsɔfo panyi paa ne bisa Yesu dwirɛ

(Mateo 26.59-66; Marko 14.55-64; Luka 22.66-71)

19Yeɛ ɔsɔfo panyi paa ne bisale Yesu dwirɛ fale ye asuafoɛ nemɔ ne ye ngyerɛkyerɛ nwo. 20#Mat 4.23; 26.55 Na Yesu buale ye kyɛ, “Me de, madwudwo pefee mahyire wiase; nyɛle me ngyerɛkyerɛ mmerɛ biala wɔ nyianu sua mɔ nu ne asɔneyɛɛ sua ne anu, nekaa bɔ Yudafoɛ amukoraa bɛbayia ɔ; na manga dwirɛ biala wɔ mvealeɛ nu. 21Nzu ati yeɛ ebisa me ɔ? Bisa bɛ bɔ betiele me ne, na bɔ nga ngyirele bɛ ne, bɛ yeɛ bɛse bɔ ngane ɔ.” 22#Mat 16.21 Na Yesu hane sɔ nen, asomvoɛ mɔ bɔ begyigyi berɛ ne, bɛ nu ko bɔle ye nye so, na ɔhane kyɛ, “Sɔ yeɛ ɛ́ma ɔsɔfo panyi paa ne mmuayɛɛ ɔ?” 23#Mat 5.39; Aso 23.2-9 Na Yesu buale ye kyɛ, “Sɛ mahã edwirɛ tɛɛ a, kã ma ebiala ɔte bie. Nakoso sɛ edwirɛ paa yeɛ mahã de a, nzu ati yeɛ ɛbɔ me ɔ?” 24#Mat 26.3; Yoh 18.13; Luk 3.2 Yeɛ Anase maa bɛfale nyamaa bɛkyekyele ye bɛfale ye bɛɛmane ɔsɔfo panyi paa Kaifa.

Petro po Yesu bieku

(Mateo 26.71-75; Marko 14.69-72; Luka 22.58-62)

25Né Simɔn Petro gyi berɛ ɔto see. Yeɛ bebisale ye kyɛ, “Wɔ koso, ye asuafoɛ nemɔ, aso nna bɛ nu ko ole wɔ?” Na ɔsale kyɛ, “Mmmoka so oo!” 26Na ɔsɔfo panyi paa ne ngoaa nemɔ anu ko, bɔ ye busuaniɛ yeɛ Petro pɛle ye so ne, obisale kyɛ, “Aso mannwu wɔ ne ye wɔ turo ne anu dɔ?” 27#Yoh 13.38 Na Petro sale bieku, na berɛ ne ala yeɛ akɔ bɔle ɔ.

Bɛfa Yesu bɛkɔ Pilato nyunu

(Mateo 27.1-2; Marko 15.1-5; Luka 23.1-5)

28 # Mat 27.2 Yeɛ bɛfale Yesu befili Kaifa berɛ bɛhɔle amrado n’aluo berɛ; na né ɔte ngyerɛmɔ tutuutu. Nakoso bɛ bɔbɔ de, bangɔ amrado n’aluo berɛ bie, kyɛbɔ ɔkɔyɛ bɔ bɛ nwo ngogua fiɛ, ná bahora bali Abɔtra (aleɛ) ne ɔ. 29Yiti Pilato fite wale bɛ berɛ oobisale bɛ kyɛ, “Nzikyɛ kwaadu yeɛ ɛmɔfa bɛbɔ sɔ biaa ye ɔ?” 30Na bebuale ye kyɛ, “Sɛ akoaa he ɔtte mmeraatolɛniɛ a, ahaa yamva ye yammrɛ wɔ.” 31Yeɛ Pilato sele bɛ kyɛ, “Ɛmɔ bɔbɔ ɛ́mɔfa ye bɛhɔ, ná ɛmɔgyina ɛmɔ mmeraa so bebua ye ndɛen.” Yeɛ Yudafoɛ nemɔ sele ye kyɛ, “Yɛ de, mmeraa mma yɛ ate kyɛ yɛku sona biala ɔ.” 32#Mat 20.19; 26.2; Yoh 3.14; 12.32 Na ɛhe sili mane Yesu dwirɛ bɔ ɔhã fale ewue horɛ bɔ okowu ne nwo wale nu.

33 # Luk 23.3; Mat 2.2 Yeɛ Pilato wurale amrado aluo berɛ bieku, na ɔfrɛle Yesu bisale ye kyɛ, “Wɔ ole Yudafoɛ Hene ne anaa?” 34Na Yesu buale kyɛ, “Wɔ bɔbɔ yeɛ ɛ́bɔ wɔ ti anu ɛkã ɔ, anaakyɛ ebiemɔ yeɛ bahã me nwo dwirɛ bahyire wɔ ɔ?” 35Na Pilato buale ye kyɛ, “Nde Yudaniɛ anaa? Wɔ bɔbɔ wɔ maen ne asɔfo mbanyi yeɛ bɛfale wɔ bɛbrɛle me ɔ; nzikyɛ yeɛ ayɔ ɔ?”

36 # Yoh 6.15; Mat 26.53 Yesu buale kyɛ, “M’ahennie ne, offi wiase wa. Sɛ m’ahennie ne ofi wiase wa a, ahaa m’asomvoɛ mɔ bɛkɔho, bɔ ɔnate so bɛngɔfa me bengowura Yudafoɛ mɔ sa ɔ; nakoso m’ahennie ne offi wiase wa.” 37Yeɛ Pilato bisale ye kyɛ, “Yiti ɛte ɛhene ɛne?” Na Yesu buale kyɛ, “Wɔ yeɛ ɛkã kyɛ nde ɛhene ɔ. Me de, ɛhe ati yeɛ bɛwole me ɔ, na ɛhe ati yeɛ mawa wiase ɔ, kyɛ mebaali nahorɛ ne nwo adanzeɛ. Na ebiala bɔ ofi nahorɛ ne anu ne, otie me dwirɛ.” 38#Luk 23.4 Na Pilato bisale ye kyɛ, “Nahorɛ, ye ole nzu?”

Bebua Yesu ewue foɛ

(Mateo 27.15-31; Marko 15.16-20; Luka 23.13-25)

Na ɔhane sɔ dwirɛ nen, afei ofite hɔle Yudafoɛ nemɔ berɛ bieku, na osele bɛ kyɛ, “Me de, mennwu foɛ biala bɔ odi ɔ. 39Nakoso yeɛ ɛmɔle amanneɛ kyɛ meyakyi sona ko mema ɛmɔ Abɔtra aluolue mmerɛ nu. Yiti ɛmɔkuro kyɛ meyakyi Yudafoɛ Hene ne mema ɛmɔ anaa?” 40#Aso 3.14 Na bɛteateane nu bieku kyɛ, “Nna akoaa he ɔ, na mmom Baraba!” (Né Baraba te awerɔm awueniɛ.)

Currently Selected:

Yohane 18: EBP

Highlight

Copy