Gaoi 3
3
Fakamauli o se tagata kito
1Na pale fakatasi Petelo mo Soane ki le fale tapu, i le ola o le faikole : Ko le ola tolu lena o le sili lalatea.
2Ti na i ai se tagata kito mei lona tupu, leia na aumai i aso fuli, o tuku i mua o le matapa lasi o le fale tapu, leia na igoa ko Fulumalie, o tupu ke kaiisi paaga i ai kia latou ala na ulu ki le fale tapu. 3Ko le tagata lena, i lana tio kia Petelo mo Soane ala ka ulu ki le fale tapu, na kaiisi paaga loa kia laua. 4Ti na tio fakamaumau loa Petelo mo Soane kiate ia, o pati : Tio mai kia maua. 5Ti na tio tokaga a ia kia laua, o amanaki ke tali e ia se nea meia laua. 6Ti na pati loa Petelo kiate ia : E leaise kau maua se paaga pe ko se aulo ; kae ko le nea leia e kau maua, e kau soli atu a ia kiate koe : I le suafa o Sesu-Kilisito mei Nasaleti, tuu ki aluga, o saele. 7Ti na too loa e Petelo lona lima atamai, o fakatuu a ia ki aluga. I le temi fai lena, na makeke loa ona vae mo ona fatuvae ; 8ti na sopo aifai a ia ki aluga o tuu, ti na kamata saele loa a ia. Na ulu loa a ia mo laua ki le fale tapu, o saele, mo soposopo, ti mo fakavikiviki ki le Atua.
9Ti na tio loa le kakai katoa kiate ia, kua saele mo fakavikiviki ki le Atua. 10Ti na lotou iloa ko ia leia na tonatona i le matapa Fulumalie o le fale tapu, o kaiisi paaga i ai, ti na lotou apele loa i le punamauli mo le i o tupu ko le nea kua soko kiate ia. 11Kae tupu na leaise mavae a ia ia Petelo mo Soane, na feoso ake loa le kakai katoa kia latou, i lolatou punamauli, ki le Poletike, leia na fakaigoa kia Salomone.
Masau a Petelo
12Ko Petelo, i lana tio ki le nea lena, na masau loa ki le kakai, o pati : Tagata Iselaele, kolea e kotou punamauli ai ki le nea leinei ? Kolea e kotou tio fakamaumau mai ai kia maua, o sakinake kua ma fakasaele le tagata leinei i loma makeke pe i loma tausi malie ki le Atua ? 13Ko le Atua o Apalaamo, mo Isaake, mo Sakopo, ko le Atua o otatou tamana, kua fakakololia ia lana tagata fakasausau ko Sesu, leia na kotou fakatau mo fakafiti ki ai i mua o Pilato, i le lakaga leia na fakatotonu ai e ia ke fakamauli Sesu. 14Kae ko koutou, na kotou fakafiti ki le Maokioki mo le Agatonu, ti na kotou kole ke fakamauli atu kia koutou se tagata tukipo. 15Na kotou tamate le Tupuaga o le mauli, leia kua fakatuuake e le Atua mei le kau mate, ti ko le kau fakamaoki matou ki ai. 16Ti ko lona suafa, ko le tui ki lona suafa, leia kua fakamakeke ia a ia leia e kotou tio ki ai mo iloa ia ; io, ko le tui kia Sesu leia kua soli ia ki le tagata leinei le malolo ki lona tino katoa, i mua okoutou fuli.
17Ti ko leinei, fetaina, e kau iloa na kotou fai i le fakapouli, ti e tatau foki mo okoutou pule. 18Kae i le nea lena kua fakasoko e le Atua le nea leia na fakasa fakatomua e ia i le gutu o ana polofeta fuli, e tonu ke mamae lona Kilisito.
19Koia kotou fakasemala mo kotou tafoki, ke fakamolemole ai akoutou agasala, 20o tupu ke soko mai ni aso o le fakamauli mei mua o le Aliki, ti ke kakau mai e ia Sesu-Kilisito, leia na fakatuutuu e ia mei mua kia koutou, 21leia e tonu ke tali e Selo o kaku ki aso o le toe fakafoou o nea fuli, leia na masau ki ai le Atua i le gutu o ana polofeta maokioki o le temi mua. 22Na pati Moisese : Ko le Aliki lokoutou Atua e fakanofo ia loa mei okoutou fetaina se polofeta kia koutou ofaipe au ; e kotou fakalogo loa kiate ia i nea fuli ala e fakasa atu loa e ia kia koutou, 23ti ko leia e leaise fakalogo loa ki le polofeta lena, e motusi loa a ia mei lotomalie o lona kakai. 24Io, na masau le kau polofeta katoa, meia Samuele ki muli, o fakasa a aso anei. 25Ko vosa koutou o le kau polofeta ti mo le fakapapau leia na fai e le Atua mo otatou tamana, i lana pati kia Apalaamo : E tapuakina loa a famili fuli o le malama nei i lou sakoga. 26Koia na fakatuu ai e le Atua lana tagata fakasausau ko Sesu kia koutou mua, ti kua kakau mai e ia a ia ke tapuaki kia koutou ki le tafoki o le tagata taki toka tasi mei ana agaveli.
Currently Selected:
Gaoi 3: FB2000
Highlight
Share
Copy
Want to have your highlights saved across all your devices? Sign up or sign in
© Société Biblique de Genève, 2000-2020
