Gaoi 4
4
Petelo mo Soane i mua o le fono lasi
1Koi lolotoga masau Petelo mo Soane ki le kakai, kae na feoso ake loa le kau tagata faisakilifisio mo le pule o le fale tapu, ti mo le kau Satuseo, 2i lolatou ita i lala akonaki ki le kakai, o fakasa le toe tuuake o Sesu mei le kau mate. 3Ti na lotou too loa laua, o velo ki le pilisoni o kaku ki leia ake aso ; talie ko le afiafi lena. 4Kae na tui loa se toka api o latou ala na logo ki le folafola, ti na lau loa ki tino afe e lima le api o tagata.
Masau a Petelo ki le fono lasi
5I leia ake aso, na fakatasi loa ki Selusalemi le kau pule o le kakai, mo le kau fakamatuatua, mo le kau sekelipa, 6mo Anasi, ko le pule faisakilifisio, mo Kaifa, mo Soane, mo Alesatelo mo latou fuli ala na kau ki le sakoga o le kau pule faisakilifisio. 7Ti na lotou fakatuu loa Petelo mo Soane i lotomalie o latou, ti na lotou vesili loa kia laua : Ko le makeke fea, ti ko le suafa o ai, leia na kolua fai ai le nea lena ?
8Ti ko Petelo, na apele i le Laumalie Maokioki, na pati loa kia latou : Kau pule o le kakai, mo kau fakamatuatua o Iselaele, 9talie kua fakavesili maua i le aso nei o tupu ko se gaoi malie kua fai ki se tagata masaki, o tupu ke ma fakasa pe na feaki lona fakamauli, 10ke kotou iloa fuli, ti ke iloa e le kakai katoa o Iselaele : Ko le igoa o Sesu-Kilisito mei Nasaleti, leia na kotou tutuki i le koluse, kae kua toe fakatuuake e le Atua mei le kau mate, ko ia leia kua tuku ia le malolo katoa ki le tagata leinei e tuu i okoutou mua.
11Ko Sesu
Ko le fatu leia na tiaki e koutou ala na laga ia,
Ti kua liliu a ia ko le fatu tafito o le agele.
12E leaise fakamauli i se tasi kese, talie e leaise se tasi ake igoa i le lalo lagi nei kua soli ki le tagata, leia e tonu ke tou mauli ai.
Tapu o le akonaki i le suafa o Sesu
13I lalatou tio ki le tuu makeke o Petelo mo Soane, na lotou punamauli ai, talie na lotou iloa ko ni tagata laua o le kakai, ala na leaise sekola ; ti na lotou iloa na la nonofo mo Sesu. 14Kae i lalatou tio ki le tuu o le tagata leia kua fakamauli i ola tafa, na leaise lotou maua ia loa se tali. 15Ti na lotou fakatotonu loa kia latou ke lotou mavae ki fafo mei le fono lasi, kae lotou fonofono mua ia latou tefua, o pati : Kolea loa le nea leia e tonu ke tou fai ki tagata ana ? 16Talie kua sa ki le kakai katoa o Selusalemi kua la fai le milakulo lasi lena, ti e leaise mafai ke tou fakafiti ki ai. 17Kae, o tupu ke aua na toe mafola le nea leinei i le kakai, tou tapui fakamakeke kia laua le toe masau ki se tasi ki le igoa lena. 18Ti na lotou kalagai loa laua, ti na lotou tapui fakamakeke loa kia laua le masau mo le akonaki i le suafa o Sesu. 19Ti na tali loa Petelo mo Soane kia latou : Kotou tio pe totonu i mua o le Atua ke ma fakalogo ake kia koutou i le Atua ; 20talie e leaise mafai ke aua na ma masau ki le nea leia kua ma tio mo logo ki ai. 21Na lotou toe fai loa kia laua ni iki fakaii foou, ti na lotou tuku loa laua ke ano, talie na leaise lotou iloa se nea ke fakatua ai laua, o tupu ko le kakai ; talie kua fakakololia le kakai katoa ki le Atua o tupu ko le nea leia kua soko. 22Talie kua fetuu kau fa tupu le tagata leia na soko ki ai le milakulo lena.
Faikole a le kau kilisiteano
23I lola tuku ake, na la ano loa ki ola kaukaunea o fakamatala kia latou a nea fuli ala na pati ake ki ai le kau pule faisakilifisio mo le kau fakamatuatua. 24I lalatou logo ki le fakamatala lena, na lotou siki ake loa ki le Atua olatou leo, e latou fuli fakatasi, o pati : Aliki, ko koe leia na fakatupu ia le lagi, mo le kele, mo le tai, mo nea fuli ala e maua i ai,
25ko koe leia na fakasa ia i le Laumalie Maokioki, i le gutu o lomatou tamana, lau tagata fakasausau ko Tavite :
Kolea le maveuveu lena i puleaga,
Ti mo ni manatu vaiga ana i kakai ?
26 Kua malaga ki aluga a sau o le malama nei,
Ti kua fakatasi a pule
Oagatuu ki le Aliki mo lona Kilisito.
27Talie e maoki na fakatasi Elote, mo Posio Pilato i le kolo leinei, mo atu puleaga, ti mo kakai o Iselaele, o agatuu ki lau tagata fakasausau maokioki ko Sesu, leia na ke fakanofo, 28o fai a nea fuli ala na fakatuutuu fakatomua e lou lima ti mo lou poto. 29Ti ko leinei, Aliki, tio ki alatou fakaii, ti ke tuku ki au tagata fakasausau ke lotou fakasa lau folafola i le makeke katoa, 30o falo lou lima, o tupu ke fai ni fakamauli, mo ni milakulo, ti mo ni nea fakaofolele i le suafa o lau tagata fakasausau maokioki ko Sesu.
31I le oki o lalatou faikole, na galulu loa le ganea leia na lotou fakatasi ai ; ti na lotou apele fuli loa i le Laumalie Maokioki, ti na lotou fakasa loa le folafola a le Atua i le makeke katoa.
Mauli vaevae o le kau kilisiteano
32Na loto tasi mo laumalie tasi latou fuli ala na tui. Ti na leaise pati se tasi ko nea ala e maua e ia ko ana nea, kae na fakatasi alatou nea fuli. 33Ti na fakamaoki le kau apositolo ki le toe tuuake o le Aliki Sesu i le makeke katoa, ti na nofo ia latou fuli se kalasia lasi. 34Talie na leaise tasi fua ia latou na fakaaloalofa : ko latou fuli ala na maua ia ni kele pe ko ni fale na fakatau ia latou, ti na lotou aumai le totogi o nea ala kua lotou fakatau, 35o tuku ki vae o le kau apositolo ; ti na fai loa ni tufa kia latou taki toka tasi o mulimuli ki le nea leia e aoga kiate ia.
36Ko Sosefo, leia na fakaigoa e le kau apositolo ko Palenapa, (ko lona uiga ko le vosa o le fakapelepele), tagata Levita, mei le motu ko Sipele, 37na fakatau ia loa se faisaga leia na maua e ia, ti na aumai loa e ia le paaga, o tuku ki vae o le kau apositolo.
Currently Selected:
Gaoi 4: FB2000
Highlight
Share
Copy
Want to have your highlights saved across all your devices? Sign up or sign in
© Société Biblique de Genève, 2000-2020
