Luka 17

Agasala, fakamolemole, tui

1Na pati loa Sesu ki ana tisipulo : E leaise mafai ke aua na soko ni fakasala, kae malaia ki leia e fakatupu ia latou ! 2E malie ake kiate ia ke nonoa se fatufuaga ki lona ua, ti ke ti a ia ki le moana, i lana fakasalai se tasi i ga toe liliki anei. 3Kotou tokaga kia koutou totonu. Kapau na sala lou taina kiate koe, valoki a ia ; ti kapau e fakasemala a ia, fakamolemole kiate ia. 4Ti kapau e sala a ia kiate koe o tua fitu i se aso e tasi, kae toe liliu tua fitu atu a ia kiate koe, o pati : e kau fakasemala ! e ke fakamolemole loa kiate ia.

5Na pati loa le kau apositolo ki le Aliki : Fakalasi lamatou tui. 6Na pati loa le Aliki : Kapau e lasi lakoutou tui ofaipe se fatui sinapi, e kotou pati loa ki le sikomole lena : Mataaki a koe, o vilo ki le moana ; ti e fakalogo atu loa a ia kia koutou.

Maua o le tagata fakasausau

7Ko ai leia ia koutou, e maua ia sana tagata fakasausau leia na gaoi kele pe na fagai manu, e pati loa kiate ia mo ka toe liliu mai a ia mei faisaga : Au fakatavili, ti ke eke ki le laupapa, o kai ? 8Pe leaise pati loa a ia kiate ia : Teuteui mai kiate au se nea kai, tui ou kofu o takatuu mai kiate au, ke kau kai mo inu ; kao oki a ia, tio ke kai mo inu loa ? 9Pe maua ke fakafetai a ia ki le tagata fakasausau lena talie na fai e ia le nea leia na fakatotonu kiate ia ? 10Ko koutou foki, ka kua kotou fai loa a nea fuli ala na fakatotonu atu kia koutou, ti kotou pati : Ko ni tagata fakasausau lee aoga matou, kua motou fai le nea leia na tonu ke motou fai.

Fakamauli o kilia e tino agafulu

11Ko Sesu, i lana ano ki Selusalemi, na fakalaka loa i le koiga o Samalia mo Kalilea. 12Ti na ulu loa a ia ki se kolo, ti na au loa ni tagata kilia e tino agafulu o fakafetaulaki mai kiate ia. Na lotou tutuu loa mei mamao, ti na lotou kalaga loa, o pati : 13Sesu, pule, alofa mai kia matou ! 14I le tio a Sesu kia latou, na pati loa a ia kia latou : Kotou ano o fakasa koutou ki le kau tagata faisakilifisio. I lalatou ano, na lotou mauli loa i lolatou kilia. 15Ko se tasi o latou, i lana tio ake kua malie lona kilia, na toe liliu a ia loa, o fakakololia ki le Atua o leo lasi. 16Na punou loa a ia ki le kele i vae o Sesu, o fakafetai kiate ia. Ko se tagata Samalitana a ia. 17Na masau loa Sesu, o pati : Pe na leaise mauli fuli le tino agafulu ? Ti kofea leia ake toka iva ? 18Pe gato fai ki le matapule leinei kua toe liliu mai o fakakololia ki le Atua ? 19Ti na pati loa Sesu kiate ia : Tuu ki aluga, ano ; kua fakamauli a koe e lau tui.

Puleaga o le Atua i le temi nei

20Na vesili loa le kau faliseo kia Sesu pe au fakaa loa le puleaga o le Atua. Na tali loa a ia kia latou : E leaise au le puleaga o le Atua ke feala ke tio ki ai. 21E leaise pati loa : E nofo a ia i leinei, pe : E nofo a ia i lena. Talie ko leinei e nofo le puleaga o le Atua i loto malie o koutou.

Fakasa o lana toe liliu mai

22Ti na pati loa Sesu ki le kau tisipulo : E soko mai loa ni aso ala e kotou oli ai ke kotou tio ki se aso e tasi o aso o le Vosa o le tagata, kae e leaise kotou tio loa ki ai. E pati atu loa kia koutou : 23E nofo a ia i leinei, e nofo a ia i lena. Aua na kotou ano ki ai, ti aua na kotou makape i muli. 24Talie, ofaipe le uila e tapa mei le tasi potu lagi o fakamalama le tasi potu lagi, e toe fenaaki loa le Vosa o le tagata i lona aso. 25Kae e tonu ke mamae lasi a ia i mua, ti ke tiaki a ia e le tautupu nei.

26Ko nea ala na soko i le temi o Noe, e toe soko loa i aso o le Vosa o le tagata. 27Na kai mo inu a tagata, mo avaga ti mo fakaavaga alatou fanau, o kaku ki le aso leia na ulu ai a Noe ki le aleka ; ti na to loa le lomaki, o lotou mamate fuli ai. 28Ko le nea leia na soko i le temi o Lote, e toe soko loa. Na kai a tagata, mo inu, mo totogi, mo fakatau koloa, mo to, mo fau ; 29kae i le aso leia na mavae ai a Lote i Sotoma, na to loa se ua afi mo se ua sulifa mei le lagi o tamate fuli latou. 30E toe tatau loa i le aso leia e sa mai ai loa le Vosa o le tagata.

31I le aso lena, ko leia e nofo loa i le taufufu o lona fale kae tuku ona nea i le loto fale, ke aua na ifo loa a ia o too latou ; ti ko leia e nofo loa i faisaga ke aua na toe liliu loa a ia ki muli. 32Kotou manatui le avaga o Lote. 33Ko leia e afa ke saofaki lona mauli e fakapuli ia loa a ia, kae ko leia e fakapuli ia loa a ia e toe maua ia loa a ia. 34E kau fakasa atu kia koutou, i le pouli lena, i se fa toka lua ala e momoe loa i se palepale, e too loa le tasi kae tuku loa le tasi ; 35I ni fafine e toka lua ala e fakamaluu ia le fulumeto, e too loa le tasi kae tuku loa le tasi. 36I ni tagata e toka lua ala e nonofo i se faisaga, e too loa le tasi kae tuku loa le tasi.

37Na vesili loa le kau tisipulo kiate ia : Aliki, e soko loa ifea a nea ana ? Ti na tali loa Sesu : I le ganea leia e tuku ai le tino mate, e katoa ai loa a votu.

Currently Selected:

Luka 17: FB2000

Highlight

Copy