SENESI 23
23
Mate mo te tanu o Sala
1Ko te mauli o Sala nee tau teau uafulu ma fitu: ko te lahi aia o te u tau o te mauli o Sala.
2Nee mate leva ia Sala i Kiliate-Alepa, ae ko Hepelone, i te fenua o Kanaane; pea nee fai leva e Apalahamo te putu o Sala, pea nee tagi leva ia ia kia ia. 3Nee tuu ake leva ia Apalahamo ia mua o tona mate, o palalau fenei ki te u foha o Eti: 4Ko au ko he matapule ae e nofo i te lotolotoga o koutou; kotou foaki mai kia au he tanuma i tokotou kele, ke au tanu ai taku mate, pea ke au too ia ia mai oku mua. 5Nee tali leva e te u foha o Eti kia Apalahamo, o ui: 6Aliki! Fakalogo mai kia matou: Ko he aliki ia koe a te Atua i lotomalie o matou; ke ke faitaliha o tanu tau mate i he tanuma pe ae e ke loto ki ai i omatou tanuma; e mole he tahi o matou e fakafisi atu anai kia koe tona tanuma ke tanu ai tau mate. 7Nee tuu ake leva ia Apalahamo o punou ia mua o te hahai o te fenua, i mua o te u foha o Eti. 8Pea nee palalau leva ia ia kia natou, o ui: Kapau e koutou fakagafua mai kau tanu taku mate, pea ke au too ia ia mai oku mata, ke koutou fakalogo mai kia au pea ke koutou kole kia Efelone, foha o Tesokale, 9ke ina tuku mai kia au te ana o Makepela, ae e ina mau i te taupotu o tana gaueaga, ke ina foaki mai kia au ke au totogi paaga, pea ke liliu ia ko toku tanuma i lotomalie o koutou. 10Nee lala leva ia Efelone mo te u foha o Eti. Pea nee tali leva e Efelone, ko te tagata Eti, kia Apalahamo, ia mua o te u foha o Eti mo natou fuli ae nee feulufi i te matapa o tona kolo: 11Aliki, fakalogo mai kia au, e mole au tali ke ke totogi. E au tuku atu te gaueaga, pea e au tuku atu mo te ana ae e tuu i ai. E au foaki noa atu te u mea aena kia koe, ia mua o te u foha o taku hahai: ke ke tanu ai tau mate. 12Nee punou leva ia Apalahamo ia mua o te hahai o te fenua. 13Nee palalau leva ia ia kia Efelone i mua o te hahai o te fenua, o ui: E au kole atu kia koe ke ke fakalogo mai kia au: e au foaki atu te totogi o te gaueaga, ke ke tali ia ia, pea e au tanu anai i ai taku mate. 14Pea nee tali leva e Efelone kia Apalahamo: 15Oi toku aliki, fakalogo mai kia au! Ko he kele e fageau paaga siliva, kotea te uhiga o te mea aena i toku vahaa mo koe? Koia, ke ke tanu i ai tau mate. 16Nee mahino leva ia Apalahamo kia Efelone; pea nee fua leva e Apalahamo kia Efelone te lahi o te paaga ae nee ina fakaha ia mua o te u foha o Eti, ko te paaga siliva e fageau, i te paaga ae nee fakaaoga e te kau faikoloa.
17Ko te gaueaga a Efelone ae i Makepela, i te potu esite o Mamele, te gaueaga mo te ana ae nee tuu i ai, pea mo te u ulu akau fuli ae nee tuu i loto o te gaueaga, 18nee mau fuli leva natou e Apalahamo, o fakamooni ki ai te u foha o Eti mo natou fuli ae nee ulu i te matapa o te kolo. 19I te osi o te mea aena, nee tanu leva e Apalahamo ia Sala, tona ohoana, i te ana aena nee tuu i te gaueaga o Makepela, i te potu esite o Mamele ae ko Hepelone, i te fenua o Kanaane. 20Nee fakalaka leva te gaueaga mo te ana ae nee tuu i ai maia nima o te u foha o Eti, o liliu leva ko te kele o Apalahamo ke tanu ai ana mate.
Currently Selected:
SENESI 23: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
