SENESI 24
24
Kumi o he ohoana kia Isaake
1Nee matua leva ia Apalahamo, pea nee lahi osi ona tau; pea nee tapuaki te Eteleno kia Apalahamo ia mea fuli.
2Nee ui leva e Apalahamo ki tana tagata faifekau, ae nee matua i tona fale, ae nee pule ki ana mea fuli. E au kole atu kia koe ke ke hohoaki mai tou nima ki lalo o toku kauaga; 3e au loto ke ke fakapapau ki te Eteleno, ko te Atua o te lagi pea ko te Atua o te kele, ke aua naa filifili anai ki toku foha he fafine i te u taahine o te kau Kanaane ae e au nofo ai, 4kae ke ke alu ki toku fenua, ki toku fale o filifili mai ai he ohoana ki toku foha ko Isaake. 5Nee tali leva e te tagata faifekau kia ia: Pea kapau anai e mole loto te taahine ke hau mo au ki te fenua aeni, pe e tonu anai ke au ave tou foha ki te fenua ae nee ke mavae mai ai? 6Nee tali leva e Apalahamo kia ia: Aua pe naa ke ave ki ai toku foha! 7Ko te Eteleno, te Atua o te lagi, ae nee ina fakamavae au mai te fale o taku tamai mo toku fenua, ae nee palalau mai kia au o fakapapau fenei mai: E au foaki anai te fenua aeni ki tou hakoga. E ina fekaui totonu anai tana aselo i ou mua; pea e ke aumai anai mai te kogamea aena he ohoana ki toku foha. 8Pea kapau e mole loto anai te fafine ke hau, pea e ke lauatea anai i te fakapapau ae e ke fai mai anai kia au. Kae ke aua naa ke ave toku foha ki te fenua aena. 9Nee tuku leva e te tagata faifekau tona nima ki lalo o te kauaga o Apalahamo, ko tona aliki, pea nee ina fakapapau leva kia ia ke fai te u mea aia.
10Nee too leva e te tagata faifekau ni kamelo e hogofulu i te u kamelo o tona aliki, o hili ki ai te u koloa lelei fuli o tona aliki, pea nee alu leva ia. Nee faifagona ia ia ki Mesopotamia, ki te kolo o Nakole. 11Pea nee kaku leva ia ia ki he vaikeli i te tua kolo, pea nee ina fakamalolo leva ana kamelo i ona tafa. Ko te temi aia o te afiafi, ae e olo ai te u fafine o ohu vai. 12Pea nee ina ui leva: Eteleno, Atua o toku aliki ko Apalahamo, e au kole atu kia koe ke ke ofa o fakafelavei au i te aho nei mo ia ae e au loto ki ai. Pea e ke fakaha anai i ai tou ofa ki tau tagata faifekau ko Apalahamo! 13Koeni, e au tuu anai ia tafa o te matapuna vai, pea e omai anai te u taahine o te hahai o te kolo o ohu vai. 14Ko te taahine ae e au ui anai ki ai: E au kole atu kia koe, ke ke momoli mai mua tau hina vai ke au inu, pea ka ina tali mai anai: Inu, pea e au toe foaki foki ke inu au kamelo, ke liliu ia ia ko te fafine ae kua ke fakatuutuu ki tau tagata faifekau ko Isaake! Pea e au iloi anai i te mea aena e ke ofa ki toku aliki.
15Nee heeki osi tana palalau, kae koeni ia Lepeka kua hau, ko te taahine o Petuele, mo tana foi hina e hili mai i tona fugauma. Ko Petuele ko te tama a Milika mo Nakole ae ko te tehina o Apalahamo. 16Nee matalelei osi te taahine; pea nee nofo taupoou ia ia, koteuhi nee heeki ina iloi he tagata. Nee hifo leva ia ia ki te vaikeli, o uutu ake tana foi hina vai, pea nee hake ake leva ia ia. 17Nee lele leva te tagata faifekau ki ona mua, o ui: E au kole atu kia koe, ke ke foaki mai ke au inu he kii moi vai i tau foi hina vai. 18Nee tali leva e te taahine: Inu, oi toku aliki! Pea nee ina tuku fakavilivili ki lalo tana foi hina, o ina taofi aki ona nima ke feala ai tana inu. 19I te osi o tana fakainu ia ia, nee ui leva e te taahine: E au toe alu foki o ohu mai ke iinu au kamelo o kaku ki tonatou malie fuli. 20Nee fakavilivili leva ia ia, o liligi tana foi hina ki te kogamea inu o te u manu, kae nee toe lele leva ia ia ki te vaikeli, o ohu vai mai ai. Nee ina ohu leva o fakainu te u kamelo fuli.
21Nee sio punamauli osi te tagata kia ia, kae nee mole palalau ia ia, koteuhi nee ina fia iloi pe kua fakamanuia mooni e te Eteleno tona fagona pe kailoa. 22I te osi o te iinu a te u kamelo, nee too leva e te tagata he mama aulo, ko tona mamafa ko te vaelua o te foi paaga siliva e tahi, pea mo te u vesa aulo e lua, ko tona mamafa ko te hogofulu foi paaga aulo. 23Pea nee ina ui leva: E au kole atu ke ke fakaha mai pe ko te ofafine koe o ai? Pe e mau i te fale o tau tamai he kogamea ae ke au nofo ai i te po aeni? 24Nee tali leva e te taahine: Ko te ofafine au o Petuele, ko te foha o Milika mo Nakole. 25Pea nee ina toe ui leva kia ia: E mau i tomatou fale he luna moamoa mo he meakai lahi ki te u manu, pea mo he kogamea ae ke natou malolo ai i te pouli. 26Pea nee tulolo leva te tagata ki te kele o atolasio ki te Eteleno, 27o ui: E au fakafetai ki te Eteleno, ko te Atua o toku aliki ko Apalahamo, koteuhi kua ina fakaha mai tona ofa mo tona agatonu ki toku aliki! Kua taki e te Eteleno toku fagona ke au kaku totonu ki te fale o te u tehina o toku aliki.
28Nee lele leva te taahine o fakamatala te u mea fuli aena i te fale o tana fae.
29Kae nee i ai he tuagaane o Lepeka ae nee higoa ko Lapane. Pea nee lele leva ia Lapane ki te tagata faifekau ia tafa o te vaikeli. 30Nee sio leva ia ia ki te mama mo te u vesa ia nima o tona tuagaane, pea nee logo leva ia ia ki te palalau o tona tuagaane ko Lepeka, o fakamatala te u palalau a te tagata kia ia. Nee ina mau te tagata mo ana kamelo ia tafa o te vaikeli. 31Pea nee ina ui leva: Hau, oi tapuakina a te Eteleno! Kotea ae e ke nofo ai i fafo? Kua au teuteui te fale, mo he nofoaga ki au kamelo. 32Nee kaku leva te tagata ki te fale. Pea nee too leva e Lapane te u kavega i te u kamelo, pea nee ina foaki leva he luna moamoa mo te meakai ki te u kamelo, pea mo he vai ke fufulu ai te u vae o te tagata faifekau pea mo te u vae o natou ae nee omai mo ia. 33Pea nee ina tuku leva he meakai ki ona mua. Kae nee ui leva e te tagata: E mole anai au kai ia mua o te fakaha o te mea ae e tonu ke au palalau ki ai. Nee ui leva e Lapane: Palalau!
34Pea nee ina ui leva: Ko te tagata faifekau au a Apalahamo. 35Kua tapuaki aupito te Eteleno ki toku aliki, pea kua liliu ia ia o malohi. Nee foaki e te Eteleno kia ia ni faga ovi mo ni faga pipi, mo he siliva pea mo he aulo, mo ni kau tagata faifekau pea mo ni fafine faifekau, mo ni faga kamelo, pea mo ni faga asino. 36Nee fanaui foki e Sala, te ohoana o toku aliki, i tona matua, he foha ki toku aliki; pea kua tuku e Apalahamo kia ia ana mea fuli. 37Nee fakatotonu mai e toku aliki kia au ke au fakapapau age kia ia te mea aeni; nee ina ui mai: Aua naa ke filifili he ohoana ki toku foha i te u taahine o te kau Kanaane, i te fenua ae e au nofo ai; 38kae ke ke alu ki te fale o taku tamai, ki toku famili totonu, o filifili mai ai he ohoana ki toku foha. 39Nee au ui leva ki toku aliki: Pea kapau e mole loto anai te fafine ke hau mo au? 40Pea nee ina tali mai kia au: Ko te Eteleno, ae nee au haele ai i ona mua, e ina fekaui anai tana aselo i ou mua, pea e ina fakamanuia anai tou fagona, pea e ke filifili anai he ohoana ki toku foha i te famili mo te fale o taku tamai. 41E ke ateaina anai i te fakapapau, i te aho ae e ke kaku ai ki toku famili; pea kapau e mole foaki atu anai kia koe te mea ae e ke kole ki ai, e ke ateaina anai i te fakapapau ae e ke fai mai kia au. 42Nee au tau mai i te aho nei ki te matapuna vai, pea nee au ui: Eteleno, ko te Atua o toku aliki ko Apalahamo, kapau e ke ofa o fakamanuia toku fagona, 43koeni, e au tuu ia tafa o te matapuna vai, pea ko te taahine ae e hau anai o ohu vai, pea e au ui anai ki ai: E au kole atu kia koe ke ke tuku mai mua ke au inu he vai i tau foi hina, pea e tali mai anai kia au: 44Inu, pea e au toe ohu anai ke iinu au kamelo; ke liliu te taahine aena ko te ohoana ae nee fakatuutuu e te Eteleno ki te foha o toku aliki! 45Nee heeki osi taku palalau i toku loto, kae koeni ia Lepeka nee hau mo tana foi hina e hili i tona fugauma. Nee hifo leva ia ia ki te vaikeli o ohu vai. Nee au ui leva kia ia: E au kole atu, ke ke foaki mai ke au inu! 46Nee ina too fakavilivili tana foi hina i tona kia, pea nee ina ui leva: Inu, pea e au toe ohu anai ke iinu au kamelo. Nee au inu pea nee ina toe foaki foki ke iinu aku kamelo. 47Nee au fehui leva kia ia: Ko te taahine koe a ai? Nee ina tali: Ko te taahine au a Petuele, ko te foha o Nakole mo Milika. Nee au fakapipiki leva te mama ki tona ihu, pea mo te u vesa ki ona nima. 48Pea nee au tulolo leva ki te kele o atolasio ki te Eteleno. Pea nee au fakafetai ki te Eteleno, te Atua o toku aliki ko Apalahamo, ae nee agatonu o takitaki mai au, o tupu ke au too ki tona foha te taahine o te tehina o toku aliki. 49I te lakaga nei, kapau e koutou fia fakaha tokotou ofa mo tokotou agatonu ki toku aliki, ke koutou fakaha mai te mea aena kia au; pea kapau e kailoa, ke koutou fakaha mai, pea e au afe anai ki te fahai matau pee ko te fahai hema.
50Nee tali leva e Lapane mo Petuele: E hau te mea aia mai te Eteleno; e mole feala ke ma fai he palalau kia koe pe e kovi pee lelei o uhiga mo te mea aena. 51Koeni ia Lepeka i ou mua; too ia ia pea ke alu, pea ke liliu ia ia ko te ohoana o te foha o tou aliki, o fai ki te mea ae nee ui ki ai e te Eteleno. 52I te logo a te tagata faifekau a Apalahamo ki ana palalau, nee tulolo leva ia ia o kaku ki te kele, ia mua o te Eteleno. 53Pea nee too leva e te tagata faifekau ni mea fakateuteu siliva, mo ni mea fakateuteu aulo, pea mo ni kofu, o foaki kia Lepeka; pea nee ina toe fai foki ni meaofa mauhiga ki tona tuagaane mo tana fae. 54I te osi o te mea aia, nee natou kakai leva mo iinu, ia ia mo te hahai ae nee olo mo ia, pea nee natou malolo leva i te pouli. I te ala uhu ake, nee natou tutuu ake leva, pea nee ui leva e te tagata faifekau: Ke kolua tuku la ke au toe liliu ki toku aliki. 55Nee ui leva e te tuagaane mo te fae: Ke toe nofo mua te taahine mo matou i he kii temi siisii pe, i ni kii aho pe e hogofulu; pea osi, pea ke alu leva. 56Kae nee ina tali leva kia naua: Ke aua naa kolua fakatuai au, koteuhi kua fakamanuia e te Eteleno toku fagona; ke kolua tuku au ke au alu, pea ke au toe liliu ki toku aliki. 57Pea nee na tali leva: Ke tou paui mua te taahine, pea ke tou fehui kia ia pe kotea tona loto. 58Nee na paui leva ia Lepeka, o na ui kia ia: Pe e ke loto ke ke alu mo te tagata aeni? Nee ina tali leva ki ai: E au alu anai. 59Pea nee na tuku leva ke alu ia Lepeka ko tona tuagaane mo tana fafine tauhi, mo te tagata faifekau a Apalahamo, pea mo tana hahai. 60Nee na tapuaki leva kia Lepeka, o ui kia ia: Oi sioma tuagaane, ke ke liliu ko he fae a ni toko afe pea mo miliate, pea ke pule tou hakoga ki te matapa o ona fili! 61Nee tuu ake leva ia Lepeka ki oluga mo ana fafine faifekau, pea nee natou heheka leva ki ni kamelo, o mulimuli i te tagata faifekau. Pea nee ave leva ia Lepeka e te tagata faifekau, pea nee natou olo ai leva.
62I te temi aia, nee mavae age leva ia Isaake i te vaikeli o Lasai-Loi, pea nee nofo leva ia ia i te fenua o te potu saute. 63I he afiafi ae nee alu ai leva ia Isaake o metitasio i te u gaueaga, nee hiki ake leva ona mata, pea nee sio ia ia: koeni, e kaku age ni kamelo. 64Nee sio leva ia Lepeka, pea nee sio leva ia ia kia Isaake, pea nee hifo leva ia ia ki lalo i tana kamelo. 65Nee ui leva e Lepeka ki te tagata faifekau: Ko ai te tagata aena e hau i te gaueaga o fakatautau mai kia tatou? Pea nee tali leva e te tagata faifekau: Ko toku aliki. Pea nee too leva e Lepeka tona pulou o puloui ai ona mata. 66Nee fakamatala leva e te tagata faifekau kia Isaake te u mea fuli ae nee ina fai. 67Pea nee taki leva e Isaake ia Lepeka ki te falela o tana fae ko Sala; nee too leva e Isaake ia Lepeka ke liliu ko tona ohoana. Nee ofa leva ia Isaake kia ia, pea nee fimalie leva tona loto i te puli o tana fae.
Currently Selected:
SENESI 24: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
