SENESI 30
30
1Nee sio leva ia Lasele nee mole ina mau ni fanau kia Sakopo, pea nee fuaa leva ia ia ki tona tehina, o ina ui leva kia Sakopo: Foaki mai kia au ni fanau, pe e au mate! 2Nee ita leva ia Sakopo kia Lasele, o ui: Pe ko au ko te Atua, ae nee ina mapunui ia koe ke aua naa ke fanaunau? 3Pea nee ui leva e Lasele: Koeni taku fafine kaugana ko Pila; alu kia ia, pea ke fanau ia ia i oku tuli ke au mau foki ni foha maia ia. 4Pea nee tuku leva e Lasele tana fafine faifekau ko Pila ke ohoana mo ia, pea nee alu leva ia Sakopo kia Pila. 5Nee faitama leva ia Pila, pea nee ina fanaui leva he tama kia Sakopo. 6Nee ui leva e Lasele: Kua tuku mai kia au e te Atua tona faitotonu, koteuhi kua logo ia ia ki toku leo, pea kua ina foaki mai kia au he tama. Pea nee ina fakahigoa leva te fanau ko Tane. 7Nee toe faitama leva ia Pila, fafine faifekau a Lasele, pea nee ina toe fanaui leva kia Sakopo he tahi tama. 8Nee ui leva e Lasele: Nee au tau i mua o te Atua ki toku tehina, pea kua au malo. Pea nee ina fakahigoa leva te fanau ko Nefetali.
9Nee sio leva ia Lea kua gata tana fanaunau, pea nee ina too leva tana fafine faifekau ko Silipa, o foaki ke toe ohoana mo Sakopo. 10Pea nee fanaui leva e Silipa, fafine faifekau a Lea, he foha kia Sakopo. 11Nee ui leva e Lea: Oi he manuia! Pea nee ina foaki leva ki tana tama te higoa ko Kate. 12Nee toe fanaui leva e Silipa, fafine faifekau a Lea, he tahi tama kia Sakopo. 13Nee ui leva e Lea: Kua lahi osi toku manuia! Koteuhi e ui anai e te u taahine kia au: E au manuia! Pea nee ina foaki leva ki tana tama te higoa ko Asele.
14Nee alu leva ia Lupeni i te temi tuusi o te fulumeto, pea nee ina mau leva ni fuai akau ko te matakole* i te u gaueaga. Pea nee ina aumai natou ki tana fae ko Lea. Nee ui leva e Lasele kia Lea: E au kole atu kia koe ke ke foaki mai kia au ni fuai akau mai te u fuai akau o tau tama. 15Nee tali leva e Lea kia ia: Pe e mole feauga kia koe tau too toku ohoana? Pe e ke loto foki ke ke toe too mo te u matakole o taku tama? Pea nee ui leva e Lasele: E lelei! E moe anai ia Sakopo mo koe i te po aeni ke totogi ai te u matakole o tau tama. 16I te afiafi, nee liliu ake leva ia Sakopo mai te u gaueaga, pea nee alu leva ia Lea o fakafelavei kia ia, o ui: E ke hau anai kia au, koteuhi kua au totogi ia koe aki ni matakole o taku tama. Pea nee na momoe leva i te po aia. 17Nee tali leva e te Atua te tagi a Lea, pea nee toe faitama leva ia ia, pea nee ina fanaui leva he tahi tama kia Sakopo, ko tona nima aia. 18Nee ui leva e Lea: Kua foaki e te Atua kia au toku totogi koteuhi nee au foaki taku fafine faifekau ki toku ohoana. Pea nee ina foaki leva te higoa ko Isakale ki tana tama. 19Nee toe faitama ia Lea, pea nee ina toe fanaui leva he tahi tama kia Sakopo, ko tona ono aia. 20Nee ui leva e Lea: Kua foaki mai e te Atua kia au he koloa matalelei, i te faiaga aeni, e nofo anai toku ohoana mo au, koteuhi kua au fanaui kia ia ni foha e toko ono. Pea nee ina fakahigoa leva ko Sapulone. 21Nee toe fanaui foki e Lea he taahine, pea nee ina foaki leva kia ia te higoa ko Tina.
22Nee manatui leva e te Atua ia Lasele, pea nee ina tali leva tana kole, o fakafanaunau leva ia ia. 23Nee faitama leva ia Lasele, pea nee ina fanaui leva he tama, pea nee ina ui leva: kua too e te Atua toku matagafua. 24Pea nee ina foaki leva te higoa ko Sosefo ki tana tama, o ui: Ke toe foaki mai e te Atua kia au he tahi foha!
Fakamaukoloa o Sakopo e te Atua
25I te osi o te fanaui e Lasele ia tana tama ko Sosefo, nee ui leva e Sakopo kia Lapane: Tuku mai la ke au alu, ke au toe liliu ki toku api, ki toku fenua. 26Tuku mai ke au alu mo oku ohoana pea mo aku fanau, ae nee au gaue ki ai i tou fale, koteuhi e ke iloi te lahi o te gaue nee au fai kia koe. 27Nee ui leva e Lapane kia ia: Kapau e ke ofa kia au, pea ke nofo i heni. E au iloi lelei nee tapuaki te Atua kia au o tupu ko koe; 28fakaha mai kia au te lahi o tou totogi, pea e au foaki atu anai ia kia koe. 29Nee ui leva e Sakopo kia ia: E ke iloi te lahi o taku gaue kia koe, pea mo te lahi o tau faga manu i taku tauhi ki ai; 30koteuhi kua tupu lahi osi te kii mea noa ae nee ke mau i mua i taku kaku mai kia koe; pea kua tapuaki te Eteleno kia koe i te aho ae nee ulu ai oku vae i tou fale. Pe e mole ko te temi aeni e tonu ke au gaue ai ki toku famili totonu? 31Nee ui leva e Lapane: Kotea te totogi ae e tonu ke au foaki atu kia koe? Pea nee tali leva e Sakopo: E mole ke foaki mai anai kia au he mea pe e tahi. Kae kapau e ke loto lelei ki te mea aeni e au ui atu anai ki ai, e au toe fafaga anai tau faga manu, pea e au toe taupau anai ia ia. 32I te aho nei, e au alu anai o ahiahi ki tau faga manu katoa; pea e au vahei kehe anai te u ovi fuli e pulepule liliki pee pulepule lalahi, mo te u akeno uli fuli, pea mo te u tao fuli e pulepule liliki pee pulepule lalahi. Ko toku totogi aia. 33E feala anai i apogipogi ke ke sio ki toku faitotonu, moka ke hau anai o sioi toku totogi. Ko te u tao fuli ae e mole pulepule liliki pee pulepule lalahi, pea mo te u ovi fuli ae e mole fulu uli, e lau anai natou ko te u manu kaihaa. 34Pea nee ui leva e Lapane: E lelei, ke fai ki te mea ae kua ke palalau ki ai. 35Kae i te aho pe aia nee vahei kehe leva e Lapane te u tao tagata fuli ae nee pulepule liliki mo pulepule lalahi, mo te u tao fafine fuli ae nee pulepule liliki mo pulepule lalahi, pea mo te u ovi fuli ae nee fulu uli mo pulepule liliki pee pulepule lalahi. Nee ina tuku leva te faga manu aia ki ona foha, 36pea nee ina fekau leva natou ke olo, pea nee natou haele leva lolotoga aho e tolu o tupu ke natou mamao maia Sakopo. Pea nee tauhi leva e Sakopo te u manu ae nee kei toe i te u faga manu a Lapane.
37Nee alu leva ia ia o tuusi ake ni vaa akau mata o te ulu akau ko te popelie* mo te amatie mo te palatane*. Nee ina fohi leva te kili i te tahi potu o te akau, o tupu ke ha te hihina o te sinoi akau. 38Pea nee ina tuku leva te u vaa akau aia kua osi i te fohi ki loto o te u kogamea inu o te u manu, o tupu ke sisio ki ai te u ovi fafine moka natou omai o iinu, pea ke natou fia ohoana ai. 39Nee fia ohoana leva te u ovi ia tafa o te u vaa akau, pea nee natou ohoana leva i ai, pea nee fanaui leva e te u ovi fafine ni uhi lanu sikasika mo ni uhi pulepule liliki mo pulepule lalahi. 40Pea nee vahei kehe leva e Sakopo te u akeno o ina fakatahii ae e pulepule mo ae e fulu uli i te faga manu a Lapane. Nee kamata fakatupu leva e Sakopo ana faga manu, o ina tuku kehe leva natou mai te faga manu a Lapane. 41I te u temi fuli ae nee fia ohoana ai te u ovi fafine fuli ae e malolohi, nee tuku leva e Sakopo te u vaa akau ki te u kogamea inu o te u manu, ke natou sisio ki ai pea ke natou fia ohoana ai. 42Pea kapau ko ni manu gaegae, e mole ina tuku anai ki ai te u vaa akau: koia nee mau ai leva e Lapane te u manu gaegae, kae nee mau leva e Sakopo ae nee malolohi.
43Nee asilisili mau koloa leva te tagata aia: Nee lahi tana faga ovi, mo ana faga tao, mo ana fafine faifekau, mo ana tagata faifekau, mo ana faga kamelo, pea mo ana faga asino.
Currently Selected:
SENESI 30: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
