SENESI 31
31
Lliliu a Sakopo ki Kanaane
1Nee logo leva ia Sakopo ki te u palalau a te u foha a Lapane, ae nee ui: Kua too e Sakopo te u mea fuli a tatatou tamai, pea kua ina fakatupu tona koloa fuli aki te u mea o tatatou tamai. 2Nee fakatokagai foki e Sakopo te u mata o Lapane, nee mole kei tatau tana sio kia ia mo ae i mua atu.
3Koia nee ui leva e te Eteleno kia Sakopo: Liliu ki te fenua o au tamai, pea mo te kogamea ae nee ke tupu ai, pea e au nofo anai mo koe. 4Nee paui leva e Sakopo ia Lasele mo Lea ae nee nonofo i te u gaueaga ia tafa o tana faga manu liliki. 5Pea nee ina ui leva kia naua: E au sio ki te u mata o takolua tamai e mole kei tatau ia kia au mo mua atu; kae nee kau mo au te Atua o taku tamai. 6E kolua iloi lelei nee au gaue ki takolua tamai i toku malohi katoa. 7Pea nee kakaai au e takolua tamai, o ina fetogi tua hogofulu toku totogi; kae nee mole fakagafua e te Atua ke ina fai he mea e kovi kia au. 8Kapau e ina ui: Ko tou totogi ko te u ovi pulepule, pea nee fanaui leva e te u ovi fafine ni uhi pulepule. Pea kapau e ina ui: Ko tou totogi anai ko te u ovi sikasika, pea nee fanaui leva e te u ovi fafine fuli ni uhi sikasika. 9Kua too e te Atua mai takolua tamai tana faga manu, o foaki mai kia au. 10Nee au moemisi pea nee au sio ki te u ovi tagata ae nee olo ki te u ovi fafine, nee natou pulepule, mo ilaila pea mo matohitohi. 11Pea nee ui mai leva e te aselo a te Atua kia au i te moemisi: Sakopo! Nee au tali: Koeni au! 12Nee ina ui mai: Sio ou mata: E pulepule mo matohitohi te u ovi tagata fuli aena nee olo ki te u ovi fafine; koteuhi nee au sio ki te u mea fuli ae nee fai e Lapane kia koe. 13Ko te Atua au o Petele, te kogamea ae nee ke vali lolo ai he maka fakamanatu, ae nee ke fai ai te fakapapau. I te aho nei, ke ke tuu ki oluga, pea ke mavae i te fenua aeni, o toe liliu ki te fenua ae nee ke tupu ai.
14Nee tali leva e Lasele mo Lea kia ia: Pe e kei ma mau he vaega pe ko he tofiga i te fale o tama tamai? 15Pe nee mole sio ia ia kia maua o hage ko ni fafine matapule, o tupu ai tana fakatau maua, kae ina kai tana paaga? 16Koia kua ma mau ai te koloa fuli ae kua too e te Atua mai tama tamai, e maua mo ama fanau. Fai i te aho nei te u mea fuli ae e fakaha atu e te Atua kia koe.
17Nee tuu ake leva ia Sakopo ki oluga, o fakaheka ana fanau mo ona ohoana ki ni kamelo. 18Pea nee ina ave leva tana faga manu katoa mo ana mea fuli ae nee ina mau, ae nee gaue ki ai i Patane-Alame; pea nee alu leva ia ia ki tana tamai ko Isaake i te fenua ko Kanaane. 19I te temi aia nee alu ia Lapane o kosi tana faga manu. Nee kaihaa leva e Lasele te u taulaatua o tana tamai. 20Nee kakaai leva e Sakopo ia Lapane, te tagata Alami, koteuhi nee hola fakafufu ia ia kae nee mole ina fakaha kia ia. 21Nee hola leva ia ia mo te u mea fuli ae nee ina mau; nee tuu leva ia ia o alu, pea nee fakalaka leva ia ia i te vaitafe o fakahagahaga ki te mouga ko Kalaate.
Tuli o Sakopo e Lapane
22I te tolu aho, nee fakaha leva kia Lapane kua hola ia Sakopo. 23Nee too leva e Lapane ona tehina, pea nee natou tuli leva ia Sakopo ia aho e fitu, pea nee ina mau ia ia ki te mouga o Kalaate. 24Kae nee ha leva te Atua i te pouli i he moemisi kia Lapane, te tagata Alame, o ui kia ia: Aua naa ke palalau kia Sakopo i he mea lelei pee ko he mea kovi! 25Nee kaku leva ia Lapane kia Sakopo. Nee fakatuu leva e Sakopo tona falela i te mouga o Kalaate.
26Pea nee ui leva e Lapane kia Sakopo: Kotea nee ke fai? Kotea nee ke kakaai ai au, o ke ave oku ofafine o hage ko ni fafine popula? 27Kotea nee ke hola fakafufu ai, pea nee ke kakaai ai au? Kotea nee mole ke fakaha mai ai kia au? Nee au tuku leva ia koe ke ke alu i lotomalie o ni fakafiafia mo ni hiva, i te musika o te foi nafa mo te alepe? 28Nee mole pe ke fakagafua ke au uma ki oku mokopuna mo oku ofafine! Nee ke fai he mea fakavale! 29E malohi feauga toku nima ke au fai kia koe he mea kovi; kae nee ui mai kia au e te Atua o takotou tamai i te aho anafi: Aua naa ke palalau anai kia Sakopo i he mea lelei pee ko he mea kovi! 30Koeni, kua ke alu koteuhi kua ke mamahi ki te fale o tau tamai, kotea nee ke kaihaa ai oku atua?
31Nee tali leva e Sakopo kia Lapane: Nee au mataku, pea nee au manatu: E lagi ke too anai ou ofafine. 32Kae ke mate ia ia ae e ke mau ai anai ou atua! I mua o ota tehina, kumi i toku fale katoa au mea fuli, pea ke too natou. Nee mole iloi e Sakopo nee ko Lasele ae nee ina kaihaa natou. 33Nee ulu leva ia Lapane ki te loto falela o Sakopo, mo te falela o Lea, pea mo te falela o te u fafine faifekau, pea nee mole ina mau leva he mea. Nee mavae leva ia ia i te falela o Lea, o toe ulu ki te falela o Lasele. 34Kae nee too leva e Lasele te u atua, o taotao i te lalo hekaaga kamelo pea nee heka ia ia i oluga. Nee hue leva e Lapane te falela katoa, kae nee mole ina mau leva he mea. 35Nee ui leva e Lasele ki tana tamai: Ke aua naa ke ita, taku tamai, mo kapau e ke sio e mole au tuu ki oluga i ou mua, koteuhi e au mau te mahaki ae e hoko mahani ki te u fafine. Nee fai leva e Lapane tana kumi, kae nee mole ina mau leva te u atua.
36Nee ita leva ia Sakopo, o palalau kovi kia Lapane. Nee ina ui leva: Kotea taku hala, kotea taku agahala, ke ke kumi fakamalohi ai au? 37Kua ke hue aku mea fuli. Pe nee ke mau he mea pe e tahi o tou fale? Ke ke fakaha mai ki oku tehina mo ou tehina, pea ke natou fakamaaui taua. 38Koeni kua tau uafulu taku nofo i tou fale; nee mole pe to he faitama o au ovi fafine mo au tao fafine, pea nee mole pe au kai he ovi tagata o au faga manu. 39Nee mole pe au aumai kia koe i he aho he manu nee tamatei e he manu fekai, pea nee au totogi kia koe ia mea fuli nee puli. Nee ke fakaala mai kia au, te u manu fuli nee kaihaa, tatau pe pe nee kaihaa i te aho pee ko te pouli. 40Nee au tali te mamahi o te vevela o te laa i te aho, mo te momoko i te pouli, pea nee hola mamao te fia moe i oku mata. 41Koeni kua tau uafulu taku nofo i tou fale; nee au gaue kia koe lolotoga tau e hogofulu ma fa ke totogi ai ou ofafine e toko lua, pea mo tau e ono ke totogi ai taku faga manu, kae ko koe, nee ke fetogi tua hogofulu toku totogi. 42Kanapau nee mole tokoni mai te Atua o taku tamai ko Apalahamo kia au, te Atua ae e mataku ki ai taku tamai ko Isaake, nee ke haga leva o kapu au mo oku nima atea. Kae nee sio te Atua ki toku mamahi mo te kinakina o oku nima i te gaue; koia i te aho anafi nee ina fakaha tona faitotonu kia au.
43Nee tali leva e Lapane kia Sakopo: Ko te u taahine aena ko oku ofafine, ko anatou fanau ko aku fanau, ko te u manu aena ko aku faga manu, pea ko te u mea fuli e ke sio ki ai ko aku mea. Kae kotea e feala ke au fai i te aho nei ki oku ofafine mo aku fanau ae kua natou fanaui ki te malamanei? 44Hau, ta fai he hai, e koe mo au, pea ke tuu te mea aia ko he fakamooni i tota vahaa.
45Nee too leva e Sakopo he maka, pea nee ina fakatuu leva te maka aia ko he fakamanatu. 46Nee ui leva e Sakopo ki ona tehina ke natou tanaki age ni maka. Nee natou tae age leva ni maka, o natou tanaki fakatuuga leva natou. Pea nee natou kakai fuli leva i oluga o te tuuga maka aia. 47Nee fakahigoa leva e Lapane te kogamea aia ko Sekale-Saatuta, pea nee fakahigoa leva ia ia e Sakopo ko Kaleti. 48Nee ui leva e Lapane: Ke tuu te tuuga maka aeni ko he fakamooni ia au mo koe! Ko te tupuaga aia o tana higoa ko Kaleti, ko tona uhiga: Tuuga maka o te fakamooni. 49Nee toe foaki foki ki ai te higoa ko Misipa, ko tona uhiga: tuuaga o ae e leoleo, koteuhi nee ui e Lapane: Ke leoleo te Eteleno kia koe mo au, i te temi ae e mole ta toe fesioaki anai. 50Kapau e ke gaohi kovii anai oku ofafine, pea kapau e ke toe ohoana anai mo ni ihi age fafine, tokaga pe koteuhi e mole ko he tagata ae e ina fakamooni taua, kae ko te Atua totonu. 51Nee ui leva e Lapane kia Sakopo: Sio ki te tuuga maka aeni, mo te maka ae kua au fakatuu i tota vahaa. 52E tuu anai te tuuga maka aena mo te maka ko ni fakamooni kia taua: e mole au toe fakalaka anai i te tuuga maka aeni ki tou faahi, pea e mole ke toe fakalaka mai anai i te tuuga maka aena mo te maka aena ki toku faahi, o fai he mea ae e kovi. 53Ke tuu te Atua o Apalahamo mo Nakole ko te tuifakamaau ia taua. Nee fakapapau leva e Sakopo i te huafa o te Atua ae nee mataku ki ai ia Isaake. 54Pea nee momoli leva e Sakopo he sakilifisio i te mouga, pea nee ina fakaafe leva ona tehina ki he kaitahi. Nee natou kakai leva, pea nee natou momoe i te po aia i te mouga.
55Nee tuu ake leva ia Lapane i te uhu kei mafoata, o uma ki ona foha mo ona ofafine, pea nee tapuaki leva ia ia kia natou. Pea nee mavae leva ia ia, o toe liliu ki tona fale.
Currently Selected:
SENESI 31: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
