SENESI 37
37
Fakatau o Sosefo e ona tehina
1Nee nofo leva ia Sakopo i te fenua o Kanaane, ae nee nofo fakatemi ai tana tamai.
2Koeni te hakoga o Sakopo. Nee tau hogofulu ma fitu ia Sosefo, pea nee ina tauhi te faga manu o tana tamai, fakatahi mo ona tehina; pea nee nofo te fanau aia mo te u foha o Pila pea mo te u foha o Silipa, ko te u sinifu o tana tamai. Pea nee fakaha e Sosefo ki tanatou tamai anatou palalau kovi. 3Nee ofa ia Iselaele kia Sosefo o lahi age i ona foha fuli, o tupu nee ina mau ia ia kae kua matua; pea nee ina fai leva he kofu lanu kehekehe kia ia. 4Nee sio leva ona tehina e lahi age te ofa o tanatou tamai kia Sosefo ia natou fuli, pea nee natou fehia leva kia ia. Nee mole feala ke natou palalau lelei kia ia.
Moemisi a Sosefo
5Nee fai leva e Sosefo he moemisi, pea nee ina fakamatala leva ki ona tehina, o toe lesili fehia ai leva ia natou kia ia. 6Nee ina ui leva kia natou: Ke koutou fakalogo mai ki te moemisi aeni kua au fai! 7Nee tou lolotoga hai te u fuhiga fulumeto i te u gaueaga, pea koeni, nee malaga ake leva taku fuhiga fulumeto, o tuu totonu ki oluga, pea alu ake leva akotou fuhiga fulumeto o takatakai ia ia, pea nee natou punou leva kia ia. 8Nee ui age leva e ona tehina kia ia: Pe e mooni e ke pule anai kia matou? Pe e ke lagiaki anai kia matou? Pea nee natou asilisili fehia leva kia ia o tupu ko ana moemisi mo ana palalau.
9Nee ina toe fai foki he tahi moemisi, pea nee ina toe fakamatala leva ki ona tehina. Nee ina ui leva: Nee au toe fai foki he tahi moemisi: nee au sio ki te laa, mo te mahina, pea mo te u fetuu e hogofulu ma tahi, e tulolo i oku mua. 10Pea nee ina fakamatala leva tana moemisi ki tana tamai mo ona tehina. Pea nee valoki leva ia ia e tana tamai, o ui: Kotea te uhiga o te moemisi aena kua ke fai? Pe e tonu ke matou omai, ia au ko tau tamai mo tau fae, pea mo ou tehina fuli, o punou ki te kele i ou mua? 11Nee finenonofo leva ona tehina kia ia, kae nee taupau leva e tana tamai te u mea aia i tona loto.
12Nee olo leva te u tehina o Sosefo ki Siseme, o fafaga te faga manu a tanatou tamai. 13Pea nee ui leva e Iselaele kia Sosefo: Pe e mole fafaga e ou tehina te faga manu i Siseme? Hau, koteuhi e au loto ke ke alu kia natou. Pea nee ina tali leva: Koeni au! 14Nee ui leva e Iselaele kia ia: E au kole atu kia koe ke ke alu o ahiahi ki ou tehina, o sio pe e natou malolo pe mo te u manu; pea ke hau mo ni logo kia au. Pea nee fekau leva e Sakopo tona foha ko Sosefo ke alu mai te vaevaeliua o Hepelone, pea nee alu leva ia Sosefo ki Siseme. 15Nee felavei leva he tagata mo ia i tana foli i te u gaueaga, pea nee fehui leva e te tagata kia ia: Kotea ae e ke kumi? 16Nee tali leva e Sosefo: E au kumi oku tehina. E au kole atu kia koe ke ke fakaha mai kia au te kogamea ae e natou fafaga ai te u manu. 17Nee ui leva e te tagata kia ia: Kua natou mavae i heni, koteuhi nee au logo ki anatou palalau: Tou olo ki Totane! Pea nee alu leva ia Sosefo o kumi ona tehina, pea nee ina mau atu natou i Totane.
18Nee natou sisio mai leva kia ia mai mamao, kae i mua o tana kaku ake kia natou, nee natou fonofono leva ke tamatei ia ia. 19Nee natou feuiaki leva: Koeni te tagata faimoemisi e hau kia tatou! 20Koutou omai i te temi aeni, tou tamatei ia ia pea tou li ia ia ki he foi tane i te u foi tane aeni. E tou ui anai kua kai ia ia e he manu fekai, pea e tou sisio anai pe e iku feafeai anai ana moemisi. 21Nee logo ia Lupeni ki te mea aia, pea nee fakapapau leva ia ia ke ina haofaki ia Sosefo mai te u nima o ona tehina. Nee ina ui leva: Aua naa tou matehi ia ia. 22Pea nee toe ui leva e Lupeni kia natou: Aua naa koutou liligi te toto; koutou li ia ia ki te vaikeli aeni i te toafa, kae aua naa fafa okotou nima kia ia. Nee palalau feia leva ia ia koteuhi kua ina fakatuutuu ke ina haofaki ia Sosefo mai te u nima o ona tehina, o toe fakaliliu ia ia ki tana tamai.
23I te tau ake pe a Sosefo ki ona tehina, nee natou hui leva tona kofu, te kofu lanu kehekehe ae nee ina tui. 24Pea nee natou li leva ia ia ki te foi tane. Nee ago te foi tane aia, pea nee mole he vai i ai. 25Nee natou nofo leva ki lalo o kakai. Nee natou sio leva ki he fagona o he kau Isemaele. Nee natou omai mai Kalaate, pea e natou olo ki Esipito. Nee amo e anatou kamelo ni akau fakamagoni, mo ni kaloni, mo he mila. 26Pea nee ui leva e Suta ki ona tehina: Kotea te aoga kia tatou o tatatou tamatei totatou kii tehina, mo tatatou fufu tona toto? 27Koutou omai, pea e tou fakatau ia ia ki te kau Isemaele, kae aua naa fafa otatou nima kia ia, koteuhi ko totatou tehina ia ia, ko totatou kogasino. Pea nee fakalogo leva ona tehina kia ia. 28I te kaku ake a te kau Matiane kia natou, nee natou toho ake leva ia Sosefo mai te foi tane ki tua, pea nee natou fakatau leva ia ia o uafulu foi sikele* paaga ki te kau Isemaele, ae nee natou ave leva ia Sosefo ki Esipito.
Fakatau o Sosefo ke ave ki Esipito
29Nee toe liliu leva Lupeni ki te foi tane; pea koeni, kua puli ia Sosefo i te foi tane. Pea nee ina hae leva ona kofu. 30Pea nee alu leva ia ia ki ona tehina o ui kia natou: Kua puli te fanau! Pea ko au, e au alu anai ki fea? 31Nee natou too leva te kofu o Sosefo; pea nee natou tamatei leva he tao tagata, pea nee natou ukui leva te kofu ki te toto. 32Pea nee natou fakamomoli leva ki tanatou tamai te kofu lanu kehekehe, o ui kia ia: Koeni te mea ae nee matou mau! Sio pe e mole ko te kofu aia o tou foha?
33Nee iloi leva e Sakopo te kofu, pea nee tagi leva ia ia, o ui: Ko te kofu aia o toku foha! Kua kai ia ia e he manu fekai! 34Pea nee hae leva e Sakopo ona kofu, nee ina tui leva he taga, pea nee tagi leva ia ia ki tona foha i he temi fualoa osi. 35Pea nee olo ake leva ona foha fuli mo ona ofafine fuli o fakapelepelei ia ia, kae nee mole ina tali ke fakafimaliei e he tahi. Nee ina ui leva o fenei: E au tagi anai ki toku foha o kaku ki te aho ae e au fakatahi ai anai mo toku foha i te nofoaga o te kau mate! Pea nee tagi ia ia ki tona foha.
36Nee fakatau leva e te kau Matiane ia Sosefo i Esipito kia Potifale, ko te ofisa a Falaone, ko te pule o te kau leo.
Currently Selected:
SENESI 37: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
