SENESI 38
38
Suta mo Tamale
1I te temi aia, nee mavae leva ia Suta mai ona tehina, pea nee alu leva ia ia ki he tagata o Atulami nee higoa ko Ila. 2I ai, nee sio leva ia Suta ki te taahine a he tagata Kanaane nee higoa ko Sua; pea nee ohoana leva ia ia mo te taahine aia; pea nee alu leva ia ia kia ia. 3Nee faitama leva te fafine, pea nee ina fanaui leva he tama, ae nee ina fakahigoa leva ko Ela. 4Nee toe faitama leva ia ia, pea nee ina fanaui leva he tama, ae nee ina fakahigoa ko Onane. 5Nee ina toe fanaui leva he tahi tama, ae nee ina fakahigoa leva ko Sela. Nee nofo ia Suta i Kesipi i te tupu o Sela.
6Nee filifili leva e Suta ki tona foha uluaki ko Ela, he fafine nee higoa ko Tamale. 7Ko Ela, te foha uluaki o Suta, nee agakovi osi kia mata o te Eteleno; pea nee fakamate leva ia ia e te Eteleno. 8Pea nee ui leva e Suta kia Onane: alu ki te ohoana o tou tehina, o too ia ia, pea ke fakatupu he hakoga ki tou tehina. 9Kae i te iloi e Onane e mole ko tona hakoga aia, nee ina liligi leva tona pulapula ki te kele i te u temi fuli ae nee alu ai ia ia ki te ohoana o tona tehina, o tupu ke aua naa mau he hakoga ki tona tehina. 10Nee kovi osi te mea aia kia mata o te Eteleno, ae nee ina toe matehi mo ia. 11Pea nee ui leva e Suta kia Tamale ohoana o tona foha: Koeni kua ke nofo toko tahi, toe liliu o nofo i te fale o tau tamai, o talitali ke lahi ake toku foha ko Sela. Nee palalau feia ia ia koteuhi nee mataku ia ia naa toe mate anai tona foha ko Sela o hage ko ona taokete. Pea nee alu leva ia Tamale o nofo i te fale o tana tamai.
12Nee fualoa osi pea nee mate leva te taahine a Sua, te ohoana o Suta. I te tokalelei leva o te loto o Suta, nee hake leva ia ia mo tona kau tagata ko Ila, tagata Atulami, ki Timina kia natou ae nee natou kosi tana faga ovi. 13Nee fakaha leva te mea aia kia Tamale, o ui kia ia: Koeni tau tamai kua hake ki Timina, o tuusi tana fului ovi. 14Pea nee hui leva e Tamale ona teu fakalokonui, pea nee ina puloui leva ona mata aki he kie, pea nee alu leva ia ia o lala i te matapa o Enaimi, ae nee tuu i te ala o Timina; koteuhi nee sio ia ia kua lahi ia Sela, kae nee mole foaki ia ia e Suta ke ohoana mo Sela.
15Nee sio leva ia Suta kia Tamale, pea nee ina ui leva ko he fafine faiaga, koteuhi nee puloui e Tamale ona mata. 16Pea nee alu leva ia ia o ui kia Tamale: Tuku mai ke au alu atu kia koe. Nee mole iloi leva e Suta ko te ohoana o tona foha ia ia. Pea nee ui leva e Tamale kia ia: Kotea te mea ae e ke foaki mai anai kia au ke ke hau ai kia au? 17Nee tali leva e Suta: E au fakamomoli mai anai kia koe he uhii tao o taku faga manu. Pea nee ui leva e Tamale: Tuku mai kia au he fakamooni o kaku ki te kaku mai o te mea aia. 18Nee tali leva e Suta: Kotea te fakamooni ae e tonu ke au tuku atu kia koe? Pea nee ui leva e Tamale: Ko tou mama fakailoga totonu, mo tou kavei, pea mo te tokotoko aena e ke too i tou nima. Pea nee tuku leva e Suta te u mea aia kia Tamale, pea nee alu leva ia Suta kia ia. Nee faitama leva ia Tamale kia Suta. 19Nee toe liliu leva ia Tamale ki tona api; pea nee ina hui leva tona pulou, kae nee ina toe tui leva ona teu fakafinetaka.
20Nee fekau leva e Suta tona kaumea ko Atulami ke alu o ave te uhii tao, mo toe aumai te u mea fakamooni ae nee tuku ki te fafine. Kae nee mole ina mau te fafine. 21Pea nee ina fehui leva ki te hahai o te kogamea aia: Kofea te fafine faiaga ae nee tuu i Enaimi, i te ala o Timina? Pea nee natou tali leva kia ia: Nee heeki mau i te fenua aeni he fafine faiaga. 22Pea nee toe liliu leva te tagata kia Suta, o ui: Nee mole au mau te fafine, pea nee ui mai e te hahai o te fenua kia au: Nee heeki mau i te fenua aeni he fafine faiaga. 23Nee ui leva e Suta: Ke ina taupau te u mea aia ma ana! E mole tonu ke katai tatou. Koeni, nee au ave te uhii tao, kae nee mole ke mau ia ia.
24Nee hili leva ki ai mahina e tolu, pea nee fakaha leva kia Suta: Kua faiaga tou fugao ko Tamale, pea koeni kua faitama ia ia i tana faiaga. Pea nee ui leva e Suta: Koutou aumai ia ia ke tutu mauli! 25I te lolotoga o tona ave ki te tua kolo, nee ui leva e Tamale ke fakaha ki tana tamai ko Suta: Nee au faitama ki te tagata ae a ana te u mea aeni; e au kole atu kia koe ke ke iloi pe e a ai te u mea aena, te mama fakailoga, mo te kavei, pea mo te tokotoko. 26Nee iloi leva e Suta te u mea aia, pea nee ina ui leva: e veliveli age tana hala ia au, koteuhi nee mole au foaki ia ia ki toku foha ko Sela! Pea nee mole toe alu leva ia Suta kia Tamale.
27I te oviovi ki te fanau a Tamale, koeni nee nofo he mahaga i tona fatu. 28I tana lolotoga fanau, nee ha ake leva ki tua te nima o he tahi, pea nee nonoo leva ki ai e te fafine faifanau he filo kula. Pea nee ina ui leva: Ko ia aeni nee uluaki tupu! 29Kae nee toe too leva e te fanau tona nima, pea nee to age leva tona tehina ki tua. Pea nee ui leva e te fafine faifanau: Ko te ava fea ae nee ke ulu mai ai ki tua! Pea nee ina foaki leva kia ia te higoa ko Pelesi. 30Pea nee to ake leva ki tua tona tehina, ae nee nonoo tona nima aki te filo kula, pea nee ina foaki leva kia ia te higoa ko Selake.
Currently Selected:
SENESI 38: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
