SENESI 43
43
Toe hifo o tehina o Sosefo ki Esipito
1Nee toe lelesili kovi te hoge i te fenua o Kanaane. 2Nee osi leva te fulumeto ae nee avake mai Esipito i te kai, pea nee ui leva e Sakopo ki ona foha: Koutou toe liliu o totogi mai he meakai. 3Nee tali leva e Suta kia ia: Nee fakapapau mai te tagata Esipito kia matou ke aua naa matou toe ha age ki ona mua, mo kapau e mole matou olo age mo tomatou tehina muli. 4Koia, kapau e ke tuku mai anai ia Pesamino ke alu mo matou, pea e matou hifo anai ki Esipito o totogi mai ni meakai. 5Kae kapau e mole ke loto ki ai, pea e mole matou hifo anai ki Esipito, koteuhi nee fakapapau fenei mai te tagata aena kia matou: Ke aua naa koutou toe ha mai ki oku mua, mo kapau e mole koutou omai anai mo tokotou tehina muli. 6Nee ui leva e Iselaele: Kotea ae nee koutou fai ai te mea kovi kia au, o kotou ui ki te tagata aena e i ai foki hokotou tehina. 7Nee natou tali leva kia Sakopo: Nee fakafehui matou e te tagata aena o uhiga mo matou mo omatou famili, o ina fehui mai: pe kei mauli takotou tamai? Pe kei toe ake he tahi o okotou tehina? Pea nee matou tali leva ki ana fehui. Pe nee feala ke matou iloi e ina ui mai anai ke avake tomatou tehina?
8Nee ui leva e Suta kia Iselaele: Tamai, tuku mai te fanau ke alu mo au! E tonu ke matou tutuu nei o olo mo kapau e ke loto ke tou mauli, kae ke aua naa tou mamate, tatou mo atatou fanau. 9Ko au, e au tokaga anai kia ia; e ke kumi mai anai ia ia kia au. Kapau e mole au liufaki mai anai ia ia kia koe, pea kapau e mole au toe tuku ia ia ki ou mua, pea e au hala anai i ou mua o heegata. 10Koteuhi, kanapau nee mole tou tuai fenei, kua matou toe liliu tua lua mai nei. 11Nee ui leva e tanatou tamai ko Iselaele kia natou: Koena e tonu ke feia, ke tou fai te mea aeni: koutou fafao ki akotou taga ni fua lelei o te fenua, ke koutou fai ai he meaofa ki te tagata aena: Koutou too ni kaloni, mo he meli, mo ni mea fakamagoni, mo he mila, mo ni fuai pinati*, pea mo ni fuai amatie. 12Koutou toe fakaliliu te paaga ae nee koutou mau i akoutou taga, e lagi ko he faihala, pea koutou toe too fakalahi hakoutou paaga. 13Kotou too mo tokotou kii tehina, pea koutou tutuu o toe liliu ki te tagata aena. 14Ke ofa te Atua Mafimafi o tuku ke tali lelei koutou e te tagata aena pea ke koutou toe liliu mai kia au mo tokotou tehina ko Pesamino pea mo Simeone. Pea ko au, kapau e tonu ke au nofo hala mo aku fanau, pea ke au hala!
Tali e Sosefo ona tehina
15Nee natou too leva te molaga, pea nee natou too foki he paaga o liuga lua, mo Pesamino, pea nee natou tutuu leva ki oluga o hifo ki Esipito; nee natou olo leva kia mua o Sosefo.
16I te sio a Sosefo kia Pesamino ae kua alu ake mo natou, nee ina ui leva ki te pule o tona fale: Fakaulu te u tagata aeni ki fale, pea ke matehi ni manu o teuteui he kai, koteuhi e kakai anai te u tagata aeni mo au i te hoata. 17Nee fai leva e te tagata pule te mea ae nee fakatotonu e Sosefo kia ia, pea nee ina fakaulu leva te u tagata ki te fale o Sosefo. 18I te temi ae nee fakaulu ai natou ki te fale o Sosefo, nee lahi osi tonatou mataku, pea nee natou ui leva: E ave nei tatou o tupu ko te paaga ae nee fafao ki atatou taga i te faiaga talu ai. Ko te mea aeni ke puke ai mo ohofi ai tatou, pea ke fakapopulai ai tatou kae too atatou asino. 19Nee natou fakaoviovi leva ki te pule o te fale o Sosefo pea nee natou palalau kia ia i te mua matapa. 20Nee natou ui fenei: Silou age, aliki! nee matou uluaki hihifo mai i mua ki heni, o totogi meakai. 21I tamatou liliu, i te kogamea ae nee tonu ke matou malolo ai i te pouli, nee matou avahi leva amatou taga, pea nee matou tahi mau leva tana paaga e tuku i oluga o tana taga. Nee matou toe aumai te paaga katoa aia. 22Nee matou toe aumai foki he tahi paaga kehe ke totogi ai ni ihi amatou meakai. E mole matou iloi pe ko ai ae nee ina tuku te paaga ki amatou taga. 23Nee tali leva e te tagata pule kia natou: Ke fimalie okotou loto! Aua naa kotou tuania he mea! Ko tokotou Atua aena, te Atua ae o takotou tamai, nee ina foaki he koloa ki loto o akotou taga. Nee kaku lelei mai akotou paaga kia au. Pea nee aumai leva ia Simeone e te pule o te fale kia natou. 24Pea nee fakaulu leva natou e te tagata aia ki te fale o Sosefo. Nee ina tuku leva kia natou he vai ke fufulu ai onatou vae; pea nee ina foaki foki he meakai ki anatou asino. 25Nee natou teuteui leva tanatou meaofa o fakatalitali ke alu ake ia Sosefo i te hoata; koteuhi kua osi i te fakaha kia natou e natou kakai anai mo Sosefo i tona fale. 26I te tau ake a Sosefo ki fale, nee natou momoli leva kia ia te meaofa ae nee natou aumai, pea nee natou punou leva o kaku ki te kele ia mua o Sosefo. 27Pea nee fehui leva e Sosefo kia natou pe e natou malolo pe; pea nee ina toe ui kia natou: pe e malolo pe takotou tamai, ae nee koutou palalau mai ki ai kua matua? Pe kei mauli ia ia? 28Nee natou tali: E malolo tau tagata faifekau, tamatou tamai, pea kei mauli foki ia ia. Pea nee natou toe punou leva o kaku ki te kele ia mua o Sosefo. 29Pea nee hiki ake leva e Sosefo ona mata; pea nee sio leva ia ia kia Pesamino tona tehina, tama a tana fae totonu, pea nee ina ui leva: Pe ko tokotou tehina muli aeni ae nee koutou palalau mai ki ai? Pea nee ina ui leva kia Pesamino: Ke tapuaki te Atua kia koe, oi toku foha! 30Nee logoi leva e Sosefo i ona tootooga tona ofa ki tona tehina, pea nee fia tagi leva ia ia. Nee ulu fakavilivili leva ia ia ki tona kogafale o tagi i ai. 31I te osi o tana fufulu ona mata, nee toe ulu ake leva ia ia kia natou. Pea nee faiga leva ia ia ke aua naa ha tona loto, o ina ui age ke tufa te meakai. 32Nee kai kehe pe ia Sosefo, pea nee kakai kehe ona tehina, pea nee toe kai kehe te kau Esipito ae nee fakaafe ki tona fale, koteuhi nee mole gafua ke kai fakatahi te kau Esipito mo te kau Hepeleo, koteuhi nee fakalialia osi te mea aia kia natou. 33Nee fakanofo leva te u tehina o Sosefo i ona mua, o kamata mai ae nee mua o kaku ki ae nee muli. Nee natou punamauli leva i te mea aia, pea nee natou fesioaki ia natou. 34Nee fakatotonu leva e Sosefo ke tufa kia natou te u meakai ae nee tuku i ona mua. Nee lahi tua nima age te vaega o Pesamino i ona tehina. Nee natou inu leva, pea nee natou fakafiafia fakatahi leva mo Sosefo.
Currently Selected:
SENESI 43: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
SENESI 43
43
Toe hifo o tehina o Sosefo ki Esipito
1Nee toe lelesili kovi te hoge i te fenua o Kanaane. 2Nee osi leva te fulumeto ae nee avake mai Esipito i te kai, pea nee ui leva e Sakopo ki ona foha: Koutou toe liliu o totogi mai he meakai. 3Nee tali leva e Suta kia ia: Nee fakapapau mai te tagata Esipito kia matou ke aua naa matou toe ha age ki ona mua, mo kapau e mole matou olo age mo tomatou tehina muli. 4Koia, kapau e ke tuku mai anai ia Pesamino ke alu mo matou, pea e matou hifo anai ki Esipito o totogi mai ni meakai. 5Kae kapau e mole ke loto ki ai, pea e mole matou hifo anai ki Esipito, koteuhi nee fakapapau fenei mai te tagata aena kia matou: Ke aua naa koutou toe ha mai ki oku mua, mo kapau e mole koutou omai anai mo tokotou tehina muli. 6Nee ui leva e Iselaele: Kotea ae nee koutou fai ai te mea kovi kia au, o kotou ui ki te tagata aena e i ai foki hokotou tehina. 7Nee natou tali leva kia Sakopo: Nee fakafehui matou e te tagata aena o uhiga mo matou mo omatou famili, o ina fehui mai: pe kei mauli takotou tamai? Pe kei toe ake he tahi o okotou tehina? Pea nee matou tali leva ki ana fehui. Pe nee feala ke matou iloi e ina ui mai anai ke avake tomatou tehina?
8Nee ui leva e Suta kia Iselaele: Tamai, tuku mai te fanau ke alu mo au! E tonu ke matou tutuu nei o olo mo kapau e ke loto ke tou mauli, kae ke aua naa tou mamate, tatou mo atatou fanau. 9Ko au, e au tokaga anai kia ia; e ke kumi mai anai ia ia kia au. Kapau e mole au liufaki mai anai ia ia kia koe, pea kapau e mole au toe tuku ia ia ki ou mua, pea e au hala anai i ou mua o heegata. 10Koteuhi, kanapau nee mole tou tuai fenei, kua matou toe liliu tua lua mai nei. 11Nee ui leva e tanatou tamai ko Iselaele kia natou: Koena e tonu ke feia, ke tou fai te mea aeni: koutou fafao ki akotou taga ni fua lelei o te fenua, ke koutou fai ai he meaofa ki te tagata aena: Koutou too ni kaloni, mo he meli, mo ni mea fakamagoni, mo he mila, mo ni fuai pinati*, pea mo ni fuai amatie. 12Koutou toe fakaliliu te paaga ae nee koutou mau i akoutou taga, e lagi ko he faihala, pea koutou toe too fakalahi hakoutou paaga. 13Kotou too mo tokotou kii tehina, pea koutou tutuu o toe liliu ki te tagata aena. 14Ke ofa te Atua Mafimafi o tuku ke tali lelei koutou e te tagata aena pea ke koutou toe liliu mai kia au mo tokotou tehina ko Pesamino pea mo Simeone. Pea ko au, kapau e tonu ke au nofo hala mo aku fanau, pea ke au hala!
Tali e Sosefo ona tehina
15Nee natou too leva te molaga, pea nee natou too foki he paaga o liuga lua, mo Pesamino, pea nee natou tutuu leva ki oluga o hifo ki Esipito; nee natou olo leva kia mua o Sosefo.
16I te sio a Sosefo kia Pesamino ae kua alu ake mo natou, nee ina ui leva ki te pule o tona fale: Fakaulu te u tagata aeni ki fale, pea ke matehi ni manu o teuteui he kai, koteuhi e kakai anai te u tagata aeni mo au i te hoata. 17Nee fai leva e te tagata pule te mea ae nee fakatotonu e Sosefo kia ia, pea nee ina fakaulu leva te u tagata ki te fale o Sosefo. 18I te temi ae nee fakaulu ai natou ki te fale o Sosefo, nee lahi osi tonatou mataku, pea nee natou ui leva: E ave nei tatou o tupu ko te paaga ae nee fafao ki atatou taga i te faiaga talu ai. Ko te mea aeni ke puke ai mo ohofi ai tatou, pea ke fakapopulai ai tatou kae too atatou asino. 19Nee natou fakaoviovi leva ki te pule o te fale o Sosefo pea nee natou palalau kia ia i te mua matapa. 20Nee natou ui fenei: Silou age, aliki! nee matou uluaki hihifo mai i mua ki heni, o totogi meakai. 21I tamatou liliu, i te kogamea ae nee tonu ke matou malolo ai i te pouli, nee matou avahi leva amatou taga, pea nee matou tahi mau leva tana paaga e tuku i oluga o tana taga. Nee matou toe aumai te paaga katoa aia. 22Nee matou toe aumai foki he tahi paaga kehe ke totogi ai ni ihi amatou meakai. E mole matou iloi pe ko ai ae nee ina tuku te paaga ki amatou taga. 23Nee tali leva e te tagata pule kia natou: Ke fimalie okotou loto! Aua naa kotou tuania he mea! Ko tokotou Atua aena, te Atua ae o takotou tamai, nee ina foaki he koloa ki loto o akotou taga. Nee kaku lelei mai akotou paaga kia au. Pea nee aumai leva ia Simeone e te pule o te fale kia natou. 24Pea nee fakaulu leva natou e te tagata aia ki te fale o Sosefo. Nee ina tuku leva kia natou he vai ke fufulu ai onatou vae; pea nee ina foaki foki he meakai ki anatou asino. 25Nee natou teuteui leva tanatou meaofa o fakatalitali ke alu ake ia Sosefo i te hoata; koteuhi kua osi i te fakaha kia natou e natou kakai anai mo Sosefo i tona fale. 26I te tau ake a Sosefo ki fale, nee natou momoli leva kia ia te meaofa ae nee natou aumai, pea nee natou punou leva o kaku ki te kele ia mua o Sosefo. 27Pea nee fehui leva e Sosefo kia natou pe e natou malolo pe; pea nee ina toe ui kia natou: pe e malolo pe takotou tamai, ae nee koutou palalau mai ki ai kua matua? Pe kei mauli ia ia? 28Nee natou tali: E malolo tau tagata faifekau, tamatou tamai, pea kei mauli foki ia ia. Pea nee natou toe punou leva o kaku ki te kele ia mua o Sosefo. 29Pea nee hiki ake leva e Sosefo ona mata; pea nee sio leva ia ia kia Pesamino tona tehina, tama a tana fae totonu, pea nee ina ui leva: Pe ko tokotou tehina muli aeni ae nee koutou palalau mai ki ai? Pea nee ina ui leva kia Pesamino: Ke tapuaki te Atua kia koe, oi toku foha! 30Nee logoi leva e Sosefo i ona tootooga tona ofa ki tona tehina, pea nee fia tagi leva ia ia. Nee ulu fakavilivili leva ia ia ki tona kogafale o tagi i ai. 31I te osi o tana fufulu ona mata, nee toe ulu ake leva ia ia kia natou. Pea nee faiga leva ia ia ke aua naa ha tona loto, o ina ui age ke tufa te meakai. 32Nee kai kehe pe ia Sosefo, pea nee kakai kehe ona tehina, pea nee toe kai kehe te kau Esipito ae nee fakaafe ki tona fale, koteuhi nee mole gafua ke kai fakatahi te kau Esipito mo te kau Hepeleo, koteuhi nee fakalialia osi te mea aia kia natou. 33Nee fakanofo leva te u tehina o Sosefo i ona mua, o kamata mai ae nee mua o kaku ki ae nee muli. Nee natou punamauli leva i te mea aia, pea nee natou fesioaki ia natou. 34Nee fakatotonu leva e Sosefo ke tufa kia natou te u meakai ae nee tuku i ona mua. Nee lahi tua nima age te vaega o Pesamino i ona tehina. Nee natou inu leva, pea nee natou fakafiafia fakatahi leva mo Sosefo.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland