EVASELIO A LUKA 10
10
Fekaui e Sesu te toko fitugofulu
1I te hili o te mea aia, nee filifili leva e te Aliki he tahi age kau tisipulo e fitugofulu, pea nee ina fekaui leva natou taki toko lua ke natou muamua ia te ia ki te u kolo fuli mo te u kogamea fuli nee tonu ke alu ia ia totonu ki ai. 2Pea nee ina ui leva kia natou: E lahi te taukai, kae e toko sii te kau gaue. Koia koutou kole ki te pule o te taukai ke ina fekaui ni tagata gaue ki tana taukai. 3Koutou olo; koeni, e au fekaui koutou o hage ko ni akeno ki te lotomalie o ni lupo. 4Aua naa kotou too he paaga, pee ko he taga, pee ko ni sulie, pea aua naa kotou fakamalo ki he tahi i te ala. 5I he fale pe e kotou hu ai; koutou ui mua: Ke hifo te tokalelei ki te fale aeni! 6Pea kapau e nofo i ai he fanau o te tokalelei, e hifo anai tokotou tokalelei kia ia; ka e kailoa, e toe liliu atu anai ia ia kia koutou. 7Kotou nofo i te fale aena, o kai mo inu te mea ae e foaki atu anai kia koutou, koteuhi e tonu ke mau e te tagata gaue tona totogi. Aua naa kotou mavae mai he fale ki he tahi fale. 8I he kolo pe e kotou hu ai anai, pea e talitali ai anai koutou, kotou kai te u mea e tuku atu anai kia koutou, 9kotou fakamauli te kau mahaki e nonofo anai i ai, pea kotou ui kia natou: Kua fakaovi mai te puleaga o te Atua kia koutou. 10Kae i he kolo pe e kotou hu ai anai, pea e mole talitali ai anai koutou, kotou olo i ona ala, pea kotou ui: 11E matou tutui kia koutou te efu totonu o tokotou kolo ae nee pipiki ki omatou vae; Kae ke kotou iloi nee fakaovi mai te puleaga o te Atua kia koutou. 12E au fakaha kia koutou i te aho o te fakamaau, e veliveli anai te tautea o Sotoma i te tautea o te kolo aena.
Valoki o natou e mole tui
13Malaia ia koe, Kolasini, Malaia ia koe, Petesaita! Koteuhi kanapau nee fai i Tile mo Sitone te u milakulo nee fai i lotomalie o kolua, kua fualoa age tana fakahemala, o too te taga mo te lefulefu. 14Koia, i te aho o te fakamaau, e tautea anai ia Tile mo Sitone o maamaa age ia kolua. 15Pea ko koe, Kafanaume, ae nee hiki o kaku ki te lagi, e tuku anai ia koe ki lalo o kaku ki te nofoaga o te kau mate.
16Ko ae e ina fakalogo koutou e ina fakalogo au, pea ko ae e ina siaki koutou e ina siaki au; pea ko ae e ina siaki au e ina siaki ia ae nee ina fekaui mai au.
Toe liliu o te u tisipulo; fiafia o Sesu
17Nee toe liliu leva te toko fitugofulu i he fiafia, o ui: Aliki, mo te kau temonio foki nee natou fakalogo mai kia matou i tou huafa. 18Nee ui leva e Sesu kia natou: Nee au sio ki te to ifo a Satana mai te lagi o hage he hila. 19Koeni, nee au foaki atu kia koutou te pule ke haele i te u gata mo te u sekolopio, pea ke malamalaki te malohi katoa o te fili; pea e mole he mea pe e feala anai ke ina fai he kovi kia koutou. 20Kae, aua naa kotou fakafiafia koteuhi nee fakalogo atu kia koutou te u laumalie; kae kotou fakafiafia koteuhi kua tohi okotou higoa i te atu lagi.
21I te lakaga pe aia, nee fakafiafia leva ia Sesu i te Laumalie Maonioni, o ui: E au fakavikiviki kia te koe, Tamai, Aliki o te lagi mo te kele, koteuhi nee ke fufu te u mea aeni ki te kau poto mo te kau atamai, kae nee ke fakaha natou ki te u fanau liliki. Io, Tamai, e au fakavikiviki kia koe koteuhi nee ke loto ke feia. 22Ko mea fuli pe kua tuku mai kia te au e taku Tamai, pea e mole he tahi e ina iloi pe ko ai te Alo, gata pe ko te Tamai, pe ko ai te Tamai, gata pe ko te Alo pea mo ae e loto te Alo ke ina fakaha ia ia ki ai. 23Pea nee maliu age leva ia ia ki ana tisipulo, o ui kia natou ateaina: Manuia te u mata e sio ki te u mea e kotou sio ki ai! 24Koteuhi e au ui atu kia koutou nee kaugamalie te u polofeta mo te u hau nee natou fakaamuamu ke sio ki te u mea e kotou sio ki ai, kae nee mole natou sio ki ai, pe ke natou logo ki te u mea e kotou logo ki ai, kae nee mole natou logo ki ai.
Fehui a te toketa o te lao kia Sesu
25Nee tuu ake leva ki oluga he toketa o te lao o ui kia Sesu, ke ahiahii ai ia ia: Pule, kotea te mea e tonu ke au fai ke mau ai te mauli heegata? 26Nee ui leva e Sesu kia ia: Kotea te mea e tuu i te lao? Kotea e ke lau i ai? 27Nee ina tali leva kia ia: E ke ofa anai ki tou Aliki, tou Atua, i tou loto katoa, mo tou laumalie katoa, mo tou malohi katoa, pea mo tou atamai katoa; pea mo tou kaiga o hage ko koe totonu. 28Nee ui leva e Sesu kia ia: Kua ke tali tonu, fai te mea aia, pea e ke mauli anai. 29Kae i tana fia fakatonuhia ia ia, nee ina ui leva kia Sesu: Pea ko ai toku kaiga?
Folafola a te tagata Samalitana
30Nee toe palalau leva ia Sesu, o ui: Nee hifo he tagata mai Selusalemi ki Seliko. Nee to leva ia ia kia nima o te kau kaihaa, ae nee natou kaihaa ana mea fuli, mo ta ia, pea nee natou olo leva, kae tuku ia kua mehii mate. 31Ko he tagata faisakilifisio, ae nee fuafua hifo mai i te ala aena, nee sio leva ki te tagata aia, pea nee fakalaka leva ia ki te tahi kauala. 32Ko he Levita*, ae nee toe kaku mai foki ki te kogamea aia, nee sio ki te tagata, pea nee toe fakalaka leva ki te tahi kauala. 33Kae ko he tagata Samalitana, ae nee fagona o kaku mai ki te kogamea aia, nee sio leva ia ki te tagata, pea nee ofa mamahi leva ia kia ia. 34Nee fakaovi age leva ia kia ia, pea nee ina hai ona kafo, o tului natou ki he lolo mo he vino; pea nee ina fakaheka leva ia ki tana manu fagona, pea nee ina ave leva ia ia ki he fale talifagona, pea nee ina tauhi leva ia. 35I te aho ake, nee ina too leva ni foi tenalio e lua, o fakatoo ki te pule o te fale talifagona, pea nee ina ui leva kia ia: Tokaga kia ia, pea ko te mea fuli pe e ke toe fakaaoga anai kia ia, e au totogi atu anai ia kia koe i taku toe liliu mai. 36Ko ai i te toko tolu aeni e mata kia koe nee liliu ko te kaiga o ae nee to kia nima o te kau kaihaa? 37Nee tali leva e te toketa o te lao: Ko ia ae nee ina fakaha te manavaofa ki te tagata aia. Pea nee ui leva e Sesu kia ia: Alu, pea ko koe, fai feia.
Maleta mo Malia
38I te fagona a Sesu mo ana tisipulo, nee ulu leva ia ki he kolo, pea ko he fafine, nee higoa ko Maleta, nee ina talitali leva ia i tona api. 39Nee i ai hona tehina nee higoa ko Malia, ae nee nofo ia vae o te Aliki, o fakalogo tana folafola. 40Ko Maleta, ae nee maua e te u gaue kehekehe o te fale, nee oho age leva, o ui: Aliki, pe e ke lelei ia pe toku tuku toko tahi e toku tehina ke au faifekau? Ui age kia ia ke tokoni mai kia au. 41Nee tali leva e te Aliki kia ia: Maleta, Maleta, e lahi aupito te u mea ae e ke kinakina mo ke hohaa ki ai. 42Ko te mea pe e tahi e aoga. Nee filifili e Malia te vaega lelei, ae e mole too anai maia te ia.
Currently Selected:
EVASELIO A LUKA 10: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
