EVASELIO A LUKA 9
9
Gaue a te toko hogofulu malua
1Nee fakatahii leva e Sesu te toko hogofulu ma lua, pea nee ina foaki leva kia natou te malohi mo te pule ki te u temonio fuli, pea mo te malohi ke fakamauli ai te u mahaki. 2Pea nee ina fekau leva natou ke olo o fagonogono te puleaga o te Atua, pea mo fakamauli te u mahaki. 3Nee ui leva e Sesu kia natou: Aua naa koutou too ki te fagona pee ko he tokotoko, pee ko he taga, pee ko he pane, pee ko he paaga, pea aua naa koutou ave ni kofu e lua. 4I he fale pe e kotou ulu ki ai, koutou nonofo i ai o kaku ki te takotou mavae. 5Pea, kapau e mole tali koutou e te hahai, kotou mavae mai te kolo aena, pea kotou tutui te efu i okotou vae, ko he fakamooni aia kia natou. 6Nee natou olo leva, pea nee natou fakalaka leva i te u kolo liliki fuli, o fakaha te logo lelei pea mo fakamauli te u mahaki i te u kogamea fuli.
Helote
7Nee logo leva ia Helote te Tetalake ki te u mea fuli kua hoko, pea nee mole ina iloi hana manatu. Koteuhi nee ui e ihi ko Soane-Patita kua toe tuuake mai te kau mate. 8Pea ko ihi ko Elia kua ha; pea ko ihi age ko he tahi o te kau polofeta afea ae kua toe tuuake mai te kau mate. 9Kae nee ui leva e Helote: Nee au fakatotonu ke tuusi te kia o Soane; pe ko ai aeni e au logo e palalaui ki ai te u mea aeni? Pea nee faiga leva ia ia ke sio kia Sesu.
Fafaga o te toko nima afe i te toafa
10Nee toe liliu mai leva te kau apositolo, o fakamatala kia Sesu te u mea fuli nee natou fai. Nee ina taki leva natou, pea nee alu leva ia ia ki he kogamea lavaki, i te fahai o he kolo nee higoa ko Petesaita. 11Kae nee iloi leva ia ia e te hahai, pea nee natou mumuli leva ia ia. Nee talitali leva natou e Sesu, pea nee folafola leva ia ia kia natou o uhiga mo te puleaga o te Atua; nee ina fakamauli foki mo natou ae nee aoga ke fakamauli.
12I te kamata malu o te afiafi, nee fakaoviovi age leva te toko hogofulu ma lua kia Sesu, o ui kia ia: Fekau te hahai ke olo ki te u kolo liliki pea mo te u kolo uta ae e ovi mai, o momoe i ai pea mo kumi ai ni meakai, koteuhi e tou nonofo i he kogamea lavaki. 13Nee ui leva e Sesu kia natou: Foaki e koutou totonu kia natou he mea ke kai. Kae nee natou ui leva: E tou mau pe ni foi pane e nima mo ni kii ika e lua, kae kapau koia, pea e motou olo totonu o totogi mai ni meakai ki te hahai fuli aeni! 14Koeni, nee i ai he hahai nee toko nima afe tagata ape. Nee ui leva e Sesu ki ana tisipulo: Kotou fakanofo natou ki lalo, i ni atu, ke toko nimagofulu te atu. 15Nee natou fai fena leva, nee natou fakanonofo leva natou fuli ki lalo. 16Nee too leva e Sesu te u foi pane e nima mo te u kii ika e lua, nee tagaki ake leva ona mata ki te lagi, pea nee ina tapuakii leva natou. Pea nee ina tofitofi leva te u foi pane mo te u kii ika, o foaki age natou ki ana tisipulo, ke natou tufa natou ki te hahai. 17Nee natou kakai fuli leva o makokona, pea nee ave leva ni kato e hogofulu ma lua kua fofonu i te u toei kai.
Fakaha e Petelo ko Sesu ko te Kilisito
18I he aho nee faikole ai ia Sesu toko tahi, pea nee olo ake leva ana tisipulo kia ia, pea nee ina fai leva kia natou te fehui aeni: Pe e ui e te hahai ko ai au? 19Nee natou tali leva: E ui e ihi ko Soane-Patita; pea e ui e ihi ko Elia, pea e ui e ihi ko he tahi o te kau polofeta afea kua toe tuuake. 20Pea nee ina fehui age leva kia natou: Ko koutou, e koutou ui ko ai au? Nee tali leva e Petelo: Ko te Kilisito o te Atua. 21Nee fakatotonu fakamamafa age leva e Sesu kia natou ke aua naa natou tala ki he tahi te mea aia.
Fakaha e Sesu tona mate mo tana toe tuuake
22Pea nee toe ui leva e Sesu e tonu ke mamahi lahi te Foha o te tagata, pea ke siaki ia e te kau matua, mo te kau pule faisakilifisio, mo te kau sekelipa, pea ke tamatei ia ia, pea ke toe tuuake ia ia i te tolu aho.
Mulimuli ia Kilisito
23Pea nee ina ui leva ki te kau tisipulo fuli: Kapau e loto e he tahi ke mulimuli mai ia au, ke fakafisi ia ia kia ia totonu, ke ina amo tona koluse i te aho taki tahi, pea ke mulimuli mai ia ia ia au. 24He ko ae e loto anai ke haofaki tona mauli e ina pulihi anai ia, kae ko ae e ina pulihi anai tona mauli o tupu ko au e ina haofaki anai ia. 25Pea kotea tona aoga ki he tagata tana mau te malamanei katoa, mo kapau e puli pe e maumau ia ia totonu? 26Kapau e ufiufi anai he tahi kia au pea mo aku folafola, e toe ufiufi anai te Foha o te tagata kia ia, moka hau anai ia ia i tona kololia, pea mo ae o te Tamai mo te kau aselo maonioni. 27E au fakaha mooni atu kia koutou, ko ihi ia natou ae e nonofo i heni e mole natou mamate anai i mua o tanatou sio ki te puleaga o te Atua.
Ha o te kololia o Sesu i te mouga
28Nee hili leva ni aho ape e valu ki tana fakaha te u folafola aena, nee too leva e Sesu ia Petelo, mo Soane, mo Sakopo, pea nee hake leva ia ia ki he mouga, o faikole i ai. 29I te lolotoga o tana faikole, nee fetogi leva ona mata, pea nee liliu leva ona teu o hina gigila. 30Pea koeni, nee palalau ni tagata e toko lua mo ia: Nee ko Moisese mo Elia, 31ae nee ha mai i te kololia, pea nee na palalau mo ia ki tona fagona ki Selusalemi e ina amanaki fakahoko. 32Nee kua fia moe aupito ia Petelo mo ona kaumea; kae i tanatou alaala, nee natou sisio leva ki te kololia o Sesu mo te u tagata e toko lua ae nee tutuu mo ia. 33I te mavae a te u tagata aena ia Sesu, nee ui age leva e Petelo kia ia: Pule, e lelei ke tou nonofo i heni; tou fakatuu ni falela e tolu, he tahi kia koe, mo he tahi kia Moisese, pea mo he tahi kia Elia. Nee mole ina iloi te mea ae nee palalau ia ia ki ai. 34I tana lolotoga palalau, nee hau leva he ao o kofu natou; pea nee mataku lahi osi te kau tisipulo i tanatou sio kua takatakai natou e te ao. 35Pea nee logo mai leva he leo mai te ao, o ui: Ko ia aeni ko toku Alo filifiliia, koutou fakalogo kia ia! 36I te osi o te palalau a te leo, nee natou sio leva kia Sesu toko tahi. Nee natou fakalologo leva, pea nee mole pe natou fakamatala ki he tahi, i te temi aia, te mea ae nee natou sio ki ai.
Fakamauli o he toe nee fakamamahii e he laumalie kovi
37I te aho ake, nee natou hifo leva mai te mouga, pea nee omai leva he hahai kaugamalie o fakafelavei kia Sesu. 38Pea nee kalaga leva he tagata mai te lotomalie o te hahai: Pule, e au kole atu kia koe, ke ke sio mai ki toku foha, koteuhi ko toku foha ulutokotahi. 39E too ia ia e he laumalie, pea fokifa pe e kalaga ia ia; pea e lu fakamalohi ia e te laumalie, o fakafiho ona gutu, pea e faigataa tana mavae ia te ia, pea ka mavae ia, e ina tuku ia kua kafo katoa. 40Nee au kole ki au tisipulo ke natou kapu ia, pea nee mole natou fealagia ia. 41Nee ui leva e Sesu: Lanu hee tui mo agakovi, e kaku anai ki afea taku nofo mo koutou, mo taku katakii koutou? Aumai ki heni tou foha. 42I tana fakaoviovi ake, nee atufi leva ia e te temonio ki te kele, pea nee ina fakatapalutu ia. Kae nee pupulai leva e Sesu te laumalie uli, pea nee ina fakamauli leva te toe, pea nee ina tuku leva ia ki tana tamai. 43Pea nee natou punamauli fuli i te mafimafi o te Atua. Kae i tanatou punamauli ki te u mea fuli ae nee fai e Sesu, nee ina ui age leva ki ana tisipulo:
Fakaha o tona mate mo tana toe tuuake
44Kia koutou, kotou fakalogo lelei mai ki te mea aeni: E tonu ke tuku te Foha o te tagata kia nima o te u tagata. 45Kae nee mole mahino te kau tisipulo ki te folafola aia; koteuhi nee uufi ia kia natou, o tupu ke aua naa natou mahino ki tona uhiga; pea nee natou teki i tona fakafehui o uhiga mo te folafola aia.
Fihi a te u tisipulo: Ia ia ae e lahi ia natou
46Kae, nee tupu leva he manatu i onatou loto, ke iloi pe ko ai e lahi ia natou. 47I te iloi e Sesu te manatu aia i onatou loto, nee ina too leva he kii toe, o fakatuu i ona tafa, 48pea nee ina ui leva kia natou: Ko he tahi pe e ina talitali i toku huafa te kii toe aeni e ina tali ia au totonu; pea ko he tahi pe e ina talitali ia au e ina talitali ia ae nee ina fekaui mai au. Koteuhi ko ae e veliveli ia koutou fuli, ko ia ae e lahi.
Fiamealahi fakalotu
49Nee palalau leva ia Soane, o ui: Pule, nee matou sio ki he tagata e ina kapu ni temonio i tou huafa; pea nee matou taofi ia ia, koteuhi e mole mulimuli mai ia ia tatou. 50Nee tali leva e Sesu kia ia: Tuku takotou taofi ia ia; koteuhi ko ae e mole fakafehagai kia koutou e kau mo koutou.
Fakapapau a Sesu ke hake ki Selusalemi
51I te kua ovi mai leva o te temi nee tonu ai ke too ia ia mai te malamanei, nee too leva e Sesu te fakapapau ke hake ki Selusalemi. 52Pea nee ina fekaui leva i ona mua ni tagata faifekau, ae nee na olo leva, pea nee na hu leva ki he kolo o te kau Samalitana, o teuteui he nofoaga kia te ia. 53Kae nee mole talitali leva ia e te hahai, koteuhi nee alu fakahaga ia ia ki Selusalemi. 54I te sio a te u tisipulo ko Sakopo mo Soane ki te mea aia, nee na ui leva: Aliki, pe e ke loto ke ma lagiaki ke to mai te afi mai te lagi o tutu natou? 55Nee maliu leva ia Sesu kia naua, pea nee ina munai leva naua, o ui: E mole kolua iloi pe ko te laumalie fea e ina taki kolua. 56Koteuhi nee mole hau te Foha o te tagata ke ina pulihi te u mauli o te u tagata, kae ke ina fakamauli natou. Pea nee natou olo leva ki he tahi age kolo.
Te mulimuli ia Sesu
57I tanatou olo i te ala, nee ui leva e he tagata kia Sesu: Aliki, e au mulimuli anai ia koe, i te u kogamea fuli e ke alu anai ki ai. 58Nee tali leva e Sesu kia ia: E mau e te u lenato* ni nofoaga i te kele, pea e mau e te u manulele o te lagi ni fatai, kae e mole mau e te Foha o te tagata he kogamea e feala ai tana fakamalolo tona ulu. 59Nee ina ui leva ki he tahi: Mulimuli mai ia te au. Pea nee tali leva e te tagata aia: Aliki, fakagafua mai ke au alu mua o tanu taku tamai. 60Kae nee ui leva e Sesu kia ia: Tuku te kau mate ke natou tanu anatou mate; kae ko koe, alu o fagonogono te puleaga o te Atua. 61Nee ui leva e he tahi: Aliki, e au mulimuli anai ia koe, kae fakagafua mai ke au alu mua o tauine mo natou o toku api. 62Nee tali leva e Sesu kia ia: Ko he tahi pe e kapa tona nima ki te saliote, pea e toe sio ki muli, e mole aoga ia ia ki te puleaga o te Atua.
Currently Selected:
EVASELIO A LUKA 9: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
