EVASELIO A MALEKO 4
4
Te tagata nunusi pulapula mo te u kele
1Nee toe akonaki leva ia Sesu i te matatai. Pea nee fakatahi age leva he hahai kaugamalie kia ia, pea nee hopo leva ia ia o heka i he vaka, i te tai. Nee nonofo te hahai katoa i te kele, i te matatai. 2Nee ina ako leva kia natou ni mea lahi i ni folafola fakatata, pea i tana akonaki nee ina ui kia natou:
3Koutou fakalogo mai. Nee hu leva ki tua he tagata nunusi pulapula o nunusi tana pulapula. 4I tana nunusi te pulapula, nee maluku leva he potu o te pulapula i te tafaaki o te ala: Nee omai leva te u manulele o kai ia ia. 5Nee maluku leva te tahi potu ki he kogamea makamaka, ae nee mole lahi ai he kele: Nee homo atu aipe ia ia, koteuhi nee mole ina mau he kele loloto; 6kae, i te hopo ake o te laa, nee mahunu leva ia o moamoa, koteuhi nee mole ina mau ni aka. 7Nee maluku leva he tahi potu ki te vao talatala: nee homo ake leva te vao talatala o taotao ia ia, pea nee mole fua leva ia. 8Nee maluku leva he tahi potu ki te kele lelei: nee ina foaki leva ni fua ae nee fua lelei, pea nee fua lahi osi, o tolugofulu, mo onogofulu, mo teau ki te foi pulapula e tahi. 9Pea nee ina ui leva: Ko ae e ina mau ni taliga moo fakalogo, ke fakalogo.
10I te temi nee toko tahi ai, nee fehui leva kia ia e natou ae nee natou takatakai ia ia pea mo te toko hogofulu ma lua ki te uhiga o te folafola fakatata aia. 11Pea nee ina ui leva kia natou: Kua tuku atu kia koutou ke kotou iloi te misitelio o te puleaga o te Atua; kae kia natou ae e nonofo i tua e fai te u mea fuli aki ni folafola fakatata, 12koteuhi i tanatou sio mata, e natou sisio pea e mole pe natou iloi; i tanatou logo taliga, e natou logo pea e mole pe natou mahino, o tupu ke aua naa natou tafoki, pea ke aua naa fakamolemole anatou agahala. 13Pea nee ina toe ui leva kia natou: Pe e mole koutou mahino ki te folafola fakatata aia? Pea e feafeai anai ke koutou mahino ki te u folafola fakatata fuli?
14Ko te tagata nunusi pulapula e ina nunusi te folafola. 15Ko ihi ko te tafatafa natou o te ala, ae nee nunusi ki ai te folafola: I tanatou logo ki te folafola, e hau ia Satana i te lakaga pe aia, o too te folafola ae nee nunusi ia natou. 16Pea ko ihi foki nee natou tali te pulapula i ni kogamea makamaka: I tanatou logo ki te folafola, nee natou tali aipe ia ia mo te loto fiafia. 17Kae e mole ni onatou aka ia natou totonu, koteuhi e puli ia natou te kataki fualoa, pea ka hoko mai pe he mamahi pee ko he fakataga o tupu ko te folafola, e natou mau aipe he faigamalie ke natou higa. 18Ko ni ihi e natou tali te pulapula i te vao talatala; ko natou ae e logo ki te folafola, 19kae ko tonatou taomia e te u mea o te sekulo, pea mo tonatou ofa ki te u koloa, pea mo tonatou ulufi e te u manumanu fuli, e natou taotao te folafola ke aua naa fua. 20Ko ni ihi nee natou tali te folafola i te kele lelei; ko natou ae e logo ki te folafola, pea e natou tali ia ia, pea e natou fua, o tolugofulu, mo onogofulu, pea mo teau ki te tahi.
Te malama i oluga o te hiliaga malama
21Nee ina toe ui leva kia natou: Pe e aumai te foi malama ke tuku i lalo o te foi kesi, pee i lalo o te palepale? Pe e mole hili ia ia ki oluga o te hiliaga malama? 22Koteuhi e mole he mea e uufi, e mole tonu ke fakaha, pea e mole he mea e fakapulipuli, e mole tonu ke iloi. 23Kapau e mau e he tahi ni taliga ke fakalogo, ke logo ia ia.
24Nee ina toe ui leva kia natou: Koutou tokaga ki te mea ae e koutou logo ki ai. E fuafua anai koutou aki te fua ae nee kotou fakaaoga, pea e toe fakalahi atu anai kia koutou. 25Koteuhi e foaki anai kia ae e ina mau; kae ki ae e mole ina mau e too anai foki mo te mea ae e ina mau.
Fakatata o te mauli fakalaumalie
26Nee ina toe ui leva: E toe fakatatau foki te puleaga o te Atua ki he pulapula e nunusi e he tagata ki te kele; 27pe e moe ia ia pee alaala ia ia, i te pouli mo te aho, e homo te pulapula pea mo tupu lelei, kae e mole ina iloi pe e feafeai; 28e fakatupu toko tahi e te kele tona fua, uluaki ko te homo, pea mo te fisi, pea mo te tegai fulumeto kua katoa i te toulu fulumeto; 29pea ka matua te fua, e tuku ki ai te hele tuusi, koteuhi kua hoko te temi tanaki o te taukai.
Folafola o te foi sinapi
30Nee ina toe ui leva: E tou fakatatau anai ki tea te puleaga o te Atua? Kofea leva te folafola fakatata e tonu ke tou fakamatala ai ia ia? 31E tatau ia ia mo te foi sinapi; ka to ia ia ki te kele, e veliveli osi ia i te u fuai pulapula fuli o te kele; 32kae, i te osi o tona to, e homo ia ia, pea e liliu ia ia o lahi age i te u akau liliki fuli o te oloto, pea e homo ona vaa o lalahi, pea e omai te u manulele o te lagi o faifatai i tona malumalu.
33Nee lahi te u folafola fakatata feia, ae nee ina fakaha ai kia natou te folafola, o hage ko te fakatata aeni, o mulimuli ki te mafai o tanatou fakalogo. 34Nee mole pe palalau ia ia kia natou hala fakatata; kae ka toko tahi, pea nee ina fakamatala te u mea fuli ki ana tisipulo.
Taofi o te afa e Sesu
35I te aho pe aia, i te afiafi, nee ui leva e Sesu kia natou: Tou fakalaka ki te tahi fahai o te tai. 36I te osi o te fekaui o te hahai, nee natou ave leva ia ia i te vaka ae nee nofo ai; nee i ai foki mo ni ihi vaka nee fakatahi mo ia. 37Nee mafuta leva he ahiohio lahi, pea nee pa te u peau ki te loto vaka, pea kua fonu foki ia ia i te vai. 38Kae ko ia, nee moe ia ia i te taumuli i he pila. Nee natou fafagu leva ia ia, o ui age ki ai: Pule, pe e mole ke hoha he ka tou mamate? 39I tana ala ake, nee ina pupulai leva te matagi, pea nee lea leva ia ia ki te tai: Fakalologo! Manava osi! Pea nee mate leva te matagi, pea nee to leva he totofu lahi ki te tai. 40Pea nee ina ui leva kia natou: Kotea nee koutou matataku lahi ai? Kotea nee mole pe koutou mau ai he tui? 41Nee natou mau e he mataku lahi aupito, pea nee natou feuiaki ia natou: Ko ai foki ia ia aeni, ae e fakalogo foki ki ai te matagi mo te tai?
Currently Selected:
EVASELIO A MALEKO 4: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
