EVASELIO A MALEKO 5
5
Fakamauli o he tagata avea i Katala
1Nee natou kaku leva ki te tahi fahai o te tai, i te fenua o te kau Katala. 2I te lakaga pe ae nee hifo ai leva ia Sesu i te vaka, nee hau leva he tagata ki ona mua, ae nee ulu mai te u tanuma, pea nee nofo ia ia he laumalie uli. 3Nee mau e te tagata aia tona nofoaga i te u tanuma, pea nee mole kei feala e he tahi tona hai tatau aipe aki ni seini. 4Koteuhi kua tua lahi te tau hai o ona vae aki ni katena pea mo ona nima aki ni seini, kae nee ina motumotuhi te u seini pea fasifasii te u katena, pea nee mole kei mau e he tahi te malohi ki tona fakalalata. 5Nee nofo tuumau ia ia, i te pouli mo te aho, i te u tanuma pea mo te u mouga, o pakalaga, mo hifi tona sino aki ni maka. 6I tana sio kia Sesu mai mamao, nee lele leva ia ia, o tulolo i ona mua, 7pea nee kalaga leo lahi leva ia ia: Pe e i ai he mea ia au mo koe, Sesu, Alo o te Atua Maoluga? E au kole mamahi atu kia koe i te huafa o te Atua, aua naa ke fakamamahii au. 8Koteuhi nee ui e Sesu kia ia: Mavae i te tagata aena, laumalie uli! 9Pea nee fehui leva e Sesu kia ia: Ko ai tou higoa? Nee ina tali leva kia Sesu: Ko toku higoa ko Lesio, koteuhi e matou kaugamalie. 10Pea nee ina kolekole leva kia Sesu ke aua naa ina kapu natou ki te tua fenua. 11Nee i ai i te kogamea aia he faga puaka lahi ae nee fafaga i te mouga. 12Pea nee kole leva e te kau temonio kia ia, o ui: Fekaui matou ki te faga puaka aia, o tupu ke matou ulu kia natou. 13Nee ina fakagafua leva kia natou te mea aia. Pea nee mavae leva te u laumalie kovi o ulu ki te u puaka, pea nee oho leva te faga puaka ki te mata mato, o fakato ki te tai: nee ko puaka e lua afe ape, pea nee natou malelemo fuli leva i te tai. 14Ko natou ae nee natou fafaga te u puaka nee feholaki leva, pea nee natou fakamafola leva te logo i te kolo mo te u fale tauhi manu. Nee olo leva te hahai o sisio ki te mea kua hoko. 15Nee natou omai leva kia Sesu, pea nee natou sisio leva ki te tagata ae nee nofo ai te Lesio, kua teuteu, pea kua atamai lelei; pea nee natou manavasii leva. 16Ko natou ae nee sisio ki te mea nee hoko nee natou fakamatala leva kia natou te mea nee hoko ki te tagata avagaia mo te faga puaka. 17Pea nee natou kolekole leva kia Sesu ke mavae i tonatou fenua.
18I tana hopo ki te vaka, nee kole age leva kia ia e te tagata nee avagaia ke fakagafua age kia ia ke nofo mo ia. 19Nee mole fakagafua leva e Sesu kia ia te mea aia, kae nee ina ui leva kia ia: Alu ki tou fale, ki tou famili, pea ke fakamatala kia natou te u mea fuli ae nee fai e te Aliki kia koe, pe nee feafeai tona manavaofa kia koe. 20Nee alu leva ia ia, o kamata fakaha i te Tekapole te u mea fuli ae nee fai e Sesu kia ia. Pea nee fakaofoofo ia ki te hahai fuli.
Te ofafine o Sailusi mo te fafine mahaki fakafanoa
21Nee toe liliu leva ia Sesu i te vaka ki te tahi matatai, pea nee fakatahi age leva te hahai tokolahi kia ia. Nee tuu ia ia i te matatai. 22Pea nee hau leva he tahi o te kau pule o te sinakoka, nee higoa ko Sailusi: I tana sio kia Sesu, nee to tuutuli leva ia ia ki ona vae, 23pea nee ina fai leva kia ia te kole mamahi o ui: Kua vave mate pe taku kii taahine; hau, o hili kia ia ou nima, o tupu ke haofaki ia ia, pea ke mauli. 24Nee alu leva ia Sesu mo ia. Pea nee muli leva ia ia he hahai kaugamalie, pea nee natou fakaefihi ake kia ia mai te potu fuli.
25Kae nee i ai he fafine ae nee mahaki fakafanoa talu maia tau e hogofulu ma lua. 26Nee mamahi lahi te fafine aia ia nima o te kau toketa kaugamalie, pea kua puli ki ai te u mea fuli nee ina mau, kae nee mole pe ina mau he kii fimalie, pea nee asilisili tona kovi. 27I tana logo ki te palalau kia Sesu, nee hau leva ia ia i te hahai, pea nee ina puke leva tona kofu mai muli: 28Koteuhi nee ina ui: Kapau e feala pe ke au lave ki ona teu, pea e au mauli anai. 29I te lakaga pe aia nee gata leva tona mahaki fakafanoa, pea nee ina logoi leva i tona sino kua mauli ia ia i tona mahaki. 30Nee iloi leva e Sesu i te lakaga pe aia nee mavae he malohi maia ia; pea nee mafuli leva ia ia ki te hahai, o ui: Ko ai ae nee kapa mai ki oku teu? 31Nee ui leva e ana tisipulo kia ia: E ke sio ki te hahai ae e fakaefihi atu kia koe, pea e ke ui: Pe ko ai ae nee lave mai kia au? 32Pea nee fesioaki ia ia ki ona tafatafa ke sio kia ia ae nee ina fai te mea aia. 33I tana iloi te mea ae kua hoko kia ia, nee mataku lahi te fafine pea nee tete ia ia, pea nee hau leva ia ia o punou i te u vae o Sesu, mo fakaha kia ia te mooni katoa. 34Kae nee ui leva e Sesu kia ia: Siaku taahine, kua haofaki koe e tau tui; alu i te tokalelei, koteuhi kua ke mauli i tou mahaki.
35I tana lolotoga palalau, nee kaku age leva ni hahai mai te api o te pule o te sinakoka, o ui: Kua mate tau taahine; kotea ae e ke toe fakakinakina ai ki te pule? 36Kae nee mole tokaga ia Sesu ki te u palalau aia, pea nee ina ui ki te pule o te sinakoka: Aua tau tuania, tui pe koe. 37Pea nee mole ina fakagafua leva ki he tahi ke alu mo ia, gata pe kia Petelo, mo Sakopo, pea mo Soane, tehina o Sakopo. 38Nee natou kaku leva ki te fale o te pule o te sinakoka, pea nee sio leva ia Sesu ki he hahai logoaa pea mo ni ihi nee fetagihi pea mo kalaga leo lahi. 39Nee ulu leva ia Sesu, o ui kia natou: Kotea e koutou logoaa ai, pea kotea e koutou fetagihi ai? E mole mate te toe, kae e moe ia ia. 40Nee natou nukinuki leva kia ia. Kae nee ina fakamavae leva ki fafo te hahai katoa, pea nee ina too leva mo ia te tamai mo te fae a te toe, pea mo natou ae nee kauga fagona mo ia, pea nee ulu leva ia ia ki te kogamea ae nee tuku ai te toe. 41Nee too leva e Sesu te nima o te toe, o ui kia ia: Talitha Koumi, ko tona uhiga: Taahine, tuu ki oluga, e au ui atu kia koe. 42I te lakaga pe aia nee tuu ake leva te taahine ki oluga, o kamata haele; koteuhi nee tau hogofulu ma lua ia ia. Pea nee natou ofolele aupito. 43Nee tuku leva e Sesu kia natou ni fakatotonu mamafa, ke aua naa iloi e he tahi te mea; pea nee ina ui leva ke foaki he meakai ki te taahine.
Currently Selected:
EVASELIO A MALEKO 5: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
