EVASELIO A MALEKO 6
6
Alu fakaosi ki Nasaleti
1Nee mavae leva ia Sesu mai ai, o toe liliu ki tona fenua. Nee mulimuli leva ia ia ana tisipulo.
2I te hoko mai leva o te sapato, nee kamata akonaki leva ia ia i te sinakoka. Pea nee ofolele te hahai kaugamalie ae nee fakalogo kia ia, o ui: Pe e ina mau mai fea te u mea fuli aia? Pe ko te poto feafeai aia kua tuku age kia ia, pea ko te pule feafeai aia kua fakahoko ai e tona u nima te u milakulo lalahi aia? 3Pe e mole ko te tagata tufuga akau ia ia, te tama a Malia, te tehina o Sakopo, mo Sosefo, mo Suta, pea mo Simone? Pea ko ona tuagaane, pe e mole natou nonofo i heni mo tatou? Pea nee mole natou tui kia ia.
4Kae nee ui leva e Sesu kia natou; E fehiainai pe he polofeta i tona fenua, mo ona kaiga, pea mo tona famili. 5Nee mole feala leva ke ina fai i ai he milakulo, gata pe ki tana hili ona nima ki ni mahaki, o fakamauli natou. 6Pea nee punamauli ia ia ki tanatou tui gataa.
Te fekau o te toko hogofulu ma lua
Nee folii e Sesu te u kolo nee ovi ai, o akonaki. 7Nee paui leva e Sesu te toko hogofulu ma lua, pea nee ina kamata fekaui leva natou o taki toko lua, pea nee ina foaki leva kia natou te pule ki te u laumalie uli. 8Nee ina fakatotonu leva kia natou ke aua naa too he mea ki te fagona, gata pe mo kapau ko he tokotoko; ke aua naa too he pane, pee ko he taga, pee ko he paaga i te kilii pipi; 9pea ke tui ni taka, pea ke aua naa tui ni tunika e lua.
10Pea nee ina ui leva kia natou: I he fale pe e kotou ulu anai ki ai, koutou nonofo i ai o kaku ki takotou mavae i te kogamea aia. 11Pea, kapau e i ai i he kogamea ni hahai e mole natou tali koutou pe e mole natou fakalogo kia koutou, koutou mavae i ai, pea koutou tutu te efu i okotou vae, o tupu ke liliu te mea aia ko he fakamooni kia natou.
12Nee natou olo leva, pea nee natou akonaki leva ki te fakahemala. 13Nee natou kapu ni temonio kaugamalie, pea nee natou vali lolo ni mahaki kaugamalie pea mo fakamauli natou.
Fakapogi o Soane-Patita
14Nee logo leva te hau ko Helote ki te palalau kia Sesu, koteuhi nee logologona tona higoa, pea nee ina ui leva: Ko Soane-Patita aia kua toe tuuake mai te kau mate, pea koia e hoko ai ni milakulo ia ia. 15Nee ui e ihi: Ko Elia. Pea nee ui e ihi: Ko he polofeta o hage ko he tahi o te kau polofeta. 16Kae nee ui e Helote i tana logo ki te mea aia: Ko te Soane ae nee au fakatotonu ke tuusi tona ulu, ko ia aena kua toe tuuake mai te kau mate.
17Koteuhi nee fekau e Helote totonu ke puke ia Soane, pea ke hai ia ia i te fale pilisoni, o tupu ko Elotiasi, te ohoana o Filipo, tona tehina, koteuhi nee ina ohoanai ia ia, 18pea nee ui e Soane kia ia: E mole gafua kia koe tau nofo mo te ohoana o tou tehina. 19Nee ita ai Elotiasi kia Soane, pea nee loto ia Elotiasi ke tamatei ia Soane. 20Kae nee mole ina fealagia te mea aia; koteuhi nee mataku ia Helote kia Soane, i tana iloi ko he tagata agalelei ia ia mo maonioni; nee ina puipui ia Soane, pea, i te osi o tana logo kia ia, nee tua lahi te lakilua o tona loto, pea nee fia logo tuumau ia ia kia ia.
21Kae, nee hoko leva he aho faigamalie, ko te aho fakamanatu aia o te tupu o Helote. Nee fai leva e Helote he kaitahi ki tana kau lalahi, mo te kau pule solia pea mo te kau tagata mauhiga o Kalilea. 22Nee ulu age leva te taahine o Elotiasi ki te kogafale; nee mee leva ia ia, pea nee lelei ia leva e Helote mo tana kau fakaafe. Pea nee ui leva e te hau ki te taahine: Kole mai kia au te mea ae e ke loto anai ki ai, pea e au foaki atu anai ia ia kia koe. 23Nee toe fuakava foki ia ia kia ia, o ui: Ko te mea ae ka ke kole mai anai kia au, tatau aipe pe ko te vaelua o toku puleaga, e au foaki atu anai ia ia kia koe. 24I tana hu ki tua, nee ina ui leva ki tana fae: Kotea te mea e au kole anai? Pea nee tali leva tana fae: Te foi ulu o Soane-Patita. 25Nee ulu atu aipe te taahine ki loto o alu fakavilivili ki te hau, pea nee ina fai leva kia ia te kole aeni: E au loto ke ke foaki mai kia au, i te lakaga pe aeni, i he pa, te foi ulu o Soane-Patita. 26Nee mamahi lahi leva te hau; kae, o tupu ko ana fuakava mo te kau fakaafe, nee mole loto leva ia ia ke fakafisi. 27Nee ina fekaui atu aipe ki te fale pilisoni he tagata leo, mo te fakatotonu ke aumai te foi ulu o Soane-Patita. 28Nee alu leva te tagata leo o tuusi te foi ulu o Soane i te fale pilisoni, o aumai i he pa. Nee ina foaki leva ia ia ki te taahine, pea nee foaki leva ia ia e te taahine ki tana fae. 29Ko te kau tisipulo a Soane, i tanatou logo ki te mea aia, nee natou omai leva o too tona sino, o tuku ki he tanuma.
Liuga o pane ki te toko nimagofulu afe
30Nee fakatahi age leva te kau apositolo kia Sesu, pea nee natou fakamatala leva kia ia te u mea fuli nee natou fai pea mo te u mea fuli nee natou akonaki ki ai. 31Nee ui leva e Sesu kia natou: Koutou omai ki he kogamea lavaki, pea koutou malolo fakasiisii. Koteuhi nee kaugamalie natou nee tau age mo natou nee mavae. Pea nee mole natou mau he kii temi ke kakai ai.
32Koia nee natou mavae leva i he vaka ke olo tefua ki he kogamea lavaki. 33Nee sisio leva he hahai toko lahi ki tanatou olo, pea nee natou iloi leva ia natou, pea nee natou felelei lalo leva mai te atu kolo fuli, o muamua ia natou ki te kogamea ae nee natou olo ki ai. 34I tana hifo i te vaka, nee sio leva ia Sesu ki he hahai kaugamalie, pea nee ofa mamahi leva ia ia kia natou, koteuhi kua natou hage ko ni ovi ae e mole natou mau he tagata tauhi ovi; pea nee ina kamata ako leva kia natou ni mea lahi.
35Pea i te fakaalu ke tauhala aupito te hola, nee fakaovi age leva ana tisipulo kia ia, o ui: E lavaki te kogamea aeni, pea kua tauhala aupito te hola; 36fekau te hahai ke olo ki te u nofoaga mo te u kolo e ovi mai, o totogi ai hanatou meakai. 37Nee tali leva e Sesu kia natou: Koutou foaki e koutou totonu kia natou he meakai. Kae nee natou ui leva kia ia: Pe e matou olo anai o totogi mai ni pane aki ni foi tenalio e luageau, pea e matou foaki anai kia natou ke kai? 38Pea nee ui leva e Sesu kia natou: Pe ko foi pane e fia e koutou mau? Kotou olo o sioi. Nee natou kumikumi totonu leva, pea nee natou tali leva: E nima, mo ika e lua. 39Pea nee fakatotonu leva e Sesu kia natou ke fakanonofo ki lalo te hahai katoa, o nofo fakakaigana i te luna fuluihega, 40pea nee natou nonofo leva ki lalo, i ni atu nee taki teau nimagofulu. 41Nee too leva e Sesu te u foi pane e nima mo kii ika e lua, pea nee haga leva ona mata ki te lagi, o fakafetai. Pea nee ina tofitofi leva te u foi pane, o foaki ki te kau tisipulo, ke tufa ki te hahai. Nee ina toe vahe foki te u kii ika e lua kia natou fuli. 42Nee natou kakai fuli leva, pea nee natou makokona leva, 43pea nee ave leva ni kato e hogofulu ma lua kua fofonu i te u kogai pane mo te mea nee toe i te u ika. 44Ko natou ae nee natou kai te u pane ko te u tagata e toko nima afe.
Haele a Sesu i te tai
45I te osi pe o te mea aia, nee fakamaua leva e Sesu ana tisipulo ke heka ki te vaka, o muamua ia ia ki te tahi fahai, ki Petesaita, i te temi e ina fakamavete ai e ia totonu te hahai. 46I te osi o tana fakamavetevete te hahai, nee alu leva ia ia ki te mouga, o faikole.
47Pea kua hoko te afiafi, nee kua alu te vaka i te lotomalie o te tai, pea nee nofo toko tahi ia Sesu i uta. 48Nee sio leva ia ia kua natou kinakina osi i te foe; koteuhi nee fakafehagai te matagi kia natou. I te vaevae hola tolu mafoata, nee alu leva ia ia kia natou, o haele i oluga o te tai, pea nee fia fakalaka leva ia ia ia natou. 49I tanatou sisio leva ki tana haele i te tai, nee natou manatu leva ko he tuuola, pea nee natou taukalaga leva; 50koteuhi nee natou sisio fuli kia ia, pea nee natou manavahe. I te lakaga pe aia nee palalau leva ia Sesu kia natou, o ui: Kotou fimalie, ko au, aua takotou manavahe! 51Pea nee hopo ake leva ia ia kia natou i te vaka, pea nee puli leva te matagi. Nee natou ofolele aupito pea nee fonu onatou loto i te manavahe. 52Koteuhi nee mole natou mahino ki te milakulo o te u pane, o tupu nee fakafefeka onatou loto.
Fakamauli o mahaki i Senesaleti
53I te osi o tanatou fakalaka i te tai, nee natou tau leva ki te fenua ko Senesaleti, pea nee natou hake leva i ai. 54I tanatou hifo leva mai te vaka, nee iloi atu aipe ia Sesu e te hahai, 55pea nee natou olo leva i te fenua katoa aia, pea, nee kamata leva te fetuku age o te u mahaki i ni palepale, ki te u kogamea fuli nee logo kua i ai ia Sesu. 56I he kogamea pe nee kaku ia ia ki ai, i te u kolo liliki, mo te u kolo lalahi, pea mo te u nofoaga, nee tuku te u mahaki i te u malae fakafenua, pea nee kole kia Sesu ke fakagafua age pe ke natou lave ki te tapa o tona kofu. Pea ko natou fili nee lave ki ai nee natou mauli leva.
Currently Selected:
EVASELIO A MALEKO 6: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
