EVASELIO A MALEKO 7
7
Te kau faliseo mo te talatisio
1Pea nee fakatahi age leva kia Sesu te kau faliseo pea mo ihi o te kau sekelipa, nee omai mai Selusalemi. 2Nee natou sio leva ki ihi o ana tisipulo nee kai mo ni nima uli, ko tona uhiga, nee mole natou fanofano. 3Koteuhi e mole kai te kau faliseo mo te kau Sutea fuli kae e heeki fanofano fakalelei onatou nima i mua, o mulimuli ki te talatisio a te kau matua afea; 4pea ka natou toe liliu mai te malae fakafenua, e hoki natou kai moka kua natou fakamaa. E natou mau foki ni ihi age maua fakatalatisio, o hage ko te fufulu o te u ipu, mo te u hina ohuvai, pea mo te u ipu ukamea. 5Pea nee fehui leva e te kau faliseo mo te kau sekelipa kia Sesu: Kotea e mole mulimuli ai au tisipulo ki te talatisio a te kau matua afea, kae e natou kai mo ni nima uli? 6Nee tali leva e Sesu kia natou: Kau malualoi, nee tonu osi te folafola a te polofeta ko Esaia kia koutou, ae e tuu i te tohi:
E fakavikiviki te hahai aeni kia au i te u laugutu,
Kae e mamao tona loto ia au.
7 E mole he uhiga o takotou hu kia au.
O tuku ni pelesepeto ae ko ni fakatotonu a te u tagata.
8Kua kotou siaki te u fakatotonu a te Atua, kae kotou tauhi te talatisio a te u tagata. 9Nee ina toe ui foki kia natou: E kotou popoto i te siaki o te u fakatotonu a te Atua, o tupu ke tauhi takotou talatisio. 10Koteuhi nee ui e Moisese: Fakaapaapa ki tau tamai mo tau fae; pea: Ko ae e laukovi anai ki tana tamai pee ki tana fae e fakatua anai ia ia ki te mate. 11Kae ko koutou, e kotou ui: Kapau e ui e he tagata ki tana tamai pee ki tana fae: Ko te mea ae e tonu ke au foaki atu kia koe, kua Kolopani ia ia, kua tuku ia ia ko he molaga ki te Atua, 12e mole kei kotou tuku ke ina fai he mea ki tana tamai pee ki tana fae; 13o kotou fakanoai i ai te folafola a te Atua o tupu ko takotou talatisio ae nee kotou fakatupu. Pea e kotou fai mo ni ihi age u mea lahi e tatau mo te u mea aia.
Te loto o te tagata
14Nee ina toe paui leva te hahai kia ia, o ui: Kotou fakalogo fuli mai kia au, pea ke kotou mahihino. 15E mole pe he mea i tua o te tagata, e ulu ki te tagata, e feala ke ina ulihi ia ia; kae ko te mea ae e ulu mai te tagata, ko ia ae e ina ulihi ia ia. 16Ko ae e ina mau ni taliga moo fagono, ke logo ia ia.
17I tana ulu ki fale, o mamao mai te hahai, nee fehui leva e ana tisipulo kia ia ki te folafola fakatata aena. 18Nee ina ui leva kia natou: Mo koutou foki, pe e kotou hala atamai? Pe e mole kotou mahihino e mole pe he mea i tua e ulu ki loto o te tagata, e feala ke ina ulihi ia ia? 19Koteuhi e mole ulu te mea aena ki tona loto, kae ki tona fatu, ae e fakamaa ai te u meakai fuli, kae e alu ki tua te mea ae e mole aoga. 20Nee ina toe ui leva: Ko te mea ae e ulu mai te tagata, ko ia ae e ina ulihi te tagata. 21Koteuhi e mai loto, mai te loto o te u tagata, e hau mai ai te u manatu kovi, mo te u tono, mo te u faifeauaki, mo te u fakapo, 22mo te u kaihaa, mo te u fulupipiki, mo te u agakovi, mo te u kaka, mo te maveuveu, mo te u manumanu, mo te fasituu, mo te fiamealahi, mo te vale. 23E hau te u mea kovi fuli aia mai loto, pea e natou ulihi te tagata.
Te fafine Kanaane
24I tana mavae i hena, nee alu leva ia Sesu ki te fenua o Tile mo Sitone. Pea nee ulu leva ia ia ki he fale, pea nee loto ia ia ke aua naa iloi e he tahi; kae nee mole pe feala ke nofo fakapulipuli ia ia. 25Koteuhi ko he fafine, ae nee ulu sino i tana taahine he laumalie uli, nee logo leva ki te palalau kia ia, pea nee hau leva ia ia o punou ia vae o Sesu. 26Nee Keleka te fafine aia, mo hafekasi Silia mo Fenisia i ona tupuaga. Nee kole leva e te fafine kia Sesu ke kapu te temonio i tana taahine. Kae nee ui leva e Sesu kia ia: 27Tuku mua ke kai te u fanau ke makona; koteuhi e mole lelei ke too te pane a te u fanau, o laku ki te u uhii kuli. 28Pea nee tali leva e te fafine kia ia: Io, Aliki, kae e kai e te u uhii kuli te u eveeve a te u fanau, i lalo o te laupapa. 29Pea nee ina ui leva ki te fafine: O tupu ko te palalau aia, alu, kua mavae te temonio i tau taahine. 30Pea, i tana toe liliu leva ki tona api, nee ina mau atu leva tana taahine e moemoe i te palepale, kua mavae te temonio.
Fakamauli o he tagata tuli pea gutu mate
31Nee mavae leva ia Sesu i te fenua o Tile, o toe hau ki Sitone, i te tai o Kalilea, o fakalaka mai i te fenua o Tekapole.
32Nee aumai leva kia ia he tuli, ae nee faigataa tana palalau, pea nee kole leva kia ia ke hili ona nima kia ia. 33Nee ina too kehe leva ia ia mai te hahai, pea nee ina momono leva ona kaui tuhi ki te u taliga, pea nee ina fakalave leva tona savai totonu ki te alelo o te tagata; 34pea nee haga leva ona mata ki te lagi, pea nee tukumanava leva ia ia, o ui: Efata, ko tona uhiga, ke ke ava. 35I te lakaga pe aia, nee ava leva ona taliga, pea nee gaugaue leva mo tona alelo, pea nee palalau lelei leva ia ia. 36Nee fakatotonu leva e Sesu kia natou ke aua pe naa palalaui te mea aena ki he tahi; kae nee lahi tana fakatotonu kia natou, pea nee toe asilisili age tanatou fakamafola te mea aia. 37Nee natou ofolele lahi, o ui: E lelei te u mea fuli e ina fai; e ina avahi foki te u taliga o te kau tuli, pea e ina fakapalalau te kau gutu mate.
Currently Selected:
EVASELIO A MALEKO 7: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
