EVASELIO A MALEKO 8
8
Te liuga o te u pane ki te toko fa afe
1I te u aho aia, nee toe fakatahi age he hahai kaugamalie, pea nee mole mau he meakai, pea nee paui leva e Sesu ana tisipulo, o ui kia natou: 2E au ofa mamahi ki te hahai aeni; koteuhi kua aho tolu tanatou nonofo i oku tafa, pea e mole natou mau he meakai. 3Kapau e au fekau natou ke olo pakupaku ki onatou api, e fakapouli anai onatou mata i te ala; koteuhi nee omai ni ihi mai mamao. 4Nee tali leva e ana tisipulo kia ia: Pe e feafeai anai tonatou fafaga aki ni foi pane ke makona i he kogamea lavaki fenei? 5Nee fehui leva e Sesu kia natou: Pe ko akotou foi pane e fia? Nee natou tali leva: E fitu. 6Nee ina fakaafe leva te hahai ke nonofo ki lalo, pea nee ina too leva te u foi pane e fitu, pea nee fakafetai leva ia ia, pea nee ina tofitofi leva natou, pea nee ina foaki leva natou ki ana tisipulo ke natou tufa natou; pea nee natou tufa leva natou ki te hahai. 7Nee natou mau foki ni kii ika liliki, pea nee fakafetai leva ia Sesu, pea nee ina ui leva ke toe tufa foki natou. 8Nee natou kakai leva pea nee natou makokona leva, pea nee ave leva ni kato e fitu kua fofonu i te u toega kai. 9Nee natou toko fa afe. Pea nee fakamavete leva natou e Sesu.
10Pea nee hopo aipe ia Sesu ki te vaka mo ana tisipulo, o olo ki te fenua o Talamanuta.
Kole o he milakulo e te kau faliseo
11Nee kaku ake leva te kau faliseo o kamata fakafehui ia Sesu, pea mo kole kia ia he fakailoga mai te lagi, ke ahiahii ai ia ia.
12Nee tuku manava lahi leva ia Sesu i tona Laumalie, o ui: Kotea e kole ai e te taitupu aeni he fakailoga? E au ui mooni atu kia koutou, e mole toe foaki anai he fakailoga ki te taitupu aeni.
13Pea nee mavae leva ia ia maia natou, o toe hopo ki te vaka, o fakalaka ki te tahi fahai tai.
14Nee galo leva i te kau tisipulo ke natou too ni pane; ko te foi pane pe e tahi nee natou mau i te vaka. 15Nee fai leva e Sesu kia natou te fakatotonu aeni: Kotou tokaga aupito ki te fakatupu a te kau faliseo pea mo te fakatupu a Helote. 16Nee fepalalauaki leva te kau tisipulo, o ui: E tupu nee mole tou too ni pane. 17Nee iloi leva e Sesu anatou manatu, pea nee ina ui leva kia natou: Kotea e kotou palalau ai ki te u pane? Pe e kei kotou hala atamai aipe? Pe e mole kotou mahihino aipe? 18Pe kua fakafefeka okotou loto? E kotou mau ni mata kae e mole kotou sisio. E kotou mau ni taliga, kae e mole kotou logo? Pe e mole kei kotou manatui? 19I taku tofitofi te u foi pane e nima ki te u tagata e toko nima afe, pe ko te u kato e fia nee fofonu i te u toega kai ae nee kotou ave? Nee natou tali leva kia ia: E hogofulu ma lua. 20I taku tofitofi te u foi pane e fitu ki te u tagata e toko fa afe, pe ko kato e fia nee fofonu i te u toega kai ae nee kotou ave? Nee natou tali leva, e fitu. 21Pea nee ui leva e Sesu kia natou: Pe e mole koutou mahino aipe?
Fakamauli o he tagata kivi
22Nee natou olo leva ki Petesaita; pea nee aumai leva kia Sesu he kivi, pea nee kole age leva kia ia ke fafa ki te kivi. 23Nee too leva e Sesu te kivi i tona nima, o taki ia ia ki te tua kolo; pea nee ina ai leva tona savai ki te u mata o te kivi, pea mo hilifaki ona nima kia ia, pea nee ina fehui leva ki te kivi. Pe e ke sio ki he mea? 24Nee sio ake leva ia ia, o ui: E au sio ki ni tagata, kae e au sio kia natou o hage ko ni akau, pea e natou haele. 25Nee toe hilifaki leva e Sesu ona nima ki ona mata; pea, i te sio fakamamau leva a te kivi, nee mauli leva ia ia, o sio lelei leva ki te u mea fuli. 26Pea nee fekaui leva e Sesu te tagata ke alu ki tona api, o ui: Aua naa ke ulu ki te kolo.
Fakaha e Petelo ko Sesu ko te Kilisito
27Nee alu leva ia Sesu mo ana tisipulo ki te u kolo liliki o Sesalea o Filipo, pea nee ina fai leva kia natou te fehui aeni i te ala: Pe ko ai ia au i te ui a te hahai? 28Nee natou tali leva: Ko Soane-Patita; pea ki ihi, ko Elia; pea ki ihi, ko he tahi o te kau polofeta. 29Pea nee fehui leva e Sesu kia natou: Pea ko koutou, pe e kotou ui ko ai au? Nee tali leva e Petelo kia ia: Ko koe ko te Kilisito. 30Nee fakatotonu fakamamafa age leva e Sesu kia natou ke aua naa natou fakaha te mea aia ki he tahi.
Totogi o te muli ia Sesu
31Nee kamata fakaha leva e Sesu kia natou e tonu ke mamahi lahi te Foha o te tagata, ke siaki ia ia e te kau matua o te hahai, mo te kau pule faisakilifisio, mo te kau sekelipa, pea ke tamatei ia ia, pea ke toe tuuake ia ia i te hili o te u aho e tolu. 32Nee ina ui fakahaha kia natou te u mea aena. Pea nee too kehe leva ia ia e Petelo, o kamata valoki ia ia. 33Kae nee mafuli leva ia Sesu ki muli, o sio ki ana tisipulo, pea nee ina valoki leva ia Petelo, o ui: Alu ki muli, Satana! Koteuhi ko au manatu e mole ko te u manatu a te Atua, kae ko te u manatu a te u tagata.
34Pea nee paui leva e Sesu te hahai mo ana tisipulo, o ui age kia natou: Ko ae e loto ke mulimuli mai ia au, ke fakafisi ia ia kia ia totonu, ke ina amo tona koluse, pea ke mulimuli mai ia ia ia au. 35Koteuhi ko ae e loto anai ke haofaki tona mauli e ina pulihi anai ia ia, kae ko ae e ina pulihi anai tona mauli o tupu ko au pea mo te logo lelei e ina haofaki anai ia ia. 36Pea kotea tona aoga ki he tagata tana mau te malamanei katoa, kae e pulinoa tona laumalie? 37Pe kotea te mea e foaki anai e he tagata ke fetogi ai tona laumalie? 38Koteuhi ko ae e ufiufi anai kia au mo aku folafola i lotomalie o te taitupu tono mo agahala aeni, e ufiufi anai te Foha o te tagata kia ia, moka hau anai ia ia i te kololia o tana Tamai, fakatahi mo te kau aselo maonioni.
Currently Selected:
EVASELIO A MALEKO 8: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
