EVASELIO A MALEKO 9
9
1Nee toe ui leva e Sesu kia natou: E au ui mooni atu kia koutou, ko ihi ia natou ae e nonofo i heni, e mole natou mamate anai kae heeki natou sisio ki te puleaga o te Atua e hau i tona mafimafi.
Fetogi o Sesu i te mouga
2Nee hili leva ki ai ni aho e ono, nee too leva e Sesu ia Petelo, mo Sakopo, mo Soane, pea nee ina taki leva natou pe ateaina ki he mouga maoluga. Nee fetogi fofoga leva ia ia i onatou mua; 3nee liliu leva ona kofu o gigila mo hihina, i he hina ae e mole feala ke fakatupu e he masini fakamaa i te kele. 4Pea nee ha leva kia natou ia Elia mo Moisese, e na palalau mo Sesu. 5Nee palalau leva ia Petelo, o ui kia Sesu: Pule, e lelei ke tou nonofo i heni; ke matou fakatuu ni falela e tolu, tahi mo ou, tahi moo Moisese, pea tahi moo Elia. 6Koteuhi nee mole ina iloi he mea ke ui, i te lahi o tonatou mataku. 7Nee hau leva he ao o uufi natou, pea nee ha leva he leo mai te ao: Ko ia aeni ko toku Alo ofaina: Kotou fakalogo kia ia! 8I te temi pe aia, nee sio leva te kau tisipulo ki onatou tafa, pea nee mole natou sio leva ki he tahi, gata pe kia Sesu toko tahi mo natou.
9I tanatou hihifo mai te mouga, nee fakatotonu leva e Sesu kia natou ke aua naa fakamatala ki he tahi te mea nee natou sisio ki ai, o kaku ki te toe tuuake o te Foha o te tagata mai te kau mate. 10Nee natou taofi leva te palalau aia, o feuiaki ia natou pe kotea te uhiga o te toe tuuake mai te kau mate.
11Nee fehui leva e te kau tisipulo kia ia: Kotea e ui ai e te kau sekelipa e tonu ke uluaki hau mua ia Elia? 12Nee tali leva e Sesu kia natou: E mooni, e uluaki hau anai ia Elia i mua, pea e ina fakatonutonu anai te u mea fuli. Pea kotea e tohi ai ki te Foha o te tagata, e tonu ke mamahi lahi ia ia pea ke nukinukii ia ia? 13Kae e au ui atu kia koutou kua hau ia Elia, pea nee natou fai kia ia te mea nee natou loto ki ai, o mulimuli ki te mea kua tohi kia ia.
Noa o te kau tisipulo Mafimafi o Sesu-Kilisito
14I tanatou kaku leva ki te kau tisipulo, nee natou sisio leva ki he hahai kaugamalie kua natou takatakai ia natou, pea nee palalau ni sekelipa mo natou. 15I te sio a te hahai kia Sesu, nee natou punamauli, pea nee natou felelei age leva o fakafelavei kia ia. 16Nee fehui leva e Sesu kia natou: Kotea te mea e kotou palalau ki ai mo natou? 17Pea nee tali leva e he tagata mai te hahai kia ia: Pule, nee au aumai kia koe toku foha, ae e nofo ai he laumalie gutu mate. 18I he kogamea pe e too ai ia ia e te laumalie kovi, e ina li ia ia ki te kele; pea e fiho te fanau, pea e gugu ona nifo, pea e liliu o fefeka katoa. Nee au kole ki au tisipulo ke natou kapu te laumalie kovi, kae nee mole natou fealagia. 19Nee ui leva e Sesu kia natou: Lanu tui gataa, e kaku anai ki afea taku nofo mo koutou? E kaku anai ki afea taku katakii koutou? Aumai te toe kia au. Pea nee aumai leva te toe kia ia. 20Pea i te lakaga pe ae nee sio ai te toe kia Sesu, nee lului fakamalohi leva ia ia e te laumalie, pea nee teka leva ia ia, o makafisi i te kele, pea nee fiho leva tona gutu. 21Nee fehui leva e Sesu ki te tamai: Pe kua fualoa te tau hoko o te mea aeni kia ia? Pea nee tali leva e te tamai: Talu mai tana kei veliveli. 22Pea kua tua lahi tona tau li e te laumalie kovi ki te afi mo te vai ke tamatei ia ia. Kae kapau e ke fealagia he mea kia ia, hau o haofaki maua, ofa mai kia maua. 23Nee ui leva e Sesu kia ia: Kapau e ke fealagia!… E feala te mea fuape ki ae e tui. 24I te lakaga pe aena nee kalaga leva te tamai o te toe, o ui: E au tui! Hau o haofaki au i toku tuigataa! 25I te sio a Sesu ki te felelei mai a te hahai, nee ina munai leva te laumalie kovi, o ui kia ia: Laumalie gutu mate mo taliga tuli, e au fakatotonu atu kia koe, mavae i te toe aena, pea aua naa ke toe ulu kia ia. 26Pea nee mavae leva te laumalie kovi, o taukalaga, pea mo lui fakamalohi te toe. Nee liliu leva te toe o hage ko he tahi kua mate, o ui ai e te kaugamalie kua mate ia ia. 27Kae nee too leva e Sesu te nima o te toe, o fakatuu ia ia ki oluga. Pea nee tuu ake leva te toe ki oluga.
28I te ulu a Sesu ki te fale, nee fehui leva e ana tisipulo kia ia: Kotea nee mole feala ai ke matou kapu te laumalie aia? 29Nee ui leva e Sesu kia natou: E hoki feala ke mavae te fahiga temonio aia aki te faikole.
30Nee natou mavae leva i hena, pea nee natou fakalaka leva i Kalilea. Nee mole loto e Sesu ke iloi ia ia.
Fakaha o tona mate mo tana toe tuuake
31Koteuhi nee ina ako ana tisipulo, o ui kia natou: E tuku anai te Foha o te tagata kia nima o te u tagata; pea e natou tamatei anai ia ia, pea, ka osi anai ni aho e tolu ki tona tamatei, e toe tuuake anai ia ia. 32Kae nee mole mahihino te kau tisipulo ki te palalau aena, pea nee natou matataku i te fehui kia ia.
Te fakamalalo, ko te lahi mooni ia
33Nee natou kaku leva ki Kafanaume. I tana nofo leva i te fale, nee fehui leva e Sesu kia natou: Kotea te mea ae nee kotou palalau ki ai i te ala? 34Kae nee natou fakalologo leva, koteuhi i te ala nee natou palalau ke iloi pe ko ai ae e lahi age ia natou. 35Pea nee hekaheka leva ia Sesu, pea nee ina kalagai age leva te toko hogofulu ma lua, o ui kia natou: Kapau e loto he tahi ke uluaki, e liliu anai ia ia ko te muli osi o te u tagata fuli pea ko te faifekau a te u tagata fuli. 36Pea nee ina too leva he kii toe veliveli, o fakatuu ia ia i te lotomalie o natou, pea nee ina fua leva ia ia i ona nima, o ui kia natou: 37Ko ae e ina tali i toku huafa he tahi o te u toe liliki aeni, e ina tali ia au totonu; pea ko ae e ina tali au, e mole ko au ae e ina tali, kae ko ia ae nee ina fekaui mai au.
Valoki o te fiamealahi fakalotu
38Nee ui leva e Soane kia ia: Pule, nee matou sisio ki he tagata ae e ina kapu ni temonio i tou huafa; pea nee matou taofi ia ia, koteuhi e mole mulimuli ia ia ia tatou. 39Nee tali leva e Sesu: Aua naa kotou taofi ia ia; koteuhi e mole he tahi, i te osi o tana fai he milakulo i toku huafa, e ina feala atu aipe ke palalau kovi kia au. 40Ko ae e mole fakafehagai mai kia tatou e kau ia ia mo tatou. 41Pea ko ae pe e ina foaki atu anai kia koutou i toku huafa he ipu vai ke inu, koteuhi e kotou kau ia Kilisito, e au ui mooni atu kia koutou, e mole toe puli anai tona fakapale.
Valoki o te u mea fakatupu higa
42Kae kapau e fakahalai e he tahi he tahi i te u kii toe liliki ae e tui kia au, e lelei age kia ia ke nonoo ki tona kia he maka lomi fulumeto lahi, pea ke li ia ia ki te tai.
43Kapau e fakahalai ia koe e tou nima, tuusi ia ia; e lelei age tau ulu nima mutu ki te mauli, i tau mau ni nima e lua kae e li anai ia koe ki te seene*, ki te afi ae e mole toe mate anai. 44I te kogamea aia e mole toe mate anai te ugaga pea e mole toe tamatei anai te afi. 45Kapau e fakahalai ia koe e tou vae, tuusi ia ia; e lelei age tau ulu ketu ki te mauli, i tau mau ni vae e lua kae e li anai ia koe ki te seene, ki te afi ae e mole toe mate anai. 46I te kogamea aia e mole toe mate anai te ugaga pea e mole toe tamatei anai te afi. 47Pea kapau e fakahalai ia koe e tou foi mata, kapei ia ia; e lelei age tau ulu foi mata tahi ki te puleaga o te Atua, i tau mau ni foi mata e lua kae e li anai ia koe ki te seene. 48I te kogamea aia e mole toe mate anai te ugaga pea e mole toe tamatei anai te afi. 49Koteuhi e fakakonakona anai te u tagata fuli e te afi. 50Ko he mea lelei te masima; kae kapau e puli anai tona konakona, e kotou fakakonakona feafeai anai ia ia? 51Ke koutou mau he masima ia koutou totonu, pea ke kotou nonofo i te tokalelei i okoutou vahaa.
Currently Selected:
EVASELIO A MALEKO 9: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
