EVASELIO A MALEKO 10
10
Te mavete ohoana
1Nee mavae leva ia Sesu i ai, o alu ki te fenua o Sutea i te tahi faahi o te Solotane. Nee toe fakatahi age leva te hahai kia ia, pea, o hage ko tana fai mahani, nee toe akonaki leva ia ia kia natou.
2Nee fakaoviovi age leva te kau faliseo kia Sesu; i tanatou fia ahiahii ia ia, nee natou fehui leva kia ia pe e gafua ke kapu e he tagata tona ohoana. 3Nee tali leva e Sesu kia natou: Kotea te mea nee fakatotonu e Moisese kia koutou? 4Nee natou ui leva, nee fakagafua e Moisese ke fai he tohi mavete pea ke fakamavae te fafine. 5Nee ui leva e Sesu kia natou: Nee tuku e Moisese te fakagafua aia, o tupu ko te fefeka o okotou loto. 6Kae i te kamataaga o te fakatupu o te malamanei, nee fakatupu e te Atua te tagata mo te fafine; 7koia e mavae anai te tagata mai tana tamai mo tana fae, pea e pipiki anai ia ia ki tona ohoana, 8pea e na liliu anai ko he sino e tahi. Koia e mole kei na toko lua, kae kua na liliu ko he kakano e tahi. 9Koia ke aua naa veteki e te tagata te mea ae kua hai e te Atua.
10I tanatou kaku ki te fale, nee toe fakafehui leva ia ia e te kau tisipulo ki te mea aena. 11Pea nee ui leva e Sesu kia natou: Ko te tagata ae e ina kapu tona ohoana pea e toe ohoana ia ia mo he tahi age fafine, e tono anai ia ia; 12pea kapau e mavae he fafine mai tona ohoana o toe ohoana mo he tahi age tagata, e tono anai te fafine aia.
Nee tapuakii e Sesu te u toe liliki
13Nee aumai leva kia ia ni toe liliki, o tupu ke fafa ia ia kia natou. Kae nee taofi leva e te kau tisipulo natou ae nee natou aumai te u toe liliki. 14I te sio a Sesu ki te mea aia, nee mamahi lahi ia ia, pea nee ina ui leva kia natou: Kotou tuku ke omai kia au te u toe liliki, kae aua takotou taofi natou; koteuhi e fakalogo te puleaga o te Atua kia natou ae e tatau mo te u toe liliki. 15E au ui mooni atu kia koutou, ko ae e mole ina tali anai te puleaga o te Atua o hage ko he kii toe veliveli e mole ulu anai ia ia ki ai. 16Pea nee ina fua leva natou i ona nima, pea nee tapuaki leva ia ia kia natou, o hili ona nima kia natou.
Te tagata tupulaga maukoloa
17I te fagona a Sesu i te ala, nee lele mai leva he tagata, o tuutuli i ona mua, pea nee ina fehui leva kia ia: Pule lelei, kotea te mea ae e tonu ke au fai ke mau ai te mauli heegata? 18Nee ui leva e Sesu kia ia: Kotea e ke fakahigoa ai au lelei? Ko te Atua toko tahi e lelei. 19E ke iloi te u fekau:
Aua pe naa ke tono anai;
Aua pe naa ke fakapo anai,
Aua pe naa ke kaihaa anai;
Aua pe naa ke fakamooni loi anai;
Aua pe naa ke fai anai he mea e kovi ki he tahi;
Fakaapaapa ki tau tamai mo tau fae.
20Nee ina tali leva kia Sesu: Pule, kua au fai te u mea fuli aena talu mai taku kei veliveli. 21Nee sio leva ia Sesu kia ia, pea nee ofa leva ia ia kia ia, o ui kia ia: E puli te mea e tahi kia koe; alu, fakatau te u mea fuli e ke mau, foaki ia ia ki te kau masiva, pea e ke mau anai he koloa i te lagi. Pea osi ia, pea ke hau, o mulimuli mai ia au. 22Kae nee mamahi leva ia ia o tupu ko te folafola aena, pea nee alu leva te tagata aena kua loto mamahi lahi; koteuhi nee lahi aupito ona koloa. 23Nee mafuli leva ia Sesu ki ona tafatafa, o ui ki ana tisipulo: E faigataa anai kia natou ae e natou mau ni u koloa ke ulu ki te puleaga o te Atua! 24Nee punamauuli leva te kau tisipulo i te palalau aena a Sesu. Pea nee toe palalau leva ia ia, o ui kia natou: Nai aku fanau, e faigataa aupito kia natou ae e falala ki te u koloa ke ulu ki te puleaga o te Atua! 25E faigafua age ki he kamelo tana ulu i te pu o he hui, i he tagata mau koloa tana ulu ki te puleaga o te Atua. 26Nee toe punamauuli lahi age te kau tisipulo, o natou ui: Pe ko ai anai e feala ke haofaki? 27Nee sio leva ia Sesu kia natou, o ui: E mole feala te mea aia ki te tagata, kae e feala ia ki te Atua: Koteuhi e feala te u mea fuli ki te Atua.
Fakapale o te agatonu ki te Atua
28Nee ui leva e Petelo kia Sesu: Koeni, kua matou siaki te u mea fuli, pea kua matou mulimuli ia koe. 29Nee tali leva e Sesu: E au ui mooni atu kia koutou, e mole pe he tahi ae kua ina siaki, o tupu ko au pea mo te Evaselio, pee ko tona fale, pee ko ona tehina, pee ko ona tuagaane, pee ko tana fae, pee ko tana tamai, pee ko ana fanau, pee ko ona kele, 30e mole ina tali anai o liuga teau i te sekulo aeni, ni fale, mo ni tehina, mo ni tuagaane, mo ni fae, mo ni fanau, mo ni kele, pea mo ni fakatagai, pea mo te mauli heegata i te temi ka hau. 31E kaugamalie i te kau muamua e mulimuli anai, pea e kaugamalie i te kau mulimuli e muamua anai.
Fakaha o te mate mo te toe tuuake
32Nee natou fagona leva i te ala ke hake ki Selusalemi, pea nee alu leva ia Sesu i onatou mua. Nee loto mamahi te kau tisipulo, pea nee natou mulimuli ia ia mo he loto tuania. Pea nee toe too leva e Sesu te toko hogofulu ma lua ki ona tafa, pea nee ina kamata fakaha leva kia natou te mea ae e tonu ke hoko kia ia: 33Koeni, e tou hake ki Selusalemi, pea e fakatau anai te Foha o te tagata ki te kau pule faisakilifisio pea mo te kau sekelipa. E natou fakatua anai ia ia ki te mate, pea e natou tuku anai ia ia ki te kau pagani, 34ae e nukinuki anai kia ia, mo anuanu anai kia ia, mo haha anai ia ia aki ni akau, mo tamatei anai ia ia; pea i te hili o te u aho e tolu, e toe tuuake anai ia ia.
Tali ki te fehui a Sakopo mo Soane
35Ko te u foha o Sepeteo ko Sakopo mo Soane, nee na fakaoviovi age leva kia Sesu, o ui kia ia: Pule, e ma loto ke ke fai kia maua te mea ae ka ma kole atu anai kia koe. 36Nee ui leva e Sesu kia naua: Kotea te mea ae e kolua loto ke au fai kia kolua? 37Nee na ui leva kia ia, fakagafua mai kia maua, ke heka he tahi i tou toomatau pea ke heka he tahi i tou toohema, moka ke nofo anai i tou kololia. 38Nee tali leva ia Sesu kia naua: E mole kolua iloi te mea ae e kolua kole. Pe e feala ke kolua inu te ipu ae e tonu ke au inu, pee ke papitemai kolua ki te papitema ae e tonu ke papitemai ai au? Nee na ui leva: E ma fealagia. 39Pea nee tali leva e Sesu kia naua: E mooni e kolua inu anai te ipu ae e tonu ke au inu, pea e papitemai anai kolua ki te papitema ae e tonu ke papitemai ai au; 40kae ki te heka i toku toomatau pee ko toku toohema, e mole fakalogo ia kia au, pea e tuku pe ia kia natou ae kua taofi ki ai te mea aia. 41I te logo a te toko hogofulu ki te mea aia, nee natou kamata iita lahi leva kia Sakopo mo Soane. 42Pea nee paui leva ia natou e Sesu, o ui: E kotou iloi ko natou ae kua fakanofo ko te u pule o te u puleaga e natou taki fakamalohi natou; pea e faifaitaliha te kau lalahi kia natou. 43Ke aua naa fena ia koutou. Kae ko ae e loto ke lahi ia koutou, ke liliu ia ia ko takotou tagata faifekau; 44pea ko ae ia koutou e loto ke pule, ke liliu ia ia ko takotou tagata kaugana. 45Koteuhi nee mole hau te Foha o te tagata ke faifekau age kia ia, kae ke faifekau mo foaki tona mauli ke totogi ai te kaugamalie.
Fakamauli o Paletimeo
46Nee natou kaku leva ki Seliko. Pea i te mavae a Sesu mai ai mo ana tisipulo pea mo he hahai kaugamalie, nee nofo ia tafa o te ala te foha o Time ko Paletimeo, ko he tagata kivi mo kaikolekole. 47Nee logo leva ia ia ko Sesu mai Nasaleti, pea nee kamata kalaga leva ia ia: Foha o Tavite, Sesu, ofa mai kia au! 48Nee taofi ia ia e he tokolahi ke fakalologo; kae nee lesili kalaga leo lahi ia ia: Foha o Tavite, ofa mai kia au! 49Nee tuu leva ia Sesu, o ui: Kotou paui ia ia ke hau. Pea nee natou paui leva te tagata kivi, o ui kia ia: Ke ke loto malohi, tuu ki oluga, e paui mai ia ia kia koe. 50Nee siaki leva e te tagata kivi tona pulupulu, pea nee mafuta leva ia ia ki oluga, o hau kia Sesu. 51Pea nee ui leva e Sesu kia ia: Kotea ae e ke loto ke au fai kia koe? Nee tali leva e te tagata kivi kia Sesu: Pule, ke au sio. 52Pea nee ui leva e Sesu kia ia: Alu, kua fakamauli koe e tau tui. 53I te lakaga pe aia nee sio leva ia ia, pea nee mulimuli leva ia ia ia Sesu i te ala.
Currently Selected:
EVASELIO A MALEKO 10: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
