John 17
17
Ajuküvüpu Shilu Penike Ghenguno Jisü no Inikhu
1Jisü no hipau pive kethiu pa no kungugha küdau jupuku no inikhu:
“Apùo, ado hu ye ighivae. O Nu juküvü shitsülo, tishianguno O Nu pelo O juküvü shi tsülu pe kepu shi. 2Kughengu nono timiqo kümtsü shou kükagha puloza pesü pa tsüke eno pa pelo lhokta küxü pesü nono pa tsüke miqo kümtsü lau tsülu peniye ke. 3Lhokta küxü ye hike: no kuchou Alhou ithi nikeu eno nono puwu keu Jisü Khristo ithi nikeu ke. 4Ni ye nono I pichetsü keu kümlà shikupulu keu vechewo ayeghi lo ajuküvü pe O tsüke. 5Ike itehi ye, Apùo, ayeghi lho mphi züu O gholo I juküvü achekeu pe O zülo no I juküvü shitsülo.
Jisü no Pa Khopemiqo ghenguno Inikhu tsü
6“Ayeghilomi khunoqo ikhiphe pesü I tsü keno tipaqo lau I no O je pephe-piyevae. Panongu ye ow ke; no no panongu pe I tsü eno panongu no O tsa ghokulu shike. 7Itehi panongu ye no no I tsü keu kümtsü O lau no ighi keu ke ipi ithivae. 8Kughengu nono I tsü keu tsaqo panoqo tsüke eno panongu no tipaqo ikhilue. Panongu ye mütsüqhei no ni ye O lau no ighi kepi ithi ani, eno panongu ye nono I puwu kepi pülüluve ake. 9Ni ye panoqo ghenguno inikhu ani. Ni ye ayeghiqha ghenguno inikhu amoe, ikemu nono khunoqo pe I tsü keno panongu ghenguno inikhu ani, kughengu panongu ye ow ke. 10I no akeu kümtsü ow ke, eno nono akeu kümtsü iw ke. Eno panongu vechewo ajuküvü I lau ighike. 11Ni ye ayeghi lo ngo ani chemoe, ikemu panongu ye ayeghi lo aphie, eno ni ye O lau chenie. Apù Akimtheu, O je küká vechewo panongu süsho tsülo, aje tiye nono I tsü keu ke, tishianguno nikujo no lakhi shi ake toi panongu ghí lakhi shilu peniye ke. 12I no panongu gholo akelo, I no panongu süsho eno nono aje I tsü keu pesü panongu sükusho shipe qhike. Kuchoyesü shikupu nike ghenguno ti lakhi pühaveni keu shi akeu kütsakungove keu kumo aye khumu pühave keu shi mphie.
13“Niye itehi O lau chenie, ikemu panongu pelo panongu lolo alokiqi akimighi chhitoi alu penike ghenguno I no ayeghi lo panongu gholo aphi lono thime hipaqo pi anie. 14I no O tsa pesü panongu tsüvae eno ayeghilomi no panongu mithi ke, kughengu I no ayeghi laumi kumo ketoi panongu ghí ayeghi laumi kumovae. 15I no inikhu akeu ye O pelo panongu pesü ayeghi lono ikhisüwuve penike ghenguno kumoe ikemu küsakügha lau no panongu süsho tsü penike ghenguno ke. 16I no ayeghi laumi kumo ketoi panongu ghí ayeghi laumi kumovae. 17Kuchou vechewo panoqo shikimthe tsülo kughengu O tsa ye kuchou ke. 18Nono ayeghi lo I puwu keu toi, I no panongu pesü ayeghi lo puwuvae. 19Panongu pelo kuchou no ikhiphe pe tsü penike ghenguno ni ye I likhi ni ikhiphe pe tsüvea ke.
Jisü no Küpülümi Kümtsü ghenguno Inikhu
20“Ni ye panongu ghengu likhi no inikhu anike kumoe. I no inikhu akeu ye khuno no panongu kükütsü sütsa vechewo I pülüni keno tipaqo ghengu ghí inikhu anie, 21Apùo, nono I lolo ake toi eno I no O lolo ake toi, panongu kümtsü pelo lakhi shilu pelo. Panongu ghí nikujo lolo apelo tishianguno ayeghilomi pelo nono I puwu kepi pülülu penike. 22Nono ajuküvü I tsü keu pesü I no panongu tsüvae, tishianguno nikujo no lakhi shi akeu toi panongu ghí lakhi shi ape niye ke— 23I no panongu lolo ani eno nono I lolo ani—tishi keu vechewo panoqo pelo qhoi küqhakulu shilu peniye ke. Tishianguno ayeghilomi ye nono I puwu eno nono I kimiye ketoi panongu kimiye kepi ithi nani.
24“Apùo, ni ye nono khunoqo pesü I tsü keno panoqo pelo I no khilehi ani keno tile I gholo ape nishi ani eno I juküvü ithulu penishi ani, tiye nono ajuküvü I tsü keu ke, kughengu nono ayeghi pulhosü mphi züu no I kimiye ke.
25“Achipi shi chekeu Apùo, ayeghilomi no O mtha aghí namu, I no no ithi ani, eno panongu ye nono I puwu kepi ithi anie. 26I no panongu pelo O je ithivepe ae, eno tamo no no ithi ape nani tishianguno nono kikimiye I ghenguno akeu toi panongu lolo apenike, eno ni ampi no panongu lolo ape niye ke.”
Currently Selected:
John 17: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
