John 16
16
1“I no hi kümtsü nongu vilo pive akeu ye nongu pelo ikiqi pemo nikeu ghenguno ke. 2Panongu no synagog lono nongu hapheve nani; kuchou lo ye kughou timi khuno no nongu heqhi pithini keno panongu ye Alhou lau hukuthu kümlagho shi ani küghashi kümsüveni keu do cheni. 3Panongu no tipaphi kümlàqo shi nani kughengu panongu ye Apù momu ni mtha ke. 4I no nongu vilo hi pive ani, tishianguno kughou panongu do ighini keno nongu no I no panoqo ghili pikichi pe püakeu kümsüchilelu peniye ke. Ni ye hipau hukuthu lo nongu vilo pimo ke kughengu I no nongu gholo ake, 5ikemu itehi ni ye khuu I puwu keno pa gholo wunia. ‘No ye khila wucheni kea?’ ipi nongu khunomu I vilo inijumoe. 6Tishini ke züqhulo I no thime hipaqo pikeu ghenguno nongu ye amlokighishi no chhitoivae. 7Ikemu kuchou no I no nongu vilo piani, I no wuve keu no nongu kivipu ke. I no wuvemo ke thaqhülo Shikumtokütsüu hu ye nongu lau ighimo nani; ikemu I no wu anguno, I no nongu lau pa puwu nani. 8Kughou pa no ighini keno, pa no ayeghiqha no axiné eno achipiumikucho eno küghakütha ghiliqo achipikumo lo kümsü pe akeu kimchitsü nani: 9eno axiné ghili kimchitsü nani, kughengu timiqo no I pülümo ke, 10eno achipiumikucho ghili kimchitsü nani, kughengu ni ye Apù lau wuni cheni, eno nongu ye ni ithumlave nani; 11eno küghakütha ghili kimchitsü nani, kughengu itehi ye ayeghi hipauu kükapuu kiléqhive ake.
12“Ni ye nongu vilo pi kepu kutomo aphi kemu itehi nongu ye puqhemla nani. 13Ikemu kughou kuchou Ghungu no ighini keno, pa no kuchou kümtsü pesü nongu kiche-piye nani. Pa ye pa kutoshi pimo nani; pa ye pa no chilu keu likhi pi nani, eno kiu ighi niye shi aphi keno pa no nongu vilo pitsü nani. 14Pa no I juküvü shitsü nani kughengu pa no kiu I lau no ithulu keno tipau pa no nongu lau pephe-piye nani. 15I pù no akeu kümtsü iw ke. Tighenguno I no piakeu ye, Aghungu no I lau no kiu ithulu keno pa no nongu lau pephe-piye nani ipi ke.”
Akhopemiqo Mlokighishi ye Alokiqi Shive Nani
16Jisü no kibe ghi pi, “Kushuwa kumo dolo nongu ye ni ithumlave nani, eno ado hami thiu no nongu no ni ithulu nani.”
17Hipau tsa lo pa khopemiqo dolo lakhi no lakhi vilo ishi pikile, “Pa ye, ‘Kushuwa kumo dolo nongu ye ni ithumlave nani, eno ado hami thiu no nongu no ni ithulu nani,’ eno ‘Kughengu ni ye Apù lau wucheni,’ ishi piakeu kiqi ye kiu kea?” 18Panongu no ishi iniju auve, “Pa no, ‘kushuwa kumo dolo,’ ipi akeu kiqi ye kiu kea? Ningu ye pa no kiu piani keno vethalu amoe.”
19Jisü ye panongu no hipau ghili pa vilo iniju nishi akeu ithive, ikehu pa no panongu vilo pi, “Nongu ye lakhi no lakhi vilo niye kiu kiqi lono ‘Kushuwa kumo dolo nongu ye ni ithumlave nani, eno ado hami thiu nongu no ni ithulu nani,’ ipi keno iniju ani keshea? 20Kuchou no I no nongu vilo pìní, ayeghiqha no alovishe akelo nongu ye qanimlo nani. Nongu ye amlokighishi shi nani, ikemu nongu mlokighishi ye alokiqipu shive nani. 21Totimi lakhi ye angá punúni kelo sǜ cheni kughengu li do ye ighivea ke; ikemu kughou li no angá punúveni keno li ye angá hu ayeghi lo punuqhiluve keu lokiqi ghenguno amloghuju hu kümsümave cheni. 22Ikehu nongu ghí itehi ye nongu mloghuju shikeu do ke, ikemu itaghi I no nongu sasü kusho nani eno nongu no alovishe nani, eno timi khunomu nongu lokiqi ikhisüwuvemo nani. 23Tipau tsalà lo nongu ye I vilo kiumu injumove nani. Kuchou no I no nongu vilo pìní, nongu no I je lono kiu-kiumu khu aye I pù no nongu tsü nani. 24Itehi kutólo nongu ye I je lono kiumu khu mphie. Khulo eno nongu no ithulu nani, eno nongu lokiqi ye kupukülailuve nani.
25“Ni ye aholetsa lono pi acheni kemu aholetsa ghola peithamove no mütsümishei keu lono I pù ghili pìní keu do lakhi chenie. 26Tipau tsalà lo nongu no I je lono khu nani. Tiye I no Apù vilo nongu züqhu shi khu nani ipi anike kumoe. 27Moe, Apù ampi no nongu kimiye chenie kughengu nongu no I kimiye ke eno ni ye Alhou lau no ighi kepi pülü cheni ke. 28Ni ye Apù lau no ayeghi lo ighike; ni ye itehi ye ayeghi qhive no Apù lau idewove cheae.”
29Tipathiu Jisü khopemiqo no ishi pi, “No ye itehi ye aholetsau no kumo püzü mütsümishei pi anie. 30No ye thowkha kümtsü ithi akeu eno khunomu O vilo iniju akepu kühae ipi ningu no ithivae. Hipau lono ningu pelo no ye Alhou lau no ighi kepi pülülupe ke.”
31“Itehi nongu ye pülüluvea kema?” ipi Jisü no khochile. 32“Ado lakhi chenie eno kuchou lo ye tihu ighivae, tipa ghuloki lo nongu ye pütüta ki lo apanaghave nani. Nongu ye I likhi qhive nani. Ikemu ni ye I likhi ani chemoe, kughengu I pù ye I gholo ani.
33“I no thime hipaqo pesü nongu vilo pive akeu ye nongu pelo I vechewo alokiqi ithulu peniye ke. Hipau yeghi lo nongu ye aveküsa sholu anani. Ikemu amlo mutotoilo! Ni ye ayeghiqha theqhiluvae.”
Currently Selected:
John 16: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
