John 15
15
Atsayibo eno Alokaqo
1“Ni ye atsaibo kuchou ke, eno I pù ye atsailukichiu ke. 2Pa no I lolo athi pithímo keu lokaqo kümtsü micheve cheni, eno aloka athi pithí akeqo kümtsü pelo alau kutomo pithílu penike ghenguno pa no kixiphe chenie. 3I no nongu vilo pive keu tsa vechewo nongu ye mitheluvae. 4I gholo kimepe achelo kughengu ni ghí nongu gholo kimepe anike. Aloka ye pa likhi pa kutoshi athi pithílu chemoe; tiye atsaibo gholo kimepe aghí moayesa ke. Titoi nongu ghí I gholo kimepemo ke thaqhülo ye athi pithí mülae.
5“Ni ye atsaibo eno nongu ye alokaqo ke. Nongu no I gholo kimepe aye eno I no nongu gholo aye, nongu ye axathi kutomo pithí nani; I sümo kelo nongu ye kiumu shimlae. 6Nongu no I gholo kimepemo aye, nongu ye aloka peve püzü thizümüive keu toi ke; aloka tipaqo ye kiche pesü ami lo vesüve no pitive cheni. 7Nongu no I gholo kimepe aye eno I tsaqo no nongu lolo aye, nongu no kiu-kiumu pulo keu khulo, eno nongu ghenguno tipau shitsü nani. 8Nongu no athi kutomo pithí keu hu no nongu ye I khopemiqo kepi pìyelu cheni eno hipau vechewo I pù juküvüpu shitsü cheni ke.
9“Apù no I kimiye ketoi, ni ghí nongu kimiye ke. Itehi ye iw kikimiye gholo kimepe alo. 10I no I pù zakütsüqo pape no paw kikimiye gholo kimepeke toi nongu no I zakütsüqo pape aye nongu ye iw kikimiye gholo kimepe anani. 11I no nongu vilo hi piakeu ye I lokiqi nongu lolo apenike eno nongu lokiqi kupukülailu peniye ke. 12I zakütsü ye hike: I no nongu kimiye ketoi nongu lakhi no lakhi kimiyekilé lo. 13Timi lakhi no paw shompamiqo ghenguno pa küxü tsüve keu kikimiye nguno akijeu kühae. 14Nongu no I no azah tsü keqo pape aye nongu ye iw shompamiqo ke. 15Ni ye nongu vilo aqemiqo ipi kuchemovae, kughengu aqemi lakhi ye pa mpeu kümlàqo ithi chemoe. Tishini ke züqhulo, I no nongu vilo shompamiqo ipi ku cheni, kughengu I no I pù lau no shikalu keqo kümtsü I no nongu pelo ithivepe ake. 16Nongu no I kishelu ke kumoe, ikemu I no nongu kishelu eno nongu pelo wu no axathi ado kushuwa pithí chekeu pithipe niye süküsü shilu ke eno tishi keu vechewo nongu no I je lono kiu-kiumu khu aye I pù no nongu tsü nani. 17I yeza ye hike: Lakhi no lakhi kimiye lo.
Ayeghiqha no Akhopemiqo Mithi ke
18“Ayeghiqha no nongu mithi aye ayeghiqha ye I mithi paghi kepi nongu mlo lo qhilo. 19Nongu no ayeghiqha’w shi aghí aye ayeghiqha ye paw toi nongu kimiye nani. Nongu ye ayeghiqha’w kumoe, ikemu I no ayeghiqha lau no nongu kishepheluvae. Tighenguno ayeghiqha no nongu mithi ke. 20I no nongu vilo kiu pi keno kümsülulo: ‘Aqemi lakhi ye pa mpeu nguno akijeu kumoe.’#15:20 Jn 13:16 Panongu no I pishi-puju aye, panongu ye nongu ghí pishi-puju nani. Panongu no I kükütsü gholu aye, panongu ye nongu kükütsü ghí gholu nani. 21I je ghenguno panongu no hitoi nongu pishi-puju nani, kughengu panongu ye khuu no I puwu keno mtha ke. 22I no ighino panongu vilo pimo ke aye panongu ye panongu xiné phumlani cheke; ikemu itehi ye panongu ye panongu xiné ghenguno ajeku kühavae. 23I mithi chekemi ye I pù ghí mithi chenie. 24Khunomu shimo keu akümzapu kümlàqo I no panongu gholo shimo ke aye panongu ye panongu xiné kühani cheke. Panongu ye ti ithuluve ake, tishi keghi panongu ye I pù ghí eno ni ghí mithi cheni ke. 25Ikemu hiye panongu Yeza lo ishi yèpüa keu shikupu nikeu ghenguno ke: ‘Panongu no ajeku küha no I mithi ke.’#15:25 Leshe 35:19; Leshe 69:4
Aghungu Kimthe Kümlà
26“Kughou I no Apù lau no puwu keu Shikumtokütsüu—Apù lau no ighi keu kuchou Ghungu—ighini keno pa no I shepe shi nani. 27Eno nongu ghí I shepe shi moayesa nani, kughengu nongu ye abothu lono I gholo ake.”
Currently Selected:
John 15: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
