Luke 13
13
Amlo Pepidemo aye Pühave nani
1Ike tipau tüqhüdo lo tilehi timi khami ngo akemi no Jisü vilo, Galileemiqo khami Pilate no ghiqhive püzü panoqo jì pesü lhoxü ghakishi kümlá gholo kitekungove keu vehu pia. 2Jisü no khochile, “Nongu ye Galileemi hipaqo no hitoi imeve keu ghenguno panongu ye Galileemi kütami kümtsü nguno axinemi alhoküsau küghashi kümsü ani keshea? 3I no nongu vilo piani, kumoe! Ikemu nongu no amlo pebidemo aye nongu ghí kümtsü pühave nani. 4Momu pano chighitache khunoqo Siloam lo akuchuqu ki no ilaiqi panongu veqhi pìthíve keno, nongu no kümsü keu ye panongu ye Jerusalem lo xü akemi kümtsü nguno shipimive küghashi keshea? 5I no nongu vilo piani, kumoe! Ikemu nongu no amlo pebidemo aye, nongu ghí kümtsü pühave nani.”
6Tisheno pa no aholetsa hipau pi: “Timi lakhi no atsailu lo mububo pighi ache, ike pa no axathi ju nike ghenguno mububo lo wu, ikemu lakhimu ithumla. 7Ikehu pa no atsailu tucho-mjo akeu timi vilo pi, ‘Ampe küthü dolo ni ye mububo hipau lo axathi pithí aghíni küghashi ighi acheni ikemu lakhimu phulu chemoe. Hi yeqhive lo! Kushiye hipau pelo aghüma chupühave pe ani kea?’
8“Timi hu no khochile, ‘Akijeu, ampe lakhi ghenguno itaghi qhipüaghi julo, eno I no homüxa chhule no aghüma süjuni. 9Tsalá hino ighi nikeu mpe lo axathi pithí aye ta, tishimo aye yeqhivenie.’ ”
Sabbath Tsalà lo Jisü no Aghütsü Ikokoive Kemi Totimi Lakhi Shipivi
10Sabbath tsalà lo Jisü ye Synagog lakhi lo kütsü ae, 11eno totimi lakhi khuu aküsǜ ghawu no ampe chighitache kutólo aghütsü ikokoive pe keno tile ngo ae. Li ye aghütsü ikokoive kehu khilemu müzüchoi puthugho müla no ache. 12Kughou Jisü no li ithulu keno, pa no azüu li kuphe no li vilo pi, “Totimio, no ye O küsǜ lono kuqhophevae.” 13Tisheno Jisü no pa u pe li shou be kelo, paikhavi li ye müzüchoi puthugholuve eno Alhou sheqhe.
14Jisü no Sabbath tsalà lono shipivi keu ghenguno, synagog lo sakipheu no aghaideve no timiqo vilo pi, “Akümlà shini ke ghenguno atsala tsügho ani. Tighenguno Sabbath tsalà lono kumo no, tipaqo tsalà lono ighino shipivilu alo.”
15Ampeu no pa khochile, “Nongu kühaküghaqo! Nongu lakhi-khi no Sabbath tsalà lo nongu mishitsü momu khurha ki lono kuqho sawo azü pìye cheni ke kumo keshea? 16Tishiaye totimi hipau, Abraham ngá lakhi, khuu Satan no ampe chighitache tshüpe püakeu, Sabbath tsalà lono li tshüpe akeu lono kuqhophevemoni keshea?”
17Pa no hipau pi kelo pa lachile chekemiqo kümtsü shikukujove, ikemu timi kütamiqo ye Jisü no akümzapu kümlà shikeu lo alokiqishi ae.
Aghane Thi eno Kholaqhi Holetsa
18Tisheno Jisü no iniju, “Alhou kükaphu ye kiutoi kea? Ni ye kiu pesü tipau kimghi tsüní kea? 19Hiye timi no aghane thi lakhi ikhipe pa ghutu lo yisü keu toi ke. Tino thuwu no asübo lakhi toive eno aghauqo no alokaqo lo apüsü pesüe.”
20Jisü no itaghi iniju, “Ni ye kiu pesü Alhou kükaphu kimghi tsüní kea? 21Hiye totimi lakhi no kholaqhi epesü ashokukubo ahukimighi muku tsünì toi keu lo kitekungove no, ti kümtsü kunuluve moke kutólo kunú akeu toi ke.”
Müghüghüi keu Hukikha
22Tisheno Jisü no mishiphu eno aphuqo veche wuche kelo kütsü ghi Jerusalem lo wue. 23Timi khami no pa vilo iniju, “Ampeu, timi aghulo likhi xalu niye ani keshea?”
Pa no panongu vilo pi, 24“Tolu ke thaqhü kibikhoi keu khagho veche ilo nike pükapütsalo, kughengu I no nongu vilo pìní, kutomo no tile ilo nike shiju nani, ikemu shimla nani. 25Kughou aki mpeu no ithu püzü ahukikha khave keno, nongu ye khalau puthugho no ahukikha kukhu ghi, ‘Akijeu, ningu ghenguno ahukikha khaqhi tsülo,’ ipi qhüiniju nani.
“Ikemu pa no, ‘Nongu ye khuu momu khile no ighi ani keno ni ye mthae,’ ipi khochile nani.
26“Tile nongu no ishi pi nani, ‘Ningu ye O gholo chu-sho ache, eno no ye niw alaghilaqo lo kütsü acheke.’
27“Ikemu pa no, ‘Ni ye nongu mthae momu khile no ighi ani keno mthae. I lau no chevelo, nongu küsaküghamiqo!’ ipi khochile nani.
28“Nongu no Abraham, Isaac, Jacob eno tungkupumiqo kümtsü Alhou kükaphu lo aghí keu ithulu nani, ikemu no ampi ye khalau vepheve kelo, tilehi qanimlo eno ahu tsüghü-bubushi keu anani. 29Timiqo ye kipelau, kulolau, ahuu eno apéu no ighino Alhou kükaphu lo panongu-a lo iqa no aghulhu shi nani. 30Kuchou no khunoqo no ashekhami shi ani keno atüghimi shive nani, eno atüghimi no ashekhami shive nani.”
Jerusalem Ghenguno Jisü Mloghime
31Tipau süchedo lo Phariseemi khami Jisü lau ighino pa vilo pi, “A-a hipau qhive no khilela wuvelo. Herod no O heqhipithíve niye shi anie.”
32Jisü no khochile, “Wu no aghalotsü tipau vilo pilo, ‘I no ishí eno thoghiu tüghaküsa haphe eno timiqo shipivi aghí nani, eno aküthüni ye I kimiji toluve nani.’ 33Kiu-kiu shi aghimu, ni ye ishí thoghiu eno aghiniu che cheghi moayesae, kughengu mütsüqhei no tungkupumi lakhimu Jerusalem khalacheu no thive mülae.
34“O Jerusalem, Jerusalem, no khuu tungkupumiqo pìthíve eno O lau puwu kemiqo atu pesü veqhive keno, awuqu no li chishibo qholo atiqo vakütsü ake toi, ni ye ghuthu khijehi O nuliqo hekütsü nishiqhiyi acheni kea, ikemu nono pulomoe. 35Julo, O ki ye kümsá shivae. Kughengu I no nongu vilo pìní, nongu no, ‘Ampeu je lono khuu cheni keno pa kümgha tsülo,’ ipi moke kutólo nongu ye ni ithulu kithemae.”#13:35 Leshe 118:26
Currently Selected:
Luke 13: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
