Luke 14
14
Jisü no Phariseemi Lakhi Ki lo ilo
1Sabbath tsalà lakhi lo kughou Jisü no Phariseemi ajekipimi lakhi ki lo chuqu-kusho shi niye wu keno, timiqo no tsaqüi Jisü chhejua. 2Tilehi aphi kughungu lono paküta keu shi sǜ akemi lakhi Jisü gizülo ae. 3Jisü no Phariseemi eno ayeza lo shitsamiqo vilo iniju, “Ayeza kiqi lo Sabbath tsalà lo ye shipivi kepu keo mokea?” 4Ikemu panongu ye inaqhoi khochilemo no ngove. Tile Jisü no timi hu sünhepe püzü pa shipivive püzü puwove.
5Tithiu Jisü no panongu vilo ishi iniju, “Tsalá nongu dolo anu#14:5 Khami lo ye khurha ipi püani. momu amishitsü lakhi Sabbath tsalani no azükikhi lo ikiqi ilove aye, nongu ye paikhavi lono ti sünhephevemo nani keshea?” 6Panongu ye hipau lo kiumu pi kepu kühave.
7Kughou inami kusü kemiqo no a-a akiviu kishe akeu Jisü no ithulu keno, pa no aholetsa hipau panongu vilo pi: 8“Kughou timi no külakupu ghulhu lo O kusü nike no, alakhü azüu akiviu lo iqa kevilo, kughengu O nguno akhotou timi kusü püaghi luvi ke. 9Tishive aye, nokujo kusüpüa keu hu no ighino ishi O vilo pi nani, ‘Nono iqa akeu lakhü timi hipau tsüvelo.’ Tishi keu vechewo no ye kujo ghi athiu alakhü chuninei keu lo iqa kepu shive nani. 10Ikemu kughou timi no O kusüni keno no ye aqhokighe lakhü lo iqalo, tishianguno kughou O kusü keu no ighini keno pa no O vilo ishi pi nani, ‘Aküsàu, alakhü akiviu küdau ikuve lo.’ Tishiaye, no ye inami kütamiqo zülo agigihu ithulu nani ke. 11Kughengu khuno no alikhi ampi pesü süqhe cheni keno kuchunuve nani eno khuno no alikhi ampi pesü kuchunu cheni keno süqheve nani.”
12Tithiu Jisü no pa kusü keu vilo pi, “Kughou nono inaqhe ghulhu momu avelau ghulhu tsüní keno O küsàmiqo, O thiküzümiqo momu O chelimiqo, O bolomiqo, momu O kisüghümi kinímiqo kusü kevilo; nono panoqo kusü aye panongu ghí O kusü nani eno tisheno O lochileve nani. 13Ikemu kughou nono aghulhu kijè tsüní keno kumlhomi, apukhu kighichemi, apukhu kinitave kemi, eno anhethi kighichemiqo kusü lo, 14eno no ye kümgha keu ithulu nani. Panongu ye O lochile müla nani ikemu amikuchomi xüleputhu keu tsalà lono O lochileve nani.”
Aghulhu Kijè Holetsa
15Kughou Jisü gholo kümtsa aghulhu shi akemi lakhi no hi chilu keno pa no Jisü vilo pi, “Khuno no Alhou kükaphu ghulhu lo chuqu-kusho shi nani keno akümghapue.”
16Jisü no khochile: “Timi lakhi no aghulhu kijè kutò eno inamiqo kutomo kusüe. 17Aghulhu tsü nikeu do tove kelo pa no pa qemi hapesü kusü akemiqo vilo ishi piwu pe, ‘Ighilo, kughengu thowkha kutoluvea ke.’
18“Ikemu panongu kümtsü no aphiphi shi jekujeli pithuve. Atüghiu no pi, ‘Ni ye alu lakhi qhü püani, eno ni ye wu no ti ju moayesa ani. Kimiye no I kipimí qhitsülo.’
19“Lakhiu no ishi pi, ‘Ni ye amishitsü tüna pungu qhü püani, eno ni ye tipaqo peitha ju niye wucheni ke. Kimiye no I kipimí qhitsülo.’
20“Itaghi lakhiu no pi, ‘Ni ye anileshi külakupu shive no anike, tighenguno ni ye ighi mülae.’
21“Aqeu hu no ideighi püzü pa mpeu vilo hipaqo vehu pesü kütüghüve. Aki mpeu hu ye amloideve eno pa qeu vilo ishi azah tsü, ‘Mtazü mishiphu alaghilaqo lo eno bidola kümtsü lo wu no kumlhomi, apukhu kighichemi, anhethi kighichemi eno apukhu kinitave kemi saighi lo.’
22“Tishive kethiu aqeu hu no ideighi püzü pi, ‘Akijeu, nono azah tsü keu toi shivae ikemu itaghi a-a aphie.’
23“Tipathiu ampeu hu no aqeu vilo pi, ‘Lavela eno atoghila lo wulo eno tsükhomo panongu pelo iloghi pelo, tishianguno I ki chhitoive penike. 24I no nongu vilo pìní, kusüpüa kemiqo dolo lakhimu I ghulhu michelumo nani.’ ”
Akhopemi Shini keu Mekusho
25Timi kutomo no Jisü gholo izüwu che, ike pa no tsüghüwo panongu vilo pi: 26“Khukhumu I lau ighi püzü papù eno azá, pa nipu nuliqo, pa thiküzümi eno achelimiqo, eno iyei, pa likhi pa küxü kutólo milivemo aye,#14:26 Mt 10:37 titoi kemi ye I papemi shimlae. 27Eno khuno no paw kros xapumo no I papeni keno panongu ye I papemi shimlae.
28“Kümsüju kelo nongu dolo lakhi no qhemghai keu ki shiqhepuku niye shi aye. Pa ye atüghishi iqa no ame khije wove nani eno ti shikulupu pisa lukümkha shi ani keo shimo keno kihikülaju paghimo nani keshea? 29Kughengu pa no aboqha likhi qhave no ti ashe tomove aye timi ithulu kemi kümtsü no pa junu ghi, 30ishi pi nani, ‘Timi hipau ye aki shipuku niye shi kemu mülaqhi mülavae.’
31“Momu kümsüju kelo kükami lakhi no kükami kütami sasü aghüshini ke wu niye kutò akelo, pa ye atüghishi iqa no pa gholo timi 10,000 akeu sasü kükami kütami khuu gholo timi 20,000 ani keno aghü shikulupu mutotoi ani keo mututoimo keno kiqiju paghimo nani keshea? 32Tsalá pa no aghü tomla kepu shive aye, kükami kütami no alà kushuwa lo chephi lono pa ye külakishi vehu iniju penike ghenguno pa ghinimi puwu nani. 33Tihutoi, nongu khukhumu nono aghí keu kümtsü phevemoni keno nongu ye I papemi shimlae.
34“Amitì ye aloe, ikemu amitì no aküqhü kühave aye, tiye kíshi no itaghi qhü kitheluve nani kea? 35Tiye aghüma kühave keu momu aghüma mülà nikeu lomu peitha mülae; tiye peve chenie.
“Khunoqo no chilu nishi ani keno panoqo pelo chilu pelo.”
Currently Selected:
Luke 14: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
