Luke 22
22
Judas no Jisü Thechu Shive nike Pulove
1Ike Kholaqhi sümo keu Sho Tiqhitini ipi no Hechekulu ghulhu shi chekeu kupunú ighive, 2eno achinetomi eno ayeza kükütsümiqo ye kíshi no Jisü pìthíveni keno alaghi hami phuju ae, kughengu panongu ye timiqo msà ake. 3Ikelo Satan no Chighikini dolo lakhi Judas Iscariot ipi chekeu lolo ilove. 4Eno Judas no achinetou ngò achineki khemiw hiyampemiqo lau wu püzü pa ye kíshi no Jisü thechu shiveni keno küptsae. 5Panongu ye ighono alokivishive püzü pisa pa tsü nikeu pulove. 6Judas ghí puloküqhave, eno pa ye aqokitikhi küküha lono Jisü pesü panongu u lo sǘvetsü niye adokivi miqeauve.
Ashekhau Ghulhu
7Ikelo Hechekulu ghulhuw ambeti ghiqhi pe akümlagho shi no Kholaqhi sümo keu Sho#22:7 Hechekulu ghulhu shelo atsala 7 kholaqhi sümo keu sho pesü aghulhu shiche: tipau pesü kholaqhi sümo keu sho pinedo ipi ani. ikhilu chekeu tsalà ighive. 8Tile Jisü no Peter ngò John puwu no pi, “Wu püzü ningu no Hechekulu ghulhu chuni keu kutò lo.”
9Pama no iniju, “No ye ikujo pelo Hechekulu ghulhu chuni ke ghenguno khile kutò penishi ani kea?”
10Pa no khochile, “Nokujo no mishighüna lo ilo kelo timi lakhi alikoli lo azü xapusü nokujo sasü kusho nani. Pa no ilo keu ki lo pa papesü wulo, 11eno aki mpeu vilo ishi pilo, ‘Akükütsüu no ishi iniju ani: I no I khopemiqo sasü Hechekulu ghulhu chuni keu chebo khilehi ani kea?’ 12Pa no aki jolha kunguu achebo kijè mülaqhi püakeu nokujo pìye nani. Tipa-a lo kutokughoi lo.”
13Pama no wu kelo Jisü no pikeu toi thowkha tishi ithulu. Ikehu pama no Hechekulu ghulhu kutoe.
14Kughou ado tove keno Jisü no apostolmiqo sasü aghulhu lipa lo iqae. 15Eno pa no panongu vilo pi, “I no aghime shimphi lono ni ye nongu sasü Hechekulu ghulhu hipau ighono chuni shiqhiyi ake. 16Kughengu I no nongu vilo pìní, Alhou kükaphu lo hipau shikupuve mphi kutólo ni ye khilemu hipau ghulhu chulumae.”
17Tisheno Jisü no ajikhu ikhilu no shikimthi tsü ghi pi: “Hi ikhilu no nongu dolo kijélu lo. 18Kughengu I no nongu vilo pìní, Alhou kükaphu ighimo ke kutólo ni ye atsaithi lono atsaizü ipeghi keu sholumae.”
19Tisheno, pa no asho ikhilu no shikimthi tsü püzü süpho pe panongu tsü ghi pi, “Hiye I phimpi nongu ghenguno tsüve keu ke. I kümsüchilelu ghi hi shichelo.”
20Tipau gholau no aghulhu chuve kethiu pa no ajikhu ikhilu no pi, “Ajikhu hipau ye I jì vechewo puloshoqhi akitheu shiluve keu ke eno hiye nongu ghenguno peleve keu jì ke. 21Ikemu I küghape thechu shiveni akeu u ghí I gholo aghulhu lipa lo anie. 22Timi Nu ye kughupüa ketoi thive nani. Ikemu pa thechu shive keu tipau ghengu ye ahaküsapue!” 23Tile panongu likhi panongu dolo no khuu no hi shini cheni kela pi kighinikile thuve.
24Panongu dolo khuu no akijeu shi nani kea ipi kütsala ipeghive. 25Jisü no panongu vilo pi, “Jewkumomi kükamiqo no panow timiqo shou ampeu shi cheni; eno khunoqo no timiqo shou kükagha peitha cheni keno pano likhi pano pesü timi kukuphuu ipi ku cheni. 26Ikemu nongu ye tishi kepu kumoe. Tishini ke züqhulo nongu gholo akijeu no akitilau toi moayesa, eno khuu no ayè pe ani keno pa ye aqeu toive moayesae. 27Kughengu khuu no akijeu kea, aghulhu lipa lo iqa akeu no keo pa lojí akeu no kea? Aghulhu lipa lo iqa akeu no kumo keshea? Ikemu ni ye nongu gholo lokijimi lakhi toi acheni ke. 28Nongu ye iw shiluküsa peju keu kümtsü lo I gholo ngo ighivae. 29Eno I pù no akükaphu I tsü keu toi I no akükaphu nongu tsü anie, 30tishianguno nongu ye I kükaphu lo I gholo kümtsa chu-sho nani, eno aküka lakhü lo iqa no Israel lagha chighikini shou xakütha shi nani.
31“Simon, Simon, Satan no amuu fuleve ketoi nongu kümtsü peju nike khuluvae. 32Ikemu Simon, O küpülü iqeve pemo nike I no O ghenguno inikhuve tsüae. Eno kughou nono ideghiveni keno O thiküzümiqo shikumtolo.”
33Ikemu Simon no khochile, “Ampeu, ni ye akughuki eno akithí kutólo O gholo wuni ke kutò pe anie.”
34Jisü no khochile, “Peter, I no O vilo pìní, awudu no ishí tsalà lo igha mphi züu no no ye ghuthu küthü I milive nani.”
35Tisheno Jisü no panongu vilo iniju, “Kughou I no nongu pelo pisabo, jolabo eno apukhukuqho pumò no wupe keno nongu ye athokha shive keshea?”
“Athokha shimoe,” ipi panongu no khochile.
36Jisü no panongu vilo pi, “Ikemu itehi ye tsalá nono pisabo aghí aye ti pelo eno jolabo ghí pelo; eno nono akihizüta küha aye ubephi jeve püzü lakhi qhüluve lo. 37Ishi yèpüani, ‘Pa ye ayeza hekibidemiqo gholo kihisüve’;#22:37 Isa 53:12 eno I no nongu vilo piakeu toi hiye I lau no shikupuve moayesae. Iyei, I ghenguno kiu yèpeqhi keno shikupuveni cheae.”
38Akhopemiqo no pi, “Ampeu julo, akihizüta kini hi anie.”
“Tiye lumkhae!” ipi pa no khochileve.
Olive Naghuto lo Jisü no Inikhu
39Thosülo toi Jisü ye Olive Naghuto lo wu eno pa khopemiqo ghí pa pape wue. 40Kughou a-a hu tolu keno Jisü no panongu vilo pi, “Nongu ye ghukuju lo ikiqimo nike inikhulo.” 41Tisheno pa ye panongu lau no putosü lo kütümo no wu püzü qhoqhünhe pe ishi inikhu, 42“Apùo, nono pulo aghí aye aghime jikhu hipau I lau no pesü wuve tsülo; tishimu I pulou kumoe ikemu O pulou shitsünie.” 43Kungugha lono kungumi lakhi pa lau ipeghino pa shikumto tsüe. 44Amlo kughuju kijè lau no pa no alau thümüyi inikhu eno tishikehu pa tsünhizü no ajì mqo kighiji hutoi ayeghi lo ìji iqie.
45Kughou pa no akighini shia püzü akhopemiqo lau ideighi keno panongu ye amloghime lau no akulhoshive püzü zü aghive keu ithulue. 46Ike pa no panongu vilo pi, “Nongu ye kushiye zü ani kea? Ithuvelo eno ghukuju lo ikiqimo nike inikhulo.”
Jisü Küghaluve
47Pa no atsa piaphi lono timi aqokitikhi lakhi ighive, eno akhopemi chighikini dolo lakhi Judas ipikeu hu no panongu sasü ighi. Pa no Jisü müma niye kupunú ighi, 48ikemu Jisü no pa vilo iniju, “Judas, no ye ghuthu lakhi müma keu pesü Timi Nu thechu shive ani keshea?”
49Kughou Jisü pape chekemiqo no kiu shive niye ani keno ithive kelo, panongu no pi, “Ampeu, ninguw akihizüta pe panongu küsaveni keshea?” 50Eno panongu dolo milakhi no achinetomiqo shou atou qeu shou ghipuku no pa kìní küsave tsü.
51Ikemu Jisü no ishi pi, “Hikithipu shi kevilo!” Eno Jisü no timi tipau kìní bu tsü püzü pa shipivive.
52Tisheno Jisü no achinetomi, achineki khemiw hiyampemi eno kichimi khunoqo pa kügha niye ighi keno tipaqo vilo pi: “Ni ye ayeza hekibidemi mqo sache ghí kepu toi nongu ye kushiye akihizüta ngò asüthaluqo pesü I kügha niye ighi ani kea? 53Ni ye nongu gholo tsalà kipetsü achineki khalau achemu nongu lakhimu I shou au bupukumoe. Ikemu hipau tüqhüdo ye nonguw ke tiye àküzǘ no ka nikeu ke.”
Peter no Jisü Milive
54Tisheno panongu no Jisü küghaluve püzü pa sasü achinetou ki lo wuve. Peter ye putou no pape che. 55Eno tilehi timi khami no aki khala mtá lo ami shipepüa eno ami sümxa pe iqa akeqo gholo Peter ghí iqa ae. 56Aqeliu lakhi no Peter no ami phivilo iqa akeu ithulu. Li no tsaqüi pa ju no pi, “Timi hipau ghí Jisü gholo cheke.”
57Ikemu Peter no li lachile ghi pi, “Totimio, ni ye pa mthae.”
58Ado kitila thiu timi khami no pa ithulu no pi, “No ghí panongu gholo lakhi ke.”
Peter no khochile: “Timi ghí lai, ni ye kumoe!”
59Ayì kihedo lakhia thiu kütami no pülübeyi shi no pi, “Timi hipau ye mütsüqhei no Jisü gholo ae, kughengu pa ye Galileemi ke.”
60Ikemu Peter no khochile pi, “Timi ghí lai, nono kiu piani keno ni ye ithi amoe!” Pa no atsa piaphi lono awudu no ighae. 61Ampeu no athiu jupuwo püzü vejoi Peter ju. Tile Peter ye Ampeu no pa vilo ishi pipüa keu tsa kümsüchilelu: “No ye ishí awudu no igha mphi züu ghuthu küthü I milive nani.” 62Eno Peter ye khalau ipeve no kunotshütshü shi qa auve.
Ghükhemi no Jisü Thaigha
63Timi khunoqo no Jisü khe akeno panongu no Jisü thaigha eno heqhi thuve. 64Panongu no pa nhethi khave tsü eno pa vilo, “Khuu no O he ani keno tungkupumi toi piveju lo?” ipi iniju. 65Panongu no pa thaigha keu tsa jeli kütau kutomo pe pa vilo piae.
Jisü no Pilate ngò Herod Zülo Puthugho
66Kughou inaqhe vüipeghi keno Jewmi ampemi kichimiqo; achinetomi eno ayeza kükütsümiqo kinikujo aqoshi kusho, eno Jisü panongu zülo saipeghi. 67Panongu no iniju, “Nono Messiah shi aghí aye ningu vilo pilo.”
Jisü no khochile, “Tsalá I no nongu vilo pi aye nongu no I pülümo nani, 68eno tsalá I no nongu vilo iniju namu nongu no khochilemo nani. 69Ikemu hinguno hilau ye Timi Nu ye Alhou akughushuu u ajeu küdau küghüqave nani.”
70Panongu kümtsü no iniju, “Imaye no ye Alhou Nu keo?”
Jisü no khochile, “Ni ye tike ipi nongu no pivae.”
71Tisheno panongu no pi, “Ningu ye kushiye hinguno alau thopi avehupu shi aní kea? Ningu no pa likhi pa kichí lono pikeu chiluvae.”
Currently Selected:
Luke 22: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
