Luke 23
23
1Tisheno tilehi akemi kümtsü ithu no Jisü sasü Pilate zülo wuve. 2Eno panongu no akipimí pa tsü thuve püzü ishi pi, “Timi hipau no ni shiye ikhiqhive niye kidi aghí keu ningu no phulue. Asüqha jeli Caesar tsü akeu pa no mjochile ani eno pa likhi pa pesü Messiah akükau lakhi ke ipi cheni.”
3Ikehu Pilate no Jisü vilo iniju, “No ye Jewmiqo kükau keshea?”
Jisü no khochile, “Nono ti pivae.”
4Tisheno Pilate no achinetomiqo eno aqokitikhi vilo pìthitsü, “Ni ye timi hipau ngukube kepu akipimí kiumu phulu amoe.”
5Ikemu panongu no pikichichi auve eno pi, “Pa no kütsü keu lono Judea qha kümtsü lo timiqo xukutho ani. Pa ye Galilee lono huthu püzü itehi ye hi kutólo ghí ighivae.”
6Hi chilu kelo, Pilate no timi hipau ye Galileemi keshea ipi iniju. 7Kughou pa no Jisü ye Herod kükaqha bocholomi shi aghí keu ithive keno, pa pesü Herod lau puwuve, tipau tüqhüdo lo Herod ghí Jerusalem lo ngo ake.
8Kughou Herod no Jisü ithulu keno, pa ye ighono alovive, kughengu pa ye ado kushuwa lono Jisü ithulu nishiqhiyi ake. Pa no pa ghili chilu chekeu kiqi lono, akümzapu michipu khami pa no shikeu ju niye lakuju shi ake. 9Pa no ashelo-ashelo shi atsa kutomo pa vilo iniju, ikemu Jisü ye kiumu pa khochilemoe. 10Achinetomiqo ngò ayeza kükütsümiqo tilehi puthugho no qhüqhüyi pa ngukube ae. 11Tisheno Herod ngò paw ghüshimiqo no Jisü pipüsa eno thaigha. Küthakügha michi shi chijeboboi-phi pesü pa pipe, eno panongu no Pilate lau pa kighide puwove. 12Tipau tsalà lono Herod ngò Pilate pama ye shompami shiluve—hipau züu ye pama ye aghümi shi acheke.
13Pilate no achinetomi, ayekipemi eno timiqo ku kumqo, 14eno panoqo vilo pi, “Nongu no timi hipau I lau sasü ighi eno pa no timiqo pelo hebide penike chuxu cheni ipi. I no nongu küa lono pa phukideküdaijuvea ke, nongu no pa nguku akeu kipimí ni ye kiumu phulu amoe. 15Herod ghí kiumu phulumoe, tighenguno pa ghí I lau pa kighide puwuvae; nongu no ithulu anike, pa pìthíve küzüpu kümlà kiumu mülà püamoe. 16Tighenguno, I no pa ghimeve no tithiu no pa phepuwu venie.” 17Israelmi no Egypt yeghi hechelu keu ghulhu atsütsǜ lo Pilate ye akughumi lakhi-khi timiqo lau phepuwu veche.#23:17 Kaku khami lo ye ajò hipau küha eno hipaqo lo yèpüa keu peitha cheni Mt 27:15 eno Mk 15:6
18Ikemu timi kümtsü no ishi ighamuku, “Timi hipau sasü chevelo! Barabbas ningu lau khaqhiphe tsülo.” 19(Barabbas ye mishighüna lo alhoküsa xukutho eno timi pìthíve keu ghenguno akughuki lo süpüa ke.)
20Jisü kuqhopheve nishi kelau no, Pilate no tsükhomo panongu vilo pikitheju. 21Ikemu panongu no tamo no ighamuku, “Pa yedavelo! Pa yedavelo!” ipi auve.
22Ghuthu aküthüu ghí pa no panongu pütsa: “Kushiye kea? Timi hipau ye ayeza heküxá kümlà kiu shive kea? Ni ye pa pìthíve kepu kipimí kiumu phulu amoe. Tighenguno I no pa ghimeve no pa phepuwu venie.”
23Ikemu panongu no ighamuku pikichichi pa yedave penike khuauve, eno panongu ghügha no ghüsüve. 24Ikehu Pilate ghí panongu no khu ake toi pulove tsü nikeu shi xathave. 25Eno panongu no khu ake toi, timi khuu alhoküsa xukutho eno timi pìthíve keu ghenguno akughuki lo akeno pa no kuqhopheve, eno Jisü pesü panongu pulou shive penike ikhipheve tsü.
Jisü Yedave keu
26Ghüshimi no pa sasü wuche kelo, tipau hokümxa lono ighi kemi Simon Cyrenemi khuu mishiphu lo ilo niye alà lo che keno panongu no pa tsüqüluve, eno kros pesü pa xapipe püzü pa pelo Jisü thikhau shi no xapu pe. 27Timi kutomo no pa pape che, tipaqo gholo totimiqo no pa ghenguno amlokithikumo shi qamlo ghi che. 28Jisü no idewo ju no panongu vilo pi, “Jerusalem ngaqo, I ghenguno qa akevilo, O likhi O ghenguno eno O nuliqo ghenguno qa alo. 29Ado ghuloki ighi nani eno nongu no ishi pi nani, ‘Anuhami totimi, atita lo mishí jumo kemi eno angapini jumo kemi kümghae!’ 30Tile no
“ ‘panongu no naghuto vilo, “Ningu shou ikiqi ikughilo!”
eno atoghi vilo, “ningu venha luvelo!” ’ ipi nani.#23:30 Hosea 10:8
31Kughengu asübo no tsüniju shi akelo thotsü timiqo no hikithipu shi aye, kughou thizümüi veni keno kíshive nani kea?”#23:31 Jisü no akelo thotsü ke pa no kühave aye kíshive nani kea ipi aholeu no piani.
32Tisheno kütami timi kini, pama kinikujo ayeza heküxami ke, pama ghí Jisü gholo pìthíve nike ghenguno sawuve. 33Kughou panongu no Aboghe ipikeu-a lo ighi keno, panongu no tilehi ayeza heküxami pama lakhi no pa u ajeu eno lakhi no pa u piyiu ishi no pa gholo yedave. 34Jisü no pi, “I pù, panongu kipimí qhitsülo, kughengu panongu ye panongu no kiu shi ani keno ithi amoe.”#23:34 Kaku khami lo ye ajò hipau kühae. Eno panongu no asaqhi no paw tiphimini kijéluve.
35Timiqo ye puthugho pe jukutoa, eno ayekipemiqo no pa thaigha junua. Panongu no pi, “Pa ye kütami xalu ke; tsalá pa no Alhou’w Messiah, Kisheluve keu Lakhi shi aghí aye pa likhi pa xalu pelo.”
36Ghüshimiqo ghí tilehi ighino pa junuqhi ae. Panongu no akiqhizü pesü pa pìye 37eno ishi pi, “Tsalá nono Jewmiqo kükau shi aghí aye, O likhi O xalulo.”
38Tile yepìthi tsa pa kütsü shou hitoi yèpüa:
Hiye Jewmiqo Kükau ke.
39Ayeza heküxami tile yedapüa keu lakhi no pa thaigha ghi pi: “No ye Messiah ke kumo keshea? O likhi O xalulo eno ningu ghí xalulo!”
40Ikemu ayeza heküxami lakhiu no pa sakiyi ghi pi. “No ye Alhou msàmo keshea? No ghí aghime aphiphi lo akeno kuu. 41Nikujo ye achipi lono aghime ithulu ani, kughengu nikujo kümlà kiqi lono imeküzü qhemi ithulu anike. Ikemu timi hipau ye kiumu shipimi püamoe.”
42Tisheno pa no pi, “Jisü, kughou nono O kükaphu lo ighini keno I kümsülu tsülo.”
43Jisü no pa khochile, “Kuchou no I no O vilo pìní, no ye ishí no I gholo alokughuno-a lo aniae.”
Jisü Kithí
44Puchomta shi ake ghuloki lono avelau ayì küthü kutólo àküzǘ no ayeghiqha kümtsü küzüpholuve, 45kughengu khetsünhe no yepüvümove. Eno achineki lo nhaqhiphi hu no ixü kütüta kini shive. 46Jisü no asütsa kuloghi lono igha no pi, “Apùo, O u lo I ghungu kulhoqhive tsü ani.”#23:46 Leshe 31:5 Kughou pa no hi pive keno, pa ye süthahuve.
47Aqhe shou zatsüu no, kiu shive keno ithulu püzü Alhou sheqhe eno pi, “Mütsüqhei no timi hipau ye akivimie.” 48Thopi shini ke tilehi kumqo akemi kümtsü no kiu shive keno ithuluve, eno panongu mülà kukhu ghi wove. 49Ikemu pa ithi akemiqo gholo no totimi Galilee lono pa papesü ighi kemiqo kümtsü putou puthugho no hipaqo chheju ae.
Jisü Qhove keu
50Ike tile timi lakhi Joseph ipikeu ae, pa ye Jewmi Hoho lo kihimpemi, akivimi eno achipiu shi chekemi, 51pa ye aqo-aho no kiu xakütha shi püzü kiu mülave keno tipau lo puloküqhamo kemi ke. Pa ye Judea lo mishiphu Arimathea lono ighi kemi, eno pa ampi ghí Alhou kükaphu ngokhe ache kemi ke. 52Pilate lau wu no, pa no Jisü sükumo khuluve. 53Tisheno pa no asükumo peqhi no phephei keu phì pesü küzüve püzü atu chhupho keu kumoki lo pesüve, akumoki tipau ye azüu khumu qho mphi keu ke. 54Tipau tsalà ye kutokughoi keu tsalà shia eno Sabbath huthuve niye shi ake.
55Totimi khunoqo Jisü gholo Galilee lono ighi keno panongu no Joseph papesü wu püzü akumoki juve eno kíshi Jisü kumo alou pesüve keno juluve. 56Tisheno panongu ye aki lo wove no axokütsüngü eno nupuku kepu jeli kutò ae. Ikemu panongu ye Sabbath tsalà yeza ghokulu shi akulhoqhive.
Currently Selected:
Luke 23: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
