Matt. 10
10
Jisü no Akhopemi Chighikini Puwu
1Jisü no pa khopemi chighikiniqo pa lau ku puwu, eno mithekumo ghunguqo haphelu pe nikeu, küsükini eno aküsǜ jeli kümtsü shipivilu pe nikeu kükagha pesü panoqo tsüe.
2Apostolmi chighikini je ye hipaqo ke:
atüghiu no, Simon (khuu Peter ipi cheni keno) eno pa thiküzüu Andrew;
Zebedee nu James, eno pa thiküzüu John;
3Philip eno Bartholomew;
Thomas eno Matthew zame küqhau;
Alphaeus nu James, eno Thaddaeus;
4Simon azá yeghi kimiye kicheu eno Jisü thechu shive keu Judas Iscariot.
5Jisü no pano chighikini vilo hitoi tsaqütsalei pi püzü ashou puwu: “Jewkumomi gholo wu kevilo momu Samariamiw mishiphuqo lakhi lomu ilo kevilo. 6Tishini ke züqhu Israelmi ambe toi pühape akemi lau wulo. 7Nongu no wuche kelo, hipau kükütsü sütsa pesü asheshu lo: ‘Kungugha kükaphu ye kupunú ighivae.’ 8Küsükinimi shipivi lo, kithimi xüputhu lo eno khunoqo apügha pù ani keno shikimthe lo, tüghaküsaqo haphelo. Nono kümsá lono ithulu keu toi; kümsá lono tsülo.
9“Ameshoyi, ghükayi momu asapuyi pesü nongu pokhaqo lo pusü wu kevilo— 10aghüzüla ghenguno jolabo, aphiküzü xakili kepu, apukhukuqho momu aküsǘ pe kevilo, kughengu akümlàmi lakhi ye pa no kiu avehupu shini keno ithulu küzü ke. 11Nongu no mishiphu momu aphu lo ilo kelo, timi ameküami phujulo eno nongu no aphughi qhimo ke kutólo aki tile ngo lo. 12Nongu no aki lo ilo kelo, panongu sasü petha shilo. 13Tsalá aki tipau lo akemi no aküzüpushi aghí aye, tile alokiqi qhitsülo; ikemu aküzüpushi aghimo aye nongu lokiqi pelo nongu lau idechile ighive pelo. 14Tsalá khiuala no nongu sasümove momu, nongu tsa initsümove aye, aki momu mishiphu tipau qhivelo eno nongu pukhu müzá lo ayeghimukhu kukhuqhivelo. 15Kuchou no I no nongu vilo pìní, küghakütha tsalà lo mishiphu tipau ye Sodom ngò Gomorrah nguno alau ghimeqhi nani.
16“Julo I no nongu pelo ambe no tüngtügha gholo ilolu ake toi puwu anie. Tighenguno nongu ye apighi toi tsükhutsüvai shilo eno amiqhiqo toi ivünhei shilo. 17Nolikhi nongu khekuto alo; nongu pesü no-a lo mijetsümiqo u lo sǘve no synagogqo lono nongu heqhi nani. 18I je ghenguno, nongu sasü angh eno kükamiqo zülo wu nani eno panoqo ngò Jewkumomiqo lau I shepe shi nani. 19Ikemu kughou panongu no nongu küghaluveni keno, kiu pìní momu kíshi pìní keno amlosa kevilo. Tipau tüqhüdo lono kiu pi kepu keno tsü nani ke. 20Kughengu nongu no pimo nani, ikemu nongu Papù Ghungu no O vechewo pi nani.
21“Athiküzüu no athiküzüu thechu shive no pìthíve nani, eno titoi apù no anu lau shi nani; anuliqo no panongu pù-aza mjochile nani eno panoqo pìthíve nani 22I ghenguno timi kümtsü no nongu mithi nani, ikemu khuu no ashekha kutólo mutotoi puthugho aghíni keno xaluve nani. 23Kughou a-a lakhi lo nongu pishi-pujuni keno, a-a kütau pove lo. Kuchou no I no nongu vilo pìní, nongu no Israel lo mishiphuqo lo wukha mphi lono timi nu ye ighive nani.
24“Kiphimi lakhi ye shikükau shou kumoe, momu aqeu ye ampeu nguno akijeu kumoe. 25Kiphimiqo ghengu ye panonguw shikükami toi shilu ke kughomoe, eno aqemiqo ghí pa mpeu toi shilu ke kughomoe. Tsalá akibo lo akütsü shi akeu vilo Beelzebul ipi ku cheghi aye, akibolomiqo vilo ye tinguno alhoküsau aje kiu ku nani kea?
26“Tighenguno panonguqo msà kevilo, kughengu tilehi lakhimu pephe-piyemo keu shimo nani eno nhapüa keu lakhimu ithive pemo keu shimo nani. 27I no àküzǘ lono nongu vilo kiu pìní keno, atsala küvü lono pilo; tuqhou no nongu kìní lo kiu pisüpüa keno aki kütsüqaqo lono asheshu lo. 28Khunoqo aphimpi pìthíve tsülu nani kemu angulho pìthíve tsü müla nani keno tipaqo msà kevilo. Tishini ke züqhu khuu no aphimpi eno angulho kinikujo amiyizü lono kütsave kulupu ani keno Pa msà alo. 29Tüghashoqhe kini ye pisa lakhi lono je cheni ke kumo keshea? Ikemu nongu Papù no pulotsümo kelo ye panongu lakhimu ayeghi lo ikiqive pe chemoe. 30Eno nongu kütsü lo asà akeu kutólo kümtsü kihipe ani. 31Tighenguno msà kevilo: nongu ye tüghashoqhe kutomo nguno amekusho ke.
32“Khunoqo no kütami zülo I je piphe tsüní keno, ni ghí kungugha lo I pù zülo pa je piphe tsü nani. 33Ikemu khunoqo no kütamiqo gizülo I miliveni keno, ni ghí kungugha lo I pù zülo pa milive nani.
34“Ni ye ayeghi lo külakishi süghi niye ighi küghashi kümsü kevilo. Ni ye alokiqi pesü tsü niye ighike kumoe, ikemu akihizüta#10:34 Akihizüta kiqi ye aghükishi momu kijetha keu pesü piani süghi niye ighike. 35I no ighi keu ye,
“ ‘anu lakhi pelo papù lachile,
angá pelo pazá lachile,
amukishiu lakhi pelo pani lachile peniye ke.
36Timi lakhi ghümi kuchou ye pa likhi pa kibolomiqo no shi nani.’#10:36 Micah 7:6
37“Khuu no I nguno alau papù momu azá kimiye nike no, iw shiküzü kumoe; khuu no I nguno alau panu momu panga kimiye nike no iw shiküzü kumoe. 38Khuu no paw kros xapumo no I papeni keno I khopemi shiküzü kumoe. 39Khuno no pano küxü phuluni keno pühave nani, eno khunoqo no I ghenguno pano küxü tsüveni keno xaluve nani.
40“Khuu no nongu sasüni keno I sasü ani, eno khuu no I sasü keno I puwu akeu sasü ani. 41Khuu no tungkupu lakhi ye tungkupumi kepi ikhiluni keno tungkupu saxu ithulu nani, eno khuu no amikuchomi lakhi ye amikuchomi kepi sasü nike no, amikuchomiw asaxu ithulu nani. 42I no kuchou no nongu vilo pìní, timi khuu no I khopemi gholo akitilau shi aghí namu pa ye I khopemi kepi azü kumko ajikhu lakhi likhimu pesü tsüní keno, panoqo ye khilemu panow qesaxu pühamo nani.”
Currently Selected:
Matt. 10: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
