Matt. 11
11
Jisü ngò John Baptiz Kishiu
1Jisü no pa khopemi chighikini vilo akivishi piputove kethiu, pa ye tile no Galilee lo mishiphuqo lo kütsü eno shika niye wuve.
2Kughou John no akughuki lo akeno Messiah kümlà ghili chilu, ikehu pa no pa khopemiqo puwu 3no ishi iniju pe, “No ye ighi niye akeu hu keo, ningu ye kütami huqhe aghílo pi kea?”
4Jisü no khochile, “John lau idechile wo püzü nongu no kiu chilu eno ithulu keno pesü pa vilo pilo: 5Anhethi kighichemi no ithulu ani, apukhu kinitave kemi no alachelu ani, apügha kupumiqo shikimtheve ani, akìní kughupomi no chilu ani, kithimi xüputhuve ani, eno tsakiviu pesü athokhami lau asheshu anie. 6Khukhumu I ju pesü lipimo kemi kümghae.”
7John khopemiqo no wuve che kelo, Jisü no aqokitikhi vilo John ghili pithu: “Nongu ye küghünamokeu-a lo kiu ju niye wu kea? Amlhü no ayeghübo fukini akeu ju niye wu keshea? 8Tishimo aye nongu ye kiu ju niye wu kea? Tiphimini kivi pepu akeu timi hu ju niye wu keshea? Moe khunoqo no tiphimini kivi pepu cheni keno panongu ye kükakiqo lo acheni. 9Tishiaye nongu ye kiu ju niye wu kea? Tungkupuu keshea? Iyei, I no nongu vilo piani, pa ye tungkupumi nguno akijeu ke. 10Kuchoyesü lo pa ghili ishi yèpüani:
“ ‘I no O züu no I ghinikishiu puwu nani,
pa no O züu no wu no O laghi ghepe qhitsü nani,’#11:10 Mala 3:1
11Kuchou no I no nongu vilo pìní, totimi no punú kemiqo dolo khunomu John Baptiz kishiu nguno akijeu kühae; ikeghi kungugha kükaphu lo khuu no aghulou keno pa ye John nguno akijeu ke. 12John Baptiz kishiu ghuloki lono ishi kutólo, kungugha kükaphu pesü muqhumüzai kepi atiche tsü acheni, eno muqhumüzai kemi no anguka sǘ acheni. 13Kughengu tungkupumiqo no pipüa keu eno ayeza kümtsü John kutólo ke. 14Eno nongu no pulolu kepu shi aye, pa ye Elijah ighi nani ipi akeu ke. 15Khunoqo no chilu nishi ani keno panoqo pelo chilu pelo.
16“Ni ye kiu pesü hipau tiqheli kimghi tsüní kea? Panongu ye alhikishi-a lo itimiqo no iqa no kütami vilo igha ku ghi ishi piakeu toi ke:
17“ ‘Ningu no nongu ghenguno fulili küyighatsü,
ikemu nongu no ilhemoe,
Ningu no akumo qho keu le phetsüe,
ikemu nongu no mloqamoe.’
18Kughengu John Baptiz kishiu ighi kelo pa ye asho chumoe momu atsaizü shomoe, ikemu nongu no, ‘pa ye tüghaküsa ani,’ ipi. 19Timi Nu no ighino chu eno sho kelo ye panongu no, ‘Timi hipau ye minhemüzai eno shokümzümi, zame küqhami ngò axinemiqo küsàmi,’ ipi ke. Ikemu alokütsü ye akümlà lono kimichive tsü cheni.”
Amlo Xaidemo kemi Mishiphuqo Ghenguno Ahaküsapu
20Ikelo Jisü no mishiphu khipaqo lo pa no akümzapu kümlà akichiù shi keno tipaqo pipüsa thuve, kughengu panongu no amlo pebidemo ke. 21“Chorazin! O ghenguno ahaküsapue, Bethsaida! O ghenguno ahaküsapue, kughengu tsalá akümzapu kümlà nongu gholo shikeu Tyre eno Sidon lo mülà ke aye, panongu ye yeqhiyephi pepu püzü ayevǜ kuchhu no khaghi no amlo pebideve aghíni cheke. 22Ikemu I no nongu vilo pìní, küghakütha tsalà lo Tyre ngò Sidon nguno alau mishiphu tipau no aghime shi nani. 23Eno O Capernaum! No ye O pesü atsütsǘ kutólo süqhe iku niye keshea? Moe, no ye Hades#11:23 Hades hipau pesü kithimi kungo-a ipi cheni lo iqive nanie. Kughengu tsalá akümzapu kümlà O lau shikeqo, Sodom lo mülà ke aye, Sodom ye ishi kutólo aghíni cheke. 24Ikemu I no nongu vilo pìní, küghakütha tsalà ghuloki lo Sodom nguno alau mishiphu tipau ghimeqhi nani.”
Anu lono Apù Pephe-piye
25Tipau tüqhüdo lo Jisü no pi, “Atsütsǘ eno ayeghi Mpeu, Apùo, I no O sheqhe ani, kughengu nono alokütsümi eno ithisheve kemiqo lau no thime hipaqo küsüpe qhive, eno anuli itimiqo lau tipaqo pephe-piye ke. 26Iyei, Apùo, hitoi shikeu ye O pulou kiqi lono shikeu ke.
27“I pù no thowkha kümtsü pesü I pichevetsüae. Apù nguno alau ye khumu Anu mthae, eno Anu nguno alau ye khunomu Apù mthae eno khunoqo lau Anu no Apù pephe-piye nike no tipaqo likhi no ithi cheni.
28“Nongu amakho kimishí xapu lhove kemiqo kümtsü I lau ighilo, I no nongu kulhoqhi tsü nike. 29Iw kuokhasü ikhilu no pepulo eno I lau no shikalulo, kughengu ni ye amlo kümtshami eno aqhokighemi ke, eno nongu ngulho ghenguno akulhokiqhi phulu nani. 30Kughengu iw kuokhasü ye mülalei eno I makho ye müthüthei ke.”
Currently Selected:
Matt. 11: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
