Matt. 16
16
Amichipu Khu keu
1Phariseemi ngò Sadduceemiqo no Jisü lau ighino pa peju ghi pa vilo kungugha lono ighi keu amichipu pìyelo ipi khu.
2Pa no khochile, “Kughou avelau shiveni keno, nongu no ishi pi cheni, azümlhü ye aloni cheni, kughengu atsütsǘ ye huchuhuyi ani 3eno inaqhe ye, ‘Ishí ye pasapagha tsalà shini cheni, kughengu atsütsǘ ye huchuhuyi eno züchiyi ani,’ ishi pi cheni. Nongu ye atsütsǘ lo ipeghi akeu ghili kíshi pìní keno ithi anie, ikemu nongu ye ado ghuloki michipu ghiliqo ye pilu chemoe. 4Küsakügha eno amikucho kumo tiqhelimi no amichipu lakhi phu cheni, ikemu Alhou no tungkupu Jonah lau amichipu tsü keu nguno alau kütau ye tsümo nani.” Tisheno Jisü ye panoqo qhive no wuve.
Phariseemi ngò Sadduceemiqo’w Kholaqhi
5Kughou panongu no ayizükucho vechesü wuve keno, akhopemiqo ye asho pe nikeu kümsümave. 6Ikelo Jisü no panoqo vilo pi, “Kutokupui lo, Phariseemi ngò Sadduceemiqo’w kühakügha lichhe lono nongu likhi nongu jukuto alo.”
7Panongu dolo hipau vehu küptsa kilé apüzü ishi pi, “Hiye ningu no asho lakhimu peighimove keu ghenguno ke.”
8Panongu no küptsa akeu ithive no Jisü no iniju, “Nongu aküpülü kitila likhi akeqo, nongu ye kushiye nongu dolo asho küha keu ghenguno küptsa ani kea? 9Nongu ye itehi kutólo vethalu mphi keshea? Nongu ye timi 5,000 ghenguno ashopa pungu, eno ashoghi kichhi khijehi kichekütsülu keno kümsümavea keshea? 10Momu timi 4,000 ghenguno ashopa tsünì, eno ashoghi kichhi khijehi kichekütsülu keno kümsümavea keshea? 11Kíshi püzü ni ye nongu vilo asho ghili piamoke ipi nongu ye vethamla aphi kea? Ikemu Phariseemi eno Sadduceemiqo’w kholaqhi lau no O likhi O jukuto alo.” 12Tithiu no, pa ye panongu vilo asho lo kholaqhi peitha chekeu ghili kumo no, Phariseemi ngò Sadduceemiqo kükütsü lachile akeu ghili piani kena ipi vethalu.
Peter no Jisü ye Messiah Kepi Shuphetsü
13Kughou Jisü no Caesarea Philippi ko-aqha lo ighi keno, pa no pa khopemiqo vilo iniju, “Timiqo ye ni Timi Nu pesü khuu ipi cheni kea?”
14Panongu no khochile, “Khami no pikeu ye no ye John Baptiz kishiu, kütami no pikeu no Elijah ipi cheni; eno itaghi khami no pikeu no Jeremiah momu tungkupumiqo dolo lakhi ke ipi chenie.”
15“Imaye nongu ye kíshi kea? Nongu ye, ni pesü khuu ipi cheni kea?” ipi pa no iniju.
16Simon Peter no khochile, “No ye xü akeu Lhou Nu Messiah ke.”
17Jisü no khochile, “Jonah nu Simon, no ye akümghaue, kughengu hiye timi küdau no O lau pephe ke kumoe, ikemu I pù kungugha lo akeu no ke. 18Eno I no O vilo pìní, no ye Peter#16:18 Greek tsa lo Peter kiqi ye atuqu ipi ani ke, eno atuqu hipau shou I no I kukuhoki mülà puku nani, eno Hades khagho ye hipau theqhi lumo nani. 19I no kungugha kükaphu khaqhiyiqo pesü O tsü nani; nono ayeghi lo kiu-kiumu khave aye kungugha lo ghí khave nani, eno nono ayeghi lo kiu-kiumu kuqhove aye kungugha lo ghí kuqhove nani.” 20Tisheno pa no akhopemiqo vilo pa ye Messiah kepi khuu vilomu pi kevilo pi azah tsüve.
Jisü no Pa Kithí Ghili Pichho
21Tile no huthu no Jisü no akhopemiqo vilo pa ye Jerusalem lo wu moayesa nani eno kichimiqo, achinetomi eno ayeza kükütsümiqo u lono aghime shi nani, eno pa pìthíve nani ikemu atsala aküthüu lo ye xüputhuve nani ipi chixechilei pitsü.
22Peter no Jisü ku sasü ayixeu wu püzü pa lomipi ghi ishi pi, “Ampeu, tishimoe, khilemu O lau tishi pemo nani.”
23Jisü no tsüghǜ ighino Peter vilo pi, “I lau no chevelo, Satan! No ye I ghenguno aküpüxapu shi anie; O kükümsü lo Alhou lau no ighi keu kükümsüqo kumo püzü timi lau no ighi keu kükümsüqo likhi anie.”
24Tisheno Jisü no pa khopemiqo vilo pi, “I khopemi shinishi kemi ye pa likhi pa milive moayesa eno paw kros xapu no I pape moayesae. 25Kughengu khuno no pano likhi pano küxü süsho nishi cheni keno pühave nani, ikemu khuno no aküxü ikhiphe pe I ghenguno tsüveni keno xaluve nani. 26Timi lakhi no ayeghiqha kuchopu paw shive aghí namu, pa ngulho xamlave aye kiu alá ani kea? Momu timi lakhi ye pa ngulho theli lo kiu tsüchile kulupu kea? 27Kughengu Timi Nu ye papù juküvü lono paw kungumiqo sasü ighi nani, eno tisheno pa no timi lüthü lakhi no kiu mülà püaghini keno tipau kiqi lono qesaxu tsü nani.
28“Kuchou no I no nongu vilo pìní, I gholo akemi dolo khami ye Timi Nu kükaphu ithulu mphi züu ye akithí michemo nani.”
Currently Selected:
Matt. 16: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
