Matt. 17
17
Aju Pekilive keu
1Atsala tsügho thiu Jisü no pa gholo Peter, James eno James thiküzüu John ishi sasü naghuto qhemghai keu lakhi lo iku. 2Tilehi panongu zülo no pa ye aju pekilive. Pa gi no khetsünhe küvü toi ithulu eno paw tiphimini no aküvü hutoi miyetsüghoive. 3Paikhavi lono tilehi panongu zülo Moses ngò Elijah no ipeghino Jisü sasü küptsa akeu ithulu.
4Peter no Jisü vilo pi, “Ampeu, ningu ye hile ngo akeu pavi anie. Nono pulo aye, I no apushonha küthü mülà puku veni; lakhi no O ghenguno, lakhi no Moses eno lakhi no Elijah ghenguno shitsünie.”
5Peter no piaphi lono, khüngküsü vüqai keu no panongu küzüpholuve, eno khüngküsü lono asütsa lakhi no ishi pi, “Hiye I Nu, I no kimiye chekeu ke; pa lau I lokiqi acheni. Pa no pikeu inilo!”
6Kughou akhopemiqo no ti chilu keno, panongu ye shishe msàve, eno agi pishiqho pe ayeghi lo ikiqive. 7Ikemu Jisü no ighino panongu bu püzü ishi pi, “Ithuvelo eno msà kevilo.” 8Kughou panongu no jupuku keno, Jisü likhi thono kütami ye ithumlave.
9Panongu no naghuto lono iqi che kelo, Jisü no panongu vilo ishi azah tsü, “Timi Nu no akithí lono xülethuve mphi kutólo, nongu no kiu ithulu keno khuu vilomu pi kevilo.”
10Akhopemiqo no pa vilo iniju, “Tishiaye kushiye ayeza kükütsümiqo ye Elijah paghi ighi moayesa kepi pi cheni kea?”
11Jisü no khochile, “Mütsümishei veni keu ghenguno, Elijah paghi ighino thowkha kümtsü kutò pe qhi nani ke. 12Ikemu I no nongu vilo pìní, Elijah ye ighivea kemu panongu ye pa jukimchi mülave, ikemu panongu no pa shou shinishi chekeu kümtsü shiluvae. Tihutoi Timi Nu ghí panongu u lono imeni chenie.” 13Tithiu no pa khopemiqo ye, Jisü ye John Baptiz kishiu ghili pesü panongu vilo piani kepi vethalue.
Tüghaküsa no Tsüghape Akeu Itimi Jisü no Shipivi
14Kughou panongu no aqokitikhi lau ighi keno, timi lakhi Jisü lau ighino pa zülo qhoqhünheluve. 15Pa no ishi pi, “Ampeu, I nu kimiye tsülo, pa ye kilighakipemi eno ighono ime acheni. Pa ye ghuthu kutomo ami lo eno azü lo ilulove achenie. 16I no pa sasü O khopemiqo lau wuke, ikemu panongu ye pa shipivilumoe.”
17Jisü no khochile, “Nongu pülükümla eno hekibide tiqhelimiqo, ni ye khitohi nongu sasü anani kea? Eno ni ye khitohi nongu gholo ache nani kea? O nu sasü hilehi I lau ighilo.” 18Jisü no tüghaküsa lomipi, ikelo tüghaküsa no anu phi lono ipeghive, eno anu hu ye tipau tüqhüdo lono viluve.
19Tithiu pa khopemiqo no Jisü lau lomo shi ighino iniju, “Kushiye ningu ye tüghaküsa haphe mülave kea?”
20Pa no ishi khochile, “Kughengu nongu ye aküpülü ighono mikhe anike. Kuchou no I no nongu vilo pìní, nongu no aghane thi pahi likhimu aküpülü aghí aye, nongu no naghuto hipau vilo, ‘Hile no hulau ithawuve lo,’ ipi kelo tipau no ithawuve nani. O ghenguno kiumu shikümlapu küha nani. 21Ikemu hitoi keu ye akighini eno kümvü keu likhi no haphelu nanie.”#17:21 Kaku khami lo ye ajò hipau ye küha eno khami lo ye Mk 9:29 lo yèpüa keu toi ani.
Jisü no Akiniù Pa Kithí Vehu Pichho
22Kughou panongu aqoshi Galilee lo ighi keno, Jisü no panongu vilo pi, “Timi Nu ye ikhiphe pesü timiqo u lo sǘve tsüní cheni. 23Panongu no pa pìthíve nani, eno atsala aküthüni lo pa ye xülethuve nani.” Ikelo akhopemiqo ye amloghime no chhitoive.
Achineki Zame
24Kughou Jisü ngò pa khopemiqo no Capernaum lo ighi keno, achineki zame ghükayi kini qha chekemiqo no Peter lau ighi eno pa vilo iniju, “Nongu kükütsüu ye achineki süqha tsüchemo keshea?”
25“Iyei, pa ye tsü chenie,” ipi Peter no khochile.
Kughou Peter no aki lo iloghi keno, Jisü paghi no pa vilo ishi iniju. “Simon, no ye kíshi kümsü ani kea? Ayeghiqha lo kükamiqo ye khunoqo lau no zame lu cheni kea; pano likhi pano tianuliqo lau no keo kütami tianuliqo lau no kea?”
26“Kütamiqo lau noe,” ipi Peter no khochile.
Ikelo Jisü no pa vilo pi. “Tishiaye anuliqo ye tsü pemo kepue.” 27“Ikemu panongu shikulosümo nike ghenguno, ayizükucho lo wulo eno akha kümsüpú yì lakhi vesülo. Akha atüghiu küghalu keu tipau kichí sükhoju aye tile ghükayi bidí aghí nani ke. Tipau ikhilulo eno I ghenguno ngò nongu ghenguno zame panoqo tsüvelo.”
Currently Selected:
Matt. 17: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
