Matt. 18
18
Kungugha Kükaphu lo Kümtsü Nguno Akijeu
1Tipau dolo akhopemiqo no Jisü lau ighino iniju, “Kungugha kükaphu lo khuu no akijeu shi nani kea?”
2Jisü no itimi lakhi pa lau ku saighi pe eno panongu mtá dolo qhie. 3Eno pa no pi: “Kuchou no I no nongu vilo piani, nongu no kilive püzü itimi lakhi toivemo ke thaqhülo, nongu ye khilemu kungugha kükaphu lo ilo müla nani. 4Tighenguno, khukhumu itimi lakhi hipau toi aqhokigheu shiluve keu no kungugha kükaphu lo kümtsü nguno akijeu ke. 5Eno khukhumu I je lono itimi hitoi keu sasüni keno ni sasü anike.
Axiné Shive Peniye Peju keu
6“Timi khukhumu itimi kitilaqo toi I pülü chekemiqo pelo veqhive pe aye, timi tipaqo ghengu ye athì kütsüghǜ tuqu kijè keu pesü pano kuwo homüxa tshüve no azüghi kuthò lo vesüve keu no akiviu shive nanie. 7Ayeghiqha ghengu ahaküsapue! Kughengu ayeghiqha’w thimeqo no timiqo pelo axiné lo ilove pe cheni ke. Hitoi keu ye ighi anani ke, ikemu timi khuu vechewo tipaqo ighini keno ahaküsapue. 8Tsalá O u momu O pukhu no O müsü sasü axiné shive pe aye, tipau ghithave no pevelo. O ghengu ye au kini momu apukhu kini xapusü alhomi lo vesüve akepu ye, aphi-au khoshe shive momu apukhu kighichemi shive no lhokta küxüpu lo ilove keu pavie. 9Eno tsalá O nhethi no O müsü sasü axiné shive pe aye, ti lejove no pevelo. O ghengu ye anhethi kini xapusü amiyizü lo vesüve kepu ye anhethi lakhi pusü lhokta küxüpu lo ilo keu pavi ke.
Ambe Pühave keu Pesü Kimghi pìye
10“Nongu ye mthamini hipaqo kititi gholo lakhimu jukünatha kepu kumoe, kughengu I no nongu vilo pi anike, kungugha lo panonguw kungumiqo ye pülhapuju I pù gi ithulu achenie. 11Kughengu Timi Nu ye pühave kemi phu niye eno xalu nike ighie.”#18:11 Kaku hami lo ye ajò hipau küha eno Lk 19:10 lo akeu athoshi peitha cheni
12Nongu ye kíshi kümsü ani kea? Tsalá timi lakhi no ambe aqhe akelo, tipaqo dolo lakhi no itsü wuve aye, pa ye lhotoku tokú atoghiqo lo tishi qhive no lakhi itsü wuve keu hu phumoni keshea? 13Kuchou no I no nongu vilo pìní, tsalá pa no ti phuluve aye, pa ye ambe lhotoku tokú itsü wumo no akeqo nguno alau hi lakhi shou alokivi shishe ananie. 14Tihutoi nongu Papù kungugha lo akeu ye hipaqo kititi gholo lakhimu pühave penishimoe.
Akukuhou lo Axiné Shive Keu Vehu
15“Tsalá O thiküzüu momu O chepu no O shou axiné shive aye, wu no panongu kipimí kichephe tsülo, eno tiye nokujo dolo likhi no ithikile lo. Tsalá panongu no O tsa ini tsü aye, no ye panongu züluvae. 16Ikemu panongu no O tsa initsümove aye, O gholo timi lakhi momu kini sawu lo, ‘tishianguno mikini momu küthü no thopi shi no ashepe shikeu vechewo kiu kügha kepu akeno kümtsü xathaluve kepue.’#18:16 Zaki 19:15 17Tsalá tishive kethiu ghí panongu no O tsa ini tsümo aye, tipau pesü akukuhou vilo pilo; eno panongu no akukuhou tsa ghí initsümove aye, zame küqhami momu Jewkumomi lakhi toi panongu peitha lo.
18“Kuchou no I no nongu vilo pìní, nongu no ayeghi lo kiu-kiumu khave aye kungugha lo ghí khave nani eno nongu no ayeghi lo kiu-kiumu kuqhove aye kungugha lo ghí kuqhove nani.
19“Itaghi I no kuchou no O vilo pìní, tsalá ayeghi lo panongu no avehupu shi akeu ghenguno kiu-kiumu khu kelo, nongu gholo mikini nomu puloküqhalu aye, I pù kungugha lo akeu no panongu ghenguno shive tsü nani. 20Kughengu khilehi mikini momu küthü I je lono kumqo nike no, ni ye tilehi panongu gholo anie.”
Akipimí Qhitsü müla keu Qeu Pesü Kimghi pìye
21Tile Peter no Jisü lau ighino iniju, “Ampeu, I thiküzüu momu I chepu no I shou axiné shive kelo niye ghuthu khijehi akipimí qhivetsü kepu kea? Ghuthu tsünì kutólo keshea?”
22Jisü no khochile, “I no O vilo pìní, ghuthu tsünì kumoe, ikemu lhotsüni no ghuthu tsünì kutólo ke.
23“Tighenguno, kungugha kükaphu ye kükami lakhi no pa qemiqo sasü kihikülayive no xathave niye shikeu hutoi ke. 24Pa no xakütha shive niye huthuve kelo, timi lakhi ameshoyi jolabo 10,000#18:24 Ameshoyi jolabo 10,000 ye atsala lakhi jume ampe 20 qelu keu me qhemi ke pa piashe pù akeu tipau pa lau saighi. 25Timi tipau no pa piagha lò müla no akehu, ampeu no pa vilo api love kepu shi, pa ngò pa nipu anuli eno pa no pighi akeu kümtsü jeve lo ipi azah tsüve.
26“Ikelo aqeu hu no ampeu zülo ikiqi qhoqhünhe püzü pa qhüiniju, ‘Kimiye no I lau kutuu tsü aghílo, I no kümtsü lochileve nani ke.’ 27Aqeu mpeu hu no pa kimiyeqhiyive püzü api-ashe xachileve tsü no pa puwuve.
28“Ikemu kughou aqemi hu no khalau ipeve keno, pa küsàmi aqemi lakhi pa piashe ghükayi 100#18:28 Hiye atsala 100 qe keu jume qhemi ke pa tsü kepu shi akeu sasü kusholu. Ikelo pa no tipau kuo lono tsüqüluve no küpüha thuve kemtsa hitoi khu, ‘Nono I tsü kepu shi akeu I tsüvelo!’
29“Pa küsàu aqeu hu no pa zülo ikiqi qhoqhünhe no pa qhüiniju ghi ishi pi, ‘Kimiye no I lau kutuu tsü aghílo, I no ti kümtsü lochileve nani ke.’
30“Ikemu pa no milive. Tishini ke züqhulo wu püzü pa küsàu aqeu hu no api-ashe lovemo ke kutólo akughuki lo khathave. 31Kughou aqemi kütamiqo no kiu shive keno ti ithulu kelo, panongu ye axuideve eno wu püzü ampeu vilo kiu shive keno kümtsü pesü pive.
32“Tile no ampeu no aqeu hu kusü no ishi pi, ‘No ye küsakügha qeu ke, nono I vilo qhüiniju ke ghenguno I no O piashe kümtsü qhivetsü ake. 33I no O kimiyeqhiyive keu toi, no ghí O küsàmi aqeu lau kimiyeqhiyi keu pìye mülave keshea?’ 34Pa mpeu no amlokighide lau no, pa tsü kepu shi akeu kümtsü lochileve moke kutólo ghimeqhi ape niye, pa pesü akughuki jukükütsümiqo u lo sǘvetsü.
35“Nongu no nongu mlo lono nongu thiküzümi momu achelimi kipimí qhive tsümo aye, I pù kungugha lo akeu ghí hitoi nongu lakhi-khi peitha nani.”
Currently Selected:
Matt. 18: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
