MATHIUS, NOPUKU AFASAO SORE, 25.
NOPUKU AFASAO SORE, 25.
1TAHA nopoge ta vaka o taragi hepe tumtagahuru atamafine, acre niamo tshare alampe ma niroro watafa keifapa tatane nifakavageina ta fine.
2Erima o acre keiro arapakau ma erima puspusi arapakau.
3Acre puspusi arapakau niamo tshare alampe, ma nigaro vainiu iateia,
4Kaia acre nikeiro arapakau niamo vainiu i aganea tsha alampe tshare.
5Ia tupo acre tari tatane nifakavageina, acreiotshi kofimero ma nimero.
6Ia tara tupo tasi nitapa, Kowcitia, tatane fakavageina nokomai; roro watafa acowa keifapa aia.
7Iai acreiotshi atamafine sisi nimasike, neipenpena niare alampe.
8Acre puspusi arapakou neitucage iacre arapakou, Tufwa acime faru tshau avainiu; ma tshome alampe komate.
9Kaia acre arapakau nifasao, nokoutucua, Jimra, pe jimra nalupai iacime ma iacowa; kaia erefia roro acowa iacre fakamata, keifakamata faru foci tshowa.
10Iai acre niroro keifakamata avainiu, tatane nifakavageina nimai; ma acre neipenpena erefia iateia niroro ia aia ia tokotokoga o ta fine; ma tafeitoca nipofna iai.
11Wamuri niromai atamafine sisi foci, nokoutucua, Teriki Teriki, tshiki iacime tafeitoca.
12Kaia aia nifasao neitucage, Tamari avau koutucua iacowa avau puspusi acowa.
13Fatshigeia acowa ma acowa puspusi taha nopoge ma taha our ta Nontariki o tagata nokomai.
14¶ Ma ta vaka o taragi hepe tatane nokofano ia fanua papai su, aia neitapa niana afitshicau, ma neinage iacre tshana toutokogane.
15Ia tasi aia neitufwa erima atalent (mune), ia tasi foci erua, ia tasi foci tasi; ia tasi ma tasi foci iotshi hepe tshana arapakau ma tomatua iateia; ma nifano tshana retu.
16Nopogera aia erima atalent neitufwa iateia nifano nifakamata aneamane ia acre, neimna acre atalent erima foci.
17Hepra foci aia neitufwa erua iateia, aia ma neimna atalent erua foci.
18Kaia aia tasi neitufwa iateia, nifano nikeria takere nifuna mune tsha tshana teriki iai.
19Wamuri toufi nalupai ta teriki o afitshicowra nimai, neiioria amagane tshare ia amune,
20Hepe aia erima atalent neitufwa iateia nimai niamomai erima foci atalent, nokoutucua, Teriki akoi neitufwa avau erima atalent; kowcitia, avau fakamata aneamane neimna erima foci atalent.
21Tshana teriki neitucage iateia, Erefia, akoi fitshicau erefia ma maganerefia; tshou magane totonu ia ane toru ana, avau kamna akoi teriki o ane nalupai; komai akoi ia kabisa o tshou teriki.
22Aia erua atalent neitufwa iateia nimai, neitucua, Teriki akoi neitufwa avau erua atalent; kowcitia, avau fakamata anea mane neimna acrawa erua foci atalent.
23Tshana teriki neitucage iateia, Erefia, akoi fetshicau erefia ma maganerefia; tshou magane totonu ia ane toru ana, Avau kamna akoi teriki o ane nalupai; komai akoi ia kabisa o tshou teriki.
24Wamuri tira aia tasi talent neitufwa iateia nimai, neitucua, Teriki, avau keiro akoi tatane aroto mukei, nokosawace nohua akoi seipesia, ma nokofakatapuria anea mane akoi sefakareresia.
25Ma avau nimtacu, ma nifano nifuna tshou talent ia takere; kowcitia, iai akoi amo tshau ane.
26Tshana teriki nifasao neitucage iateia, Akoi isa ma taru fitshicou, akoi nikeiro avau sawace wehe avau seipesia, ma fakatapuria anea mane avau sefakareresia;
27Pe akoi maganerefia iateia, erefia Akoi neitufwa tshaku mune iacre fakamata ioria aia, ma avau nakamai avau nakamo tshaku mune ma nomata iateia.
28Ia ane nei, amke ta talent o aia, ma keitufwa ia aia nakamo tumuaghuru atalent.
29Kaia iacre iotshi nakamo faru katufwa faru foci iacre, ma tshana nalupai; kaia ma aia tshana jimra kamkece ane sisi konofo iateia.
30Towaki acowa ta fitshicou isa ia apouri watafa; iai acre katagi ma kamagiugio aniforea.
31¶ Taha nopoge ta Nontariki o tagata kamai ia kabisa tshana, ma iotshi agelo erefisa iateia, aia kanofo ia tafata o kabisa tshana.
32Emoa aia kafetacina tagata o iafanua iotshi wararoni; ma aia kavaia acre tasi ia tasi foci hepe tatane fatshigeia sip, kavaia asip ia anane.
33Aia kanagi asip ia tshana norima matau, kaia anane ia norima masui.
34Iai ta teriki katucua iacre ia tshana norima matau, Koromai acowa tagata erefia o tshaku Tata, konofo ia tavaka neipenpena iacowa ia ta tave o ta neikamata o afanua wararoni;
35Ma avau nitshitogi, ma acowa neitufwa avau akai; Avau nimate tavai, ma acowa neitufwa avau keinumea; Avau tatane o fanua sece, ma acowa niarafia avau iatacowa;
36Tshaku miga nijimra, ma acowa nitakaia avau; Avau nimace, ma acowa niromai fatshigeia avau, avau neinofo ia tafare mukei ma acowa niromai iatavau.
37Iai tagata erefia kafasao iateia, nokoutucua, Teriki enaia acime neicitia akoi nitshitogi, ma nifotshia akoi? mo nimate tavai, ma neitufwa akoi tavai?
38Enaia acime neicitia akoi tatane o fanua papai, ma niarafia akoi efare tshome? mo umiga tshou nijimra, ma nitakaia akoi?
39Mo enaia acime neicitia akoi nimace, mo ia tafere mukei, ma niromai iatakoi?
40Ma ta Teriki kafasao ma koutucua iacre, Tamari avau koutucua iacowa, Ia ane nei acowa neimna maganera ia tasi ta sisi o acre akuso, acowa neimna maganera iatavau.
41Taha nopoge iai ma aia kafasao iacre foci ia norima masui, Feke avau, Roro acowa tagata isa ana ia tiafi nimouri tou ma tou, neimna ma Tiapolo ma tshana agelo isa;
42Ma avau nitshitogi, ma acowa setufwa avau akai; Avau nimate tavai, ma acowa setufwa avau ane tasi keinumea;
43Avau tasi o fanua papai, ma acowa searafia avau efare tshowa; tshaku miga nijimra, ma acowa setakaia avau; nimace, ma ia tafare mukei, ma acowa seromai iatavau.
44Iai acre foci nifasao iateia, nokoutucua, Teriki, enaia acime neicitia akoi nitshitogi, mo nimate tavai, mo tasi o fanua papai, mo umiga nijimra, mo nimace, mo ia tafare mukei, ma jimra fitshicou mau?
45Iai aia kafasao iacre, nokoutucua, Tamari avau koutucua iacowa, Ia ane nei acowa seneimna maganera ia tasi sece o acre iai acowa seneimna maganera iatavau.
46Ma acre tagata isa karoro ia ioria o maganisa tau ma tau; kaia acre tagata erefia ia aneamouri tau ma tau.
Currently Selected:
MATHIUS, NOPUKU AFASAO SORE, 25.: ANT
Highlight
Share
Copy
Want to have your highlights saved across all your devices? Sign up or sign in