Matius 18

Si mangko-wangko' ang Kakolanoan in Sorga

(Mrk. 9:33-37; Luk. 9:46-48)

1 # Luk. 22:24 An tutuw itu, sé murit-murit i Yesus mai ai Sia wo mamuéi, “Si séi e mangko-wangko' ang Kakolanoan in Sorga?”

2Wo towan i Yesus si esa toyaang teké'. Iru'du'-Na si toyaang itu tumulung an uner éra. 3#Mrk. 10:15; Luk. 18:17 Wo icua-Na ai séra, “En ulitna icua-Ku mangé ai camu, sa kamu masalé' muntep ang Kakolanoan in Sorga, kamu musti mape'dis wo robano mangé em peri miow meputé im peri i toyaang teké' anio'. 4Wo si séi e menonou ko'kos en até wo mamuali tanu si toyaang teké' anio', siao e mangko-wangko' ang Kakolanoan in Sorga. 5Wo si séi en sumungkul si esa toyaang teké' tanu si anio' ampa'paan sia makiit Yaku, sia puté isumungkulo Yaku.”

Si séi e mengaéma' si tou meséa'

(Mrk. 9:42-48; Luk. 17:1-2)

6“Sa awéan tou iméma' esaan asé toyaang teké' tanu si anio' sé maémano a Yaku akar sé toyaang itu méma' ing kamesé-meséaan, aweso taré eng kolot i tou itu wa'kesan im batu wangker wo itinep an ta'sic. 7Icawangkuro eng kayo'baan ampa'paan kelian sé maéma' sé tou mengaéma' ing kamesé-meséaan. Mémang andumoro' in itu tantu awéan, taan icawangkuro si tou imakawali sé tou walina meséa'!

8 # Mat. 5:30 Sa eng kamamu esa kuma'pa eng kécéimu esa iméma' ico meséa', pokolen wo itiya'o eng kama kuma'pa eng kécéi itu! Aweso taré ko mandé waya oka in esa kama kuma'pa esa kécéi taan tumerima ing katouan akar ing kauré-uré, wotaré ico rua kama wo rua kécéi taan yuntep an api si ra'ica mape'de-pe'del akar ing kauré-uré. 9#Mat. 5:29 Sa si esa werenmu iméma' ico meséa', tu'iceno wo itiya'o si weren itu! Aweso taré ko mandé waya oka in esa weren taan tumerima ing katouan akar ing kauré-uré, wotaré rua weren taan iwangkilke' an api ra'ica mape'de-pe'del akar ing kauré-uré.”

10“Ta'néien iow sumama-sama'! Tioo paepesen iow im beren sé toyaang teké' anio', ampa'paan itu icua-Ku mangé ai camu, séra itu awéan malaékat makatéir sé tatap mengapaar a si Amang-Ku an sorga. [11#Luk. 19:10 Ampa'paan si Toyaang i Tou imai ang kayo'baan anio' en lumowir sé tou icasélé'kow.” ]

En andéan andumoro' i domba icatala

(Luk. 15:3-7)

12“Weroten iow sumama-sama' en andéan anio'. Sa awéan esa tou makadomba sangaatus wo katalaan esa, sapa en émaan oka i tou itu? Tantu itela'una sé siow ngapulu' siow domba itu an tolaina wo mangé mangéré si esa domba si aicatala itu. 13Wo sa si domba itu kinéréannao, en ulitna icua-Ku mangé ai camu, eng kaaruianna asi esa domba itu lumébémai wo ing kaaruianna a sé siow ngapulu' siow dombana sé ra'ica icatala itu. 14Taniitu ka'i wo si Amang iow an sorga, ra'ica icasalé'-Na sa esaan asé toya-toyaang teké' anio' icatala ai Sia.”

En andumoro' in sina'u a si poow esa paémanen

15 # Luk. 17:3 “Sa si poow iow esa paémanen méma' ing kamesé-meséaan ai camu, lébé loor mangéo icua miow eng kamesé-meséaan si niéma' i poow iow itu. Wo sa pangakun i poow iow eng kamesé-meséaanna, tantu icamu wo isia mensamaano, en iitu tanu kinéréano miow sumawel sia. 16#Ul. 19:15 Taan sa ra'ica kiimna tumerima in sina'u miow, iwalio mangé esa kuma'pa rua tou mamuali sairi. Ampa'paan ang Kitap Le'nas aipatic, ‘En tumantu si esa tou meséa', musti awéan rua kuma'pa telu tou e mamuali sairi.’ 17Taan sa sia ra'ica kiim luminga in sina'u éra, mangéo icua a sé jamaat em perkarana itu. Wo sa ra'ica linganna ka'i en sina'u é jamaat, anggapeno mio' sia tou ra'ica makatuus si Amang Kasuruan, kuma'pa sé matagi im pajak mengauwak sé tou. 18#Mat. 16:19; Yoh. 20:23 En ulitna icua-Ku mangé ai camu, sapake' em pinéromu émaan é tou ang kayo'baan, péronen ka'i i Amang Kasuruan si maento' an sorga. Taniitu ka'i sapake' e niénanmu émaan é tou ang kayo'baan, en itu ka'i énan i Amang Kasuruan si maento' an sorga. 19Icua-Ku ka'i ai camu, ang kayo'baan anio' sa an uner iow awéan rua tou meesa mangilek sapake' mangé, em pinangilek iow itu tantu énan i Amang-Ku an sorga. 20Ampa'paan am bisa awéan rua kuma'pa telu tou makali'us ampa'paan maéman a Yaku, Yaku am bitu ang karapi éra.”

En andéan andumoro' i ata si ra'ica mengaampung

21 # Luk. 17:3-4 Kumawus in itu si Petrus mai a si Yesus wo mamuéi, “Tuang, sa si poowku méma' ing kamesé-meséaan a yaku, akar i makapira aku musti méé ampung? Akar i makapitu?”

22Wo isowat i Yesus ai sia, “Ra'ica! Icua-Ku ai co, ra'ica akarke' i makapitu, taan wéanmu ampung sia akar i makapitu ngapulu' lumepet, wo lepeté' ka'i mangé makapitu lumepet! 23Musti émaanmu tanu siitu, ampa'paan andumoro' ing Kakolanoan in Sorga meputé wo in andéan anio': Awéan si esa kolano imurus in utang é atana ai sia. 24An tutuw sia tumo'tolo meriksa in utang, wo iwali éra mai an diorna si esa ata imutang ai sia sangapulu' ngariwu talenta.#18:24 Esa talenta itu puté wo in enem ngariwu dinar. Esa dinar tanu im pawér a si esa tou matawoi sangaendo. 25Taan ampa'paan si ata itu ra'io makawoo mér in utangna wo iru'du' i colano sé touna e mangkér si ata itu, ang karapi sé toyaang wo si penanaanna wo pakasa sé anuna wosama' en utangna itu ro'na kawéranna. 26Wo si ata itu makala'us kumundu an dior i colano wo mekiupus in tana'i, ‘Tuang kolano, lesenanio' toyo', pakasa en utangku wéranku oka.’ 27Wo makala'us mai eng kaupusan i colano a si ata itu. Wo icua i colano ai sia, ‘En utangmu nomoo wéran.’

28Taan kekesotai i ata itu am balé i colano, sia meta'up ka'i wo si carapina ata, si mutang ai sia sangaatus dinar. Wo tangkaanna si carapina itu wo kiselenna eng kolot, icuana, ‘Wérano mai en utangmu a yaku!’ 29Wo si carapina itu makala'us kumundu mekiupus ai sia in tana'i, ‘Lesenanio' toyo' pakasa en utangku wéranku oka.’ 30Taan aicélongnake' wo isarakanna si carapina itu am bui akar kawéranna waya en utangna.

31Keséré é kara-karapina ata sapa e imamuali, en até éra mawendu keli wo mangé éra icelak a si colano pakasa e imamuali. 32Kelinga in itu, iru'du' i colano séra en tumowa si ata itu, wo icuana ai sia, ‘Éi ata léwo'! Pakasa en utangmu ra'io pinangilekku iwaréng, ampa'paan ico imayo mekiupus a yaku. 33Ico ka'i musti méé ing kaupusan a si carapimu, meputé wo yaku iméé ing ka- upusan ai co.’ 34Wo si colano itu mae'bow keli a si ata itu. Wo isarakanna si ata itu a sé tou matéir im bui wo okoien éra sia akar iwaréngna waya en utangna itu.

35Tanu siitu ka'i en émaan i Amang-Ku an sorga ai camu sa kamu ra'ica lekep en até méé kaampungan a si poow iow.”

Currently Selected:

Matius 18: TNT

Highlight

Copy