Matius 22
22
En andéan andumoro' im pésta kawéng
(Luk. 14:15-24)
1Wo icua ka'i i Yesus ai séra maké in andéan. 2“Eng Kakolanoan in Sorga meputé wo si andéan anio': Awéan esa kolano méma' im pésta kawéng i toyaangna. 3An tutuw em pésta itu tumo'tolo, iru'du'na sé atana en tumowa sé tou sé nienotnao wosama' lumilio mai am pésta itu. Taan sé tou itu ra'ica kiim lumili mai.
4Wo iru'du'na ka'i sumawel sé atana walina, icuana, ‘Mangéo icua a sé tou sé nienotkuo itu, sapaoka em pésta kawéng tu'tulo waya. Tanumai sama'na é sapi tuama wo sé binatang kemel papiaranku siniwoo waya wo aituliro am bawo i méja. Ampa'paan in itu towano waya séra mai am pésta anio'.’ 5Taan ra'ica pinandung é tou nienot itu. Awéan sé imangéke' itumawoi an uma wo sé walina ka'i imangéke' murus im paraméjian éra i esa wo si esa. 6Sé walina ka'i tumangka'ke' sé ata itu, okoien éra wo patén éra.
7Si colano itu mae'bow keli, wo iru'du'na sé surarona mangé maté sé tou sé maté sé atana itu, wo luma'ung ing kota éra.
8Kumawus in itu, icua i colano a sé atana walina tana'i, ‘Em pésta kawéng tu'tulo taan sé tou nienot tarépé' ra'ica patus maai am péstaku. 9Ampa'paano in itu mangéo kamu am paepa-epatan in lalan, wo enoteno mai waya sé tou ipeta'up iow a mangé mbitu e mai am pésta anio'.’ 10Kumawus in itu sé ata itu mangém. Wo pakasa sé tou ipeta'up éra an lala-lalan, tou léwo' kuma'pa tou sama', enoten éra mai am pésta itu. Akar an tampa im pésta itu mawutao é sakéi.
11An tutuw si colano muntep am pésta e meta'up wo sé sakéi itu, sérénna awéan esa sakéi ra'ica mekarai ing karai pésta. 12Wo wuéien i colano a si sakéi itu, ‘É karapi, tumambisako imuntepai am bia'i ra'ica mekarai ing karai im pésta?’ Taan si tou itu makapeneske'. 13#Mat. 8:12, 25:30; Luk. 13:28 Wo icua i colano a sé atana, ‘Wa'keseno eng kécéi wo eng kama i tou itu wo iwangkilo mangé sia an tampa riréimbeng. A mangé mbitu kalingaan oka en amé' wo eng kare'ket im baang.’
14Kelian en tou sé tinowa muntep ang Kakolanoan i Amang Kasuruan, taan wayake' im pira eng kinasisiran.”
En andumoro' i mawér im pajak a si Kaisar
(Mrk. 12:13-17; Luk. 20:20-26)
15Wo sé tou Farisi mangé menuwu' tumambisa en tuma'kong si Yesus maké wuwuéien. 16Iru'du' éra sé murit éra wo piraan tou sé makiit si colano Herodes mangé a si Yesus e mamuéi ai Sia, “Guru, kailekan ami si Guru ra'ica matowo, wo masusui sé tou ang karapi i makakii-kiit andumoro' ing kasalé'an i Amang Kasuruan. Wo si Guru ra'ica maindé' a si séike' mangé ampa'paan si Guru ra'- ica masisir in tou. 17Anaé, icua mai i Guru ai cami, sa iciit si Guru, ro'na réén kami mér im pajak a si Kaisar kuma'pa ra'ica?”
18Taan kailekan i Yesus eng kaléwo'an in até éra, wo icua-Na ai séra, “Éi camu sé tou punek, kéitu réén kamu mangepé' a Yaku? 19Turu'mai a Yaku en doit papakén iow mengawér im pajak!” Wo paalian éra mai a si Yesus esa dinar.
20Wo wuéien-Na ai séra, “Gambar wo ngaran i séi asi roit anio'?”
21Isowat éra, “Gambar wo ngaran i Kaisar.”
Wo icua-Na ai séra, “Sa taniitu, iwééo a si Kaisar sapa si musti iwéé miow a si Kaisar, wo iwééo a si Amang Kasuruan sapa si musti iwéé miow a si Amang Kasuruan.”
22Kelinga in itu séra mangaya-ngaya'ka' wo itela'u éra si Yesus wo mangém.
Em buwuéien andumoro' é tou imatéo itumou sumawel
(Mrk. 12:18-27; Luk. 20:27-40)
23 #
Kis. 23:8 Asi endo' ituke', piraan tou Saduki mai a si Yesus. Paanggapen éra sa sé tou imatéo ra'io kawisa tumou sumawel. Wo wuéien éra a si Yesus: 24#Ul. 25:5 “Guru, aicua i Musa in tana'i, sa si esa tuama icumawéngo wo sia maté ra'ica imakéré toyaang, si tuama metuari wo sia itu musti kumawéng wo si wéwéné mabalu itu, wosama' si tuama imatéo itu ro'na imakéré taranak. 25Taan an uner ami, awéan pitu tuama metuari. Si luluna icumawéngo wo maté taan sia ra'ica imakéré toyaang. Wo si penanaanna si mabaluo itu kawéngen i tuarina karua. 26Taan si tuarina karua ka'i imatéke' wo ra'ica makéré toyaang. Taniituo ka'i e mamuali asi tuarina katelu akar asi tuarina kapitu. 27Sumiwakio', si wéwéné itu ka'i maté. 28Sa taniitu, asi endo i Amang Kasuruan tumou sumawel sé tou imatéo, si séi asé pitu tuama itu e mamuali penanaan i wéwéné itu? Ampa'paan séra im baya imenana'o sia.”
29Wo isowat i Yesus ai séra, “Isuméa' keli kamu, ampa'paan ra'ica pangartian iow eng Kitap Le'nas wo ka'i ra'ica kailekan iow eng kakawasaan i Amang Kasuruan. 30Ampa'paan asi endo sé tou imatéo touen sumawel, séra ra'io kumawéng wo kawéngen. Taan séra menonou oka meputé wo sé malaékat an sorga. 31Taan andumoro' é tou imatéo wo touen sumawel, ra'ipé' réén binaca miow sapa en aicua i Amang Kasuruan a si apo'ta Musa? Icua-Na in tana'i, 32#Kel. 3:6 ‘Yakuo si Amang Kasuruan si pengaapo'an i Abraham, i Ishak wo si Yakub.’
An tutuw i Amang Kasuruan icumua in itu, si Abraham, Ishak wo si Yakub imatéo, taan séra kasake' menonou mewali-wali wo Sia. Anaé, si Amang Kasuruan itu ra'ica Kasuruan é tou imatéo, taan Kasuruan é tou menonou.”
33Kelinga é tou keli en aicua i Yesus, séra mangaya-ngaya'ka' ampa'paan icasalé' éra keli en sususuien-Na itu.
En ukum si kumataré-taré
(Mrk. 12:28-34; Luk. 10:25-28)
34An tutuw é tou Farisi iluminga in aisowat i Yesus akar iméma'o sé tou Saduki ra'io icaroma' sapa-sapa, wo sé tou Farisi itu makala'us mali'us. 35Wo awéan esa ai séra si makailek wutul in Torat, mangepé' tuma'kong si Yesus maké im buwuéien. 36“Guru, sa iciit si Guru, ukum sapa eng kumataré-taré an ukum Torat?”
37 #
Ul. 6:5 Isowat i Yesus ai sia, “Mengaupus angé si Casuruan, si Amang Kasuruanmu ang karapi in lekep en atému, wo ang karapi im pakasa ing katouanmu wo ang karapi im pakasa im pakawerotmu. 38Siituo en ukum kumataré-taré wo si kataré. 39#Im. 19:18 Wo si ukum karua si puté wo siitu, ‘Mengaupus angé sé kakélému in tou meputé kamu mengaupus in owak iow in esa.’ 40Asé rua ukum anioo em patuuran im pakasa in ukum Torat wo in sususuien é nabi.”
En ubungan i Kristus wo si Daud
(Mrk. 12:35-37; Luk. 20:41-44)
41An tutuw é tou Farisi makali'usé' am bitu, si Yesus mamuéi ai séra, 42“Sapa eng kailekan iow andumoro' i Kristus? Sia taranak i séi?”
Wo isowat éra ai Sia, “Sia itu taranak i Daud.”
43Wo wuéien ka'i i Yesus ai séra, “Sa réén taniitu, tumambisa si Daud an tutuw sia kinawasa i Roh Le'nas wo patuulenna si Kristus itu Tuangna? An tutuw itu aicua i Daud in tana'i,
44 #
Mzm. 110:1 ‘Si Amang Kasuruan icumuao a si Tuangku in tana'i:
Lumukuto mai asi tampa pasiri-siriin ang kakan-Ku,
akar sé kaséké'-Mu iweta'-Ku an darem im palara ing kécéi-Mu.’
45Anaé, sa si Daud mengatuul si Kristus itu Tuangna, tambisa réén wo icuata Sia itu taranakna ka'i?”
46Pakasa é tou am bitu ra'ica wana mandé esake' e ro'na sumowat a si Yesus, wo tumo'tolai asi endo itu ra'io wana em brani e mamuéi a si Yesus.
Currently Selected:
Matius 22: TNT
Highlight
Share
Copy
Want to have your highlights saved across all your devices? Sign up or sign in
En Taar Weru a nunuwu' é Tontemboan @ LAI 2018
