Matius 25

En andéan andumoro' sé mangala'un pandéi wo sé mangala'un bodok

1 # Luk. 12:35 “Eng Kakolanoan in Sorga meputé wo in andéan anio': awéan sangapulu' mangala'un mindo in sosoloan mangé sumungkul si tuama kumawéng. 2Sé mangala'un itu, lima sé bodok wo lima sé pandéi. 3Sé lima mangala'un bodok maali-ali in sosoloan taan ra'ica tumu'tul in solo. 4Wo sé lima mangala'un pandéi maali-ali in sosoloan wo tumu'tulo ka'i in solo am botel éra. 5Taan ampa'paan si tuama kumawéng itu uré-uréanai, sé sangapulu' mangala'un itu makili'o keli akar séra kinakili'ano.

6Ang katoorao im bengi, kalingaan éra awéan tou maangko' in tana'i, ‘Si tuama kumawéng maayo! Mayo sungkulenta sia!’. 7Kelinga éra in itu, wo séra im baya tumooro wo tu'tulen éra en sosoloan wosama' loor en embungna. 8Taan icua é mangala'un bodok itu a sé mangala'un pandéi, ‘Pekiupusen ami sa woo ro'na wéténganai solo kami mandé wayake' im pira, ampa'paan en sosoloan ami mape'delo.’ 9Taan aisowatke' é mangala'un pandéi in tana'i, ‘Ra'ica, oréoka en solo ra'ica maawes pakén ami wo pakén iow. Aweso taré kamu mangé tumeles a si tou mawangkér in solo.’ 10Wo sé mangala'un bodok itu mangé en tumeles solo. Taan ang karoro'an éra imangé tumeles solo, si tuama kumawéng icateka'o mai. Wo sé mangala'un pandéi tumu'tulo wo muntep mewali-wali wo si tuama kumawéng itu am pésta kawéngan, wo em papalen kusiin.

11 # Luk. 13:25 An tutuw é mangala'un bodok maréngai, wo séra mangko', ‘Tuang! Tuang! Wukaanai em papalen.’ 12Taan aisowatke' i tuama kumawéng itu, ‘Ra'ica katuusanku kamu.’ ”

13“Ampa'paano in itu kamu matéi-téiro mangé, ampa'paan ra'- ica kailekan iow en endo wo en orasna si Toyaang i Tou maai sumawel.”

En andéan andumoro' in talenta

(Luk. 19:11-27)

14“Eng Kakolanoan in Sorga meputé wo si andéan anio': awéan si esa tou maya' manangkéi. An tutuwna ra'ipé' imangé, li'usenna sé atana wo itokéna ai séra eng kasiyaanna. 15Si esa tinokéanna lima talenta, wo si esa tinokéanna rua talenta wo si esa ka'i tinokéanna in esa talenta iciit ing kawooan éra in esa, wo sia maya' manangkéi.

16Si ata tinokéan in lima talenta makala'us mangé e mangkér, wo en untungna lima talenta. 17Taniitu ka'i si ata tinokéana rua talenta. Sia ka'i mangé mangkér, wo en untungna ka'i rua talenta. 18Taan si ata tinokéan in esa talenta, sia ka'i mangé wo en doit itu asaloke' aica'ilna an untep in tana' wo yenepna am bitu.

19Uré-uréan si tuang éra itu ra'ica imawaré-waréng. Wo kewaréngna mai wo sia merékénano wo sé atana andumoro' in doit si aitokéna ai séra. 20Wo mai si ata tinokéan lima talenta wo isarakanna a si tuangna sangapulu' talenta. Wo icuana a si tuangna, ‘Tuang, yaku tinokéan i tuang lima talenta, sérén i tuang en untungku lima talenta.’ 21Wo icua i tuangna, ‘Wutu-wutul loor e niéma'mu itu. Ico ata loor wo le'tek a yaku. Ampa'paan ko ro'na tinokéan andumoro' sé teké', tokéanku oka ka'i ko andumoro' sé tawoien wangker. Muntepo mai ko wo mayo maaru-arui ang karapiku!’

22Kumawus in itu, muntepai si ata tinokéan rua talenta, icuana, ‘Tuang, yaku tinokéan i tuang rua talenta. Sérénai, en untungku ka'i rua talenta.’

23Wo icua i tuangna, ‘Loor ulit e niéma'mu itu. Ico ata loor wo le'tek a yaku. Ampa'paan ko ro'na tinokéan andumoro' in tawoien teké', tokéanku oka ka'i ko andumoro' sé tawoien wangker. Muntepo mai ko wo mayo maaru-arui ang karapiku!’

24Wo mai ka'i si ata tinokéan in esa talenta, icuana, ‘Tuang, kailekanku si tuang tou bengis. Si tuang maupu' an uma si ra'ica winurasan i tuang in lulumbo wo mengaindo im buéna an uma si ra'ica niusewan i tuang. 25En caindé'ku oréoka en doit i tuang icatala, anaé en doit itu ayenepku an untep in tana'. Nio', indono sumawel en doit i tuang.’ 26Wo icua i tuangna, ‘Éi, ata léwo' wo ra'ica kiim tumawoi. Kailekanmuo sa aku mengaupu' an uma si ra'ica winurasanku in lulumbo wo mengaindo im buéna an uma si ra'ica niusewanku. 27Sa taniitu, aweso taré woo en doitku itu ayéma'mu am bank wosama' kewaréngku mai ro'na indonku en doit itu ang karapio i rénténa.’

28Wo icua i tuang itu a sé ata walina, ‘Indono en doit itu ai sia wo iwééo mio' a si ata si makaanu in sangapulu' talenta. 29#Mat. 13:12; Mrk. 4:25; Luk. 8:18 Anaé, sé tou ro'na patokéan in sapake' mangé, séra wéan oka lébé keli mai. Taan sé tou ra'ica toro patokéan in sapake' mangé, sapake' sé ai séra pakaindo-indon oka. 30#Mat. 8:12, 22:13; Luk. 13:28 Wo si ata ra'ica iméma' in sapa-sapa, iwangkilo mangé sia an tampa riréimbeng. A mangé mbitu oka sia maamé' wo mengare-ngare'ket im baang.’ ”

Sé tou akimen asi endo kaka'puan ing kayo'baan

31 # Mat. 16:27, 19:28 “Sa si Toyaang i Tou maai ang karapi i rarayo wo in sisiri'-Na mewali-wali wo sé malaékat-Na, Sia lumukut oka am palukutan pasiri-siriin. 32Wo pakasa im bangsa li'usen oka an dior-Na, wo petanén-Na séra mamuali rua ngaumung, meputé wo si gembala itumané sé domba an uner é mémbé'. 33Sé domba iweta'-Na oka ang kakan-Na wo sé mémbé' ang ka'biri-Na. 34Wo si Toyaang i Tou si tanu Kolano itu kumua oka a sé tou ang kakan-Na, ‘Mayo sumusuto mai kamu sé kinamango i Amang-Ku! Muntepo mai ang Kakolanoan si aitu'tulo ai camu tumo'tolai eng kayo'baan anio' niéma'. 35Ampa'paan an tutuw-Ku i maarem, winéan iow kanen Aku, an tutuw-Ku maré'om, winéan iow elepen Aku. An tutuw-Ku tanu sakéi an doong iow, tinowa miow Aku tumuli am balé miow. 36An tutuw-Ku ra'ica mekarai, winéan iow karai Aku, an tutuw-Ku sumakit, pakatéiran iow Aku. An tutuw-Ku an untep im bui, pengasérén iow Aku.’

37Wo sé tou nianggap wutul i Amang Kasuruan, kumua oka in tana'i, ‘Tuang, kawisa réén sinéré ami si Tuang maarem wo winéan ami kanen, kuma'pa si Tuang maré'om wo winéan ami elepen? 38Wo kawisa ka'i kami isuméré si Tuang tanu sakéi wo tinowa ami tumuli am balé ami? Kuma'pa sinéré ami si Tuang ra'ica mekarai wo winéan ami karai? 39Wo kawisa sinéré ami si Tuang sumakit kuma'pa an untep im bui wo mai ami sérén?’

40Wo isowat oka i Colano ai séra in tana'i, ‘En ulitna icua-Ku ai camu, pakasa sé niéma' miow a si esaan asé poow-Ku si pawawa-wawa', niéma'o miow en itu torona-Ku.’

41Wo icua-Na oka ka'i a sé tou ang ka'biri-Na, ‘Kamu itu sé tou kinutuko. Tumayango mangé kamu an dior-Ku wo mangé muntep an api ra'ica mape'de-pe'del akar ing kauré-uré an tampa si aitu'tulo torona i kikiiten é sétang wo sé makiit sia. 42Ampa'paan an tutuw-Ku i maarem, ra'ica winéan iow kanen Aku. An tutuw-Ku i maré'om, ra'ica winéan iow elepen Aku. 43An tutuw-Ku ka'i tanu sakéi an doong iow, ra'ica tinowa miow Aku tumuli am balé miow. An tutuw-Ku ra'ica mekarai, ra'ica winéan iow karai Aku. An tutuw-Ku sumakit kuma'pa an untep im bui, ra'ica mai sinéré miow Aku.’

44Wo isowat éra oka ai Sia in tana'i, ‘Kawisao réén sérén ami si Tuang maarem kuma'pa maré'om kuma'pa tanu sakéi an doong ami kuma'pa ra'ica mekarai kuma'pa sumakit kuma'pa an untep im bui wo ra'ica mai ami sérén?’

45Isowat-Na oka ai séra in tana'i, ‘En ulitna icua-Ku mangé ai camu, an tutuw iow ra'ica itumawang esaan asé poo-poow-Ku si ipawawa-wawa', en itu meputé kamu ra'ica itumawang Yaku. 46#Dan. 12:2 Sé tou léwo' anio' ukumen oka an tampa in okoien akar ing kauré-uré, taan sé tou nianggap wutul i Amang Kasuruan makéré oka ing katouan akar ing kauré-uré.’ ”

Currently Selected:

Matius 25: TNT

Highlight

Copy