Matius 26

Sé kikiiten é tou Yahudi mawasa maté si Yesus

(Mrk. 14:1-2; Luk. 22:1-2; Yoh. 11:45-53)

1Kekawus i Yesus sumusui waya in itu, icua-Na a sé murit-Na, 2#Kel. 12:1-27 “Kailekan iow, en endo wangko' Paska waya oka i rua ngando wo si Toyaang i Tou isarakan oka in salipen.”

3Asi témpo itu, sé kikiiten é imam wo sé matu'a é tou Yahudi mali'us am balé paento'an i imam wangko' makangaran Kayafas. 4Séra mepaar wo mawasa en tumangka' si Yesus ang karapi i maene-enep e maté Sia. 5Taan séra mengkuanan,“Tioo tumangka' Sia asi endo wangko' Paska, wosama' sé tou ra'ica méma' ing kalicokoan.”

En do'kos i Yesus ninaam in solo mawou manam

(Mrk. 14:3-9; Yoh. 12:1-8)

6An tutuw i Yesus am Betania, Sia tumuli am balé i Simon si sumangkumo sinakitan ing kusta. 7#Luk. 7:37-38 Ang karoro'an i Yesus makalukut i makan, wo mai ai Sia si esa wéwéné maali-ali im botel teké' niéma' am batu pualam owo, si pinumpunan in solo mawou manam sosor keli em bééna. Wo inaamna en solo itu an do'kos i Yesus.

8E niéma' i wéwéné itu sinéré é murit i Yesus, wo séra mae'bow. Icua éra, “Kéitu réén en solo itu ipengéla-ngélanake'? 9Ampa'paan en solo itu sosor keli em bééna! Aweso taré en solo itu iwangkér, wo en doit itu ro'na iwéé a sé tou lengéi.”

10Taan kailekan i Yesus em pawero-weroten éra wo icua-Na, “Kéitu réén kamu sumusa si wéwéné anio'? E niéma'na a Yaku loor. 11#Ul. 15:11 Ampa'paan sé tou lengéi tatap ang karapi miow wo séra ro'na tawangen iow. Taan Aku ra'io uré mewali-wali wo icamu. 12Ampa'paan an tutuw sia numaam in solo an owak-Ku, meputéo sia tumu'tulo in owak-Ku en icubur. 13En ulitna icua-Ku mangé ai camu, am bisake' sé tou makua in Abar Kaaruien a sé tou ang kayo'baan, tantu ipakua éra oka ka'i sapa e niéma' i wéwéné anio' a Yaku, en tuma'néi sia.”

Si Yudas mawasa in sumarakan si Yesus a sé kikiiten é imam

(Mrk. 14:10-11; Luk. 22:3-6)

14Awéan esaan asé sangapulu' rua murit i Yesus, makangaran i Yudas Iskariot mangé a sé kikiiten é imam. 15#Za. 11:12 Wo icuana ai séra, “Sapa em béé oka miow a yaku sa si Yesus isarakanku ai camu?” Wo wéran éra ai sia telu ngapulu' roit pérak.#26:15 “Telu ngapulu' roit pérak”: Toyoo meputé ing kakeli im pate'tek a si esa tou epat ngaserap. Wo meputé im bééna pengateles ata an jaman in Taar Uré. 16Tumo'tolai asi témpo itu si Yudas maéré-éré témpo loor en sumarakan si Yesus ai séra.

Si Yesus kuman mewali-wali wo sé murit-Na an endo wangko' Paska

(Mrk. 14:12-21; Luk. 22:7-14, 21-23; Yoh. 13:21-30)

17Asi endo kataré in endo wangko' Roti Ra'ica Rinagian, sé murit i Yesus mai ai Sia wo mamuéi, “Guru, am bisa réén en icasalé' i Guru tu'tulan ami ing kakanen Paska torona i Guru?”

18Wo isowat-Na, “Mangém ang kota Yerusalem, ipeta'up oka miow si esa tuama wo icua mio' en taar-Ku ai sia, ‘En oras i Guru makatawio, Sia masalé' kuman mewali-wali wo sé murit-Na am balému en tuma'néi in endo wangko' Paska.’ ”

19Wo émaan é murit-Na tanu si airu'du'-Na ai séra. Wo tu'tulen éra eng kakanen Paska itu.

20Mawengi mio', si Yesus lumukut kuman mewali-wali wo sé sangapulu' rua murit-Na itu. 21Ang karoro'an éra i makan, icua i Yesus, “En ulitna icua-Ku ai camu, awéan esaan ai camu en sumarakan oka Yaku.”

22Kelinga in itu, en até éra mawendu keli wo séra maesa-esa mamuéi ai Sia, “Ra'ica yaku é Guru?”

23 # Mzm. 41:10 Wo icua i Yesus, “Si tou mewali-wali wo Yaku tumo'to' i roti am paelepan anio', siao en sumarakan oka Yaku. 24Si Toyaang i Tou maté oka tanu in aipatic ang Kitap Le'nas andumoro' Sia. Taan icawangkuro mio' si tou sumarakan Sia, aweso taré si tou itu ra'ica aitou ang kayo'baan.”

25Wo icua i Yudas si sumarakan oka Sia, “Ra'ica yaku é Gu- ru?”

Wo icua i Yesus ai sia, “Icoo in esa en cumua!”

Si Yesus wo sé murit-Na méma' im perjamuan

(Mrk. 14:22-26; Luk. 22:14-20; 1Kor. 11:23-25)

26An tutuw i Yesus wo sé murit-Na ang karoro'an i makan, indon-Na e roti wo kumua mangé makapulu'sama', wo te'bi-te'biin-Na e roti itu, wo yéké-Na a sé murit-Na wo kumua, “Indono, kaneno, si anioo en owak-Ku.”

27Kekawus in itu indon-Na em paelepan in anggor wo kumua i makapulu'sama'. Wo iwéé-Na ai séra wo kumua, “Melepo waya kamu asi paelepan anio'! 28#Kel. 24:8; Yer. 31:31-34 Ampa'paan si anio' en enda'-Ku, si enda' perjanjian si aituas torona ing kaampungan ing kamesé-meséaan é tou keli. 29Taan icua-Ku mangé ai camu, tumo'tol intarépé' Aku ra'io kawisa ka'i melep in anggor anio', akar asi endona Aku melep in anggor weru mewali-wali wo icamu ang Kakolanoan i Amang-Ku.”

Si Petrus sumangkal oka si Yesus

(Mrk. 14:27-31; Luk. 22:31-34; Yoh. 13:36-38)

30Kekawus éra kumantar ing kakantaren rarayoan wo si Yesus wo sé murit-Na mangé an Tolaina in Zaitun.

31 # Za. 13:7 Wo icua i Yesus a sé murit-Na, “Asi wengike' anio' icamu im baya tumela'u oka Yaku. Ampa'paan ang Kitap Le'nas aipatico in tana'i, ‘Patén-Ku oka si gembala, wo sé domba itu icasera-serar oka.’

32 # Mat. 28:16 Taan sa Aku tumouo sumawel, Yaku en dior wo icamu maangé ang Galilea.”

33Wo icua i Petrus, “Mandé ka'i séra im baya tumela'u si Guru, taan aku wutu-wutul ra'ica.”

34Wo icua i Yesus ai sia, “En ulitna icua-Ku ai co é Petrus, asi wengi anio', ra'ipé' kumukuk karua si co'ko', ko isumangkalo Yaku makatelu.”

35Taan icua i Petrus, “Mandé ka'i yaku maté mewali-wali wo si Guru, ra'ica sangkalenku si Guru.” Pakasa sé murit walina kumua ka'i in taniitu.

Si Yesus sumombayang ang Getsemani

(Mrk. 14:32-42; Luk. 22:39-46)

36Wo icateka'o mangé si Yesus wo sé murit-Na an esa tampa makangaran Getsemani. Wo icua i Yesus ai séra, “Lumukuto mio' am bia'i kamu, karoro'an Aku mangé sumombayang.” 37Wo iwali i Yesus si Petrus wo sé rua toyaang i Zebedeus kumiit ang karapi-Na. Sia tumo'tolo mapendam im bendu wo ra'io makaaté in sama'. 38Wo icua-Na ai séra, “En até-Ku wenduo keli, kapendaman tanu matawio maté. Mentoo mio' am bia'i kamu wo matéi-téiro mangé ang karapi-Ku.”

39Kumawus in itu si Yesus maya' mangé toyo', Sia kumundu wo sumombayang, “O Amang-Ku, sa woo ro'na, angkaien woo mai eng kawenduan anio' a Yaku. Taan ra'ica iciit ing kasalé'an-Ku e mamuali, iciito ing kasalé'an i Amang.”

40Makasombayang ako, si Yesus maréng angé a sé murit-Na wo kaumaan-Na séra kinakili'ano. Icua-Na a si Petrus, “Ra'ica réén kalesenan iow matéi-téir ang karapi-Ku mandé in esa jamke'? 41Matéi-téiro mangé wo sumombayango wosama' kamu ra'ica makéré im pangepé'an. Ulit en até miow masalé' méma' sé aicua-Ku, taan ra'ica kawooan in owak iow i méma'.”

42Kumawus in itu si Yesus maréng angé ka'i sumombayang ing karua, icua-Na, “O Amang-Ku, sa réén musti wuléngen-Ku eng kawenduan anio', mandéo kasalé'an i Amang e mamuali.” 43An tutuw Sia maréng angé sumawel a sé murit-Na, kaumaan-Na mangé séra kinakili'ano ka'i, ampa'paan séra makili'o repet.

44Wo iwaya-Na séra am bitu wo Sia mangé sumombayang ing katelu. Wo sumombayang tanu in sombayang tarépé'. 45Makasombayang ako wo Sia maréng a sé murit-Na, icua-Na, “Makakili' wo makaena'pé' réén kamu? Sérén, an témponao si Toyaang i Tou isarakan ang kama é tou keli eng kamesé-meséaan. 46Tumooro! Mayo sungkulentao mangé si tou sumarakan Yaku, sia an tawio.”

Si Yesus tinangka'

(Mrk. 14:43-50; Luk. 22:47-53; Yoh. 18:3-12)

47An tutuw i Yesus maroma'pé', wo mai si Yudas si esaan asé sangapulu' rua murit-Na mewali-wali wo sé tou keli sé maali-ali in sa'bel wo im papangkur. Séra airu'du' é kikiiten é imam wo sé matu'a é tou Yahudi. 48An tutuw é tou iitu ra'ipé' mai am bitu, aicuao i Yudas ai séra esa tuus tana'i, “Si tou ciomanku oka, Siao si tangkaan iow.”

49Icateka' mangé séra am bitu, si Yudas makala'us rumuru mangé a si Yesus wo icuana, “Siri' é Guru!” Wo ciomenna si Yesus.

50Wo icua i Yesus ai sia, “É karapi, siitu réén en aienmu?” Wo séra rumiit tumimboi si Yesus wo tangkaan éra Sia.

51Taan esaan asé tou si makii-kiit si Yesus, kumémbut in sa'belna wo parakenna en lunteng i ata imam wangko' akar imarembus. 52Wo icua i Yesus ai sia, “Iwaléo mio' sumawel en sa'belmu itu am baléna! Ampa'paan si séi maté tou maké in sa'bel, sia ka'i patén oka in sa'bel. 53Kuma'pa werotenmu réén Aku ra'ica makawoo mekiupus a si Amang-Ku wosama' iru'du'-Na sé malaékat-Na ilumébémai asé sangapulu' rua ngareru' suraro é malaékat e mai tumawang Yaku? 54Taan sa émaan-Ku en itu, tumambisa sé aipatic ang Kitap Le'nas itu lekepen? Aicua ang Kitap Le'nas sapaoka en anio' musti mamuali.”

55 # Luk. 19:47, 21:37 Wo an tutuw ituke', icua i Yesus a sé tou keli sé mai itumangka' Sia, “Paweroten iow réén Aku anio' tou léwo' akar kamu mai tumangka' Yaku maali-ali in sa'bel wo im papangkur? Susur in endo penéré-nérén iow Aku makalukut masusui am Balé Le'nas, wo ra'ica tinangka' miow Aku. 56Taan pakasa en anio' musti mamuali, wosama' en aipatic é nabi ang Kitap Le'nas musti lekepen.” Wo pakasa sé murit-Na tumela'u Sia wo tumincas.

Si Yesus a Mahkamah Agama

(Mrk. 14:53-65; Luk. 22:63-71; Yoh. 18:13-14, 19-24)

57Kekawus éra tumangka' si Yesus, wo iwali éra Sia am balé i imam wangko' Kayafas. A mangé mbitu imali'uso mai sé makailek wutul in Torat wo sé matu'a é tou Yahudi. 58Wo si Petrus mengii-ngiit si Yesus an tayang akar ang kintal im balé i imam wangko'. Wo sia muntep, lumukut mewali-wali wo sé pengawal en suméré sapa e mamuali a si Yesus. 59Sé kikiiten é imam wo pakasa sé anggota Mahkamah Agama maéré-éré kasairian ra'ica wutul andumoro' i Yesus wosama' Sia makéré ukuman patén. 60Taan mandé esake' ra'ica wana tuus eng kinéréan éra, mandé kelio sé mééo kasairian ra'ica wutul andumoro' Sia. Taan ang kasomoi- ana awéan rua tou mangé méé kasairian, 61#Yoh. 2:19 icua éra a sé anggota Mahkamah Agama, “Si Tou anio' sumangkumo icumua sapaoka em Balé Le'nas ro'na tongkaren-Na wo wangunen-Na sumawel wayake' in telu ngando.”

62Wo si imam wangko' tumulung wo icuana a si Yesus, “Ra'- ica réén sowaten-Mu em patudu éra ai Co?” 63Taan si Yesus makapeneske'. Wo icua i imam wangko' ai Sia, “Ang karapi i ngaran i Amang Kasuruan si menonou, icuao mai ai cami, Ico réén si Kristus Toyaang i Amang Kasuruan, kuma'pa ra'ica?”

64 # Dan. 7:13 Wo isowat i Yesus, “Si Amango in esa en cumua in itu. Taan icua-Ku ai camu, tumo'tol asi oras anio' kaséréan iow oka si Toyaang i Tou makalukut ang kakan i Makakawasa, wo mai ang kayo'baan an dangka' ing kambung-kambung an langit.”

65 # Im. 24:16 Kelinga in itu wo késéén i imam wangko' eng karaina ampa'paan mae'bow keli wo icuana, “Sia maojato si Amang Kasuruan. Anaé, sapapé' en torona kita mangéré sairi. Liningao miow waya e nunuwu'-Na maojat si Amang Kasuruan. 66Sa réén iciit im paweroten iow tambisa?”

Isowat éra, “Sia musti ukumen patén.”

67 # Yes. 50:6 Wo ruraan éra en amo-Na wo rukin éra. Taniitu ka'i sé tou walina sumepé' Sia. 68Wo icua éra ai Sia, “Éi Kristus, sa Ko uli- ulit nabi icua mai ai cami si séi réén en sumepé' Ico?”

Si Petrus sumangkal si Yesus

(Mrk. 14:66-72; Luk. 22:56-62; Yoh. 18:15-18, 25-27)

69Ang karoro'an in itu si Petrus ang kesot, makalukut ang kintal im balé i imam wangko'. Wo mai si esa ata wéwéné sumusut angé a si Petrus wo kumua, “Ico ka'i si tatap mewali-wali wo si Yesus tou Galilea itu.”

70Taan an dior éra waya si Petrus isumangkalke', icuana, “Ra'- ica kailekanku sapa en aicuamu.” 71Wo si Petrus mangé am papalen wangko'. Am bitu ka'i sia kaséréan i ata wéwéné walina wo icua i ata itu a sé tou am bitu, “Si tou anio' ka'i mewali-wali wo si Yesus, si tou Nazaret itu.”

72Taan si Petrus isumangkalke' ka'i wo sumumpa, “Ra'ica katuusanku si Tou itu.”

73Ra'ica mento' uré, sé tou am bitu mai a si Petrus wo kumua, “Tantu ko ka'i esaan ai séra, en tuusna kailekan ami am pakaroma'mu.”

74Wo tumo'tolo si Petrus kumutuk wo sumumpa, “Ra'ica katuusanku si Tou itu!” An tutuw ituke' kumukuko mai si co'ko'.

75Wo kata'néiano i Petrus en aicua i Yesus ai sia, “Ra'ipé' kumukuk si co'ko', ko makateluo sumangkal Yaku.” Wo sia kumesot wo maamé' akar i masesendu'an oka.

Currently Selected:

Matius 26: TNT

Highlight

Copy