Lukas 2

Si Yesus nimatou

(Mat. 1:21-25)

1Zéi'kan uré si Yohanes i nimatoumé, si Kaisar Agustus nimerénta im péléng sé tou witi kakolanoanna, a ngaran néra én ipantik wo toro kata'uan ung kalakez né tou. 2Um perénta i mantik a ngaran né tou kenu éng kataré-taré winangun, i si Kirenius nimaéndo gubernur witi Siria. 3Pahpaano um perénta itii péléng sé tou mangé wana am wanua tua'na né nimaopo néra i maipantik wana.

4Téntu kangkasii si Yusuf, ni sia timula'umé um wanua tua'na Nazaret witi Galilea a mangé witi Yudea witi wanua tua'na ni Daud, u makangaran Betlehem, pahpaan ni sia é suzu ni Daud. 5Niitumo si Yusuf wo si Maria si timantumo#2:5 Witu u nunuwu'en Yunani ‘emnestomen’, witu u nunuwu'en Tombulu' é ‘sé timantumo’. wo mahawa-awako, nimangé witi Betlehem wo u ngaran néra zua toro ipantik wana.

6I ni séra witi Betlehem, orasnamo si Maria i makaoki', 7a sia makaileké si lowai, si oki'na tu'a. Ang kampilennala si lowai itii karia u roko' an ikolo'nala witu u lontang, pahpaan ni séra én zéi'kan méikailekla walé in tulian.

Sé memimiara domba mamilek si Yesus si taré matoumé

8Im wengi itii, witi ataran kazukutan ém wéwéhan sé woopira sé memimiara domba, sé mahtéiz sé domba néra.

9Kumompo'mé si malaekat ni Opo Empung mapaileka un touna witu u rété néra. Wo u sena' ni Opo Empung simena'ma wia ni séra, a séra totoz kinaindé'an. 10Ang kuan ni malaekat itii wia ni séra, “Tia'mo maindé'! Pahpaan ni aku i niméyé é nimahalimé u nuwu' lé'os wia ni kamu un totoz makapaazen wia péléng sé tou.

11Téntii u Nuwu' Lé'os itii, ‘In endo kenu é nimatoumomé witi wanua tua'na ni Daud, si Milot ni kamu im witu un ukuman wana a singkéla'. Ni Siamo si Kristus, si Mahpiara.’

12Ung kenu u maileken niou: Ni kamu é mamilek si Lowai si kinampil u roko' wo méikolo' witu lontang.”

13Kumompo'mé si malaekat itii éng kinariamo né malaekat sé totoz lakez witi kasendukan sé mahlooz si Opo Empung, kuan néra,

14“U sigi' wo u looz én iwéhé uman wia si Opo Empung si witi kaséndukan!

Wo ung kaluasan witu un até wia sé tou wia ung kaayahan, sé mahwangun si Opo Empung mahpaa-paaz.”

15Kumawusa niitu sé malaekat mawurima witi kasendukan. A sé memimiara domba mahkuaala, “Méyémo kita mangé witi Betlehem i mamilek u nimamuali wana, tanu u méikua ni Opo Empung wia ni kita.”

16A séra merewe-reweka mangé witi Betlehem. Maileken néra si Maria, si Yusuf wo si lowai si méikolo' witu lontang.

17I niilekla né memimiara domba si lowai itii, an ikua nérala a méikua ni malaekat tumoro si lowai itii. 18Péléng sé tou é mengusi-ngusingsing in timalingala a sirita né memimiara domba itii. 19Taan péléng a sirita itii ém pegena-genangen ni Maria wo pinahtata'una ung kalakoan niitu. 20Tumondong niitu, sé memimiara domba mawurima sumaup witi ataran kazukutan. Karegas niitu, ni séra é mahlooz wo mahsigi' si Opo Empung pahpaan an tinalinga wo a niilek néra ém péléng masuat wo a méikua ni malaekat wia ni séra.

Si Yesus méipahwali witi Walé ni Opo Empung

21 # Luk. 1:31; Im. 12:3 I si Lowai itii waluna endomo, a Sia sunaten. A Sia ngaranan nérala Yesus, u ngaran méikua ni malaekat wia si ina'-Na puunala i mahawa-awak ni Sia.

22 # Im. 12:6-8 I méikaayomola un oras, si Maria wo si Yusuf mangé witi Yerusalem i mameresi un tou mengiit an tinotoz witu un ukum ni Musa. Ni séra kangkasii nimahwalima si Yesus i maiayo wia si Opo Empung. 23#Kel. 13:2, 12; Im. 12:6-8 Pahpaan witu un ukum Torat é méipantik in téntii,

“Péléng sé lowai kataré én iwéhé wia si Opo Empung i maéndo anu-Na uman.”

24 # Im. 12:6-8 Ni séra kasii é mahali u raragés sé wuku zua kaapa sé bombo zua sé peranggangpé' mengiit u méipantik witu un ukum Torat.

25In toro niitu im witi Yerusalem ém wéwéhan si tou makangaran Simeon. Ni sia én tou ulit wo mahkiit uman am paaz ni Opo Empung wo mengento-ngento' un oras ni Opo Empung i milot sé tou Israel. Si Roh Lenas én totoz memali-mali kariana. 26Mémoikua ni Roh Lenas wia ni sia i ni sia én zéi'kampé' maté sa zéi'kampé' nimilek si Mesias, si Kolano milot sé tou, si méitaaz ni Opo Empung. 27Si Roh Lenas nimahkita si Simeon muntep witu um Walé ni Opo Empung. In toro niitu a muntepa si Yusuf wo si Maria i mangun wia si Yesus tanu an tinotoz witu un ukum Torat. 28I si Simeon nimilekla si Koki' itii, maéndonamé a rawakennala si Koki' itii a mahlooz si Opo Empung. Kuana,

29“O Opo Empung, in tarékan é linekep-Mumola u méitaaz-Mu im puuna.

Niitumo in tarékan, si ata-Mu én toromo maté karia ung kaluasan witu un até.

30Pahpaan niilekkumola,

si méiatu-Mumé i milot sé tou-Mu.

31Ni Sia si méitégam-Mu wia péléng sé tahsasana wanua,

32 # Yes. 42:6, 49:6, 52:10 ni Sia én tanu u sena' i sumena'ma witu u lalan né tahsasana wanua walina, wo ni séra méyé wia ni Ko,

u sena' itii é maéndo sisigi'an wo lolooz né tou-Mu, Israel.”

33Kaitalingamé u méikuamé ni Simeon tumoro si Koki' néra itii, si Yusuf wo si Maria é mengusi-ngusingsing. 34Si Simeon mengaléi wia si Opo Empung a méhéma ang kamang wia ni séra ang kuana wia si Maria, si ina' ni Koki' itii, “Si Koki' kenu ém pinéléng ni Opo Empung i mukum sé tou Israel, sé zéi'kan ma'éman wia ni Sia wo kasii i mangun ni séra maéndo ulit witu u sinaru-Na. Ni Sia ém pinéléng ni Opo Empung i mapagenang wia sé tou a siningkéla' néra, taan lakez sé tou mahsaru uman ni Sia. 35Karia in téntu péléng am pegena-genangen né tou é makata'uan. Wo un atému é mamendan u rumara tanumokan im pahrukin karia um pahagi'.”

36Wéwéhan si nabi wéwéné makangaran Hana. Ni sia én tu'amo. Si Hana kenu én oki' ni Fanuel si wia sé suzu ni Asyer. Pituna ta'uno ni sia ing kimawéng, a matéma si mahayona, 37niitumo ni sia é mahesa-esamokan. Wo ung katou-touanna in tarékan ém waluna pulu' wo epatna ta'uno. Ni sia sekezé é mahragés wia si Opo Empung witi Walé ni Opo Empung. Endo wo wengi ni sia é mahpuasa wo sekezé é mengaléi.

38Makanuwu'la si Simeon wia si Yusuf wo si Maria, a méyé witu si Hana. A sia mahkua u makasé wia si Opo Empung wo mahkua un tumoro si Koki' itii wia péléng sé tou sé mengento-ngento' si Opo Empung i milot sé tou Israel.#2:38 Witu u nunuwu'en Yunani é méipantik Yerusalem.

Si Yusuf wo sé sana awuna mawuri witi Nazaret

39 # Mat. 2:23 I si Yusuf wo si Maria nimangunomé péléng a léwo'zéi' im wangunen néra tanu u méipantik witu un ukum Torat, a séra mawuri witi walé néra witi wanua tua'na Nazaret, witi Galilea. 40Si Koki' itii é makatua'namomé wo kaenté'namo. Ni Sia kasii én totoz tulap wo si Opo Empung én totoz rumaraaté ni Sia.

Si Yesus witi Walé ni Opo Empung

41 # Kel. 12:1-27; Ul. 16:1-8 Sekez in ta'un, sé tu'a ni Yesus é mengangangé witi Yerusalem ing gumenang un endo Paskah né tou Yahudi.#2:41 Im witi Mesir, si Opo Empung nimatu sé tou Israel i méhé un zaha' ni domba witu um pepenet am walé nera, wo si malaekat um patéan é lumangkoi umana. A séra iondolé ni Opo Empung im witi tana' Mesir. Si Opo Empung kimua wia ni séra i sekez in ta'un sé tou Israel mangun um pésta um pahkuan Paskah. (Kel. 12:1-27) 42I si Yesus mapulu' wo zuana ta'uno ung katou-touan-Na, ni Sia wo sé tu'a-Na simosoza mangé witi Yerusalem i lumé'os un endo Paskah né tou Yahudi tanu ung kinanaram néra. 43Ing kimawusola an endo i lumé'os um Paskah itii, ni séra é mawurimo. Taan si Yesus nimento' witi Yerusalem zéi'kan kata'uan né tu'a-Na. 44Pahgenangen néra umanla sa si Yesus éng kimaria sé tou mahlampang karia néra. Ni séra i limampangomé sana endo, a Sia penéron néra. Peligauen néra Sia wia sé katuari wo sé tou kata'uan néra. 45Pahpaan ni Sia én zéi'kan kinailekan nérala, a séra mawuri sumaup witi wanua tua'na Yerusalem i mamenéro ni Sia.

46In teluna endomo, ang kailekan nérala Sia witi Walé ni Opo Empung. Ni Sia é rimumez witu un unez né méster um pa'émanen né Yahudi, ni Sia é mahtalinga wo mahligau wia ni séra. 47Wo péléng sé timalinga an ipahkua ni Yesus é mengusi-ngusingsing, pahpaan ni Sia én totoz tulap wo an ipahwingkotna én totoz timoro. 48Kaiileka ni Sia, si ama' wo si ina'-Na é mengompo'. Ang kuan ni ina'-Na wia ni Sia, “Tolé, kaa téntu um pahwangunen-Nu wia ni kai? Si ama'-Mu wo si ina'-Mu én totozo paharétan i menéro ni Ko.”

49Taan si Yesus é nimingkot umanla, “Kaa si ama' wo si ina' é menéro-néro ni Aku? Zéi'kan kata'uan niou wé i ni Aku én totoz uman memia-mia um walé ni Ama'-Ku?” 50Taan zéi'kan katulapan néra un ipahkua-Na.

51A Sia mawuri witi Nazaret mahwali karia ni ama' wo ni ina'-Na. Ni Sia én totoz mahtali-talinga uman wia sé tu'a-Na. Péléng a nimamuali itii ém pegena-genangen uman ni ina'-Na. 52#1Sam. 2:26; Ams. 3:4 Si Yesus é makatarétumoumomé wo katulapnamo, wo kalousna u raraatéan ni Opo Empung wo né tou.

Currently Selected:

Lukas 2: LAITOM

Highlight

Copy