Lukas 4

Si tonaas né sétang mema'wa' si Yesus

(Mat. 4:1-11; Mrk. 1:12-13)

1Si Yesus nimawurimomé im witi so'so'an Yordan, ni Sia éng kinawasa ni Roh Lenas. Si Roh Lenas mahwalima si Yesus witi kapelasan. 2Epatna pulu' endo ni Sia im pema'wa'en ni tonaas né sétang im witu wo ni Sia kangkasii én zéi'kan mahkan. Kumawusa niitu a Sia mendané u maharem.

3Ang kuan ni tonaas né sétang wia ni Sia, “Sa Ko Oki' ni Opo Empung, kuana um watu kenu maéndoma roti.”

4 # Ul. 8:3 A mingkotla si Yesus wia ni sia, “Witu um Pinantik Lenas méipantik in téntii: Si tou i menou-nou én zéi'kan uman pahpaan u roti.”

5A si tonaas né sétang mahwalima si Yesus witi tampa rakék, pinitpitan umana sia i nimapaileka wia si Yesus péléng ang kakolanoan wia ung kaayahan. 6Kuan ni tonaas né sétang wia ni Sia, “Péléng ang kawasa wo ung kawa'ilanan a niilek-Muma itii ém pakawéhéku wia ni Ko pahpaan péléng niana é méipakawéhémo wia ni aku. Niana péléng én iwéhéku wia séi uman si kapaazku. 7Niana péléng én iwéhéku wia ni Ko i maéndo anu-Mu sa Ko mongkot wo sumigi' wia ni aku.”

8 # Ul. 6:13 Taan kuan ni Yesus wia ni sia, “Wéwéhan u méipantik in téntii: ‘Ni ko é léwo'zéi' mahongkot wo mahsigi' uman si Mahpiara, si Opo Empungmu, wo ni Sia uman si pahragésannu!’ ”

9A Sia ipahwalinama witi Yerusalem, witi wawona um Walé ni Opo Empung ang kumua wia ni Sia, “Sa Ko Oki' ni Opo Empung, mapanawu'moma, 10#Mzm. 91:12 pahpaan méipantik witu um Pinantik Lenas in téntii,

‘Tumoro ni Ko, si Opo Empung é meréntamé sé malaekat-Na,

i matuméiz ni Ko.

11Ni séra é sumikop ni Ko,

wo un a'é-Mu én zéi'kan ikawasal witu um watu.’ ”

12 # Ul. 6:6 A sia wingkotela ni Yesus, “Wéwéhan u méipantik,

‘Tia' ko mema'wa' si Mahpiara, si Opo Empungmu!’ ”

13I si tonaas né sétang simampetoma péléng am pema'wa'en wia si Yesus, an itulau'namé si Yesus wo ma'ento' un oras wangun i ma'wa' sumaup ni Sia.

Si Yesus mahtuzu' witi Galilea

(Mat. 4:12-17; Mrk. 1:14-15)

14A si Yesus mangé witi Galilea karia ung kawasa ni Roh Lenas. Tumoro ni Sia é méikawoka'moma wana péléng an tana' itii. 15Karegas niitu, ni Sia é mahtuzu' wana am walé peraragésan né Yahudi wo péléng sé tou é mahlooz ni Sia.

Si Yesus zéi'kan pa'émanen né tou Nazaret

(Mat. 13:53-58; Mrk. 6:1-6)

16A si Yesus mangé witi Nazaret um wanua-Na. Tanu ung kinanaram-Na in endo Sabat, Sia muntepa witi walé peraragésan né Yahudi a rumendaila i mahbabaca u méipantik witu um Pinantik Lenas. 17Ni Sia ém winéhanla um Pinantik Lenas um pinantik ni nabi Yesaya, am pitaren-Nala um Pinantik Lenas itii ang kailekan-Nala u méipantik in téntii,

18“Si Roh ni Opo Empung ém wia ni Aku,

pahpaan ni Sia si timotoz ni Aku,

i mahwoka' u Nuwu' Lé'os wia sé tou zéi'kan siapa apa;

wo ni Aku é méiatu-Na

19 # Yes. 61:1-2 i mahwoka' wia sé tou binui,

i ni séra én ipiloté,

wo sé tou letok én toro milek,

wo mémilot sé tou pahzézéhan,

wo mahwoka' un ta'un i si Opo Empung mapailek u raraatéan-Na wia sé tou-Na ém wiamo.”

20Ang gulungela sumaup ni Yesus um Pinantik Lenas itii, an iwéhéla sumaup wia si mahpaayang witu, a Sia rumumezla. Wo péléng sé tou witu makatengteng wia ni Sia. 21A Sia mahtuzu' ni séra, kuan-Na, “In endo kenu a nuwu' méipantik witu um Pinantik Lenas um binacama an tinalinga nioua ing kataré é nimamualimoma.”

22Péléng sé tou é mahkua am wangun tumoro ni Sia wo mengusi-ngusingsing i mahtalinga ni Sia pahpaan um pahnuwu'en-Na ém wangun, a sé tou mahligau, “Zéi'kankuaa ni Sia si oki' ni Yusuf?”

23Ang kuan ni Yesus wia ni séra, “Ni kamu éng kumua wia ni Aku ung kukuan kenu, ‘É dokter lé'osela un toumu in esa.’ Péléng an tinalinga nai a nimamuali witi Kapernaum ém wangunen kasiila wia u Nazaret um wanua-Mu kenu.” 24#Yoh. 4:44 Ang kuan-Na kasii: “Un ulitna én zéi'kan siapa si nabi si pahsigi'en witi wanuana. 25#1Raj. 17:1, 8-16 Taan ni Aku éng kumua un ulit nimamuali, in téntii: Im witu un oras ni Elia, witi Israel é nimamuali un zéi'kan nimahuza-uzané teluna ta'un wo enemna loloho'en, akaz nimamuali ung kaahreman makaindé'en wana péléng an tana'. In toro niitu, lakez sé wéwéné mahesa-esamokan. 26Taan si Opo Empung én zéi'kan nimatu si Elia mangé wia si wéwéné mahesa-esamokan witi Israel, ni Sia é nimatu si Elia mangé uman wia si wéwéné mahesa-esamokan witi wanua Sarfat, witi tana' Sidon. 27#2Raj. 5:1-14 Téntu kangkasii im witu un oras ni nabi Elisa im puuna, lakez sé tou Israel tinoro ung kusta taan maan in esa én zéi'kan siapa im wia ni séra sé liné'osna, akaz uman si Naaman, si tou Siria itii.”

28Sé tou witu um walé peraragésan né Yahudi itii én totoz maupi' in timalingamé niitu. 29A séra rumendaié a moho si Yesus i mondola witu um wanua tua'na. Um wanua tua'na itii ém witi kentur. Am pahwali nérama Sia witi ri'ping ung kentur, wo Sia toro ilombo' néra witu. 30Taan ni Sia é limampang mapauneza wia ni séra a mangé.

Si Yesus nimoho si sétang wia si tou

(Mrk. 1:21-28)

31A si Yesus mangé witi Kapernaum um wanua tua'na esa witi Galilea. Sekez in endo Sabat ni Sia mahtuzu' sé tou witu um walé peraragésan né tou Yahudi. 32#Mat. 7:28-29 Ni séra é mengusi-ngusingsing i mahtalinga am pahtuzu'-Na, pahpaan a nuwu'-Na é mawuta-wuta ung kawasa.

33Im witu um walé peraragésan né Yahudi itii ém wéwéhan si tou sinelazan ni sétang wo ni sia é mahnuwu' totoz rimez, 34“É Ko Yesus tou Nazaret, apa un éyé-Nu wia ni kai? Apa Ko niméyé i méluméwo' ni kai? Ni Ko éng kata'uangku, ni Komo si Lenas si wia si Opo Empung a méyé.”

35Taan si Yesus é rimekaka ni sia, “Menesla wo mondola im wia ni sia!” Si tou itii méiwasala ni sétang witu u unez né tou lakez, a sia mondola zéi'kan nimangun si tou itii mendan rumara.

36Péléng sé tou é mengusi-ngusingsing a mahkua wia si esa wo si esa, “A sangali kamakakompo'en a nuwu'-Na kenu! Pahpaan a nuwu'-Na é mawuta-wuta kawasa i mahperénta takazan sé roh léwo' é nimondolé im wia sé tou.” 37An ikawoka'ma un tumoro ni Sia wana péléng an tana' itii.

Lakez sé tou liné'os ni Yesus

(Mat. 8:14-17; Mrk. 1:29-34)

38A si Yesus mondolé im witi walé peraragésan né Yahudi itii a mangé witi walé ni Simon. Si mahnuang wéwéné ni Simon é saki totoz pasu', am pahaléien nérala wia si Yesus i sumawang ni sia. 39A Sia rumendaila witu ung kasaru ung kokolo'anna, a mohoma um pasu'na itii, a mazéi'ma um pasu'na itii. Si wéwéné itii é rengan in timoozé a masumelewir ni séra.

40I nimuntepola si endo, péléng sé tou é nimahwalimé sé tou saki wia ni Sia, sé mahwali-walinaan a saki pahpendanen néra. Ni Sia én zimeta'la u lengen-Na wia si esa wo si esa a séra malé'osa. 41Wo iwoho-Na kasiima sé sétang im wia sé tou lakez a séra mondolé karia i mengéré-ngérét, “Ni Komo si Oki' ni Opo Empung.” Taan si Yesus é rimekaka ni séra, wo zéi'kan iwéhé-Na séra i mahnuwu', pahpaan kata'uan néra i ni Siamo si Mesias.

Si Yesus mahtuzu' wana am wanua tua'na walina

(Mrk. 1:35-39)

42Masandomé i nimondolomé si endo, a si Yesus mangé witi tampa zéi'kan siapa tou. Taan sé tou lakez é mahpenéro ni Sia, a Sia kailekan nérala wo ni séra mahtututu' wo Sia zéi'kan tumula'u ni séra. 43Taan kuan-Na wia ni séra, “Wana am wanua tua'na walina kangkasii ni Aku é léwo'zéi' mahwoka' tumoro ung Kakolanoan ni Opo Empung, pahpaano niitu a ni Aku iatumé.”

44A Sia mahwoka' u Nuwu' Lé'os itii wia sé tou witi Yudea wana am walé peraragésan né Yahudi.

Currently Selected:

Lukas 4: LAITOM

Highlight

Copy