Lukas 7
7
Si ata ni tonaas né suraro Romawi liné'os ni Yesus
(Mat. 8:5-13)
1I si Yesus nimakanuwu'mola wia sé tou lakez itii, a Sia mangé witi Kapernaum. 2Im witu ém wéwéhan si tonaas né sana atus suraro Romawi. Ni sia ém wéwéhan si ata totoz karaaténa. Si ata itii én totoz saki wo tawimo maté. 3Ing kinatalingaala ni tonaas né suraro itii tumoro si Yesus, an iatunama sé woopira tu'a-tu'a né Yahudi#7:3 Tu'a-tu'a né Yahudi witu u nunuwu'en Yunani ém ‘presbuterous’, ung kalakoan niitu én ‘tonaas né tou Yahudi’. Sé tu'a-tu'a itii ém wéwéhan sé méikauntep witu u Mahkama Agama. Im witu u nunuwu'en Yunani é ‘Sanhedrin’. i mangé wia si Yesus, mahaléi wia ni Sia i méyé witi waléna wo lumé'osé si ata itii. 4Ni séra niméyé wia si Yesus an totoz mekitulung wia ni Sia i sumawang si tonaas itii. Kuan néra wia si Yesus, “Tuang, si tonaas né suraro itii ém wangun i sawangan ni Tuang, 5pahpaan ni sia é rumaraaté ni kita in tou Yahudi wo kasii ni sia é simawango ni kita i rimendai um walé peraragésanta.” 6A si Yesus mangé mahwali karia néra.
I ni séra mahrétémoma um walé ni tonaas né suraro itii, sé kakaria ni tonaas né suraro itii é méiatunamé i mékumua un téntii wia si Yesus, “Tuang, tia'mo melia-liasa i méyé witi waléku, pahpaan ni aku én zéi'kan wangun i sumungkul si Tuang witi waléku. 7Niitumo, ni aku én zéi'kan nimangé wia si Tuang, pahpaan ni aku én zéi'kan wangun mahilekan karia ni Tuang. Taan numuwu'moma, si ataku itii é malé'os. 8Pahpaan ni aku kangkasii ém wéwéhan si tonaasku wo wéwéhan kasii sé suraro pahperéntangku. Sa ni aku kumuala wia si esaané im wia sé suraroku in téntii, ‘Mangémo!’ ni sia é mangé, wo wia si esa kasii, ‘Méyé wia'i!’ ni sia é méyé. Kaapa wia si ataku, ‘Paayangena ung kenu!’ ni sia é maayang niitu.”
9In timalingamé u méikuamé ni tonaas né suraro itii, si Yesus é mengusi-ngusingsing pahpaan um pa'émanen ni tonaas né suraro itii én totoz wangko'. A si Yesus sumarula wia sé tou lakez sé kimiité ni Sia, ang kuan-Na, “Ikua-Kuma wia ni kamu, im wia sé tou Israel, ni Aku én zéi'kampé' nimahile-ilekla um pa'émanen tanu ung kawangko' um pa'émanen ni zéi'kan tou Israel kenu!”
10I nimawurimoma sé tou méiatumé ni tonaas né suraro itii witi waléna, maileken néra si ata itii é lé'oso.
Si oki' ni wéwéné mahesa-esamokan méitou sumaup ni Yesus
11Kumawusa niitu, a si Yesus mangé witi wanua tua'na Nain. Sé pahtuzu'en-Na wo sé tou totoz lakez é nimangé karia-Na. 12I ni séra merétémoma u loloangan um wanua tua'na itii, wéwéhan sé tou nimondolé witu um wanua tua'na itii memuléng si tou nimaté. Si tou nimaté itii én tuama wo ni sia uman si oki' ni wéwéné mahesa-esamokan. Lakez sé tou witu um wanua tua'na itii kimaria si ina' itii. 13I si Yesus nimileka si wéwéné itii, mawiamé u raraatéan-Na. Ang kuan-Na, “Ina', tia'mo mahamé'!”
14Tumondongé niitu, si Yesus rumétéla um winuléngan si nimaté, a Sia tumionla witu um wuwuléngan itii. Sé nimasaan um wuwuléngan itii é rengan nimento'la. Ang kuan ni Yesus, “É tarétumou, ikua-Kuma wia ni ko, tumoozomé!” 15Si tarétumou nimatémo itii tumoozé, a sia rumumezla, a mahnuwu'. A sia iwéhéla ni Yesus wia si ina'na.
16Péléng sé tou witu é maindé' a mahsigi' wo mahlooz si Opo Empung. Ni séra é mahkua, “Si Opo Empung é nimatumomé si nabi wangko' i mémahwali-wali kariata! Si Opo Empung é niméyémo i mésumawang sé tou-Na!” 17An ikawoka'ma u sirita tumoro si Yesus witi Yudea wo wana an tampa walina.
Sé pahtuzu'en ni Yohanes Menanarani niméyé wia si Yesus
(Mat. 11:2-19)
18I si Yohanes timalingala péléng a nimamuali itii, a méikua né pahtuzu'enna, 19an tawahennala sé zua im wia sé pahtuzu'enna, an iatunama séra zua mangé wia si Yesus i malumigau téntii, “Ama', apa ni Komo si méitaaz ni Opo Empung i méyé, kaapa wéwéhan tou walina si totoz in ento'en nai?” 20Ikaayola sé zua tou itii wia si Yesus, a séra kumuala, “Ni kai é méiatumé ni Yohanes Menanarani i mélumigau wia si Ama' in téntii, ‘Ama', apa ni Ko si méitaaz ni Opo Empung i méyé, kaapa wéwéhan tou walina si totoz in ento'en nai?’ ”
21In toro niitu, lakez sé tou liné'os ni Yesus im wana a saki wo an zézéha néra wo sé sétang simelaz wia sé tou é méiwoho-Na wo sé tou letok ém winangun-Na in toromo mahilek. 22#Yes. 35:5, 6, 61:1 A séra wingkotela ni Yesus, “Mangémo wo maikuala wia si Yohanes an tinalinga wo a niilek niou: sé letok én toromo mahilek, sé lailai én toromo mahlampang, sé tinoro ung kusta é lé'oso, sé lunteng é mahtalingamo, sé tou nimatémo é méitoumomé sumaup, wo sé tou zéi'kan siapa apa én timalingamo u Nuwu' Lé'os um wia si Opo Empung a méyé.”
23A si Yesus kumua kasii, “Mahpaa-paazola sé tou simungkul ni Aku.”
24I nimawurimoma sé pahtuzu'en ni Yohanes, a si Yesus rengan mahnuwu' wia sé tou lakez witu tumoro si Yohanes. Kuan-Na, “Makumura kamu im witi kapelasan? Apa ni kamu mangé wana i mamilek si tou mahzua-zua genang, tanumokan ang kuhun mengogé-ngogé mahkii-kiit uman u reges? 25Kaapa apa un angén niou wana? Mamilek si tou kimarai ung karai wangun? Si tou kimarai ung karai wangun é mahento' witi istana ni kolano. 26Makumura ni kamu i mangé wana? Mamilek si nabi? Ulit, wo ikua-Kuma wia ni kamu, si tou itii é lumouspé'mé si nabi. 27#Mal. 3:1 Pahpaan tumoro ni sia, méipantik witu um Pinantik Lenas, in téntii,
‘Ilekena, ni Aku é nimatuma si aatu-Ku i mapuunama wia ni Ko.
Ni sia é mamimek u lalan lampangan-Nu witu u sinaru-Mu.’
28Uli-ulit ikua-Kuma wia ni kamu: Im wia sé tou sé nimatoumé im wia sé wéwéné, zéi'kan siapa si lumousé ung kawangko' ni Yohanes, taan si totoz kori' im wia sé tou witi Kakolanoan ni Opo Empungpé' si wangko' taan ni sia.” 29#Mat. 21:32; Luk. 3:12 Péléng sé tou timalinga a méipahkua ni Yesus wo karia né menanagi am pajak é mahkua i si Opo Empung én ulit. Pahpaan sé tou itii é sinaranimola ni Yohanes. 30Taan sé wia sé sana réwok tou Farisi wo sé tou tulap un Torat é soo ung ginenang ni Opo Empung witu ung katou-touan néra, pahpaan ni séra é soo i saranin ni Yohanes.
31A si Yesus kumua kasii, “Karia un apa iandé-Kuma sé tou in tarékan? Pasuaten wo un apa séra? 32Ni séra én tanumokan sé koki' merume-rumez witi pahwangkéran, sé mengéré-ngérétan in téntii,
‘Ni kai é mahpeloit wia ni kamu,
taan ni kamu é soo dumonci,
ni kai mahkantar ang kakantaren wana am pinatéan,
taan ni kamu én zéi'kan mahamé'.’
33Ni kamu én tanu sé koki' itii. Pahpaan si Yohanes Menanarani i niméyé én zéi'kan mahkan roti wo zéi'kan mahelep anggor, taan ni kamu é mahkua, ‘Ni sia é sinelazan ni sétang.’ 34Si Oki' ni Tou niméyé, ni Sia mahkan wo mahelep wo ni kamu é mahkua, ‘Ilekena, ni Sia é sorem wo matetewelen, kakaria né menanagi am pajak wo né tou mahsingkéla'.’ 35Taan ung katulapan ni Opo Empung én toro ileken wana am pemangu-mangunen néra.”
Si Yesus witi walé ni Simon
36Si tou wia sé sana réwok tou Farisi, si makangaran Simon, kimua si Yesus i mékuman kariana. Si Yesus niméyé witi walé ni tou Farisi itii, a séra rumumezla ang kuman mahwali-wali. 37#Mat. 26:7; Mrk. 14:3; Yoh. 12:3 Witu um wanua tua'na itii ém wéwéhan si wéwéné pahkua-kua i mahsingkéla'. Kinatalingaala ni wéwéné itii i si Yesus é mahkan witi walé ni tou Farisi. A méyé witu si wéwéné itii, mahali-ali u lana mahwou tariis u méitahu' witu um wotel pualam,#7:37 Um wotel kenu ém watu kulo' pahkuan pualam am wangunen. I muka um wotel kenu é léwo zéi im pahtarazen witu u léhéna. 38a sia rumendaila witu muri, rété un a'é ni Yesus. Ni sia é mahamé' wo u lué'na é mahtihisa witu un a'é ni Yesus, am pahpéhosenama karia um wuukna wo niitu maperama. Tumondong niitu pahsiomenna un a'é ni Yesus, am wuwu'annama karia u lana mahwou tariis.
39I niileka ni tou Farisi si kimua si Yesus a nimamuali itii, witu ung genangna ni sia é mahkua, “Sa Sia ulit nabi, tantumo éng kata'uan-Na am pemangu-mangunen ni wéwéné si timion wia ni Sia. Kata'uan-Na si wéwéné kenu ém wéwéné sangaya.” 40Taan kuan ni Yesus wia si Simon, “Simon, wéwéhan un ipahkukuaku wia ni ko.” A mingkoté si Simon, “Méster, ikuamomé.” 41Ang kuan ni Yesus, “Wéwéhan sé zua tou niminjang zoit wia si tou mahlampang an zoitna. Si esa é niminjanga limana atus dinar, si esa é limana pulu' dinar. 42Taan ni séra zua én zéi'kan makawawa i muri an zoit pininjang nérama. A zéi'ela ni makazoit am pininjang néramé. In tarékan Simon, sa kiit ni ko, im wia ni séra zua é séi si totoz rumaraaté si makazoit itii?” 43A mingkotla si Simon, “Sa kiit ni aku é si tou niminjang an zoit lakez an zéi'ela ni makazoit am pininjangna.” Kuan ni Yesus, “Ulit ung ginenangmu itii.” 44A si Yesus merena wia si wéwéné itii, ang kuan-Na wia si Simon, “Simon, ilekenumé si wéwéné kenu. Ni Aku niméyé wia um walému, taan ni Aku én zéi'kan winéhannu zano i mo'as un a'é-Ku tanu ung kinanaram pahwangunenta. Taan si wéwéné kenu, wino'asanna un a'é-Ku karia u lué'na am pahpéhosenama karia um wuukna. 45Ni Aku i nimawiamé én zéi'kan siniommu. Taan si wéwéné kenu, rengan ni Aku i nimawiamé, ni sia zéi'kan kumana' i mahsiom un a'é-Ku. 46Téntu kangkasii, un ulu-Ku zéi'kan winéhannu lana. Taan si wéwéné kenu, un a'é-Ku ém winéhanna u lana mahwou tariis. 47Pahpaano niitu, ni Aku kumuama wia ni ko: A singkéla'na an totoz lakez ém pinakazéi'moma, pahpaan si wéwéné kenu é nimapailek u raraatéan un totoz wangko'. Taan sa a singkéla' ni tou én toyo' uman wo zéi'en a singkéla' toyo uman itii, ni sia kangkasii é nimapailek u raraatéanna én toyo' uman.” 48Ang kuan-Na wia si wéwéné itii, “A singkéla'mu é zinéi'moma.” 49Witu ung genang né tou mahkan karia ni Yesus ni séra é mahkua in téntii, “Séi Sia wé, makaz Sia toro zuméi' a singkéla' ni tou?” 50Taan kuan ni Yesus wia si wéwéné itii, “Um pa'émanennu u nimilot ni ko im witu u siningkéla'mu, mangémo karia ung kaluasan witu un até!”
Currently Selected:
Lukas 7: LAITOM
Highlight
Share
Copy
Want to have your highlights saved across all your devices? Sign up or sign in
