Lukas 8

Sé wéwéné mahsawa-sawang si Yesus

1Tumondongé niitu, si Yesus mangé wana am wanua tua'na wo wana am wanua. Im wana ni Sia mahwoka' u Nuwu' Lé'os tumoro ung Kakolanoan ni Opo Empung. Sé mapulu' wo zua pahtuzu'en-Na é mahwali-wali karia-Na, 2wo kasii sé wéwéné woopira. Sé wéwéné itii é sé winohoan ni Yesus sé sétang simelaz wia ni séra wo sé liné'os-Na im wana a saki néra. Si esa im wia sé wéwéné itii é si Maria tou Magdala, sé sétang méiwohomé im wia ni sia ém pitu. 3#Mat. 27:55-56; Mrk. 15:40-41; Luk. 23:49 Wo si Yohana si mahayo ni Khuza. Si Khuza kenu én tonaas né mahpaayang witi istana ni Herodes.#8:3 Si Herodes kenu é si kolano witi Galilea. Wéwéhan kasii si makangaran Susana wo lakez sé wéwéné walina. Sé wéwéné itii é mahsawang si Yesus wo sé pahtuzu'en-Na karia an zoit néra.

Un aandéan tumoro am watuna tatanemen méikeroz

(Mat. 13:1-9; Mrk. 4:1-9)

4Makasamé lakez sé tou sé wana am wanua tua'na, mahtotondongané méyé wia si Yesus. Maréwokla sé tou itii, a si Yesus kumua un aandéan. Kuan-Na, 5“Wéwéhan si mengengeroz makimeroz am watuna tatanemen. Karegas sia i mahkeroz am watuna tatanemen, wéwéhan am watuna tatanemen méikagogoma witu un tembir u lalan, am watuna tatanemen itii ém pahkaléékana né tou wo sé tumétéwél mékimulat am watuna tatanemen itii makaz nimaapu. 6Am watuna tatanemen walina é méikagogoma witu un tana' watu-watun. Am watuna tatanemen itii én timoumé taan zéi'kan uré é nimaperamoma pahpaan zéi'kan siapa zano. 7Am watuna tatanemen walina é méikagogoma witu un tana' an tinouan an zukut menulah. Tumoumé am watuna tatanemen itii wo maan an zukut menulah kasii é mahtou. Kauréna am watuna tatanemen mahtou itii é méisé'sé'la an zukut menulah akaz an tinanem itii nimaté. 8Am watuna tatanemen walina é méikagogoma witu un tana' rembuz, am watuna tatanemen itii timoumé makaz i mahwua'. Am wua'na é makasana atusé.” Tumondong niitu, ang kuan ni Yesus, “Séi si wéwéhan lunteng i mahtalinga é mahtalingama lé'os!”

Ung kalakoan un aandéan am watuna tatanemen méikeroz

(Mat. 13:10-17; Mrk. 4:10-12)

9Sé pahtuzu'en ni Yesus meligau wia ni Sia tumoro ung kalakoan un aandéan itii. 10#Yes. 6:9-10 Ang kuan-Na, “Ni kamu én tinambéran ung kamang in toro makatulap u méikawunipé' tumoro ung Kakolanoan ni Opo Empung, taan im wia sé tou walina én ipahtuzu' karia an aandéan. Karia in téntu, ‘zozo' ni séra mahilek, taan zéi'kan makana'u wo zozo' ni séra mahtalinga taan zéi'kan makatulap.’

11Téntii ung kalakoan un aandéan itii: Am watuna tatanemen itii é Nuwu' ni Opo Empung. 12Am watuna tatanemen méikagogo witu tembir u lalan, ung kalakoana é sé tou akazo in timalingama u Nuwu' ni Opo Empung, a méyé si tonaas né sétang an éndonama u Nuwu' ni Opo Empung im witu un até néra. Karia in téntu, ni séra én zéi'kan ma'éman makaz ni séra kangkasii én zéi'kan ipilot im witu un ukuman wana a singkéla'. 13A méikagogo wana an tana' watu-watun é sé tou timalingama u Nuwu' ni Opo Empung a sumungkul niitu karia mahpaa-paaz taan zéi'kan nimahmut witu un até néra. Ni séra nima'éman taan zéi'kan nimauréma, i méyé um pema'wa'en, ni séra soomo ma'éman. 14A méikagogo witu un tana' tinouan an zukut menulah, ung kalakoana é sé tou timalingama u Nuwu' ni Opo Empung, taan ni séra é maarét tumoro ung katou-touan néra, paaz mawa'ilan wo mahkiit uman a lelo wia ung kaayahan, taka-takazan zéi'kan nimaririhan. 15A méikagogoma witu un tana' rembuz, ung kalakoana é sé tou timalingama u Nuwu' ni Opo Empung, totoz winéhan néra genang akaz nimahmut witu un até lé'os néra wo ni séra zéi'kan mazéi' i memangu-mangun u Nuwu' ni Opo Empung itii.”

Un aandéan tumoro u solo

(Mrk. 4:21-25)

16 # Mat. 5:15; Luk. 11:33 Ang kuan ni Yesus, “Zéi'kan siapa tou tumutungla u solo wo niitu keleuannala karia un tampayang kaapa iwéhéna witu lalem ung kokolo'an. Taan u solo itii én izeta'na witu um penono'tolan u solo wo péléng sé tou muntepa witu um walé itii én toro milek u sena'na. 17#Mat. 10:26; Luk. 12:2 Pahpaan zéi'kan siapa a méikawuni an zéi'kan maipapailek wo zéi'kan siapa a méiwuni an zéi'kan makata'uan wo maiwoka'. 18#Mat. 25:29; Luk. 19:26 Niitumo, totoz pahwéhanla genang an tinalinga niouo. Pahpaan séi si mahtata'u u Nuwu' ni Opo Empung, ni sia é mawangunen ni Opo Empung makatulap niitu. Taan séi si soo mahtata'u u Nuwu' ni Opo Empung, makaz am pahgenangennala ing kata'uannamo ém pakaéndon.”

Si Yesus wo sé katuari-Na

(Mat. 12:46-50; Mrk. 3:31-35)

19Si ina' wo sé katuari ni Yesus mémahilekan karia ni Yesus taan ni séra én zéi'kan mata'u rumété wia ni Sia pahpaan totoz lakez sé tou witu. 20Wéwéhan si tou makimua wia si Yesus, kuana, “Si ina' wo sé katuari-Mu ém witi ondol, ni séra ém paaz mahilekan karia-Mu.” 21A si Yesus mingkotla, “Si ina'-Ku wo sé katuari-Ku é sé tou mahtalinga wo mahwangun u Nuwu' ni Opo Empung.”

U reges repet wo u sempa' méiento' ni Yesus

(Mat. 8:23-27; Mrk. 4:35-41)

22Makasamé si Yesus wo sé pahtuzu'en-Na sumakéla witu u londéi. Ang kuan-Na, “Méyémo kita mangé witi leweta u louz.” A séra mangé. 23Karegas séra i mahlewet u louz, si Yesus é nimatekel. Kumompo'mé a méyé u reges totoz repet witi louz, akaz un zano é mahuntepoma witu u londéi makaz ni séra én tawimo ikatenem. 24A si Yesus mawongkéné né pahtuzu'en-Na, kuan néra, “Méster, Méster ikaléwo'mo kita!” Si Yesus rumendaié a rekaken-Nama u reges repet wo un zano mahsempa' itii. U reges repet wo un zano mahsempa' é rengan i nimento'la wo u louz é nimapenesa. 25Ang kuan ni Yesus wia sé pahtuzu'en-Na, “Kaa kamu zéi'kan ma'éman wia ni Aku?” Ni séra é maindé' wo mengusi-ngusingsing, a si esa wo si esa im wia ni séra mahkua, “Séi Sia wé, taka-takazan u reges wo un zano mahsempa' itii é mahkiit um perénta-Na?”

Si Yesus nimoho sé sétang simelaz wia si tou witi Gerasa

(Mat. 8:28-34; Mrk. 5:1-20)

26Tumondongé niitu, a séra sumuwa'la witi lewet u louz Galilea, witi tana' né tou Gerasa.#8:26 Un tana' né tou Gerasa ém pahkuan kangkasii in tana' né tou Gadara wo sé walina é mahkua ing Gergesa. 27I si Yesus timumpamé witu u londéi, a méyé si tuama esa, ni sia é sinelazan né sétang, ni sia ém witi wanua tua'na itii a méyé. Si tuama itii én urémo in zéi'kan kimarai wo zéi'mo mahento' witi waléna, taan ni sia é mahento'mokan witi pahlewengan. 28Kaiileknama si Yesus, a sia mahkérét ang kumuruzla ung gio makaz witu un tana' witu u sinaru ni Yesus, ang kuana karia i rimimeza, “É Yesus, Oki' ni Opo Empung si Totoz Rakék! Apa un éyé-Nu wia ni aku? Pahaléiengku wia ni Ko, tia'mo zumézéha ni aku.” 29Si tou sinelazan né sétang itii é mahkua in téntu wia si Yesus, pahpaan sé sétang itii é méiwohoma ni Yesus im wia si tou itii. Pahpaan si tou itii sekezé éng kinawasa né sétang, niitumo u lengen wo un a'éna ém pahapusen né tou karia u ranté taan um pahrepesena umana. Si tou itii ém pemamalima né sétang wana an zéi'kan pahento'an né tou. 30A si Yesus meligau wia si tou itii, “Apa u ngarannu?” A sia mingkoté, “U ngaranku é Legion”#8:30 Sana legion é enemna riwu suraro. , pahpaan sé sétang simelaz wia ni sia é lakez. 31Sé sétang itii mahaléi wia si Yesus in tia' pahpeperénta-Na séra i muntep witu um woso um patéan, um pahukuman sé sétang.

32Zéi'kan zou' im witu ém wéwéhan sé wawi totoz lakez, karegas i mengan witu u siri' ung kimeleng. A sé sétang itii mahaléi wia si Yesus wo séra toro muntep wia sé wawi itii. An énéala ni Yesus um pahaléien néra. 33Mondolé sé sétang im wia si tou itii, a muntepa wia sé wawi itii, a sé wawi itii rengan ing kimara'ma witu u ri'ping a mapanawu'ma witi louz a matéla nimalemes.

34I sé mahtéiz sé wawi nimilek u nimamuali itii, ni séra éng kimara'ma mangé witi wanua tua'na wo wana am wanua limiklik witu a sumirita u nimamuali itii. 35A sé tou mondolé i mamilek u nimamuali itii. Ni séra méyé wia si Yesus an ileken nérala si tou sinelazan né sétang woan itii é rimumezo witu u rété un a'é ni Yesus, ni sia éng kimaraio wo lé'oso. I milekla niitu sé tou itii éng kinaindé'an. 36Sé tou nimilek u nimamuali itii é mahsirita wia sé tou walina kura si tou sinelazan né sétang woan itii i nimalé'osa. 37Am péléng sé tou witi tana' Gerasa mahaléi wia si Yesus in tumula'uma un tana' néra, pahpaan ni séra én totoz maindé'. A si Yesus sumakéla witu u londéi a suméngkot sumaup tumula'uma un tana' itii.

38Si tou mémoipiloté im wia sé roh léwo' itii mahaléi wia si Yesus ing kumiit ni Sia. Taan si méipekiwuri umana ni Yesus, kuan-Na, 39“Mawurimoma witi walému wo isiritala wia péléng sé tou um winanguna ni Opo Empung wia ni ko.” Si tou itii mangé a mahliklik um wanua tua'na i mahsirita péléng am winanguné ni Yesus wia ni sia.

Si kooki' ni Yairus wo si wéwéné saki

(Mat. 9:18-26; Mrk. 5:21-43)

40I si Yesus mawurimé im witi lewet u louz, lakez sé tou simungkul ni Sia karia i mahpaa-paaz, pahpaan ni séra péléng é ma'ento' ni Sia. 41A méyé wia si Yesus si tonaas um walé peraragésan né tou Yahudi makangaran Yairus. Sia kumuruzla ung gio makaz witu un tana' witu u sinaru ni Yesus, a mahaléi wia si Yesus i mangé witi waléna, 42pahpaan si kooki'na si esa uman é saki wo tawimo maté. Ung katou-touan ni kooki' itii ém woo mapulu' wo zuana ta'uno. A si Yesus mangé witi walé ni Yairus. Karegas Sia i mahlampang, sé tou lakez é mahsésé'sé'an witu u rété-Na.

43Im wia sé tou lakez itii, wéwéhan si wéwéné mapulu' wo zuana ta'uno zézéha im pahondolan, [a sangkumna é nimaapumoma pahpaan pahwaér sé mahundam ni sia] wo zéi'kan siapa si makawawa i lumé'os ni sia. 44Si wéwéné itii rumétéma witu u muri ni Yesus a sumahiza u rawisna ung karai tonton ni Yesus. In toro niitukan a mento'la un zaha' mahondol wia ni sia. 45A si Yesus meligau, “Séi si simahizé wia ni Aku?” Taan zéi'kan siapa si makaulité, ang kuan ni Petrus, “Méster, téntu ung kalakez né tou nimaréwok wo mahsésé-sé'sé'an witu u rété-Mu.” 46Taan kuan ni Yesus, “Wéwéhan si simahizé wia ni Aku, pahpaan pinendan-Kuma im wéwéhan ung kawasa nimondola im wia ni Aku.” 47I si wéwéné itii mata'ula um winangunnama éng kata'uan ni Yesus, karia i mahgerger sia kumuruzla ung gio makaz witu un tana' witu u sinaru ni Yesus. A sia sumirita wia sé tou lakez, kaa sia simahiza u rawisna ung karai tonton ni Yesus. Wo méisiritana kasii sa in toro niitukan ni sia é nimalé'osoma. 48Ang kuan ni Yesus wia si wéwéné itii, “É oki'-Ku, um pa'émanennu u limé'os ni ko, mangémo karia ung kaluasan witu un até.”

49Karegas si Yesus i mahnuwu', méyé si tou si witi walé ni Yairus i mékumua wia si Yairus, “Si kooki'mu é nimatémo, niitumo ni ko én tia'mo mahraung si Méster!” 50Taan kinatalingaana ni Yesus u méikuama ni tou itii, ang kuan-Na wia si Yairus, “Ni ko én tia'mo maindé', ma'émanola, si kooki'mu é malé'os.”

51Ikaayola witi walé ni Yairus, zéi'kan iwéhé ni Yesus sé tou i muntep karia-Na. Sé toro muntep karia-Na én akaz uman si Petrus, si Yohanes, si Yakobus wo sé tu'a ni kooki' itii. 52Péléng sé tou é mahamé' karia i mahkérét pahpaan si kooki' nimatémo itii. Taan kuan ni Yesus, “Tia'mo mahamé'! Si kooki' itii én zéi'kan nimaté, ni sia én timekel uman.” 53Taan si Yesus én ipahké'ké' néra uman, pahpaan kata'uan néra si kooki' itii é nimatémo. 54An tionala ni Yesus u lengen ni kooki' itii, ang kuan-Na, “É kooki', tumoozomé!” 55In toro niitukan, si roh ni kooki' itii nimawurimé wia ni sia a nimatoumé sumaup a rumendaila. Tumondongé niitu, an ikuala ni Yesus wia ni séra im wéhanla kakanen sia. 56Sé tu'a ni kooki' itii én totoz mengusi-ngusingsing i nimilek u nimamuali. Taan ni séra é sinéro'la ni Yesus i sumirita a nimamuali itii wia sé tou.

Currently Selected:

Lukas 8: LAITOM

Highlight

Copy