Lukas 9

Si Yesus nimatu sé mapulu' wo zua pahtuzu'en-Na

(Mat. 10:5-15; Mrk. 6:7-13)

1Si Yesus tumawahmé sé mapulu' wo zua pahtuzu'en-Na, a séra enté'en-Nala am wéhan-Nala ung kawasa i mahwoho sé sétang wo mahlé'os sé tou saki. 2Sé pahtuzu'en-Na é méiatu-Na mahwoka' wia sé tou tumoro ung Kakolanoan ni Opo Empung wo i lumé'os sé tou im wana a saki néra. 3#Luk. 10:4-11 Kuan ni Yesus wia ni séra, “Tia'mo mahali apa im wana am pahlampangan niou. Tia'mo mahali-ali teken, kaapa tatahu'an am walun, kaapa roti, kaapa zoit kaapa zua karai sasawelen. 4Sa kamu muntepla witu um walé wo si makawalé sumungkula ni kamu, mento'mola witu makaz ni kamu in tumula'umé un tampa itii. 5#Kis. 13:51 Taan sa wéwéhan sé soo sumungkul ni kamu, mondolé im witu um wanua tua'na néra, itangkaré an awu wana an a'é niou i mapagenang wia ni séra i si Opo Empung é mukum ni séra.”

6Kumawusa niitu, sé pahtuzu'en ni Yesus mangé wana am wanua i mahwoka' u Nuwu' Lé'os ni Opo Empung wo mahlé'os sé tou saki.

Si Herodes mahtata'u séi si Yesus

(Mat. 14:1-12; Mrk. 6:14-29)

7 # Mat. 16:14; Mrk. 8:28; Luk. 9:19 In toro niitu, si kolano Herodes si mahperénta witi tana' Galilea. Ing kinatalingaannala am pahwangunen ni Yesus, ni sia é malinganga. Pahpaan wéwéhan sé mahkua i si Yesus é si Yohanes Menanarani si méitoumé sumaup wia sé nimaté. 8Wéwéhan kasii sé mahkua si Elia é nimondolomé sumaup, sé walina é mahkua si esaané im wia sé nabi im puuna é nimatoumomé sumaup. 9Taan si Herodes é mahkua, “I makasa, méiperéntaku si Yohanes im pokolan un ulu. Séi kuaa ndéén si Tou kenu? Pahpaan kinatalingaangkula am pahwangunen-Na.” A si Herodes mahtututu' i mahilekan karia ni Yesus.

Si Yesus niméhé un tikohon wia sé limana riwu tou

(Mat. 14:13-21; Mrk. 6:30-44; Yoh. 6:1-14)

10I sé pahtuzu'en ni Yesus sé méiatu-Nama nimawurimomé, a séra sumirita wia ni Sia am winangun néramomé. Ni séra tawahené ni Yesus in tumampasa mangé witi wanua tua'na Betsaida. 11Taan kinata'uan umanla né tou lakez u niangéan néra, a séra kumiita mangé wia ni Sia. Sé tou lakez itii é sinungkula ni Yesus a Sia mahkua wia ni séra tumoro ung Kakolanoan ni Opo Empung wo ni Sia limé'osa sé tou saki.

12I mawengimo, a méyé wia si Yesus sé mapulu' wo zua pahtuzu'en-Na ang kumua, “Wia un tampa kenu é méikatampasé im wana am wanua, niitumo iatumoma sé tou lakez itii i mangé wana am wanua rété wia'i wo séra toro menérola un tikohon wo an ento'an néra im wengi kenu.” 13Taan kuan ni Yesus wia sé pahtuzu'en-Na, “Ni kamu sé léwo'zéi' i méhé un tikohon wia ni séra!” Sé pahtuzu'en-Na mingkotla, “Um wia ni kai én akaz uman u roti lima wo sé seza' zua. Apa ni kai léwo'zéi' matumelesé un tikohon iwéhé wia péléng sé tou kenu?” 14#Mat. 14:21 Pahpaan im witu ém wéwéhan woo limana riwu tou sé tuama. Ang kuan ni Yesus wia sé pahtuzu'en-Na, “Pekirumezla séra tahsasana réwok, sé sana réwok ém woo limana pulu' tou.” 15Ang kiitala né pahtuzu'en-Na u méikua ni Yesus wia ni séra in ipekirumezla sé tou witu.

16Tumondong niitu, si Yesus méndomé u roti lima wo sé seza' zua. A Sia lumoho'ma witi langit, kumuama u makasé wia si Opo Empung. Am pemété-météngen-Nama a roti wo sé seza', iwéhé-Nama wia sé pahtuzu'en-Na in iwéténga wia sé tou lakez itii. 17Sé tou lakez itii péléng kiman makaz nimawesuh. Makaapuma séra, a réwokela né pahtuzu'en ni Yesus a nimateza, ung kalakezna é mapulu' wo zuana lo'lo'.

Si Petrus nimakaulit i si Yesus é si Mesias

(Mat. 16:13-19; Mrk. 8:27-29)

18Makasamé, i si Yesus uman in esa si mengaléi, a sé pahtuzu'en-Na méyé witu u rété-Na. A Sia meligau wia ni séra, “Sé tou lakez mahkua ni Aku é séi?” 19#Mat. 14:1-2; Mrk. 6:14-15; Luk. 9:7-8 A séra mingkotla, “Wéwéhan sé mahkua si Méster é si Yohanes Menanarani. Sé walina é mahkua si Méster é si nabi Elia. Wéwéhan kasii sé mahkua si Méster én esaané im wia sé nabi im puuna si nimatoumomé sumaup.” 20#Yoh. 6:68-69 A Sia meligau wia ni séra, “Sa kiit ni kamu, ni Aku é séi?” A mingkotla si Petrus, “Mesias si wia si Opo Empung a méyé.” 21A séra totoz séro'en-Nala in tia' mahkukua tumoro niitu wia si séi uman.

Si Yesus kimua i ni Sia é maté wo kura ing kumiit ni Sia

(Mat. 16:21-28; Mrk. 8:31–9:1)

22Tumondongé niitu, kuan ni Yesus, “Si Oki' ni Tou é léwo'zéi' i masaan an zézéha wo kasii kasoo né tu'a-tu'a né Yahudi, né tonaas né walian wo né tou tulap un Torat. Wo ni Sia ém wunu'en taan witu un endo katelu én itou sumaup im wia sé nimaté.” 23#Mat. 10:38; Luk. 14:27 Ipahkua-Na wia ni séra péléng, “Séi si paaz ing kumiit ni Aku, ni sia én zéi'mo mahkiit ang kapaazna. Sekez in endo é léwo'zéi' i masaan u salipna wo mahkiit ni Aku. 24#Mat. 10:39; Luk. 17:33; Yoh. 12:25 Pahpaan séi si mahkelung ung katou-touanna, ni sia éng kaliongan ung katou-touanna; taan séi si kinaliongan ung katou-touanna pahpaan ni Aku, ni sia é makailek ung katou-touan makaz ing kauré-uré. 25Apa un torona sa péléng am wia ung kaayahan én anuna, taan niitu é luméwo' un touna wo zéi'kan makailek ung katou-touan makaz ing kauré-uré? 26Pahpaan séi uman si maizang makaulit i mahkii-kiit ni Aku wo an ipahkua-Ku, si Oki' ni Tou kangkasii é maizang i makaulit i si tou itii é mahkii-kiit ni Aku wo an ipahtuzu'-Ku, i ni Sia méyé sumaup karia ung kawasa-Na wo ung kawasa ni Ama'-Na wo né malaekat lenas. 27Uli-ulit ikua-Kuma wia ni kamu, ‘Im wia ni kamu im wia'i, wéwéhan sé zéi'kampé' nimaté sa zéi'kampé' nimilek ung Kakolanoan ni Opo Empung.’ ”

Si Yesus mahsena'mé u sena' ni Opo Empung witi wawo ung kentur

(Mat. 17:1-8; Mrk. 9:2-8)

28 # 2Ptr. 1:17-18 Woo waluna endomo si Yesus ing kimuama niana, an ipahwali-Nama si Petrus, si Yohanes wo si Yakobus sumosoza mangé witi kentur i mamengaléi. 29Karegas si Yesus mengaléi im witu, ung gio-Na ém pahileken i nimawalinamoma wo ung kinarai-Na é nimakulo'moma meto-petot. 30Ang kumompo'mé ém wéwéhan sé zua tou mahsirita karia-Na. Sé zua itii é si Musa wo si Elia. 31Sé zua itii i nimapailek un tou néra é mahsena', u sena' ni Opo Empung. Ni séra é mahsirita tumoro un oras ni Yesus i maté, u mamuali witi Yerusalem.

32In toro niitu, si Petrus wo sé zua kakariana é nimatekel. I ni séra nimawongkémé, ileken nérama si Yesus é mahsena'ma u sena' ni Opo Empung wo sé zua rimendai witu u rété-Na. 33I sé tou zua itii mahtutula'umo si Yesus, si Petrus kumuama wia ni Sia, “Méster, totoz makapaazen ni kita im wia an tampa kenu. Ni kai é rumendai un terung telu. Un esa én iwéhé wia si Méster, un esa wia si Musa wo un esa wia si Elia.” Taan zéi'kan kata'uan ni Petrus u méikuanama. 34Karegas si Petrus i mahnuwu' an tumumpamé u ninahak a sumaputa ni séra taka-takazan sé pahtuzu'en ni Yesus zéi'mo mata'u milek ni séra. I sé pahtuzu'en-Na nimuntepa witu u ninahak, ni séra éng kinaindé'an. 35#2Ptr. 1:17-18; Yes. 42:1; Mat. 3:17, 12:18; Mrk. 1:11; Luk. 3:22 Im witu u ninahak talingan néramé u nuwu' mahkuamé, “Si kenumo si Oki'-Ku. Ni Sia ém pinéléng-Ku. Pahtalingala Sia!”

36I nimazéi'moma u nuwu' itii, ileken nérama im witu én akaz uman si Yesus. In toro niitu, sé telu pahtuzu'en ni Yesus é nimenes uman wo zéi'kan simirita wia sé tou a niilek néra itii.

Si Yesus nimoho si sétang simelaz wia si koki'

(Mat. 17:14-18; Mrk. 9:14-27)

37Masandomé, i si Yesus wo sé telu pahtuzu'en-Na nimerosomé im witi kentur, lakez sé tou niméyé wia ni Sia. 38Si esa im wia sé tou lakez itii é mahnuwu' totoz rimez wia si Yesus, kuana, “Méster, pahaléiengku satoro mailekempé' ndootuumé si oki'ku, ni sia uman si oki'ku! 39Sa mahkompo-kompo'mé si sétang sumelaza wia ni sia, si koki' itii é mahkérét wo mengesé-ngeséi akaz u sumahna é mahsewu. Si sétang itii én zéi'kan mazéi' i mahzézéha si koki' itii, wo si sétang itii én tawi soomo mondolé im wia si koki' itii. 40Pinahaléi'kumo wia sé pahtuzu'en ni Méster i moho si sétang itii, taan ni séra én zéi'kan nimakawawama.” 41Ang kuan ni Yesus, “É kamu in tou zéi'kan ma'éman wo méikalulu, makaz sawisa ni Aku i memali-mali karia niou wo mezen wia ni kamu?” Ang kuan ni Yesus wia si ama' itii, “Pahwalimé wia'i si oki'mu itii!” 42I si koki' itii rimétéma wia si Yesus, an iwasala ni sétang si koki' itii witu un tana' makaz un touna mengesé-ngeséiokan witu wawo un tana'. A rekakena ni Yesus si sétang itii a malé'osa si koki' itii. Tumondong niitu, an iwéhéla ni Yesus si koki' itii wia si ama'na. 43Péléng sé tou é mengusi-ngusingsing i nimilek ung kawangko'an ung kawasa ni Opo Empung.

Ing kazua si Yesus kimua ni Sia i maté

(Mat. 17:22-23; Mrk. 9:30-32)

Im péléng sé tou itii mengusi-ngusingsingpé' pahpaan nimilek am winanguna ni Yesus, kuan-Na wia sé pahtuzu'en-Na, 44“Talinga nioua wo totoz wéhanla genang un ikua-Kuma kenu, ‘Si Oki' ni Tou é maiayo witu ung kawasa né tou.’ ” 45Taan sé pahtuzu'en ni Yesus én zéi'kan makatulap ung kalakoan u méikua-Namé. Ung kalakoan u méikuamé ni Yesus é méikawunipé' im wia ni séra, niitumo zéi'kan katulapan néra ung kalakoana. Taan ni séra é maindé' i lumigau wia ni Sia.

Séi si totoz ipahpuu-puuna

(Mat. 18:1-5; Mrk. 9:33-37)

46 # Luk. 22:24 Makasamé, sé pahtuzu'en ni Yesus é mahéndo-éndoan tumoro séi si totoz ipahpuu-puuna im wia ni séra. 47Taan kata'uan ni Yesus um pegena-genangen néra. Niitumo, rawakenamé wo izeta'-Nala si koki' witu ung kasaru-Na, 48#Mat. 10:40; Luk. 10:16; Yoh. 13:20 ang kuan-Na wia sé pahtuzu'en-Na, “Séi uman si simungkul si koki' tanu si kenu pahpaan ma'éman wia ni Aku, ni sia é simungkul ni Aku. Wo séi uman si simungkul ni Aku, ni sia é simungkul si Opo Empung si nimatumé ni Aku. Séi si zéi'kan ipahréké-rékén im wia ni kamu, ni siamo si totoz ipahpuu-puuna.”

Si tou zéi'kan mahsaru ni kita, ni sia én touta

(Mrk. 9:38-40)

49Kuan ni Yohanes wia si Yesus, “Méster, niilek nai im wéwéhan si tou nimoho si sétang karia u ngaran ni Méster. Sinéro' nai si tou itii in tia' mahpaké u ngaran ni Méster, pahpaan ni sia én zéi'kan esaané im wia ni kita.” 50Taan si Yesus mingkotla, kuan-Na, “Tia' pahséro'en niou sia, pahpaan séi si zéi'kan mahsaru ni kamu, ni sia én tou niou.”

Sé tou witi Samaria soo sumungkul si Yesus

51Un oras ni Yesus im wénéten mangé witi kasendukan é lelezokan, a Sia tumotozla i mangé witi Yerusalem. 52Ni Sia nimatuma sé woopira tou i mahpuunama. Sé tou itii mangé an tumulima witu um wanua witi Samaria i mamimek péléng am pemandungen ni Yesus. 53Taan sé tou Samaria é soo sumungkul si Yesus, pahpaan ni Sia é mangé witi Yerusalem.#9:53 Um pahpengaléian né tou Samaria ém witi kentur Gerasim. Niitumo ni séra é soo sumungkul sé tou Yahudi sé lumangkoi witu um wanua néra sé mamengaléi witi Walé ni Opo Empung um witi Yerusalem. 54#2Raj. 1:9-16 Ing kinata'uanla né zua pahtuzu'en-Na, si Yakobus wo si Yohanes u nimamuali, a séra kumua wia si Yesus, “Tuang, apa kapaaz ni Tuang, ni kai i mahaléi un api witi kasendukan i luma'ung ni séra?” 55Taan si Yesus merena wia ni séra, a séra séro'en-Nala. 56A séra mangé witi wanua walina.

Kura ing kumiit si Yesus

(Mat. 8:19-22)

57Karegas si Yesus wo sé pahtuzu'en-Na mahlampang, wéwéhan si tou kumuala wia si Yesus, “Ni aku éng kumiit ni Ko, wisa uman un angéan-Nu.” 58Ang kuan ni Yesus wia ni sia, “Sé longkoi ém wéwéhan an tuleng néra, sé tumétéwél ém wéwéhan a salah néra. Taan si Oki' ni Tou én zéi'kan siapa un toro rewaan-Na.” 59Ang kuan ni Yesus wia si walina, “Kumiitomé ni Aku!” Taan si tou itii nimingkoté, “Tuang, énéané ni aku i mangépé' lumewengé si ama'ku.” 60Ang kuan ni Yesus wia ni sia, “Iwayamola sé tou nimatémo i malumewengla sé nimatémo.#9:60 Ung kalakoan ‘sé tou nimatémo’ é ‘sé tou zéi'kan ma'éman’. Taan ni ko, mangémo wo maiwoka'la tumoro ung Kakolanoan ni Opo Empung.” 61#1Raj. 19:20 Am wéwéhan kasii si tou mahkua, “Ni aku ém paaz kumiit ni Ko, Tuang, taan sa toro ni aku é mangépé' tumuzu'mé wia sé katuariku witi walé.” 62Taan kuan ni Yesus wia ni sia, “Si tou taré majéko én totoz mahileka witi muka zéi'kan toro mahléngéma witi muri. Téntu kangkasii sé tou paaz maéndo tou witi Kakolanoan ni Opo Empung én zéi'kan toro megena-genangpé' a nimamualimoma.”

Currently Selected:

Lukas 9: LAITOM

Highlight

Copy