Markus 3

Si tou liné'os ni Yesus witu un endo Sabat

(Mat. 12:9-14; Luk. 6:6-11)

1A si Yesus mangé sumaup witi walé peraragésan né tou Yahudi. Im witu ém wéwéhan si tou, u lengenna kasaru é lailai. 2Im witu kangkasii ém wéwéhan sé woopira tou sé menéro-néro uman ung kasumalaan ni Yesus. Ni séra é mengile-ngilek ni Sia sa lumé'os si tou itii im witu un endo Sabat, wo Sia toro ipapahsasala' néra. 3A si Yesus kumuama wia si tou u lengenna kasaru é lailai itii, “Méyémo, rumendaié witu un unez.”

4A Sia kumuala wia sé tou witu, “Wisa un toro wangunen witu un endo Sabat? Mangun u lé'os kaapa u léwo'? Tumulung si tou wo menou-nou kaapa munu' si tou?” Taan ni séra é memene-menes uman.

5Un até-Na én totoz rumara pahpaan ung kaketéhan un até néra. Karia i maupi' ni Sia mahwerenna wia sé tou makaliklik-Na. Ang kuan-Na wia si tou itii, “Iayaté u lengenmu.” An iayatla ni tou itii u lengenna a malé'osa. 6Sé tou im wia sé sana réwok tou Farisi mondolé im witu, a séra rengan i mahesaala karia né mahkii-kiit si kolano Herodes i mahwuwunu' si Yesus.

Sé tou lakez liné'os ni Yesus

7A si Yesus wo sé pahtuzu'en-Na tumula'umé un tampa itii nimangé witi louz Galilea. Lakez sé tou witi Galilea a méyé mahkiité ni Sia, wéwéhan kasii sé witi Yudea a méyé, 8sé witi Yerusalem, sé witi Idumea, sé witi lewet u so'so'an Yordan, sé witi Tirus wo Sidon a méyé. Ni séra péléng é niméyé wia si Yesus, pahpaan ni séra én timalingamoma péléng am winangun-Na. 9#Mrk. 4:1; Luk. 5:1-3 Pahpaan sé tou én totoz lakez, a Sia matuma sé pahtuzu'en-Na i mamimek u londéi sakéan-Na, wo sé tou zéi'kan mahsésé'sé'an karia-Na. 10Pahpaan lakezo sé tou liné'os-Na, niitumo péléng sé tou saki é mahsésé'sé'an i mahtition wia ni Sia. 11Sekez sé tou sinelazan né sétang mileka si Yesus, ni séra é mongkot makaz witu un tana' witu u sinaru-Na wo mahkérét, “Ni Komo si Oki' ni Opo Empung!”

12Taan ni séra én totoz sinéro'-Nala in tia' ipahkua wia sé tou walina sa séi Sia.

Si Yesus in timotoz sé mapulu' wo zua aatu-Na

(Mat. 10:1-4; Luk. 6:12-16)

13Kumawusa niitu, a si Yesus sumosoza witu ung kimeleng. Tawahen-Namé sé tou pinéléng-Na a séra méyé wia ni Sia. 14A Sia tumotozla sé mapulu' wo zua tou, sé pahkuan kangkasii in aatu-Na i mahwali-wali karia-Na, wo maiatu-Na i mahwoka' u Nuwu' Lé'os ni Opo Empung 15wo kangkasii winéhan-Na kawasa i mahwoho sé sétang.

16Sé mapulu' wo zua tou tinotoz-Na itii é: Si Simon (si nginaranan-Na im Petrus), 17si Yakobus oki' ni Zebedeus wo si katuarina Yohanes. Ni séra zua é nginaranan-Na im Boanerges ung kalakoana én ‘oki' un erut’,#3:17 Nginaranan ‘oki' un erut’ pahpaan ni séra éng ketéh. 18si Andreas, si Filipus, si Bartolomeus, si Matius, si Tomas, si Yakobus oki' ni Alfeus, si Tadeus, si Simon si wia sé sana réwok tou Zelot sé mahsaru sé tou Roma, 19wo si Yudas Iskariot si nimangkér si Yesus.

Si Yesus wo si Beelzebul

(Mat. 12:22-32; Luk. 11:14-23, 12:10)

20Tumondong niitu, si Yesus muntepa witu um walé. Lakez kasii sé tou nimaréwoké, taka-takaz ni Sia wo sé pahtuzu'en-Na én zéi'mo siapa orasna ing kuman. 21Ing kinatalingaana né katuari-Na i ni Sia ém witu, ni séra méyé i mahééyéma ni Sia, pahpaan pahkuan néra i ni Sia ém walinamo.

22 # Mat. 9:34, 10:25 Sé tou tulap un Torat sé witi Yerusalem a méyé é mahkua, “Ni Sia é sinelazan ni Beelzebul! Karia ung kawasa ni tonaas né sétang ni Sia mahwoho sé sétang.”

23Si Yesus tumawahma ni séra, a numuwu'ma wia ni séra karia un aandéan, “Kura kahuman si tonaas né sétang toro moho si sétang? 24Sa sé tou witi kakolanoan esa é makahkoro', ni séra é makayo', 25wo sa sé sana walé é makahkoro', ni séra é makayo'. 26Téntu kangkasii sa sé sétang mahsaru sé kasétang néra wo sa séra nimahtatampasano, tantu ung kakolanoan né sétang itii én zéi'kan mauré-uré taan lamo mazéi'.

27Taan zéi'kan siapa si tou toro muntep witu um walé ni tou ketezen i makumahat a sangkumna sa sia zéi'kampé' niapusnala. Sa sia niapusnamola taré sia toro kumahat am witu um walé itii.

28Uli-ulit ikua-Kuma wia ni kamu: Péléng a singkéla' wo a séséro'an winangunla ni tou én toropé' ampungan. 29#Luk. 12:10 Taan séi uman si mahséro' wia si Roh Lenas, si tou itii én zéi'kan ampungan makaz ing kauré-uré, taan simala'mola pahpaan nimangunola u singkéla' makaz ing kauré-uré.” 30Si Yesus mahkua in téntu, pahpaan ni Sia ém pahkuan néra i sinelazan ni roh léwo'.

Si Yesus wo sé katuari-Na

(Mat. 12:46-50; Luk. 8:19-21)

31A méyé si ina' wo sé katuari ni Yesus witi walé pahtuzu'an-Na. Karegas séra i rimendai witu rété um pepenet, ni séra matuma tou i matumawah ni Sia. 32Im witu én totoz lakez sé tou rimumez limiklik si Yesus, a séra kumuala wia ni Sia, “Ilekena, si ina' wo sé katuari-Mu ém witi lésaz. Ni séra é mahtututu' i mahilekan karia-Mu.”

33A si Yesus mingkotla wia ni séra, “Séi wé si ina'-Ku wo séi wé sé katuari-Ku?”

34Werenan-Nama péléng sé tou rimumez limiklik ni Sia ang kuan-Na, “Ni kamu kenumo sé ina' wo sé katuari-Ku! 35Séi uman si mahwangun ung kapaaz ni Opo Empung, ni séramo sé katuari-Ku tuama, katuari-Ku wéwéné wo ina'-Ku.”

Currently Selected:

Markus 3: LAITOM

Highlight

Copy